Tau anu mepotuu si Kerisitu sangangaa rapatudu bona malompe babeiara
3
1 Nupopaingaka sira topepotuu si Kerisitu anu ria i se etu, bona mengkoru sira i topoparenta ai i totomana boea. Sangangaa mampeulai sira parenta nu topoparenta, ai timama liliu sira mamponggaleka ope-ope bago anu malompe. 2 Inee sira mombekaisii lolita, inee sira mombesonoi. Aginamo rapakaalusura babeiara, ai mengkaiwoi liliu sira i ope-ope tau.3 Lawi ni banimpia madoio mpuu kita, baria tainsani dala anu manoto lau si Pue Ala, baria tapopolumako AturaNa. Mampeulai ngkida kita peundea nu rarata anu madaa, ai katono dunia anu mepakanawu. Madaa rarata, masina kita i rangata, ai mombekasisi ngkida kita. 4 Agaiana nauda awetu kadaana babeiata, i Pue Ala mia-mia mampokakaia kita ai Napopeitakamo kita kalompe nu raraNa, i ka Nasoremata lako i suku dosata. 5 Nasorema kita lako i suku nu dosata, baria nakeni nu babeiata anu malompe, agaiana nakeningkamaasiNa si kita. Nasorema kita mampoliungi InosaNa, anu mokiraka kita katuwu anu mabou i rara mpobakosiNa dosata. 6 I Yesu Kerisitu mamate mosuru dosata, anu mewali Datu Topesoremata. Etumo mpane i Pue Ala mokiraka kita Inosa Magali anu mokale i rarata. 7 Tunggaia ni Pue Ala mobabei awetu si kita, bona lako i kabula nu raraNa, Naimbamo kita tau anu manoto, bona mansumba kita katuwu malompe anu baria mokasopoa, ewa etu dandiNa i ope-ope tau anu Napoana. 8 Monso mpuu anu kupololitamo.
Etumo mpane, kuperade bona nupakaroso patudu ei i ope-ope tau anu mepotuu sira si Pue Ala, bona mobabei liliu sira apa anu malompe. Patudu ei iamo patudu anu malompe, ai anu mobundu i manusia.
Inee kita mampogaloka tau anu raundera mosisala
9 Agaiana ria mbui sira tau anu mombesese ai mampombesonoingi atura agama nu toYahudi, ba lolitaka nu pemuleara, nupalengi ngkimo sira i pombesonoira anu baria mobundu etu. 10 Tau anu moparia pogaa-gaa i rara jumaa, nuombo sira sambela ba rombela. Ane baria rapetingaira, ineemo sira nupogaloka. 11 Lawi nuinsani mpuu: tau anu ewa etu, raoakara mensopi lako i patudu anu mamonso. Nakeningkamadosara anu raoakara etu, mosuku mpuumo sira wotora saduduara.
Pamperadeku anu kasopoana
12 Awetu i Artemas ba i Tikikus anu kutudu dongka luwu si i iko, kasaliu mai iko mampomberumpaka aku i boea Nikopolis, lawi tunggaiaku meari liliu aku i se etu, i tempo malengi. 13 Nupari-pari motulungi i Senas guru Atura ni Musa etu ai i Apolo i rara mpolumakora, bona ntena ria kamakurara. 14 Pokata sampepepotuuta sangangaa mampopolumako liliu sira bago anu malompe, bona mansumba sira apa anu raparaluura i eo-eona,a ai bona mobundu katuwura.
15 Maisi tabea lako i ope-ope rangaku sira. Nupadongka tabeaki i pokata sampepepotuuta i Kreta. I Pue mowati komi ope-ope.