Sonasɩw (Jonas) 1

Sonasɩ sɛbɛw

Yuudagǝ, Fɩraa-Dũnnũ cãwandɩ́ juo hi Amitayi bíɛ́ Sonasɩw wà:

2 «Suro, maar Ninive lǝri, lǝgǝ̃ngããrɩ nã. Ga wanãã gɩ̀ lǝntaaba nã, nã̀ã wa bà gaaciebɩbliɛgà yúguráa ǹ-ji hi-m.»

3 Nǝ̃ Sonasɩẃ hla nã̀ã suro ǹ-tuu hlũũgu, ǹ-ba wù kwar wù maar Tarsisɩ lǝri, ǹ-hal Fɩraa-Dũnnũw nã. Wú kãã hi Jafa lǝri, ǹ-kãã da batodiɛ wù jo wù ji suro wù maar Tarsisɩ lǝri. Wú pã wù jãnɩm'n solli nã̀ã jãn batow kusunã, bá ta nǝ̃ batomããcieraaba, bà maar Tarsisɩ lǝri, ǹ-hal Fɩraa-Dũnnũw nã.

4 Fɩraa-Dũnnũẃ juo ce salukɩnkandaarɩ́ suro lwaakɩnkandi drɔ, salkaar wáà juo bũũ ǹ-ji maa gɩ̀ suɔgu fuwɔ batoẃ ba wù caa wú karaa.

5 Gbǝrsǝrɩ́ mǝ̃gaa ǹ-blǝ batomããcieraaba, curo wo curoẃ ba wù kaasǝ wù be wù dũnnũ. Bá nǝ̃ǝ̃ ǹ-dii wariɛga min mãã gà yáá bato kusuugɩ nã lwaakɩnkandɩ nã, wú da ǹ-dɩganãã. Nǝ̃ Sonasɩ-lǝ wú ba wù yáá wùu hɩr ǹ-kãã mǝ̃rǝ̃ǝ̃ bato taara kusuugɩ nã, ǹ-ba wù duɔsǝ wù hiɛ nã.

6 Batosũɔ̃rẃ kuganãã wù nã ǹ-waa nǝ̃-yǝ wà: «Ih! Yin duɔsǝ duɔsǝ-iì? Suro ń be ǹ dũnnũw! Gɩnhyãl, wù ji kãn yì cɔ̃mmã, yi síì kurǝǝ.»

7 Batomããcieraabá fǝ̃ǝ̃ ǹ-waa nǝ̃ bà ɲĩɛ̃ wà: «Yi-ń wa yi ji fǝ̃ǝ̃ gùú tiiw mãã yublacurow yì sǝ̃ǝ̃nã, yáà yí dii trãga yí fǝ̃ǝ̃ bɩmblǝw.» Bá fǝ̃ǝ̃ ǹ-dii trãga, gá blǝ Sonasɩw.

8 Gɩ̀-i, batomããcieraabá fǝ̃ǝ̃ ǹ-waa nǝ̃-yǝ wà: «Yíi júó nǝ̃ blasǝ díɛ̀. Waa yí nɔ̃: Ǹ ce bii nhlíɛ̀ nã? Ǹ hlǝ́rá haa-i? Yiɛ hagu curo-i nǝ̃-n? Coplǝrɩ hadɩ-i nǝ̃-n?»

9 Sonasɩẃ siɛ-ba wà: «Hebru tabiɛ-i nǝ̃-m, mǝ̃̀ bũũ Fɩraa-Dũnnũ-i, Dũnnũw mãã drɔkuɔlɩ nã, wùú nǝ̃n nǝ̃́ǝ̃lã́ lwaakɩnkandi nǝ̃ ɲũũrũũgu.»

10 Nã̀ã fǝ̃ǝ̃ ǹ-tuu ǹ-taa wù cɔ̃mmã ǹ-ja-ba. Bà gáa fǝ̃ǝ̃ wà Sonasɩw kwar wù hal Fɩraa-Dũnnũ nã-i, gbǝrsǝrɩ́ mǝ̃gaa ǹ-blǝ-ba, bá yugu-yǝ wà: «Bii cíé ń ce díɛ̀?

11 Yi saa yí ce-n danii nǝ̃ lwaakɩnkandɩ́ blanãã nǝ̃-yáà?» Sulammã nã, lwaakɩnkandɩ̀ yáá dɩ̀ mũũ, dɩ̀ piɛ kuu-i, dɩ̀ maar.

12 Wú siɛ-ba wà: «Blǝ́rà-m, ɲí nǝ̃ǝ̃ ɲí dii-m lwaakɩnkandɩ nã, gɩ̀-lǝ gɩ̀ nã, lwaakɩnkandɩ̀ ji blanãã nǝ̃-ɲã́ã̀, nã̀ã wa mǝ̃̀ fǝ̃́ǝ̃lã́ wà mã́ã cɔ̃m nã-i, salkaar wáà suro.»

13 Batomããcieraabá du nã ǹ-ba bà sɔ̃ batow, bà kã bɩmblaagɩ nã, nǝ̃ bà sáa ga hi, nã̀ã wa lwaakɩnkandɩ̀ yáá dàa dɩ̀ mũũ nǝ̃ fãngããgu bà yuunã yugo yugo.

14 Bá fǝ̃ǝ̃ ǹ-cirǝ̃ǝ̃ Fɩraa-Dũnnũw nã ǹ-waa wà: «Fɩraa-Dũnnũ, báa ce yí kurǝǝ biɛ wáà cɔ̃mmã nã! Nǝ̃ báa ya curow mãã wù sáa yuɔruɔ nǝ̃ cɔ̃m, wù kúúgɩ́ ba hãmĩĩ yuunã tuul. Nã̀ã wa yíi Fɩraa-Dũnnũ, yíi cíé ǹ kusunã cɔ̃mmã.»

15 Nã̀ã fǝ̃ǝ̃ ǹ-blǝ Sonasɩw ǹ-nǝ̃ǝ̃ ǹ-dii-yǝ lwaakɩnkandɩ nã. Lwaakɩnkandɩ́ fǝ̃ǝ̃ ǹ-jiraa sɔ̃mm.

16 Fɩraa-Dũnnũ gbǝrsǝrɩ́ mǝ̃gaa ǹ-blǝ bluu báà. Bá fǝ̃ǝ̃ ǹ-jãn siimdamã ǹ-hã Fɩraa-Dũnnũw, nã̀ã pã bà nɔ̃nɲã ǹ-hã-yǝ.