Cuu Dulli (Genèse) 47

Yisefuẃ fǝ̃ǝ̃ ǹ-suro ǹ-kã Misɩra yuuntigǝ̃ngã'n kuugɩ nã, ǹ-kãã waa nǝ̃-yǝ wà: «Mǝ̃̀ tǝw nǝ̃ mǝ̃̀ cwanããbà hlǝ́rá Kanãã yiɛgu ǹ-jo nǝ̃ bà tũmba, nǝ̃ bà wuramba, nǝ̃ bà ninɲã nǝ̃ bà nãkrɔɲinɲã min. Bá nàa Gosɛngu.» 2 Yisefuẃ ne ǹ-hiil cwaabà ndii wù vũnvãnããba sǝ̃ǝ̃nã ǹ-kãã pɩgaa-ba ǹ-ja Misɩra yuuntigǝ̃ngãw. 3 Wú yugu-ba wà: «Ɲi ce bii mããcem-i?» Bá siɛ-yǝ wà: «Yuuntii, wanciinãã-i nǝ̃-yáà, yì tǝvũnvãnãã'n tammã. 4 Nũmmã̀ gáa ɲirǝ̃ǝ̃ ǹ-ga gbǝ̃ǝ̃ Kanãã yiɛgu, yì kwasǝnɲinɲã́ ba ɲì sǝ̃n da wanwuuram'n sùɔ́, gùú cíé yí wa yí juo jiraa dìɛ ǹ yiɛgu. Ce kukuɔya nǝ̃ ń ya yí jiraa dàa Gosɛngu.»

5 Misɩra yuuntigǝ̃ngãẃ waa nǝ̃ Yisefuw wà: «Ǹ tǝw nǝ̃ ǹ vũnvãnããba nǝ̃ ǹ hǝ̃ǝ̃w mãã bà gáa duu ǹ nã ǹ-jo, 6 Misɩra yiɛgɩ min, gɩ̀ nǝ̃ yíi nãkruɔ nã-i. Ne sɔhuhorgǝdagǝ ń hã bá jiraa. Bà ji gbǝ̃ǝ̃ ǹ-kãã jiraa dàa Gosɛngu. Nǝ̃ bà sǝ̃ǝ̃nã, nǝ̃-ń ba ǹ fǝ̃ǝ̃ cwaa, bàá mãã bà hi wancendɩ nã, hiil-ba bá ba bà cii mǝ̃̀ kwasǝnɲinɲã nã.»

7 Yisefuẃ fǝ̃ǝ̃ ǹ-kã nǝ̃ wù tǝ Yakubaw Misɩra yuuntigǝ̃ngã'n kuugɩ nã ǹ-ga pɩgaa-yǝ nǝ̃-yǝ. Yakubaẃ mǝ̃gaa ǹ-pã wù nɔ̃fɩnfaagu ǹ-hã Misɩra yuuntigǝ̃ngãw. 8 Misɩra yuuntigǝ̃ngãẃ fǝ̃ǝ̃ ǹ-yugu-yǝ wà: «Yíǹ bìigà saa gá hi nũɔ̃ hagɩ-i?» 9 Yakubaẃ siɛ-yǝ wà: «Mǝ̃̀ bii gundii nǝ̃ gur nũɔ̃sɔ̃w-i nnĩĩ mǝ̃̀ jiraa mǝ̃̀ waaraa liɛga nã. Bii gáàgà sáa ɲũrũɔ̃ mǝ̃̀ saa, nǝ̃ mǝ̃́ ver ǹ-da gbǝ̃ǝ̃mã gà nã. Mǝ̃n tǝvũnvãnããbà cíé gùú bii nũɔ̃gu bà jiraa bà waaraa liɛga nã, mǝ̃n yagà sáa hi bà-lǝ bà yaga.» 10 Yakubaẃ fǝ̃ǝ̃ ǹ-pã wù nɔ̃fɩnfaagu ǹ-hã Misɩra yuuntigǝ̃ngãw, nã̀ã hlǝ wù kuugɩ nã ǹ-ta.

11 Yisefuẃ ce wù tǝw nǝ̃ wù vũnvãnããba nǝ̃ wù hǝ̃ǝ̃w, bá kãã jiraa Aramsɛsɩ yiɛgu, Misɩra sɔhuhorgǝgɩ nã, nã̀ã hã-ba nǝ̃ hlɔ̃mmã́ ba bà mǝ̃gãmmã, nã́ã́ Misɩra yuuntigǝ̃ngãẁ yáá wùu waa-dǝ nĩĩguu mãã. 12 Yisefuw nã̀ã fǝ̃ǝ̃ ǹ-hiraa nǝ̃ wù tǝw, nǝ̃ wù vũnvãnããba, nǝ̃ bà suɔntaaba min wuur'n cɔ̃mmã ǹ-vaa nǝ̃ bà tãnkuuraa'n nũɔ̃gu.

