Daniyɛlw (Daniel) 6

Mɛdɩ tabiɛ Daryusɩẁ járrá fãngãtasǝrɩ nã wù bii gwasiɛl nǝ̃ hǝ̃ǝ̃lnãw nã.

2 Daryusɩẃ da wà gɩ sáalá wú kra kumãndã gwonãndienw nã (120) wù yiɛ'n yuugɩ nã.

3 Wú kra yuntaaba siɛlba nã, bà-lǝ bá ba kumãndãba yuugɩ nã.

Kumãndã báàbà yáá bà blǝ bà yanɲã nĩĩgu mãã, bà yáá bà jo bà taa dɩ̀ yuugu bà ja yuntaa báà, ǹ-da ǹ-ce yuuntigǝ̃ngãw báa jã cɔ̃m.

Daniyɛlẁ yáá gùú yuuntiidiɛw-i.

4 Daniyɛlẁ yáá wù dǝ-i, wú juo maa yuntaaba hǝ̃ǝ̃ldaa báà, nǝ̃ kumãndãba min, fuwɔ yuuntigǝ̃ngãẃ juo ba wù ne wà wu nã́ã̀ dii wù yiɛgɩ min yigantasǝri wù nãkruɔgɩ nã.

5 Gɩ̀-i, yuntaa báà, nǝ̃ kumãndãba, bá juo ba bà caa wà ba nã́ã̀ da Daniyɛlẁ píé ǹ-ce gùú sùɔ́gu mãã, bà yiɛ'n mããcemmã nã.

Nǝ̃ Daniyɛlẁ mãã wù yáá yalntiiw, bà sáa ga da sùɔ́, wù píé nǝ̃ gùú yindagǝ nã wù yúɔrúɔ nǝ̃ gùú mãã.

6 Bá fǝ̃ǝ̃ ǹ-waa nǝ̃ bà ɲĩɛ̃ wà: «Yi síì da dɩdarǝ ǹ-ba yì ji tiilǝǝ Daniyɛlw nã, gɩ-ń ba gɩ̀ sǝ wa wu mãã wù nɔ̃ wù hã wù Dũnnũ hlũũgu nĩĩgu mãã wà dìí sǝ, yáalà yí tiilǝǝ wù nã nǝ̃ dɩ̀-i.»

7 Yuntaaba hǝ̃ǝ̃l báà, bá nǝ̃ kumãndãba, bá paa ǹ-suro ǹ-kã yuuntigǝ̃ngãw nãã ǹ-kãã waa nǝ̃-yǝ wà: «Yuuntigǝ̃ngã Daryusɩẃ ba fɩraa!

8 Kumãndãba yuntaa báà, fãngãtaaba, kumãndãba, cɔ̃nfǝ̃hãrããba nǝ̃ yigantaaba, bá kãã tɩgii, wà yuuntigǝ̃ngãw-ń ba wù ji hũɔ̃, wú hiil sɛbɛdiɛ, ǹ-guur cwaaba wà: bãn gur nǝ̃ nũɔ̃sɔ̃ kusuugɩ nã, curo wo curo mãã wù ji cirǝ̃ǝ̃ dũnnũdiɛ nã, yindagǝ nã curo'n blɩdiɛ nã, nǝ̃ gɩ̀ sǝ yuuntigǝ̃ngã sǝ nǝ̃ wù hla, gɩ̀ saa bá nǝ̃ǝ̃ ǹ-dii-yǝ jaraba fuugɩ nã.

9 Yì yuuntigǝ̃ngã, hiil sɛbɛdiɛ, ń kra dɩ̀ nã, wà n gúurá cwaaba nǝ̃-dǝ, nǝ̃ ń piɛ ǹ nǝ̃blɩri wù drɔ.

Gɩ̀-lǝ gɩ̀ tammã, curo'n síì ver-dǝ.

Sulammã nã, Mɛdɩ taaba nǝ̃ Pɛrsɩ taaba saa, dìí mãã dɩ-ń hlǝ sɛbɛw nã, dɩ̀ sǝ̃n ver.»

10 Gɩ̀-i, yuuntigǝ̃ngã Daryusɩẃ fǝ̃ǝ̃ ǹ-piɛ wù nǝ̃blɩri gɩ̀ sɛbɛw nã.

11 Daniyɛlẁ gáa nɔ̃ wà yuuntigǝ̃ngãw píɛlá wù nǝ̃blɩri sɛbɛ wáá nã, wú ver ǹ-jãn wù duugɩ nã.

Sãngãnso nã, gùú duugu mãã drɔ drɔgu, flãntiɛraabá nàa bàa vĩĩ Serusalɛm yiɛgu.

