Cuu Dulli (Genèse) 48

Yakubaẁ pã wù nãkrɔfɩnfaagu nǝ̃ Yisefu byanããba

Gɩ̀ furũũgɩ nã, bá kãã waa nǝ̃ Yisefuw wà wù tǝ Yakubaw nàa wù jaa. Wú suro ǹ-kã wù nãã nǝ̃ wù byanããba hǝ̃ǝ̃lbaa mãã Mãnãsew nǝ̃ Efrayimw. 2 Bà jáa waa nǝ̃ Yakubaw mãã Isɩrayɛlw wà wù bíɛ́ Yisefuw júó wù ji dǝ̃ǝ̃-yǝ, wú gbǝ̃ǝ̃-mã ǹ-suro ǹ-jiraa wù guumǝ̃rãkuugu drɔ.

3 Nã̀ã fǝ̃ǝ̃ ǹ-waa nǝ̃ Yisefuw wà: «Fãngããgɩmintii Dũnnũẁ pɩ́gará wù hla ǹ-ja-m Lusɩ lǝri Kanãã yiɛgu nã̀ã piɛ wù nãkrɔfɩnfaagu mǝ̃̀ drɔ, 4 nã̀ã waa nǝ̃-m wà wu ji ce mǝ̃̀ huɔnbiibá ɲũrũɔ̃ mǝ̃́ ba placin'n tǝvũnvũɔ̃w. Nã̀ã waa nǝ̃-m wà wu ji hã mǝ̃̀ huɔnbiiba nǝ̃ yiɛ gúɔ̀gɩ́ ba bà nãkrɔkuugu fɩraa.» 5 Yakubaw nã̀ã ver ǹ-waa wà: «Ǹ byanããba hǝ̃ǝ̃lbaa mãã ǹ húulá-ba Misɩra yiɛgu nǝ̃ mǝ̃n ga da mǝ̃́ jo, mǝ̃̀ ce bá ba mǝ̃̀ byanãã-i. Efrayimw nǝ̃ Mãnãsew, bà ji ba mǝ̃̀ byanãã-i nã́ã́ Wurbɛnba nǝ̃ Simeyɔ̃w bà mãã mǝ̃̀ byanããba nĩĩguu mãã. 6 Nǝ̃ tãnkuur wo tãnkuurw mãã ǹ ji huu-yǝ bà-lǝ bà furũũgɩ nã, wùú ji ba ǹ yow. Gɩ̀-lǝ gɩ̀ tãnkuuraabà ji kã bá wuu sùɔ́gu nǝ̃ bà vũnvãnãã-i: Efrayimba nǝ̃ Mãnãsew. 7 Mǝ̃̀ gáa ver gùú nã mãã mǝ̃̀ maar Aram Nɩgǝraagɩ nã, mǝ̃̀ gáa piɛ Efrata lǝrɩ nã mãã Kanãã yiɛgu, ǹ ɲũ Arsɛlẃ ku mǝ̃̀ saa hlũũgɩ nã. Mǝ̃́ dii-yǝ dàa gùú sùɔ́gu, Efrata lǝ'n hlũũ'n nũɔ̃gɩ nã. Bà be gùú Efrata lǝri kuɔkuɔgu wà Betɩlehɛm lǝ.»

