Cuu Dulli (Genèse) 49

Yakubaẁ pã wù nɔ̃fɩnfaagu ǹ-hã wù byanããba

Yakubaẃ tĩɛ̃ ǹ-be wù byanããba, ǹ-juo waa nǝ̃-ba wà: «Vlã́ã̀ ɲã́ kuganãã mǝ̃̀ nã. Mǝ̃̀ jo mǝ̃̀ pɩgaa-ɲã́ã̀ nǝ̃ dìí mãã dɩ̀ ga jo mǝ̃n furũũgɩ nã. 2 Mã́ã Yakuba, mã́ã byanãã ɲimãã, vlã́ã̀ ɲí kuganãã mǝ̃̀ nã, nǝ̃ ɲí nɔ̃ ɲí hã-m. Jǝ̃́ǝ̃lã̀ ɲì tɔ̃nɲã ɲí nɔ̃ ɲí hã-m, mã́ã mãã ɲì tǝ Isɩrayɛlw.

3 «Wurbɛn, yíi-i mǝ̃̀ byavũnvũɔ̃w, mǝ̃̀ dĩ́ɛ̃lã́ ǹ-huu yíi-i mǝ̃̀ yɔmmã nã, mǝ̃̀ yáá nǝ̃ kɩkǝmmã gùú nã mãã. Ń nǝ̃ fãngããgu nǝ̃ yuugu, ǹ-maa ǹ hãmba. 4 Ń nǝ̃ nã́ã́ hũnpiirii mãã dɩ̀ juu nǝ̃ juumã nã. Nǝ̃ gɩ̀-i nnĩĩ, ǹ mãã ǹ cúɔ́ nǝ̃ mǝ̃̀ ciɛdiɛw, ǹ síì ba bà yigagɩ nã hlo, ǹ bǝ̃́ǝ̃lǝ̃́ǝ̃ mǝ̃̀ cĩĩnũũgɩ nã.

5 «Simeyɔ̃ba nǝ̃ Leviw ɲũũnãtaa-i: bà hyárá dɩ̀ nã wà ba ji ba bà ce hyadũgaaciega nǝ̃ bà dãngunãba-i. 6 Bà mãã bà ŋmã bà da bà ɲĩɛ̃, bà ce gàá mãã, mǝ̃n síì dii mǝ̃̀ nũɔ̃gu gà nã. Mǝ̃̀ síì kã bà damǝ̃ɲĩɛ̃ sùɔ́ yo gɩ̀ nã, nã̀ã wa bà hiɛgà dṹṹ bá ko cwaaba, nǝ̃ dudwalɩmmã nã bá blǝ ninbliɛba ǹ-bǝraa bà furũnyiɛ'n viɛtɩnǝ̃ǝ̃ba nã. 7 Bà hyadũũ'n cɔ̃mmã̀ bǝ̃́ǝ̃lǝ̃́ǝ̃. Bà hiɛgà ca fuwɔ ǹ-ji maa gɩ̀ sùɔ́gu. Mǝ̃̀ ji buruɔ bà huɔnbiiba nã, Yakuba yiɛgɩ min nã. Mǝ̃̀ ji pisɩrĩɛ̃ bà nã Isɩrayɛl gɩ̀ min nã.

