Markaw 16

Yesu nĩĩm'n cɔ̃mmã

(Mãtiyew 28.1-8 ; Lukaw 24.1-12 ; Yuhanãw 20.1-10)

Bà fiisaa'n yuugɩ̀ gáa ta gùú nã, Magɩdala lǝ'n Mariyamw, bá nǝ̃ Salomew nǝ̃ Yakuba bà ɲũ Mariyamw, bá kãã sǝ̃ǝ̃ latɩkolow mãã bà ga hurǝǝ pĩɛ̃ndɩ nã nǝ̃-yǝ, ǹ-jo.

2 Fiisaa'n yuu'n taakaalgu, bǝ̃ǝ̃'n hãnãm'n bǝ̃ǝ̃gu, ciibǝǝgu, bá suro ǹ-ba bà maar pĩɛ̃ndiitãnfierɩ nã.

3 Bà yáá bà yugu bà ɲĩɛ̃ bà maar wà: «Halii ga bin ǹ-cugur pĩɛ̃ndiitãnfer'n tɩntãndi ǹ-hã-yáà yí ta?»

4 Bà gáa haar bà yunɲã ǹ-ne, bá ne ǹ-da vatãndìi bin ǹ-cugur ǹ-hal pĩɛ̃ndiitãnfer'n nũɔ̃gɩ nã ǹ-tã, nã̀ã da vatãn díɛ̀dɩ̀ yáá dìi bũũ ǹ-car.

5 Bá jãn pĩɛ̃ndiitãnfierɩ nã, bá da biɛmpɩrdiɛ wùu jiraa nãdĩĩyiɛgu, nã̀ã ba ya dii kuulaadiiyǝpɩpuɔlayǝw wuupɩpla wù nã, gbǝrsǝrɩ́ blǝ-ba.

6 Wú waa nǝ̃-ba wà: «Bláá ya gbǝrsǝrɩ́ blǝ-ɲã́ã̀.

Ɲi caa Nasarɛtɩ lǝntaa'n Yesuw-i?

Wùú mãã bà gbǝ́ǝ́-yǝ daagɩ nã ǹ-ko-yǝ, wù sɩriɛ nhlíɛ̀ nã, wù nĩ́ĩlã́, níyà bà yáá bàa dii-yǝ sùɔ́ gúɔ̀ nã-i.

7 Nǝ̃ kã́ã̀ ɲi ga waa nǝ̃ wù duunãtaaba nǝ̃ Piɛrw wà wu tíɛ́ ɲì yiga nã Galile yiɛgu: Ɲi ga da-yǝ gùú sùɔ́gɩ-i nã́ã́ wù yáá wùu waa-dǝ nĩĩgu mãã.»

8 Canããbá fǝ̃ǝ̃ ǹ-hlǝ pĩɛ̃ndiitãnfierɩ nã ǹ-sɔ̃ ǹ-kwar.

Dɩ̀ yáá dìi tugulǝǝ bà nã, nǝ̃ bà min bá ba bà ɲãnãã.

Gbǝrsǝrɩ̀ mãã dɩ̀ yáá dìi blǝ-ba, bà sáa waa cɔ̃m nǝ̃ curo.

Yesuẁ pɩgaa wù hla wù ja Magɩdala lǝ'n Mariyamw

(Mãtiyew 28.9-10 ; Yuhanãw 20.11-18)

9 [Yahudyaba saajaluu'n yudĩɛ̃lãgǝ'n ciibǝǝgu, Yesuẁ gáa nĩĩ, wù dĩ́ɛ̃lã́ ǹ-pɩgaa wù hla ǹ-ja Magɩdala lǝ'n Mariyam wɩ̀-i.

Tãntɔ̃nãã nɩrhǝ̃ǝ̃lw yáá wùú nã-i nǝ̃ Yesuẃ ɲǝ̃ǝ̃ ǹ-hiil-ba wù nã.