8 Isɩrayɛl jáa ne ǹ-da Yisefu byanããba, wú yugu-yǝ wà: «Haba-i nnĩĩ-lǝ?» 9 Yisefuẃ siɛ-yǝ wà: «Dũnnũẁ hlã-m nǝ̃ gùú tãnkuuraabaa mãã Misɩra yiɛgu, bà-lǝ bà-i.» Isɩrayɛlẃ waa nǝ̃-yǝ wà: «Kuganãã nǝ̃-ba mǝ̃́ pã mǝ̃̀ nɔ̃fɩnfaagu ǹ-hã-ba.» 10 Isɩrayɛlẁ yáá wùu vǝ̃ǝ̃ ǹ-car, wù yinɲã yáá ɲã̀ã hla cɔ̃mmã, wù sáá wù da dugɔ dugɔ. Yisefuẁ gáa ce wù byanããbá kuganãã Isɩrayɛl nã, wú blǝ ǹ-ce bá pɛ̃-yǝ, nã̀ã pɩpɩrĩɛ̃ bà nã. 11 Nã̀ã fǝ̃ǝ̃ ǹ-waa nǝ̃ Yisefuw wà: «Mǝ̃n sáá mã̀ã jiraa nǝ̃-dǝ wà mǝ̃ ji ver ǹ-da-n hlo, nǝ̃ gɩ̀-i nnĩĩ Dũnnũẁ jáa ce mǝ̃́ da-n nã̀ã ver ǹ-da ǹ tãnkuuraa yo.» 12 Yisefuẃ fǝ̃ǝ̃ ǹ-blǝ ǹ-pyar-ba wù tǝ^a vyanɲã nã, nã̀ã kuulǝǝ ɲũũrũũgu. 13 Gɩ̀ furũũgɩ nã, Yisefuẃ fǝ̃ǝ̃ ǹ-tuu wù byanããba hǝ̃ǝ̃lba ǹ-fuɔ bà nã. Wù yáá wùu tuu Efrayimw mãã wù nãdĩĩgɩ nã, wù-lǝ wú juo ba Isɩrayɛl ɲiɲũɔ̃yiɛgu, nǝ̃ Mãnãsew mãã wù yáá wùu tuu-yǝ wù ɲiɲũɔ̃nããgɩ nã, wú juo ba Isɩrayɛl nãdĩĩyiɛgu. Yisefuw nã̀ã ver ǹ-ce bá kuganãã bà tǝvũnvũɔ̃w nã. 14 Isɩrayɛlẃ dii ǹ-gaa wù nãkrɔnɲã nã ǹ-piɛ wù nãdĩĩgu Efrayimw mãã wuusaal'n yuugɩ nã, nã̀ã piɛ wù ɲiɲũɔ̃gu Mãnãsew mãã vũnvãtiiw wù yuugɩ nã. 15-16 Wú pã wù nɔ̃fɩnfaagu nǝ̃ Yisefuw ǹ-waa nǝ̃-yǝ wà: «Gùú Dũnnũw mãã wù cíilá mǝ̃n nã ǹ-ji hi jimããgu, mɛlɛgɛw mãã wù cíilá ǹ-hiil-m diibɩblaarɩ nã, mǝ̃̀ tǝvũnvũɔ̃ Ibramãw nǝ̃ mǝ̃̀ tǝ Isiyaga bà wáalá gùú Dũnnũw mãã wù yigagɩ nã, mǝ̃̀ cirǝ̃ǝ̃ wù nã wà wú piɛ wù nãkrɔfɩnfaagu pũmpɩrbii báá drɔ. Bà-lǝ bàa cɔ̃mmã nã-i, mǝ̃̀ yiirɩ̀ síì guu nã nã́ã́ mǝ̃̀ tǝvũnvũɔ̃ Ibramãw, nǝ̃ mǝ̃̀ tǝ Isiyaga bà yagà sáa guu nã gùú tammã! Ya bà huɔnbiibá ɲũrũɔ̃ ǹ-ba cuu yanɲã nã.» 17 Yisefuẁ jáa da wù tǝw wùu piɛ wù nãdĩĩgu Efrayim yuugɩ nã, gɩ̀ sáa dwal wù nã. Wú blǝ ǹ-pyar-gǝ Efrayim yuugɩ nã ǹ-kã nǝ̃-gǝ Mãnãse yuugɩ nã: 18 nã̀ã waa wà «Tɩtii nnĩĩ sǝ. Wáà-i vũnvãtiiw, piɛ ǹ nãdĩĩnãkruɔgu wù yuugɩ nã.» 19 Wù tǝẃ hla nã̀ã waa nǝ̃-yǝ wà: «Mǝ̃̀ bíɛ́, mǝ̃̀ fǝ̃́ǝ̃lã́ dɩ̀ min. Mǝ̃̀ fǝ̃́ǝ̃lã́ wà Mãnãsew ji ba cogǝ̃ngãã-i nǝ̃ wù bluu yo bá ba codũlgǝ̃ngããri. Nǝ̃ wù hǝ̃ǝ̃ Efrayimẁ ji ba cogǝ̃ngãw ǹ-maa wù-lǝ nǝ̃ wù huɔnbiibà ɲũrũɔ̃ ǹ-ba coplaaga.» 20 Isɩrayɛlẃ pã wù nɔ̃fɩnfaagu ǹ-hã-ba gúɔ̀ wà: «Isɩrayɛl bluubà ji ba bà tuu ɲimãã yiriɛga-i, bà pã bà nɔ̃fɩnfaagu bà hã cwaaba, bà waa nǝ̃-ba wà Dũnnũẃ piɛ wù nãkrɔfɩnfaagu bà nã, nã́ã́ wù píɛlá-gǝ Efrayimw nã nǝ̃ Mãnãsew nã gùú tammã.» Isɩrayɛlẁ bíé Efrayim yir-i dĩɛ̃lãmmã nã nã̀ã ji fǝ̃ǝ̃ ǹ-be Mãnãse dǝlli ǹ-duu nã.

21 Gɩ̀ furũũgɩ nã, wú waa nǝ̃ Yisefuw wà: «Mǝ̃n síì hǝ̃ǝ̃sǝ nã̀ã ku, nǝ̃ mǝ̃̀ fǝ̃́ǝ̃lã́ wà Dũnnũw ji ba ɲì saa ǹ-hiil-ɲã́ã̀, ɲí ver ǹ-maar ɲì tǝvũnvãnãã'n yiɛgu. 22 Mǝ̃n hã-n nǝ̃ sɔhuhorgǝdagǝ hlo, ǹ-pya nã, ǹ kuugɩ da ǹ-maa ǹ vũnvãnãã'n ɲinɲã. Mǝ̃̀ hã-n nǝ̃ Sisɛmguu mãã mǝ̃̀ cíé byaari nǝ̃ mǝ̃̀ dãngunãw nǝ̃ mǝ̃̀ tǝ̃ǝ̃gu ǹ-hũɔ̃-gǝ Amoritɩ nũɔ̃ntaaba saa.»