Cuu Dulli (Genèse) 46

Isɩrayɛlẁ suro nǝ̃ wù suɔntaaba ǹ-kãã jiraa Misɩra yiɛgu

Isɩrayɛlẃ suro ǹ-tuu hlũũgu nǝ̃ wù nãkrɔɲinɲã min ǹ-ta wù maar Misɩra yiɛgu. Wù gáa hi Bɛrseba lǝri, wú jãn siimã ǹ-hã Dũnnũw, wù tǝ Isiyaga yáá wù bũũ wɩ̀-i. 2 Gùú yuu'n yisuɔgu dàa, Dũnnũẃ pɩgaa wù hla ǹ-ja Isɩrayɛlw, ǹ-waa cɔ̃mmã nǝ̃-yǝ wà: «Yakuba! Yakuba!» Yakubaẃ siɛ-yǝ wà: «Mǝ̃̀ síɛlá.» 3 Dũnnũẃ waa nǝ̃-yǝ wà: «Mã́ã-i Dũnnũw, ǹ tǝ Dũnnũw. Báa ya Misɩra maarɩmmã́ ba nǝ̃ gbǝrsǝri ǹ nã, mǝ̃̀ ga ce ǹ huɔnbiibá ɲũrũɔ̃ gɩ̀ sùɔ́gɩ nã. 4 Mǝ̃n-lǝ mã́ã ji tĩɛ̃-n yí maar Misɩra yiɛgu, nã̀ã ga ver ǹ-jo nǝ̃-n níɛ́ nã. Ǹ ji ku Yisefu nãkruɔgɩ nã-i.»

5 Dɩ̀-lǝ dɩ̀ furũũgɩ nã, Yakubaẃ suro ǹ-hlǝ Bɛrseba lǝri. Isɩrayɛl byanããbá tuu ǹ-dii-yǝ wotoroba nã mãã Misɩra yuuntigǝ̃ngãẁ yáá wùu hã-ba nǝ̃-ba bà waal'n cɔ̃mmã nã, wùú nǝ̃ bà tãnkuuraaba, nǝ̃ bà canããba ǹ-ta. 6-7 Bà yáá nǝ̃ gùú kwasǝnɲinɲã nǝ̃ gùú nãkrɔɲinɲã minw mãã Kanãã yiɛgu, bá kã nǝ̃-ɲã Misɩra yiɛgu. Yakubaẁ sórrá ǹ-ta Misɩra yiɛgu nĩĩgɩ-i, nǝ̃ wù furũntaaba min min, wù byanããba nǝ̃ wù byanãã'n byanããba, wù bisiiba, nǝ̃ wù byanãã'n bisiiba.

Yakuba huɔnbiiba

8 Isɩrayɛl bluubaa mãã bà kã́ã́ Misɩra yiɛgu bàá yiriɛga-i nnĩĩ: Yakubaẁ nǝ̃ wù byanããba. Wù byadĩɛ̃l Wurbɛn, 9 nǝ̃ wù byanããbaa mãã: Enɔkɩw, Paluw, Hɛsɩrɔ̃w, nǝ̃ Karɩmiw. 10 Simeyɔ̃ nǝ̃ wù byanããbaa mãã: Yemuwɛlw, Yamɛ̃w, Ohadɩw, Yakɛ̃w, Soharw nǝ̃ Kanãã yiɛntacijal'n bíɛ́ Sahulw. 11 Levi nǝ̃ wù byanããbaa mãã: Gɛrsɔ̃mw, Kehatɩw nǝ̃ Merariw. 12 Suudaw nǝ̃ wù byanããbaa mãã: Selaw, Perɛsɩw nǝ̃ Seraw. Suuda byanããdaabà yáá bàa naa Kanãã yiɛgu. Bàá yáá Ɛrw nǝ̃ Onãw. Perɛsɩẁ yáá nǝ̃ byanããba hǝ̃ǝ̃l-i, Hɛsɩrɔ̃w nǝ̃ Hamulw. 13 Isɩkarw nǝ̃ wù byanããbaa mãã: Tolaw, Puvaw, Yasubɩw, nǝ̃ Simǝ̃rɔ̃w. 14 Sabulɔ̃ nǝ̃ wù byanããbaa mãã: Serɛdɩw, Elɔ̃w, nǝ̃ Yaleyɛlw. 15 Yakubaẁ díɛ́ gùú byanããbaa mãã nǝ̃ wù ciɛ Leyaw Aram Nɩgǝraagɩ nã, bà-i nĩĩgu, ǹ-pɛ bà tǝ̃ǝ̃ Dinãw nã. Bàá nǝ̃ bà hla'n tãnkuuraaba, bà min bà yáá bà vaa nǝ̃ cwa gur nǝ̃ nũɔ̃sɔ̃ nǝ̃ bà siɛl-i.

16 Gadɩ nǝ̃ wù byanããba mãã: Sifiyɔ̃w, Agiw, Suniw, Ɛsɩbɔ̃w, Eriw, Arodiw nǝ̃ Areliw. 17 Asɛr nǝ̃ wù byanããbaa mãã: Imǝ̃nãw, Isevaw, Iseviw, Beriyaw, ǹ-pya bà tǝ̃ǝ̃ Seraw nã. Beriyaẁ yáá nǝ̃ byanããba hǝ̃ǝ̃lbaa mãã: Hebɛrw nǝ̃ Malɩkiɛlw. 18 Labã yáá wùu hã wù bisĩɛ̃ Leyaw nǝ̃ gùú busulw mãã wú ba wù mããcierw, bà be-yǝ wà Silpa, bà-lǝ bàá byanããba-i nĩĩgu bá nǝ̃ Yakubaw. Bà min bà váalá nǝ̃ cwa nũɔ̃sɔ̃ nǝ̃ nãndien-i.

