Sonasɩw (Jonas) 2

Fɩraa-Dũnnũẃ fǝ̃ǝ̃ ǹ-tĩɛ̃ tɩtokɩnkandaarɩ́ juo hĩĩ Sonasɩw. Sonasɩẃ ce bãnɲã siɛl nǝ̃ yisɔsǝrɩ siɛl tɩtro wáà kusuugɩ nã.

2 Gɩ̀ sùɔ́gɩ nã, Sonasɩẃ fǝ̃ǝ̃ ǹ-cirǝ̃ǝ̃ Fɩraa-Dũnnũw nã, wù Dũnnũw, wà:

3 «Mǝ̃̀ mããywarɩmã nã, mǝ̃̀ bíé-n, Fɩraa-Dũnnũ, ń siɛ-m; ǹ-ya mǝ̃́ ba kúú'n kusuugɩ nã, mǝ̃̀ bíé-n wà ń jo ń pɛ mǝ̃̀ nã, ń nɔ̃ mǝ̃̀ yallɩ nã.

4 Ǹ nǝ̃́ǝ̃lã́ ǹ-dii-m funulǝǝdagǝ nã lwaakɩnkan'n sǝ̃ǝ̃gɩ nã, nǝ̃ hũmmã́ caliɛ mǝ̃̀ nã. Ǹ yáá ǹ ce hũmmã min mãã mã̀ yáá mã̀ suro mã̀ mũũ, mã́ ba mã̀ jo mǝ̃̀ drɔ.

5 Mǝ̃̀ yáá mã̀ã maa ǹ-ba mǝ̃̀ waa wà: “Ǹ ɲǝ̃́ǝ̃lã́ mǝ̃́ hal ǹ yinɲã nã, nã̀ã da mǝ̃̀ caa mǝ̃́ ver ǹ-da ǹ bũũm'n suɔgu mãã yiyalɩmmã nã.”

6 «Hũmmã̀ yáá mã̀ã ga juo ba mã̀ blǝ mǝ̃̀ bũɔ̃gu. Blɩ'n hũmmã́ caliɛ mǝ̃̀ nã. Hũm'n hyãbiigá ba gà finǝ̃ǝ̃ mǝ̃̀ yuugu drɔ.

7 Mǝ̃́ fǝ̃ǝ̃ ǹ-hɩr tãnũnɲã taara. Mǝ̃́ juo ba cugutaa'n cuuw nã, flaga min gàa gbǝ ǹ-suu mǝ̃̀ nã mǝ̃́ ba dàa fɩraa. Nǝ̃ yíǹ-lǝ, Fɩraa-Dũnnũ, yíi mãã mǝ̃̀ Dũnnũw, ǹ cíé mǝ̃́ ver ǹ yuguraa ǹ-hlǝ nũmǝ̃nãw kúú'n fuu gúɔ̀ nã.

8 «Gùú nã mãã mǝ̃̀ yuflǝw yáá wù hlǝ, mǝ̃̀ yáá mǝ̃̀ kãn ǹ cɔ̃mmã, Fɩraa-Dũnnũ, nǝ̃ mǝ̃̀ cirǝ̃mmã́ yuguraa ǹ-kã ǹ nãã ǹ bũũm'n duugɩ nã mãã yiyalɩmmã nã.

9 Bàá mãã bà bũũ mǝ̃ǝ̃lǝ̃ǝ̃kiiba, yudwalblɩrɩ dɩn yo dɩ̀ sǝ bà saa, bá ba bà ga da korɩmmã.

10 Nǝ̃ mǝ̃n-lǝ, mǝ̃̀ ji ba mǝ̃̀ bɩnǝ̃ǝ̃ ǹ nã, mǝ̃̀ ji jãn siimã ǹ-hã-n. Mǝ̃̀ plã mǝ̃̀ nũɔ̃gu cɔ̃m wo cɔ̃m nã mãã, mǝ̃̀ ji hiraa mã̀ nã. Sulammã nã, yíǹ-lǝ yíi kórrà cwaaba, Fɩraa-Dũnnũ.»

11 Gɩ̀-i, Fɩraa-Dũnnũẃ fǝ̃ǝ̃ ǹ-kra dɩ̀ nã ǹ-hã tɩtro wáà wà: «Huusa ń hiil Sonasɩw ń kra wù nã ɲũũrũũgu!» Tɩtroẃ paa ǹ-nɔ̃ ǹ-hã-yǝ gbɩla.