Yisefuẁ cíé dìí mãã nũm'n bǝ̃ǝ̃gu

13 Nũmmã̀ yáá mã̀ã ji gbǝ̃ǝ̃ lǝrɩ nã ǹ-ce wuurɩ́ ba dɩ̀ síì da curoẃ wuu. Misɩra yiɛntaaba nǝ̃ Kanãã yiɛntaaba min, bá ba bà ku nũmmã. 14 Misɩra yiɛntaaba nǝ̃ Kanãã yiɛntaabà yáá bà jo bà sǝ̃ǝ̃ ble nǝ̃ gùú jinɲã, Yisefuẃ ce bá tuu ɲã̀ min ǹ-ga kra Misɩra yuuntigǝ̃ngã kuugɩ nã. 15 Jinɲã́ juo tã Misɩra yiɛgu nǝ̃ Kanãã yiɛgu. Misɩra yiɛntaabá kãã waa nǝ̃ Yisefuw wà: «Hã-yáà nǝ̃ wuuri yí wuu. Jinɲã̀ mãã ɲã sǝ yì saa, ǹ ji naa ń ya nũmmã́ ko-yáà ǹ yinɲã nã-ì?» 16 Yisefuẃ waa nǝ̃-ba wà: «Jinɲã-ń ba ɲã̀ sǝ ɲì saa, hlã́ã̀-m nǝ̃ ɲã̀ kwasǝnɲinɲã nǝ̃ mǝ̃́ hã-ɲã́ã̀ nǝ̃ wuuri.» 17 Bà yáá nǝ̃ gùú kwasǝnɲinɲã, sǝ̃nsonããba, tũmba, wuramba, ninɲã, nǝ̃ kǝkũmnããba, bá tuu-ɲã ǹ-ga hã Yisefuw nǝ̃ wú hã-ba nǝ̃ wuuri. Gɩ̀-lǝ gɩ̀ blɩrɩ nã, Yisefuẃ hã-ba nǝ̃ wuuri bá wuu, bà kwasǝnɲin'n suɔnãw.

18 Gɩ̀ blɩdaarɩ nã, bá ver ǹ-juo waa nǝ̃ Yisefuw wà: «Yuuntii, yi síì ŋmǝ̃ǝ̃rǝ̃ǝ̃ cɔ̃m nã nǝ̃-n, sulammã nã, yì jinɲã min ɲã̀ tĩ́ɛ̃́, yì kwasǝnɲin yo, ɲã́ nǝ̃ yíi saa-i. Kuɔkuɔ-lǝ, kuu'n sǝ yì saa yì ji hã-n gɩ-ń ba gɩ̀ sǝ̃n wa hãmĩĩ-i nǝ̃ yì hla nǝ̃ yì hlɔ̃mmã. 19 Ǹ ji naa ń ya yí ku ǹ yinɲã nã nnĩĩ-ì? Yi-ń ba yì sɩriɛ, yì hlɔ̃mmã̀ ji ba nnĩĩ-i mǝ̃ǝ̃lǝ̃ǝ̃. Gɩ̀ sùɔ́gɩ nã, hwar-yáà nǝ̃ yì hlɔ̃mmã min nǝ̃ wuuri. Gɩ̀-lǝ gɩ̀ nã hãmĩĩ nǝ̃ yì hlɔ̃mmã, yi ji ba Misɩra yuuntigǝ̃ngã'n mããcemmã nã. Hã-yáà nǝ̃ dudusǝri, yí da ǹ-ba nũmǝ̃nãw, yi síì kurǝǝ, yì hlɔ̃m yo, mã báa ji da ǹ-naa mǝ̃gaatii.» 20 Nũmmã̀ mãã mã̀ yáá mã̀ã ji ca Misɩra yiɛntaaba ǹ-ji car, bà min bá suur bà fugasǝri. Yisefuẁ sǝ̃́ǝ̃lã́ Misɩra yiɛ'n hlɔ̃mmã nnĩĩ-i ǹ-hã Misɩra yuuntigǝ̃ngãw. Misɩra yiɛgɩ́ juo ba Misɩra yuuntigǝ̃ngã'n kuugu. 21 Nǝ̃ Misɩra yiɛntaa-lǝ, Yisefuẃ dii-ba wasǝrɩ nã, ǹ-tuu Misɩra yuugɩ ǹ-ga kra gɩ̀ mlãrɩ nã. 22 Nǝ̃ puruɔntaa'n hlɔ̃m-lǝ, wù sáa sǝ̃ǝ̃ mã̀-lǝ. Nã̀ã wa Misɩra yuuntigǝ̃ngãẁ yáá wùu wa wu ji hiraa nǝ̃ bà-lǝ bà wuuri, gɩ̀ sáa gɩ̀ ji hi bá suur bà hlɔ̃mmã. 23 Yisefuẃ fǝ̃ǝ̃ ǹ-waa nǝ̃ gɩ̀ yiɛntaaba wà: «Kuɔkuɔ-lǝ, mǝ̃̀ mãã mǝ̃̀ jáa sǝ̃ǝ̃-ɲã́ã̀ nǝ̃ ɲã̀ hlɔ̃mmã min ɲí ba Misɩra yuuntigǝ̃ngã bɩgaaba, mǝ̃̀ ji hã-ɲã́ã̀ nǝ̃ dudusǝri ɲí kɔ̃ fugasǝri. 24 Nǝ̃ dũtɩgim'n bǝ̃ǝ̃gu, yúɔlà-mã tiɛmã ndiimã, ɲí hã Misɩra yuuntigǝ̃ngãw nǝ̃ tiɛmã dɩnmã nǝ̃ ɲi tuu tiɛmã nnǝ̃ǝ̃mã. Ɲi ji ce mã̀-i ǹ-dũũ ɲì fugasǝrɩ nã, nã̀ã tuu mã̀ dɩgaliɛ ǹ-val ɲì hla nǝ̃ ɲì tãnkuuraaba nǝ̃ ɲì suɔntaaba min.» 25 Bá siɛ-yǝ wà: «Yì tii, ǹ mãã ǹ jáa ba ǹ kor-yáà, ne yì yiɛgu, hãmĩĩ yo, yi hṹɔ̃lã́ wà yi ji ba Misɩra yuuntigǝ̃ngã'n lwɛba.» 26 Gùú nã-i, Yisefuẃ kra gɩ̀ hlũũgɩ nã bá ba bà wáà-gǝ Misɩra yiɛgu ǹ-ji vaa nǝ̃ jimããgu wà ba-ń tɩgii dũmmã, bá yuɔ-mã tiɛmã ndiimã nã̀ã hiil tiɛmã dɩnmã ǹ-ga hã Misɩra yuuntigǝ̃ngãw. Puruɔntaa'n hlɔ̃m dɩndɩn-i mã̀ sáá Misɩra yuuntigǝ̃ngã'n mǝ̃gãmmã.

