Cuu Dulli (Genèse) 45

Yisefuẁ fɩr wù hla ǹ-ja wù vũnvãnããba nǝ̃ wù hǝ̃ǝ̃w

Gɩ̀ sùɔ́gɩ nã, gùú cwaabaa nǝ̃n yáá bà duu Yisefuw nã, wù sáa ji ba wù ji gbǝ̃ǝ̃ ǹ-blǝ wù hla nã bà yinɲã nã, wú ce bà min bá hlǝ. Wù gáa ba wù fɩr wù hla nǝ̃ wù vũnvãnããba wù hǝ̃ǝ̃w gùú nã mãã, wù bluu báà sǝ̃ǝ̃nã, curo'n sáá dàa nǝ̃-ba. 2 Yisefuẃ kãã nǝ̃ǝ̃ yallɩ nã, ǹ-ba wù kaal wù higinãã, fuwɔ Misɩra yiɛntaabá nɔ̃. Cãwan díɛ̀, dɩ́ kãã hi Misɩra yuuntigǝ̃ngã'n suɔgu. 3 Yisefuẃ fǝ̃ǝ̃ ǹ-waa nǝ̃ wù vũnvãnããba nǝ̃ wù hǝ̃ǝ̃w wà: «Mã́ã-i Yisefuw! Nã́ã́ mǝ̃̀ tǝw nàa nũmǝ̃nã dàa dàa-ì?» Wù vũnvãnããba nǝ̃ wù hǝ̃ǝ̃w bà gáa nɔ̃ dɩ̀-lǝ, gbǝrsǝrɩ́ blǝ-ba fuwɔ bà sáa ji ba bà ji gbǝ̃ǝ̃ ǹ-waa cɔ̃m.

4 Gɩ̀-i, Yisefuẃ waa nǝ̃-ba: «Kúganã̀ã mǝ̃̀ nã!» Bá fǝ̃ǝ̃ ǹ-kuganãã wù nã. Wú fǝ̃ǝ̃ ǹ-waa nǝ̃-ba wà: «Mǝ̃n-lǝ mã́ã-i, ɲì hǝ̃ǝ̃ Yisefuw mãã ɲi súurá-yǝ ǹ-hã bá jo nǝ̃-yǝ Misɩra yiɛgu. 5 Dũnnũẁ yáá wù caa wú kor coyun-i, gùú cíé wú tĩɛ̃-m mǝ̃́ ta ɲì yiga nã. Bláá ya mǝ̃̀ suurɩm'n cɔ̃mmã́ ca ɲì nã, ɲí jiraa ǹ-ba ɲì hã ɲi hla nǝ̃ yuɔrɔmmã. 6 Biiga hǝ̃ǝ̃l gà-i nnĩĩ, nũmmã́ nǝ̃ yanɲã min nã, nǝ̃ biiga ndiigaa mãã gà duu nã, sɩra'n síì ce, dũblɩ'n síì tuu ɲũũrũũgu. 7 Dũnnũẁ tĩ́ɛ̃lã́ mǝ̃́ ta mǝ̃̀ jo níɛ́ nã ɲì yiga, ɲi ji da ǹ-ba nũmǝ̃nãw, nǝ̃ ɲì sǝ̃ǝ̃nã cindɩ́ da ǹ-tar ǹ-hlǝ nũm mã́ã̀ nã, gɩ́ da ǹ-ba cɔ̃ngǝ̃ngãmmã ɲì saa.» 8 «Ɲimãã sáa jo nǝ̃-m níɛ́ nã, Dũnnũẃ júó nǝ̃-m. Wùú cíé mǝ̃́ juo ba nã́ã́ Misɩra yuuntigǝ̃ngã'n tǝ-i, wùú Dũnnũ kárrá-m Misɩra yuuntigǝ̃ngã'n suɔntaa'n yuugɩ nã, nã̀ã fǝ̃ǝ̃ ǹ-ce mǝ̃́ ba Misɩra yiɛntaabà min yuugɩ nã. 9 Yindiɛ, vérrà kaliɛ ɲí kã ɲi ga waa nǝ̃ mǝ̃̀ tǝw wà wù bíɛ́ Yisefu tĩɛ̃r-i nnĩĩ: wà Dũnnũw gáa ce wú ba Misɩra yiɛgɩ min yuuntiiw. Wà wú jo wù nãã wù gbɩraanã wu báa yiilǝǝ, 10 ǹ-ji jiraa wù tuɔra, Gosɛngu nǝ̃ wù tãnkuuraaba, nǝ̃ wù huɔnbiiba, nǝ̃ wù kwasǝnɲin yo, nǝ̃ wù nãkruɔɲinɲã min. 11 Wà nũmmã yánã́ã biiga ndii hlo, nǝ̃ wù-lǝ wu ji hiraa nǝ̃ wù wuuri, wùú nǝ̃ wù suɔntaaba nǝ̃ wù kwasǝnɲin yo, kuu'n báa ji da ǹ-naa bà saa.» 12 Yisefuw, nã̀ã fǝ̃ǝ̃ ǹ-waa nǝ̃-ba wà: «Ɲimãã nǝ̃ ɲì hla, ɲi díɛ́-m nǝ̃ ɲì ɲinɲã, wà mǝ̃̀ cãwanĩɛ̃ga hlǝ́rá mã́ã hla'n nũɔ̃gɩ nã-i, mǝ̃̀ hǝ̃ǝ̃ Bɛ̃nsamɛ̃ yo, wù díɛ́-dǝ nǝ̃ wù yinɲã. 13 Kã́ã̀ ɲi ga waa ɲí ja mǝ̃̀ tǝw mǝ̃n mãã nǝ̃ gùú nũɔ̃sǝn wanhirammã Misɩra yiɛgu. Ɲi díɛ́ cɔ̃m wo cɔ̃m, táalà-mã ɲí ja-yǝ, nǝ̃ ɲí ver ɲí jo nǝ̃-yǝ kaliɛ níɛ́ nã.»