Daniyɛlẁ hi wù kuulǝǝ yin siɛl yuugɩ nã wù cirǝ̃ǝ̃ wù Dũnnũw nã, nã̀ã ba wù fyãn-yǝ.

Gɩ̀-lǝ yuugu, wú ce yun'n dɩgaliɛ tammã.

12 Wù ɲããtaabá tãrãã ǹ-juo hi-yǝ wù ce cirǝ̃mmã, wù jiɛriɛ nǝ̃ wù Dũnnũw.

13 Gɩ̀-i, bá fǝ̃ǝ̃ ǹ-ta yuuntigǝ̃ngãw nãã ǹ-kãã waa nǝ̃-yǝ wà: «Yíi sáa hiil sɛbɛdiɛ ǹ-piɛ ǹ nǝ̃blɩri wù nã, wà bãn gur nǝ̃ nũɔ̃sɔ̃ kusuugɩ nã, curo'n báa cirǝ̃ǝ̃ dũnnũdiɛ nã yindagǝ nã curodiɛ nã gɩ-ń ba gɩ̀ sǝ wa yíi-i?

Curodiɛ wu-ń hla nã̀ã ce-dǝ, nã́ã́ wù-lǝ wu sǝ̃n saa jaraba fuu sǝ-ì?»

Yuuntigǝ̃ngãẃ siɛ-ba wà: «Ũwũũ, mǝ̃̀ níé ǹ-kra dìí nã-i.

Nǝ̃ Mɛdɩ taaba nǝ̃ Pɛrsɩ taaba saa, dìí mãã dɩ-ń hlǝ sɛbɛw nã, dɩ̀ sǝ̃n ver.»

14 Daniyɛl ɲããtaabá ver ǹ-waa wà: «Nǝ̃ hãmĩĩ yuuntigǝ̃ngã, Daniyɛl mãã Suuda yiɛntiidiɛ, yi gúurá ǹ-jo nǝ̃-yǝ, wù sǝ̃n bũũ-n fiyãã yo, nǝ̃ ǹ píɛlá nǝ̃blɩri gùú sɛbɛw nã mãã ǹ-guur cwaaba wà ba báa ce dìí mãã, wù sǝ̃n bũũ gùú yo gɩ̀ sɛbɛw.

Wù cirǝ̃ǝ̃ wù Dũnnũw nã yin siɛl, yuugɩ nã.»

15 Yuuntigǝ̃ngãẁ gáa nɔ̃ dɩ̀-lǝ, wù yigagɩ́ juo huu ǹ-ji maa gɩ̀ sùɔ́gu.

Wu juo ba wù caa wú kor Daniyɛl.

Wú ba wù caa, dɩ̀ cel'n tammã fuwɔ bǝ̃ǝ̃'n jãnɩmmã nã.

16 Nǝ̃ Daniyɛl ɲããtaabá kãã ver ǹ-jo bà gbɩraanã yuuntigǝ̃ngãw nãã ǹ-juo waa wà: «Yuuntigǝ̃ngã, ǹ fǝ̃́ǝ̃lã́-dǝ, ǹ-vaa nǝ̃ Mɛdɩ yiɛntaaba nǝ̃ Pɛrsɩ yiɛntaaba hlũũgu, dìí mãã dɩ-ń hlǝ sɛbɛw nã, ǹ-ba dɩ̀ guur cwaaba nǝ̃ cɔ̃mdamã, nǝ̃ yuuntigǝ̃ngãẃ piɛ wù nǝ̃blɩri gɩ̀ sɛbɛw drɔ, curo'n síì gbǝ̃ǝ̃ ǹ-ver-dǝ.»

17 Gɩ̀-i, yuuntigǝ̃ngãẃ kra dɩ̀ nã ǹ-hã-ba wà: «Kã́ã̀ nǝ̃ Daniyɛlw ɲi ga nǝ̃ǝ̃ ɲí dii-yǝ jaraba fuugɩ nã!»

Yuuntigǝ̃ngãw nã̀ã fǝ̃ǝ̃ ǹ-waa nǝ̃ Daniyɛlw wà: «Ǹ Dũnnũw mãã ǹ ce mããcemmã ǹ hã-yǝ yalntasǝrɩ nã, wùú dɩn ga gbǝ̃ǝ̃ ǹ-kor-n.»

18 Bá fǝ̃ǝ̃ ǹ-jo nǝ̃ tɩntãnkɩnkandarǝ ǹ-juo kra-dǝ fuu'n nũɔ̃gɩ nã.

Yuuntigǝ̃ngãẃ juo nɩsɩ dɩ̀ nã nǝ̃ wù nǝ̃blɩri.

Wù yuntaa yo, bá juo nɩsɩ dɩ̀ nã.

Curo'n síì gbǝ̃ǝ̃ ǹ-ver Daniyɛl yuunã cɔ̃mmã hlo.

