Sonasɩw (Jonas) 4

Gɩ̀-lǝ gɩ̀ sáa dwal Sonasɩw nã gbal gbal yo, wù hiɛgá juo mǝ̃gaa ǹ-dũ.

2 Wú fǝ̃ǝ̃ ǹ-cirǝ̃ǝ̃ Fɩraa-Dũnnũw nã wà: «Eh! Fɩraa-Dũnnũ, mǝ̃̀ yáá mǝ̃̀ yiɛgu gùú nã mãã, mǝ̃̀ yáá mã̀ã fǝ̃ǝ̃ dɩ́ kaalaa. Gùú cíé mǝ̃́ kwar ǹ-ta Tarsisɩ lǝri mǝ̃̀ gbɩraanã. Mǝ̃̀ yáá mǝ̃̀ fǝ̃ǝ̃ wà cwaa'n cɔ̃mmã́ dwal ǹ nã ǹ-car, ǹ hujãn'n sɔ̃llɩ sǝ nǝ̃ kǝr; ǹ sɩrĩɛ̃ hyadũũgɩ nã, nǝ̃ ǹ kusufɩnfaagɩ̀ sǝ nǝ̃ kǝr, nã̀ã ba ǹ ne wà n nã́ã̀ ba, n báa nãlĩɛ̃ bà nã.

3 Yindiɛ Fɩraa-Dũnnũ, hũɔ̃ mǝ̃̀ yuflǝw, nã̀ã wa mǝ̃̀ kúúguu búɔlà mǝ̃̀ nũmǝ̃nãsǝrɩ nã.»

4 Fɩraa-Dũnnũẃ fǝ̃ǝ̃ ǹ-yugu-yǝ wà: «Nã́ã́ nǝ̃-ń ya ǹ hiɛgá dũ, dɩ́ dwal dwal-n-ì?»

5 Sonasɩẃ fǝ̃ǝ̃ ǹ-hlǝ lǝ'n kusuugɩ nã, ǹ-kãã ba Ninive lǝ'n bǝ̃ǝ̃'n pal'n yiɛgu. Gɩ̀ sùɔ́gɩ nã, wú kãã ce huɔgǝdagǝ ǹ-ba dàa gɩ̀ husumũũgɩ nã, ǹ-ba wù fennãã dìí mãã dɩ̀ ji ce lǝ'n kusuugɩ nã.

6 Fɩraa-Dũnnũẃ fǝ̃ǝ̃ ǹ-ce tuudaagɩ́ hlǝ ǹ-haar ǹ-ba Sonasɩ yuugɩ nã, ǹ-ba gɩ̀ hiil husumũũgu gɩ̀ hã-yǝ, ǹ-hiil hyacoruugu nǝ̃n yáá wù nã. Tuu gúɔ̀gɩ cɔ̃mmã nã, dudwalɩmcindaarɩ́ juo ba Sonasɩw nã.

7 Nǝ̃ gɩ̀ taakaal bãhãn'n bǝ̃ǝ̃gu, Dũnnũẃ kãã tĩɛ̃ kokodiɛẃ juo jãn tuu gúɔ́ nã, ǹ-wuu-gǝ, gɩ́ kuul.

8 Bǝ̃ǝ̃yɩsɩrɩ̀ gáa suro, Dũnnũẃ ce saluhuulaadaagɩ́ hlǝ bǝ̃ǝ̃'n pal'n yiɛgu. Bǝ̃ǝ̃gɩ́ juo ba gɩ̀ ca Sonasɩ yuugu, wú ba wù caa wú nǝ̃ǝ̃ ǹ-ku. Gɩ̀-i, wú juo ba wù caa kuugu, wú waa wà: «Mǝ̃̀ kúúguu búɔlà mǝ̃̀ nũmǝ̃nãsǝrɩ nã.»

9 Dũnnũẃ fǝ̃ǝ̃ ǹ-waa nǝ̃ Sonasɩw wà: «Ǹ hiɛga-ń dũ tuu gúɔ̀gɩ cɔ̃mmã nã, nã́ã́ ǹ diidwaldǝ-i?» Sonasɩẃ siɛ-yǝ wà: «Mǝ̃̀ diidwaldǝ-i, mǝ̃̀ hiɛgá dũ fuwɔ mǝ̃́ ba mǝ̃̀ caa kúúgu!»

10 Gɩ̀-i, Fɩraa-Dũnnũẃ fǝ̃ǝ̃ ǹ-waa nǝ̃-yǝ wà: «Ne, ǹ sáa ywar tuu gúɔ̀gɩ̀ yuunã nã, yíi sáa ce gɩ́ pa ǹ-vǝ̃ǝ̃. Gɩ̀ vǝ̃́ǝ̃lã́ yisuɔgɩ dɩn kusuugɩ nã, nã̀ã guu nã gɩ̀ yisuɔdaagɩ nã, nǝ̃ yin ba ǹ sɔ̃ gɩ̀ hujãndi.

11 Ninive lǝri, cwaabà máalá cwa waa kɛmɛ ni mugã (12 0000), bàá mãã bà sǝ̃n fǝ̃ǝ̃ dìí mãã dìi saa nǝ̃-ba. Kwasǝnɲincin yo dɩ́ nàa. Gɩ ba nã́ã́ mǝ̃n sáá mǝ̃̀ saa mǝ̃́ sɔ̃ Ninive lǝgǝ̃ngãr díɛ̀dɩ hujãndi-ì?»