8 «Suuda, ǹ vũnvãnããba nǝ̃ ǹ hãmbà ji ba bà bɩnǝ̃ǝ̃ yíi nã-i. Ǹ ji hi ǹ ɲããtaaba nã, nǝ̃ ǹ vũnvãnããba nǝ̃ hãmba ji kuulǝǝ ǹ-bũũ-n. 9 Suuda, mã́ã bíɛ́ Suuda, ń nǝ̃ fãngããgu nã́ã́ jarablɩw mãã wù blǝ́rá wù kũɔ̃mã ǹ-wuu nã̀ã ver ǹ-kãã jãn wù wanmǝ̃rǝ̃mmã nã ǹ-kãã kuulǝǝ, ǹ-mǝ̃rǝ̃ǝ̃ nã́ã́ jarabla-i, yindagǝ nã nã́ã́ jaraɲũ-i. Halii ji gbǝ̃ǝ̃ ǹ-guur wú suro? 10 Yuuntasǝrɩ̀ ji ba Suuda nũɔ̃ntaabaa saa-i. Yuuntasǝ'n guruugɩ̀ ji ba wù nũɔ̃ntaa'n nãkruɔgɩ nã-i fuwɔ ǹ-da gɩ̀ tiiw wùu ga jo nǝ̃ wù hla, wùú mãã nũɔ̃ntaaba min gà ji ba gà nɔ̃ gà hã-yǝ. 11 Wù ji vaa wù kǝkũmw ɛrsɛ̃ tuugɩ nã, nã̀ã vaa wù kǝkũmblɩw ɛrsɛ̃ tunũɔ̃huhorgǝgɩ nã. Wù ji saar wù kuulaaw ɛrsɛ̃ kwãmmã nã, nǝ̃ wù kuulaadiiyǝpɩpuɔlayǝw ɛrsɛ̃ bii'n hũmmã^a nã. 12 Wù yinɲã̀ ji hlãrãã ǹ-maa ɛrsɛ̃ kwãmmã, nǝ̃ wù ɲirãnɲã́ pesǝ ǹ-maa nɔ̃nɔ̃w. 13 Sabulɔ̃ẁ ji kãã jiraa lwaakɩnkan'n nũɔ̃gɩ nã, gùú sùɔ́guu mãã batobà ji ba bà hiraa. Wù hlɔ̃mmã̀ ji maar ǹ-ga hi fuwɔ Sidɔ̃ lǝri.

14 «Isɩkarw nǝ̃ nã́ã́ kǝkũmkɩkǝmnĩĩ-i, wùu mǝ̃rǝ̃ǝ̃ gbaliɛhuhoryǝw kusunã. 15 Wú da wà wù fiisaa'n sùɔ́gɩ sáalá, nǝ̃ wù yiɛ yo, gɩ́ dwal. Wú fǝ̃ǝ̃ ǹ-dii wù hla ǹ-ba wù tuu tuuyaga, nã̀ã ba wasǝrɩ nã.

16 «Danẁ ji jiraa wù bluu'n cɔ̃ntũɔ̃lũũ'n yuugɩ nã, Isɩrayɛl nũɔ̃ntaa'n dɩgaliɛ tammã. 17 Wù ji ba nã́ã́ waal-i hlũũgɩ nã, nã̀ã ba nã́ã́ gurɔ-i hlũmblɩrɩ nã, wu-ń ce wú jugar sǝ̃nsuuw wù kwarnkwaagɩ nã, sǝ̃nsuusũɔ̃rẃ duruu ǹ-ka ǹ-collaa ǹ-maar ǹ-ga duruu ǹ-jǝ̃ǝ̃.

18 «Fɩraa-Dũnnũ, mǝ̃́ nìɛ mǝ̃̀ fennãã ǹ nã wà n jo n ji kor-m! 19 Sɩrǝǝsɩbà ji suro Gadɩw yuunã, nǝ̃ wù ji suro ǹ-ɲǝ̃ǝ̃ ǹ-tĩɛ̃-ba.

20 «Asɛr yiɛ'n dũmmã̀ síì ba mã̀ fǝ̃ǝ̃ cɔ̃m. Yuntaabà mãã bà saa nǝ̃ gùú dũmmãã mãã, mã̀ ji ba mã̀ hlǝ sùɔ́gɩ-i.

21 «Nɛfɩtaliẃ nǝ̃ nã́ã́ ŋmãsɔ̃w mãã wùu da wù hla nã, wù huu biifɩnfaaba.

