Cuu Dulli (Genèse) 43

Yakubaẁ hũɔ̃ ǹ-ya Bɛ̃nsamɛ̃ẃ kã ba ta

Nũmmã́ juo ba mã̀ ɲirǝ̃ǝ̃ mã̀ piɛ kuu Kanãã yiɛgu mã̀ maar. 2 Bà yáá bàa jo nǝ̃ gùú dũmmã ǹ-hlǝ Misɩra yiɛgu, mã̀ gáa tã gùú nã, bà tǝ Yakubaẃ waa nǝ̃-ba: «Vérrà ɲí kã ɲi ga sǝ̃ǝ̃ dũmdamã hlo.» 3 Suudaẃ waa nǝ̃-yǝ: «Misɩra yuuntiiẁ wáalá dɩ́ gbǝ̃ǝ̃ wà wu sǝ̃n caa wú da-yáà nǝ̃ wù yinɲã, nã́ã́ yi sǝ yì min nǝ̃ yì hǝ̃ǝ̃w. 4 Nǝ̃-ń hũɔ̃ wà yì hǝ̃ǝ̃w ji kã yí ta-lǝ, gɩ̀-lǝ yi ji kãã sǝ̃ǝ̃ dũmmã ǹ-ji hã-n. 5 Nǝ̃ nǝ̃-ń hla dɩ̀-lǝ, hãmĩĩ yo, yi síì kã. Nã̀ã wa biɛẁ yáá wùu waa wà wu sǝ̃n caa wú da-yáà nǝ̃ wù yinɲã, nã́ã́ yi sǝ yì min nǝ̃ yì hǝ̃ǝ̃w.» 6 Isɩrayɛlẃ waa nǝ̃-ba wà: «Danii ɲí blǝ ǹ-ce-m nǝ̃ diibɩblar díɛ̀ tuugu? Hamã nã-i ɲí waa nǝ̃ biɛw, wà ɲì hǝ̃ǝ̃diɛ nìɛ?» 7 Bá siɛ-yǝ wà: «Biɛ wáà yáá wùu ga ba wù ce yugummã yì suɔntaa'n cɔ̃mmã nã wù sǝ̃n hiraa. Wà yì tǝẃ nàa nũmǝ̃nã-ì? Wà yí nàa nǝ̃ hǝ̃ǝ̃diɛ-ì? Wù yúgurǝ́-yáà nǝ̃ gàá, yi síɛlá-yǝ nǝ̃ gà-i. Hãmĩĩ yáá yìi naa yí fǝ̃ǝ̃ wà wu ga wa yí kã nǝ̃-yǝ gɩ̀ sùɔ́gɩ nã-ì?»

8 Suudaẃ waa nǝ̃ wù tǝw: «Tɩtii, ya mǝ̃́ kã nǝ̃ tãnkuurw. Yi-ń ba yì caa yí ba nũmǝ̃nãw, yi báa ji kurǝǝ nǝ̃ yì tãnkuuraaba, nǝ̃ halle yíì yo, sórrà yí ta! 9 Mǝ̃n-lǝ mã́ã ga hiraa nǝ̃ wù yuunã cɔ̃mmã, ǹ ji yugu wù cɔ̃mmã mã́ã saa-i. Mǝ̃-ń ba mǝ̃̀ sáa ver ǹ-jo nǝ̃-yǝ, mǝ̃-ń ba mǝ̃̀ sáa juo hã-n nǝ̃-yǝ, gɩ̀ diicĩɛ̃rǝdɩ̀ ji duruu mã́ã drɔ-i fɩraa. 10 Yi nã́ã̀ ba yi sáa sɩrĩɛ̃, kuɔkuɔ yi nã́ã̀ wáà Misɩra yiɛgu ǹ-da yin hǝ̃ǝ̃l yo.» 11 Isɩrayɛlẃ waa nǝ̃-ba: «Gɩ̀ mãã yì nãkruɔ cɔ̃m sǝ, túulà yì lǝ'n ɲããfɩnfanɲãã mãã ɲì sǝ̃n da gɩ̀ sùɔ́gɩ nã, ɲi ga bũũ biɛ wáà. Túulà saldarǝ fiyãã, nǝ̃ kɩmmãã mãã mã̀ hũũgɩ dwal, nǝ̃ tãcemǝ̃gãmmã, nǝ̃ pisitasɩw nǝ̃ amãndɩ kuɔyaga. 12 Ɲi gáa jur ɲì bɩgatãnããba ǹ-da gùú jinɲã, vérrà ɲí kã nǝ̃ ɲã̀ min, nǝ̃ ɲí tuu jindaɲã hlo ɲí pya nã. Bà yáá bàa pe ǹ-dii-ɲã ga ba. 13 Yindiɛ, máarà nǝ̃ ɲì hǝ̃ǝ̃w min nã biɛ wáà nãã. 14 Fãngããgɩmintii Dũnnũẃ dii ɲì hujãndi biɛ wáà hiɛga nã, wu ga ya ɲí jo nǝ̃ Simeyɔ̃ nǝ̃ Bɛ̃nsamɛ̃ yo. Nǝ̃ mǝ̃n-lǝ, mǝ̃-ń ba mǝ̃̀ ji naalaa mǝ̃̀ tãnkuuraaba nã, mǝ̃̀ ji naalaa bà nã-i.»

