Daniyɛlw (Daniel) 7

9 «Mǝ̃̀ bla nellɩ nã ǹ-ji da bàa jo nǝ̃ yuuntasǝ'n ɲããjiraɲinɲã, ǹ-juo kra-ɲã, Fɩraa-Yoẃ juo jiraa.

Wù kuulanãmbà yáá bà pesǝ nã́ã́ nɔ̃nɔ̃-i.

Wù yukwaasǝrìi ba nã́ã́ kurandohuhoryǝ'n jisɩ-i.

Wù yuuntasǝ'n guujirakuugɩ̀ yáá dãncaalam-i, nǝ̃ gɩ̀ vyanɲã́ ba nã́ã́ dãncilaa-i ɲĩɛ̃.

10 Dǝ̃ǝ̃m'n lwaadaagɩ́ juo juu ǹ-hlǝ, ǹ-ba gɩ̀ sɔ̃ byanvũɔ̃'n yigagɩ nã.

Cohuɔdaagɩ́ juo ba gɩ̀ ce mããcemmã gɩ̀ hã-yǝ, nǝ̃ cohuɔdaagɩ́ ba hirammã nã wù yigagɩ nã.

Sugojarriɛbá fǝ̃ǝ̃ ǹ-juo jiraa, bá cugur sɛbɛba.

11 Mǝ̃́ kã nǝ̃ yiga ǹ-ba mǝ̃̀ ne, gùú yircaacãwanĩɛ̃ga nǝ̃n yáá gà hlǝ yensaalarǝdɩ nã, nã̀ã ba gà du, gà-lǝ gà cɔ̃mmã nã.

Ǹ-ya mǝ̃́ ba nellɩ nã, bá juo ko kwasǝnɲingǝ̃ngãnɲã nnǝ̃ǝ̃nãw ǹ-nǝ̃ǝ̃ ǹ-dii-gǝ dǝ̃ǝ̃mdamã nã, gɩ́ caa.

12 Kwasǝnɲin'n dɩgaliɛẃ naa wù fãngããgu, nǝ̃ kuugɩ́ piɛ bà bãnɲã nã, ǹ-ji hi bǝ̃ǝ̃dagǝ.

13 Mǝ̃́ kã nǝ̃ yiga ǹ-ba mǝ̃̀ ne gùú mãã gɩ̀ hillaa mǝ̃̀ nã yisɔsǝri.

Nũmǝ̃nãkuudagǝ gɩ̀ hlǝ curo'n blɩw, gɩ̀ jo drɔ yiilunɲã.

Wú ba wù kã Fɩraa-Yo'n yiɛgu, bá ce wú kuganãã wù nãã.

14 Wú kãã da fãngããgu, yuuntasǝ'n gbɩgbaamã nǝ̃ yuuntigǝ̃ngã'n fãngãtasǝri.

Gɩ̀-i coplaaga min cwaaba, nǝ̃ yanɲã min cwaaba, bà waa tammã min, bá du nã ǹ-ba bà ce mããcemmã bà hã-yǝ.

Wù fãngããgɩ́ nǝ̃ fɩraa-i, gɩ̀ sǝ nǝ̃ kǝr.

Wù fãngãtasǝ'n yiɛgɩ̀ síì guu nã ǹ-da.»