22 «Yisefuẃ nǝ̃ nã́ã́ tubikuuhuhoruu-i, gùú mãã gɩ̀ ŋmǝ̃ǝ̃, nã̀ã ba gùu ba hũnnaalw tuɔra. Gɩ̀ nɔ̃́ǹɲã̀ ji firiɛ ǹ-maa dofũũli. 23 Cwaabà sórrá wù yuunã, ǹ-ba bà caa wù nũɔ̃gu, bà tuu-yǝ nǝ̃ cũɔ̃nɲã, nã̀ã ba bà ce-yǝ nǝ̃ byaari. 24 Nǝ̃ wú hla nã̀ã blǝ wù tǝ̃ǝ̃gu nǝ̃ kɩkǝmmã, wù nãkrɔnɲã̀ sáa hyãl. Gùú Fãngããgɩmintii Dũnnũw mãã wù ya Yakuba Dũnnũ, wù-lǝ wùú jáa ver ǹ-ba wù cii Isɩrayɛl bluuba nã nã́ã́ wanciin-i, nã̀ã ver ǹ-ba wù gbǝ̃ǝ̃ nã́ã́ tɩntaluu-i. 25 Ǹ tǝ Yakuba Dũnnũw yiir nã, Fãngããgɩmintii Dũnnũẃ piɛ wù nãkrɔfɩnfaagu ǹ drɔ. Wù-lǝ wɩ̀-i Dũnnũw mãã wù ji ba wù pɛ ǹ nã, Wú hã-n nǝ̃ duɔgu, nǝ̃ hũmmãã mãã mã̀ hlǝ hũnnaalw nã, nǝ̃ huɔnbiiba nǝ̃ kwasǝnɲinɲã piyɛ̃. 26 Ǹ tǝẁ plã gùú nɔ̃fɩnfaaguu mãã ǹ-hã-n, gɩ̀ máalá ɲinhuhoranɲãã nǝ̃n yáá tãnũnɲã nã mãã fɩraa. Nɔ̃fɩnfaa gúɔ̀gɩ̀ máalá gbaasǝri mãã dɩ̀ yáá haasǝ tãmbiiga nã. Nũɔ̃'n pãl wo nũɔ̃'n pãl mãã mǝ̃̀ cíé-dǝ ǹ-hã Yisefuw, Dũnnũẃ fuɔ dɩ̀ nã. Wù vũnvãnããba nǝ̃ wù hǝ̃ǝ̃w sǝ̃ǝ̃nã, Dũnnũẁ níé ǹ-hiil wɩ̀-i wù dǝ.

27 «Bɛ̃nsamɛ̃ẃ nǝ̃ nã́ã́ jernvaa-i. Wu-ń ce wú ko kũɔ̃mã ǹ-wuu ciibǝǝgu, nǝ̃ wù mãã wù da gùú mãã, wú jo nǝ̃-gǝ dɩndǝ̃mbǝ̃ǝ̃gu, ba ji buruɔ gɩ̀ nã nǝ̃ badaba.»

28 Bà-lǝ bà-i Isɩrayɛl nũɔ̃ntaa nũɔ̃sɔ̃ nǝ̃ gà hǝ̃ǝ̃lga. Bà tǝẁ yáá wù pã wù nɔ̃fɩnfaagu wù hã-ba, wù wáalá cãwanĩɛ̃ gáá-i nǝ̃-ba. Wù plã wù nɔ̃fɩnfaagu ǹ-hã curo wo curo, ǹ-vaa nǝ̃ wù yuɔri.

Yakuba kúúcɔ̃mmã

29 Gɩ̀ furũũgɩ nã, Yakubaẃ waa nǝ̃ wù byanããba wà: «Mǝ̃-ń ku, díilà mǝ̃̀ pĩɛ̃ndi mǝ̃̀ vũnvãnãã'n pĩɛ̃ndiitãnfierɩ nã. Dɩ̀-i tãnfieri mãã dàa Hitɩ nũɔ̃ntii Ɛfrɔ̃ fugagɩ nã, 30 Makɩpelagu, Mãmɩre tuɔragu Kanãã yiɛgu. Ibramãẁ sǝ̃́ǝ̃lã́ fuga gúɔ̀ Ɛfrɔ̃w saa ǹ-ce tãnfer díɛ̀dɩ́ ba wù pĩɛ̃ndiitãnfieri. 31 Bà díilá Ibramãw nǝ̃ wù ciɛ Sɩra pĩɛ̃ndi gùú sùɔ́gɩ-i, nã̀ã dii Isiyagaw nǝ̃ wù ciɛ Erbekaw pĩɛ̃ndi gùú sùɔ́gɩ dɩngɩ nã-i. Mã́ã yo, mǝ̃̀ díilá Leya pĩɛ̃ndi gùú sùɔ́gɩ-i. 32 Bà sǝ̃́ǝ̃lã́ fuga gúɔ̀ nǝ̃ tãnfer díɛ́ Hitɩ bluu'n saa-i.»

33 Yakubaẁ jáa waa cãwanĩɛ̃ gáà nǝ̃ wù byanããbaa ǹ-tã, wú ver ǹ-mǝ̃rǝ̃ǝ̃ ǹ-ku ǹ-duu wù tǝvũnvãnããba nã.