Yisefuẁ da wù vũnvãnããba yin hǝ̃ǝ̃lnãw

15 Yisefu vũnvãnããba nǝ̃ wù hǝ̃ǝ̃w, bá fǝ̃ǝ̃ ǹ-tuu tĩɛ̃yaga, nã̀ã ver ǹ-tuu dũm'n soldarǝ hlo, ǹ-ta bà maar bà min, nǝ̃ Bɛ̃nsamɛ̃ yo Misɩra yiɛgu, Yisefu nãã.

16 Yisefuẁ gáa da-ba, bà min nǝ̃ Bɛ̃nsamɛ̃w, wú waa nǝ̃ wùú mãã wù suɔ'n mããcem'n yuugɩ nã wà: «Jãn nǝ̃ bluu báà suɔgɩ nã, nǝ̃ ń ko kwasǝnkuudagǝ, mǝ̃̀ ji kã yí wuu bǝciiwuuri yì min nǝ̃-ba.» 17 Yisefuẁ wáalá-dǝ gùú tuugu, biɛ wáá ce-dǝ nĩĩgu. Wú kã nǝ̃-ba Yisefu kuu'n yiɛgu. 18 Bà gáa da bàa jãn nǝ̃-ba Yisefu kuu'n yiɛgu, gbǝrsǝrɩ́ mǝ̃gaa ǹ-blǝ-ba, bà-lǝ bá ba bà ne wa ba díɛ́ gùú jinɲãã mãã bà bɩgatãnããba nã, dĩɛ̃lãm nã jollɩ nã, wà ɲã̀ã́ cɔ̃m nã-i, bá ba bà jo bà ji tɔ ǹ-duruu bà drɔ ǹ-blǝ-ba, bà-lǝ nǝ̃ bà kǝkũmnãã yo bà min, ǹ-ce-ba lwɛba. 19 Bà gáa hi dũndɔ̃l'n nũɔ̃gu, bá waa nǝ̃ wùú mãã Yisefu suɔ'n mããcem'n yuugɩ nã wa: 20 «Yuuntii, ce yì kafal, yi híí ǹ-juo sǝ̃ǝ̃ dũmmã ǹ-da níɛ́ nã.» 21 Yì verɩmmã nã, yi yáá yì saa yí cɔ gùú sùɔ́guu hlũũgɩ nã, yí cugur yì bɩgatãnããba, curo wo curo, wú da wù jinɲã ɲã̀ tantammã nã, wù bɩgatĩɛ̃ nũɔ̃gɩ nã. Yi vérrá ǹ-jo nǝ̃ gɩ̀ jinɲã min nã. 22 Yi sáa fǝ̃ǝ̃ gùú tii nǝ̃n díilá-ɲã yì bɩgatãnããba nã, yi júó nǝ̃ jindaɲã hlo, yi ji sǝ̃ǝ̃ wuuri. 23 Biɛẃ waa nǝ̃-ba: «Sã́rrã̀ ɲì hiɛga nã, bláá jã cɔ̃m. Ɲimãã, nǝ̃ ɲì tǝw, ɲi mãã ɲì bũũ gùú Dũnnũw mãã, wù-lǝ wùú díilá jinɲã ɲì bɩgatãnããba nã, ǹ-hã-ɲã́ã̀, nã̀ã wa bà hlã mã́ã̀ nǝ̃ ɲì dũm'n solli.» Nã̀ã fǝ̃ǝ̃ ǹ-hiil Simeyɔ̃ yo wú kã bà nãã. 24 Biɛ wáà nã̀ã fǝ̃ǝ̃ ǹ-kã nǝ̃ Yisefu vũnvãnããba nǝ̃ wù hǝ̃ǝ̃w duugɩ nã, ǹ-ga hã-ba hũmmã bá saar bà vyanɲã, nã̀ã hã bà kǝkũmnããba nǝ̃ hĩɛ̃gu bá wuu. 25 Yisefu vũnvãnããba bá wù hǝ̃ǝ̃w, bà mãã bà yáá bàa fǝ̃ǝ̃ wà ba ga wuu wuuri bà min nǝ̃ Yisefuw, bá tɩgɩnǝ̃ǝ̃ ɲinɲã nã mãã bà yáá bàa jo nǝ̃-ɲã bà ji bũũ-yǝ ǹ-kra ǹ-ba bà fennãã wù jollɩ nã.