14 Yisefuẃ fǝ̃ǝ̃ ǹ-juo blǝ Bɛ̃nsamɛ̃w, bá pɩpɩrĩɛ̃ bà ɲĩɛ̃ ɲiɲirãmmã nã. 15 Yisefuẃ nã̀ã fǝ̃ǝ̃ ǹ-ba wù taa wù blǝ wù vũnvãnãã yo bá ba bà pɩpɩrĩɛ̃ bà ɲĩɛ̃ nã bà denden nǝ̃ ɲiɲirãmmã. Dɩ̀-lǝ dɩ̀ furũũgɩ nã, bá juo ba bà wanãã nǝ̃-yǝ.

Misɩra yuuntigǝ̃ngãẁ be Yakubaẃ kãã ba Misɩra yiɛgu

16 Misɩra yuuntigǝ̃ngãẁ gáa nɔ̃ wà Yisefu vũnvãnããbaa bá nǝ̃ wù hǝ̃ǝ̃w, bá júó Misɩra yiɛgu, gɩ́ dwal wù nã, wùú nǝ̃ wù tuɔrataaba min. 17 Wú waa nǝ̃ Yisefuw wà: «Waa nǝ̃ ǹ vũnvãnããbaa bá nǝ̃ ǹ hǝ̃ǝ̃w wà bá hyãl bà kǝkũmnããba nǝ̃ bà tuuyaga, ǹ-ver ǹ-maar Kanãã yiɛgu, 18 ǹ-ga tuu bà tǝw nǝ̃ bà suɔntaaba min ǹ-jo mǝ̃̀ nãã níɛ́. Mǝ̃̀ ji kra-ba Misɩra nũɔ̃sǝn sɔhuhorgǝgɩ nã, gùú sùɔ́gɩ nã mãã bà ga ba bà da Misɩra ɲããhuhorɩnɲã bà wuu.» 19 «Nǝ̃ ń waa nǝ̃-ba wà bá tuu wotoroba nhlíɛ̀, ǹ-ga tuu bà canããba, bà tãnkuuraaba, nǝ̃ bà tǝw ǹ-jo nǝ̃-ba. 20 Bà mãã bà ga ta nǝ̃ gùú ɲinɲãã mãã ɲã́ ba Kanãã yiɛgu, ba báa wa bá ya ɲã̀ cɔ̃mmã́ jaa-ba, nã̀ã wa Misɩra yiɛgɩ min nũɔ̃sǝn ɲããhuhorɩnɲã ji ba bàá ɲin-i.»

21 Misɩra yuuntigǝ̃ngãẁ wáalá dìí mãã, Isɩrayɛl tãnkuuraabá ce-dǝ nĩĩgu. Misɩra yuuntigǝ̃ngã'n nũɔ̃ drɔ, Yisefuẃ hã-ba nǝ̃ wotoroba nǝ̃ wuuri, ba ga ba bà wuu bà waa hlũũgu. 22 Nã̀ã hã curo wo curo nǝ̃ kuulaaflãmw dɩn, nǝ̃ Bɛ̃nsamɛ̃-lǝ, wú hã wù-lǝ nǝ̃ kuulanãmba ndii, nã̀ã piɛ jinɲã, jiibii twiga hǝ̃ǝ̃l trãngwaahǝ̃ǝ̃l (300). 23 Wú piɛ Misɩra ɲããhuhorɩnɲã, kǝkũmlwɛ nũɔ̃sɔ̃w drɔ, wà ba ga hã wù tǝw, nã̀ã tuu dũmmã, burw, nǝ̃ wuriɛdaga ǹ-piɛ kǝkũm nǝ̃nũɔ̃nãã nũɔ̃sɔ̃w drɔ wà ba ga hã wù tǝw ba wù wuu wù wáà hlũũgu. 24 Yisefuẃ nã̀ã fǝ̃ǝ̃ ǹ-hã-ba nǝ̃ hlũũgu, nã̀ã waa nǝ̃-ba wà: «Ɲi báa ga wà ɲí gãnãã hlũũgɩ nã.»

25 Bá suro ǹ-hlǝ Misɩra yiɛgu, ǹ-kãã hi bà tǝ Yakubaw Kanãã yiɛgu. 26 Bá kãã taa-dǝ ǹ-ja-yǝ wà: «Yisefuẃ nǝ̃ nũmǝ̃nãw, wù-lǝ wɩ̀-i Misɩra yuuntiiw.» Yakubaẁ hiɛga sáa suro, nã̀ã wa wù sáa hũɔ̃ bà cãwandi. 27 Yisefuẁ wáalá cɔ̃m wo cɔ̃m nǝ̃-ba, bá taa-mã ǹ-ja-yǝ. Wù gáa da wotorobaa mãã wù biɛẁ tĩ́ɛ̃lã́-ba wà ba juo tuu-yǝ nǝ̃-ba, wù hiɛgá juo jiraa. 28 Isɩrayɛlẃ fǝ̃ǝ̃ ǹ-waa wà: «Yindiɛ-lǝ, gɩ̀ sǝ nǝ̃ cincaruu, mǝ̃̀ bíɛ́ Yisefuẃ nàa nũmǝ̃nã, mǝ̃̀ ji kãã da-yǝ nã̀ã fǝ̃ǝ̃ ǹ-ji ku.»