19 Yuuntigǝ̃ngãẃ fǝ̃ǝ̃ ǹ-ver ǹ-ta wù fãngãtasǝ'n suɔgɩ nã, wù ga cɔ dàa.

Wú hla wuuri.

Nǝ̃ halle ǹ-da wà duɔsǝmmã sáá wù nã, wú hla kuu wo kuu mãã wù yáá wù ji gbǝ̃ǝ̃ ǹ-paaraa nǝ̃-gǝ.

20 Ciibǝpuruugu, yuuntigǝ̃ngãẃ suro ǹ-ba wù gǝǝraa wù kã jaraba fuugɩ nã.

21 Wù gáa ba wù kuganãã fuugɩ nã, wú ba wù be Daniyɛlw nǝ̃ kaaluu'n yalli wà: «Daniyɛl, yíi mãã Nũmǝ̃nã-Dũnnũ mããcierw, ǹ ce-mã yalntasǝrɩ nã ǹ hã-yǝ, nã́ã́ ǹ Dũnnũw gbǝ̃́ǝ̃lã́ ǹ-hiil-n jaraba nãkrɔnɲã nã-ì?»

22 Daniyɛlẃ fǝ̃ǝ̃ ǹ-siɛ-yǝ wà: «Yuuntigǝ̃ngãẃ ba fɩraa!

23 Mǝ̃̀ Dũnnũẁ tĩ́ɛ̃lã́ wù mɛlɛgɛẃ juo suu jaraba nɔ̃nɲã nã.

Bà sáa ce-m nǝ̃ diibɩblaar dɩn yo.

Sulammã nã, Dũnnũẁ díɛ́ wà mǝ̃ sǝ nǝ̃ wanyuɔrɔm wù yinɲã nã, nǝ̃ mǝ̃̀ sáa ce-n nǝ̃ diibɩblar.

24 Dudwalɩmmã́ juo car yuuntigǝ̃ngãw nã wú wa bá hiil Daniyɛlw fuugɩ nã.

Daniyɛlẁ gáa hlǝ, cwaabá da wà wu sáa kɔsuɔ sùɔ́ nã, nã̀ã wa wù hṹɔ̃lã́ ǹ-cu wù Dũnnũw nã.

25 Yuuntigǝ̃ngãw nã̀ã fǝ̃ǝ̃ ǹ-hã-ba nǝ̃-dǝ wà bá kãã blǝ gùú cwaaba nǝ̃n yáá bà tiilǝǝ Daniyɛlw nã.

Wú ce bá nǝ̃ǝ̃ ǹ-dii-ba jaraba fuugɩ nã nǝ̃ bà canããba nǝ̃ bà tãnkuuraaba min.

Ba-ń wa ba ga hi fuu'n taari, jaraba-ń ce bá karaa ǹ-baal bà kukuunɲã.

26 Gɩ̀ furũũgɩ nã, yuuntigǝ̃ngã Daryusɩẃ juo yal sɛbɛw ǹ-hã yanɲã min coplaaga min mãã gà waa tammã min, nã̀ã ba cuuw min nã wà: «Sɩsɩrãmmã́ ba ɲì saa dugɔ!

27 Mǝ̃̀ mãã mǝ̃̀ ji kra dìí nã mãã, dɩ̀-i nnĩĩ: «Yanɲã min nã mãã mǝ̃̀ fãngãtasǝri dàa ɲã̀ nã, ɲã̀ cwaaba min bà saa bá ba bà ɲãnãã nǝ̃ gbǝrsǝri min Daniyɛl Dũnnũ yigagɩ nã, nã̀ã ba bà bũũ-yǝ.

Nã̀ã wa wù-lǝ wɩ̀-i Nũmǝ̃nã-Dũnnũw, wú nǝ̃ fɩraa-i.

Yuuntigǝ̃ngã-i nǝ̃-yǝ fɩraa, wù fãngãtasǝrɩ̀ sǝ nǝ̃ kǝr.

28 Wù hiil cwaaba nãkrɔnɲã nã, nã̀ã ba wù kor-ba.

Wù ce cɔ̃ngǝ̃ngãmmã nǝ̃ cɔ̃ntugulǝmmã drɔkuɔlɩ nã nǝ̃ ɲũũrũũgɩ nã.

Wùú híilá Daniyɛlw jaraba ɲicãnfuunɲã nã.

29 Gɩ̀ furũũgɩ nã, Daniyɛlẃ juo da wanhiramkɩnkan, gùú nã Daryusɩẁ yáá yuuntigǝ̃ngãw, nǝ̃ gùú nã mãã Siirɩsɩẁ yáá Pɛrsɩ yiɛ'n yuuntigǝ̃ngãw.