Cuu Dulli (Genèse) 44

Yisefuẁ dǝ̃ǝ̃ wù vũnvãnããba ǹ-ne

Gɩ̀ furũũgɩ nã, Yisefuẃ waa nǝ̃ wùú mãã wù suɔ'n mããcem'n yuugɩ nã wà: «Dii dũmmã bluuba bà bɩgatãnããbá yurǝǝ ń hã-ba. Bà mãã bà ji gbǝ̃ǝ̃ ǹ-tuu gùú dũmmãã mãã, hã-ba nǝ̃-mã. Nǝ̃ ń dii curo wo curo'n jinɲã wù bɩgatĩɛ̃ nũɔ̃gɩ nã. 2 Wuusaal'n bɩgatĩɛ̃ nũɔ̃gɩ nã, nǝ̃-ń dii, dũm'n solli, ń dii mǝ̃̀ guuɲũɔ̃kuuguu mãã bàa ce-gǝ nǝ̃ kwaplaari ń pya nã.» Yisefuẁ wáalá cɔ̃m wo cɔ̃m, wù suɔ'n mããcem'n yuuntiiẃ ce-mã nĩĩgu.

3 Gɩ̀ taakaal taajãlũũgɩ nã, bá hã-ba nǝ̃ hlũũgu, bá ta nǝ̃ bà kǝkũmnããba. 4 Bà gáa hlǝ lǝrɩ nã, bà sáa hi ǹ-hal, Yisefuẃ waa nǝ̃ wù suɔ'n mããcem'n yuuntii wa: «Suro ń ɲǝ̃ǝ̃ ń duu bluu báá nã, nǝ̃-ń ga hi-ba, ń waa nǝ̃-ba wa: “Bii cíé ɲí ba ɲì pã diifɩnfaari nǝ̃ diibɩblaari? 5 Mǝ̃̀ tii'n guuɲũɔ̃kuugɩ̀ sǝ ɲimãã saa sǝ-ì? Wù ɲũɔ̃ nǝ̃ gɩ̀-i, nã̀ã ba wù sii nǝ̃-gǝ. Ɲi cíé diibɩblar dɛ.”»

6 Suɔ'n mããcem'n yuuntiiẃ sɔ̃ ǹ-kãã hi-ba nã̀ã waa-dǝ nǝ̃-ba. 7 Yisefu vũnvãnããba, bá nǝ̃ wù hǝ̃ǝ̃ẁ, bá waa nǝ̃-yǝ: «Bii cíé yì tiiẃ ba wù waa nĩĩgu? Dũnnũw báa ya yí ce dɩ̀-lǝ! 8 Yi yáá yìi da gùú jinɲãã mãã yì bɩgatãnããba nã Kanãã yiɛgu, yi vérrá ǹ-juo hã-n nǝ̃-ɲã. Hamã nã-i yí ba yì ji ŋmã kwaplaari yindagǝ nã sãnãw ǹ yuuntii'n suɔgu? 9 Guuɲũɔ̃kuu gúɔ̀gɩ-ń da gùú tii'n wariɛga nã, ń ko-yǝ, nǝ̃ ń blǝ hãmĩĩ ń ce yí ba ǹ lwɛba.» 10 Biɛ wáá fǝ̃ǝ̃ ǹ-waa wà: «Ɲi wáalá-dǝ gùú tammã, yi ji ce-dǝ nĩĩgɩ-i. Gɩ-ń da gùú tii saa, wùú ji ce mǝ̃n wabiɛw, nǝ̃ mǝ̃́ nǝ̃nǝ̃ǝ̃ ɲì dɩgaliɛ nã wú ta.» 11 Bà min bá gǝǝraa ǹ-hyar bà bɩgatãnããba nã̀ã fɩr bà nɔ̃nɲã. 12 Biɛẃ tuu-gǝ bà vũnvũɔ̃w nã, ǹ-ne bɩgatãnããba ǹ-ga kãã faal wuusaal'n yow nã. Guuɲũɔ̃kuugɩ́ kãã da Bɛ̃nsamɛ̃ bɩgatĩɛ̃ kusunã.

