Sonasɩw (Jonas) 3

Fɩraa-Dũnnũ cãwandɩ́ hi Sonasɩw yin hǝ̃ǝ̃lnãw wà:

2 «Suro! Maar Ninive lǝri, lǝgǝ̃ngããrɩ nã. Ga waa gùú tĩɛ̃ri mãã mǝ̃̀ hã-n nǝ̃-dǝ dɩ̀ cɔ̃mmã nǝ̃ gɩ̀ lǝntaaba.»

3 Sonasɩẃ fǝ̃ǝ̃ ǹ-suro ǹ-ta Ninive lǝri, ǹ-vaa nǝ̃ Fɩraa-Dũnnũ cãwandi. Nǝ̃ Ninive lǝrɩ̀ yáá lǝgǝ̃ngãr-i: nǝ̃-ń wa ń finǝ̃ǝ̃ ǹ-cal dɩ̀ nã fuwɔ ń ce bãnɲã siɛl waali.

4 Sonasɩẃ fǝ̃ǝ̃ ǹ-jãn lǝ'n kusuugɩ nã, ǹ-ce yuukukuugu waalɩ nã wù waa wà: «Bãn gwaahǝ̃ǝ̃l kusuugɩ nã, Ninive lǝrɩ̀ ji guu nã!»

5 Ninive lǝntaabá cu Dũnnũ cãwandɩ nã. Bá wa ba ji dii sũũw. Curo wo curo, wú fǝ̃ǝ̃ ǹ-dii bɩgatĩɛ̃ kuulanãmba, ǹ-tuu cogǝ̃ngĩɛ̃ba nã, ǹ-ga kra baasaalaaba nã. Bà cíé dɩ̀-lǝ ǹ-pɩgaa wà bá nǝ̃nǝ̃ǝ̃ nã̀ã tuu ǹ-tu.

6 Ninive lǝ'n yuuntigǝ̃ngãẃ juo nɔ̃ cɔ̃m mã́ã̀. Wú suro wù yuuntasǝ'n guujirakuugɩ nã, ǹ-fa ǹ-hiil wù yuuntasǝ'n kuulaadiiyǝw, nã̀ã dii bɩgatĩɛ̃ yow ǹ-kãã jiraa cuugu drɔ.

7 Yuuntigǝ̃ngãw nã̀ã ce bá waa lǝ'n kusuugɩ nã wà: «Yuuntigǝ̃ngãw nǝ̃ wù cogǝ̃ngĩɛ̃ba wà curo yindagǝ nã kwasǝnkuu, ninɲã, tũmba, curo'n báa dǝ̃ǝ̃ kuu, curo'n báa wuu kuu yindagǝ nã ǹ-ɲũɔ̃ hũm!

8 Cwaanbiiba nǝ̃ kwasǝnɲinɲã, bá dii bɩgatĩɛ̃ kuulanãmba, nǝ̃ bá ba bà be Dũnnũw huhorɩmmã nã, nǝ̃ bá nǝ̃nǝ̃ǝ̃ bà gaabɩbliɛga nã, nǝ̃ hyadũgaaciegaa mãã bà nãkrɔnɲã drɔ.

9 Gɩ̀-lǝ gɩ̀ nã, yindagǝ nã, Dũnnũẁ yáá wù blǝ dìi, wù yáá wù ji ya dɩ́ ba, wù yáá wù ji nǝ̃nǝ̃ǝ̃ wù hyadũkɩnkandɩ nã, wù sáá wù ji ce yí kurǝǝ.»

10 Dũnnũẁ díɛ́ Ninive lǝntaabà yáá bà ce gàá mãã, wú da wà ba yáá bàa nǝ̃nǝ̃ǝ̃ bà gaabɩbliɛga nã. Gɩ̀-i, Dũnnũẁ yáá wù wanãã wà wu ji ce-ba nǝ̃ dìí mãã, wú ver ǹ-ya dɩ́ ba.