Yakubaẁ yun'n faalɩmmã nã Misɩra yiɛgu

27 Isɩrayɛl bluubà yáá bàa kãã jiraa Gosɛngɩ-i, Misɩra yiɛgu. Sùɔ́ gúɔ̀gɩ́ ga juo ba bà kuugu, nǝ̃ bá da tãnkuuraa yo piyɛ̃, fuwɔ ǹ-juo ɲũrũɔ̃ dugɔ.

28 Yakubaẁ cíé bii nũɔ̃sɔ̃ nǝ̃ nɩrhǝ̃ǝ̃l-i Misɩra yiɛgu. Wù biiga min nũɔ̃gɩ̀ yáá gùu vaa nǝ̃ bii gundii nǝ̃ gwaahǝ̃ǝ̃l nǝ̃ nɩrhǝ̃ǝ̃l-i. 29 Wù jáa fǝ̃ǝ̃ wà wu kuuyunɲã píɛlá nã, wú be wù bíɛ́ Yisefuw ǹ-juo waa nǝ̃-yǝ wà: «Nǝ̃-ń ba nã̀ã ne mǝ̃̀ yiɛgu, waasǝ nǝ̃-m^a, nǝ̃ ń pã ǹ nũɔ̃gu nǝ̃-m wà mǝ̃-ń ji ku, n síì dii mǝ̃̀ pĩɛ̃ndi Misɩra yiɛgu. Gùú nã-i, ǹ ji pɩgaa-m nǝ̃ ǹ kusufɩnfaagu nǝ̃ ǹ yalntasǝri. 30 Mǝ̃-ń ji ku, tuu mǝ̃̀ pĩɛ̃ndi ń hlǝ nǝ̃-dǝ Misɩra yiɛgu ǹ-maar ǹ-ga dii-dǝ mǝ̃̀ vũnvãnãã'n pĩɛ̃ndiitãnfierɩ^b nã.» Yisefuẃ siɛ-yǝ wà: «Ǹ wáalá mǝ̃ ji ce kuu wo kuu mãã, mǝ̃̀ ji ce-gǝ.» 31 Isɩrayɛlẃ waa dɩ́ gbǝ̃ǝ̃ nǝ̃-yǝ wà: «Pã ǹ nũɔ̃gu nǝ̃-m wà n ji ce-dǝ.» Yisefuẃ pã wù nũɔ̃gu nǝ̃-yǝ. Isɩrayɛlẃ fǝ̃ǝ̃ ǹ-kuulǝǝ wù guumǝ̃rãkuu'n yuu'n yiɛgu.