13 Bà hiɛgá gaala nã, fuwɔ gɩ́ ce bá fa ǹ-taalaa bà kuulanãmba nã, nã̀ã tuu bà bɩgatãnããba ǹ-piɛ bà kǝkũmnããba drɔ, ǹ-ver ǹ-kã lǝ'n kusuugɩ nã. 14 Suudabá ver nǝ̃ wù vũnvãnããbaa bá nǝ̃ wù hãmba ǹ-kãã hi Yisefu dàa wù suɔgu. Bà min bá duruu ǹ-kuulǝǝ wù yigagɩ nã. 15 Yisefuẃ waa nǝ̃-ba: «Bincɔ̃m nã-i ɲí ce díɛ̀? Ɲi sáa fǝ̃ǝ̃ wa curow mãã mǝ̃n tammã, wú gbǝ̃ǝ̃ wù sii wù da cɔ̃mmã halbaa-ì?» 16 Suudaẃ waa wà: «Yì tii, cãwandaarɩ̀ sǝ hãmĩĩ saa. Yi ji waa hadɩ-i ǹ-da diidwaldǝdi? Dũnnũ cúrúɔ yì gaacĩɛ̃yaga nã taasǝ̃ǝ̃nǝ̃ǝ̃gu. Guuɲũɔ̃kuugɩ̀ díɛ́ gùú tiiw mãã wù saa, ǹ-pya hãmĩĩ nã, yì min yi ji ba yì tii'n lwɛba.» 17 Yisefuẃ waa nǝ̃-ba wà: «Dũnnũw báa ya mǝ̃́ ce dɩ̀-lǝ. Guuɲũɔ̃kuugɩ̀ díɛ́ gùú tii saa, wùú ji ba mǝ̃̀ wabiɛw. Nǝ̃ ɲimãã vérrà ɲí kũũ duɔle ɲì tǝ suɔgu.»