19 Yakuba ciɛ Arsɛl byanããbaa mãã: Yisefuw nǝ̃ Bɛ̃nsamɛ̃w. 20 Yisefuẃ nǝ̃ wù byanããbaa mãã wù díɛ́-ba Misɩra yiɛgu: Mãnãsew nǝ̃ Efrayimw. Wù díɛ́-ba nǝ̃ wù ciɛ Asenatɩ-i, Onɩ lǝ'n puruɔntii Potifera bisĩɛ̃w. 21 Bɛ̃nsamɛ̃w nǝ̃ wù byanããbaa mãã: Belaw, Bekɛrɩw, Asebɛlw, Geraw, Nããmãw, Ehiw, Wurɔsɩw, Mupimw, Hupimw nǝ̃ Ardew. 22 Yakubaba díɛ́ gùú byanããba nǝ̃ wù ciɛ Arsɛl bà-lǝ bà-i nĩĩgu. Bà min bà váalá nǝ̃ cwa nũɔ̃sɔ̃ nǝ̃ bà nnǝ̃ǝ̃-i.

23 Danw nǝ̃ wù bíɛ́w mãã Husimw. 24 Nɛfɩtali byanããba-i nǝ̃ Yasiɛlw, Guunɩw, Yesɛrw nǝ̃ Silɛmw. 25 Labã yáá wùu hã wù bisĩɛ̃ Arsɛlw nǝ̃ gùú busul, wú ba wù mããcierw, bà be-yǝ wa Bila, bà díɛ́ gùú tãnkuuraaba nǝ̃ Yakubaw bà-i nĩĩgu. Bà min bà yáá nǝ̃ cwa nɩrhǝ̃ǝ̃l-i.

26 Yakuba kã́ã́ Misɩra yiɛgu nǝ̃ wù huɔnbiibaa mãã, bà yáá cwa gwasiɛl nǝ̃ nãndien-i. Bà sáa ja wù byanãã'n canããba. 27 Yisefuẁ díɛ́ byanããba hǝ̃ǝ̃l-i Misɩra yiɛgu. Yakuba huɔnbiiba minw mãã bà yáá jirammã nã Misɩra yiɛgu, bà yáá cwa gwasiɛl nũɔ̃sɔ̃-i.

Yakubaẁ kãã jiraa dàa Misɩra yiɛgu

28 Yakubaẁ yáá wùu tĩɛ̃ Suuda wú tɔ ǹ-ta wù yiga nã, ǹ-da ǹ-kãã kã nǝ̃ Yisefuw Gosɛngu. Yakubaba nǝ̃ wù bɩgaabà gáa piɛ Gosɛngɩ nã, 29 Yisefuẃ suro ǹ-vaa wù wotorow ǹ-ta wù tǝ jǝ̃ǝ̃lǝ̃mmã. Wù jáa yii ǹ-da-yǝ, wú kãã pɩpɩrĩɛ̃ wù nã ǹ-hǝ̃ǝ̃sǝ ɲiɲirãmmã. 30 Isɩrayɛlẃ wú waa nǝ̃-yǝ wà: «Kuɔkuɔ-lǝ, mǝ̃̀ díɛ́-n lɩgǝlɩgǝ nǝ̃ mǝ̃̀ yinɲã nã̀ã fǝ̃ǝ̃ wà ń nìɛ nũmǝ̃nã, mǝ̃̀ ji gbǝ̃ǝ̃ ǹ-ku.»

31 Yisefuẃ fǝ̃ǝ̃ ǹ-waa nǝ̃ wù vũnvãnããba nǝ̃ wù tǝ suɔntaaba wà: «Mǝ̃̀ ji kã ǹ-ga waa nǝ̃ Misɩra yuuntigǝ̃ngãw wà mǝ̃̀ vũnvãnããba nǝ̃ mǝ̃̀ tǝ suɔntaaba minw mãã bà yáá dàa Kanãã yiɛgu, ba júó mǝ̃̀ nãã. 32 Nã̀ã waa ǹ-ja-yǝ wà ɲi val tũmba nǝ̃ wuramba, nã̀ã ba ɲì cii wancendi, nǝ̃ ɲi júó nǝ̃ ɲì kwasǝnɲinɲã nǝ̃ ɲì nãkrɔɲinɲã min. 33 Misɩra yuuntigǝ̃ngãw-ń ga be ǹ-yugu-ɲã́ã̀ wà “Ɲi ce bii mããcem-i?” 34 Wáalà nǝ̃-yǝ wà ɲi cii wancen-i ɲì tǝvũnvãnãã'n tammã ɲì pũmpǝrsǝ'n bǝ̃ǝ̃gu dìi ǹ-ji hi jimããgu. Nǝ̃ wanciinããba nǝ̃ Misɩra yiɛntaabà mãã bà sǝ̃n gaala bà ɲĩɛ̃ nã, gùú ji ce Misɩra yuuntigǝ̃ngãẃ ce ɲí kãã jiraa dàa Gosɛngu.»