10 Bàá mãã bà yáá nǝ̃ Yesuw, bà yigasǝrɩ̀ yáá dìi huu, nǝ̃ bá ba kaaluugɩ nã, Mariyamẃ fǝ̃ǝ̃ ǹ-ta ǹ-kãã taa-dǝ ǹ-ja-ba.

11 Bà-lǝ bà gáa nɔ̃ wà wu nǝ̃ nũmǝ̃nã, nǝ̃ Mariyam yo, wu díɛ́-yǝ, bà sáa hũɔ̃-dǝ.

Yesuẁ pɩgaa wù hla wù ja duunãtaaba hǝ̃ǝ̃ldaba

(Mãtiyew 28.16-20 ; Lukaw 24.13-49 ; Yuhanãw 20.19-23)

12 Dɩ̀-lǝ dɩ̀ furũũgɩ nã, Yesuẃ cin ǹ-pɩgaa wù hla ǹ-ja wù duunãtaaba hǝ̃ǝ̃ldaba tamdamã nã, bà yáá bà maar jierɩ nã.

13 Bàá yo, bá juo taa-dǝ ǹ-ja bà dɩgaliɛw, nǝ̃ bà sáa hũɔ̃ dìí yo.

Yesuẁ hillaa wù duunãtaaba nã

14 Gɩ̀ furũũgɩ nã, ǹ-ya wù duunãtaa nũɔ̃sɔ̃ nǝ̃ wù dɩnẃ ba juwuukaagɩ nã, Yesuẃ kãã pɩgaa wù hla ǹ-ja-ba.

Wú wanãã bà nã, wà ba sǝ bàa hũɔ̃ wù cɔ̃mmã, wà bà yugbǝ̃ǝ̃gǝguu cíé, bàá nǝ̃n díɛ́-yǝ wù nĩĩm'n furũũgɩ nã, ba sáa hũɔ̃ bà cãwandi.

15 Nã̀ã fǝ̃ǝ̃ ǹ-waa nǝ̃-ba wà: «Máarà cuu liɛga min nã, ɲi ga ba ɲì waa Dũnnũ cɔ̃ndudwalɩm'n cɔ̃mmã ɲi ja cuu cwaaba min.

16 Bàá nǝ̃n hũɔ̃ wù cɔ̃mmã nã̀ã ce bá ɲĩɛ̃-ba, Dũnnũẁ ga kor-ba.

Nǝ̃ bàá nǝ̃n ba bà sáa hũɔ̃, Dũnnũẁ ga hã-ba nǝ̃ yuɔrɔmmã wù sugojaryuugu.

17 Dìí mãã dɩ̀ ga ce ǹ-ba dɩ̀ pɩgaa cwaaba nǝ̃ bàá nǝ̃n hṹɔ̃lã́ wù cɔ̃mmã gɩ̀-i nnĩĩ: bà ga ba bà gbǝ̃ǝ̃ bà ɲǝ̃ǝ̃ bà hiil tãntɔ̃nããba tãntɔ̃nããntaaba nã mǝ̃̀ yiirɩ nã.

Bà ji ba bà waa tammãã mãã cuu cwaabà sáa hi waa-mã ǹ-da.

18 Bà ji ba bà blǝ waalaaba nǝ̃ bà nãkrɔnɲã, bà ji ba ba-ń ce bá ɲũɔ̃ tãmmã, nǝ̃ cɔ̃m'n síì hi-ba.

Bà ji ba bà piɛ bà nãkrɔnɲã hlɔnããba nã bà buɔ-ba.»

Yesuẁ yuguraa wù maar drɔgu

(Lukaw 24.50-53 ; Gaaciega 1.9-11)

19 Yitii Yesuẁ gáa wanãã nǝ̃ ba ǹ-tã, Dũnnũẃ ce wú yuguraa ǹ-ta drɔgu, ǹ-kãã jiraa wù nãdĩĩyiɛgu.

20 Nǝ̃ duunãtaa-lǝ, bá ta ǹ-kãã ba bà waa Dũnnũ cãwandi bà ja cwaaba yanɲã min nã.

Yitii-lǝ wùú yáá wù ce mããcemmãã nǝ̃-ba, bá ba bà gbǝ̃ǝ̃ bà ce cɔ̃m bà pɩgaa cwaaba, wà bà cãwanĩɛ̃ga sulam-i.]