18 Suudaẃ kuganãã Yisefuw nã, nã̀ã waa nǝ̃-yǝ: «Mǝ̃̀ tii, yíì nǝ̃ Misɩra yuuntigǝ̃ngãw, ɲí nǝ̃ sùɔ́gɩ dɩn-i, mǝ̃n cíé ǹ mããcier-i, ce mǝ̃̀ kafal nǝ̃ ń ya mǝ̃́ waa cɔ̃mmã dɩn, mǝ̃̀ cirǝ̃ǝ̃ cirǝ̃ǝ̃ ǹ nã-i, n báa ya gɩ́ ca ǹ nã. 19 Mǝ̃̀ tii, yi dĩ́ɛ̃lã́ ǹ-jo nìɛ gùú nã mãã, ǹ yúgurǝ́-yáà wà yì tǝw-ń ba dàa nũmǝ̃nãw, nǝ̃ yi-ń ba dàa nǝ̃ yì hǝ̃ǝ̃diɛ. 20 Hãmĩĩ tii, yi wáalá nǝ̃-n wà yì tǝw nàa, nǝ̃ wu vǝ̃́ǝ̃lã́, nã̀ã waa nǝ̃-n wà yì hunper yo, wú nàa. Yì tǝẁ díɛ́-yǝ wù byanvãsǝrɩ nã-i. Bà ɲũũnã kuugɩ nã, bà ya cwaaba hǝ̃ǝ̃l-i, vũnvãyoẁ náalá nǝ̃ wú yanãã nǝ̃ wù dɩn. Wù cɔ̃mmã̀ dwal wù tǝw nã. 21 Gɩ̀ sùɔ́gɩ nã, ǹ wáalá nǝ̃-yáà, hãmĩĩ mãã ǹ mããcieraaba wà yí jo nǝ̃-yǝ ń ji da-yǝ. 22 Hãmĩĩ tii, yí waa nǝ̃-n wà tãnkuur wáà síì gbǝ̃ǝ̃ ǹ-hal wù tǝw nã, yi-ń pyar-yǝ, wù tǝẁ ga ku. 23 Gɩ̀-i, ń fǝ̃ǝ̃ ǹ-waa nǝ̃-yáà wà yi-ń ba yì sáa jo nǝ̃ yì hǝ̃ǝ̃w, ń sǝ̃n caa ń da-yáà nǝ̃ ǹ yinɲã. 24 Gɩ̀ sùɔ́gɩ nã, yi gáa ver, yí kãã taa-dǝ ǹ-ja yì tǝw ǹ mããcierw. 25 Gɩ̀ furũũgɩ nã, yì tǝẃ waa nǝ̃-yáà wà yí ver ǹ-ji sǝ̃ǝ̃ dũmdamã. 26 Yi waa nǝ̃-yǝ wà yi síì gbǝ̃ǝ̃ ǹ-jo Misɩra yiɛgu, nã́ã́ yi sǝ nǝ̃ yì hǝ̃ǝ̃w min nã. Wù-lǝ wu-ń ba dàa nǝ̃-yáà, yi ga jo. Wù-lǝ wu-ń ba wù sǝ nǝ̃ wù kã, yi síì gbǝ̃ǝ̃ ǹ-juo hiraa Misɩra yuuntii'n yigagɩ nã. 27 Mǝ̃̀ tǝw, wùú mãã ǹ mããcierw, wú waa nǝ̃-yáà wà yi fǝ̃́ǝ̃lã́ wà wù ciɛ Arsɛl húulá pũmpɩrbiiba hǝ̃ǝ̃l-i ǹ-hã-yǝ. 28 Wà wù dɩndiɛw náalá wù saa, wu sáa ji da-yǝ hlo, wà dɩ́ kaalaa jerguyodiɛ fla ǹ-jãrãã wù nã. 29 Wà, yi-ń juo tuu wáá yo wú hal wù nã, nǝ̃ diibɩblardaarɩ́ kãã hi-yǝ, wà wu vǝ̃́ǝ̃lã́ ǹ-hi gùú sùɔ́gu nnĩĩ, wà hujãncɔ̃mmãã ji ce wú ku.» 30 «Kuɔkuɔ-lǝ, mǝ̃̀ tii, mǝ̃n síì ver ǹ-kũũ ǹ-kã mǝ̃̀ tǝw nãã, ǹ mããcierw, nǝ̃ biɛmpɩr wáà ba wù sɩraa nǝ̃-yáà. Wù cɔ̃mmã́ nǝ̃ mã̀ã gbǝ̃ǝ̃ wù nã ǹ-car. 31 Wu-ń ga da yì kã nǝ̃ wù sɩraa, wù vǝ̃́ǝ̃lã́ ǹ-hi gùú sùɔ́gu mãã nnĩĩ, hujãncɔ̃mmãã ga ce wú ku. 32 Mã́ã mãã ǹ mããcierw, mǝ̃̀ plã mǝ̃̀ nũɔ̃gu nǝ̃ mǝ̃̀ tǝw pũmpɩr wáà cɔ̃mmã nã. Wà mǝ̃-ń ba mǝ̃̀ sáa ver ǹ-kũũ nǝ̃-yǝ ǹ-ji hã-yǝ, gɩ̀ diicĩɛ̃rǝ ji duruu mã́ã drɔ-i fɩraa.» 33 «Mǝ̃̀ cirǝ̃ǝ̃ cirǝ̃ǝ̃ ǹ nã, yáalà pũmpɩrẃ kã bá ta nǝ̃ wù vũnvãnããba, nǝ̃ mǝ̃n ba ǹ wabiɛw wù-lǝ wù suɔnãw. 34 Mǝ̃̀ síì gbǝ̃ǝ̃ ǹ-ver ǹ-kã mǝ̃̀ tǝw nãã, nã́ã́ yi sǝ yì min nǝ̃ pũmpɩrw, mǝ̃̀ sɩga gbǝ̃ǝ̃ ǹ-ne mǝ̃̀ tǝ hujãncɔ̃m'n yigagu.»