26 Yisefuẁ gáa juo hi wù suɔgu, bá tuu gɩ̀ ɲinɲã ǹ-hã-yǝ, nã̀ã kuulǝǝ ǹ-tɩsɩnǝ̃ǝ̃ bà yunɲã nã fuwɔ ɲũũrũũgu. 27 Wú fyãn-ba nã̀ã waa wà: «Ɲi wáalá ɲì tǝ byanvũɔ̃'n cɔ̃mmãã mãã, wú nàa nũmǝ̃nã-ì? Wú nàa hinnǝ̃-ì?» 28 Bá waa nǝ̃-yǝ: «Ǹ mããcierw mãã hãmĩĩ tǝw, wú nàa hinnǝ̃, wú nàa nũmǝ̃nã.» Nã̀ã fǝ̃ǝ̃ ǹ-kuulǝǝ ǹ-bũũ-yǝ.

29 Yisefuẃ yiil ǹ-ne wù hǝ̃ǝ̃ Bɛ̃nsamɛ̃w, wù ɲũ bíɛ́w, wú waa wà: «Ɲì hǝ̃ǝ̃w mãã ɲi wáalá wù cɔ̃mmã nǝ̃-m, wɩ̀-i nnĩĩ nã-ì?» Nã̀ã fǝ̃ǝ̃ ǹ-waa nǝ̃-yǝ: «Dũnnũẃ pɛ ǹ nã mǝ̃̀ hǝ̃ǝ̃.» 30 Yisefuẁ gáa da wù hǝ̃ǝ̃w, wù yinɲã́ kaa ɲiɲirãmmã, wú gǝǝraa ǹ-suro ǹ-jãn wù docɔgǝgɩ nã, ǹ-kãã ba wú kaal. 31 Dɩ̀-lǝ dɩ̀ furũũgɩ nã, wù gáa saar wù yigagu, ǹ-ver ǹ-jo bà nãã, wú gbǝ̃ǝ̃ ǹ-hiil dìí nǝ̃n yáá wù kusuugɩ nã, nã̀ã ce bá hiil wuuri. 32 Bá juo kra Yisefu wuurɩ nã dɩ̀ dǝ, wù vũnvãnãã'n dǝl yo dɩ̀ dǝ. Misɩra yiɛntaabaa mãã bà yáá bàa jar-ba wuurɩ nã, bàá yo, bá jiraa ǹ-ba bà wuu bà dǝ. Misɩra yiɛntaabà sáá bà da bà wuu wuuri bà min Hebruba. Bà sɩgaɲǝ̃rǝ̃ǝ̃ yáá bà hlũũgɩ nã. 33 Yisefu vũnvãnããbà nǝ̃ wù hǝ̃ǝ̃w, bà yáá bàa jiraa ǹ-vĩĩ-yǝ, bà yáá bàa ce bá jiraa ǹ-duu bà ɲĩɛ̃ nã, ǹ-tuu vũnvãtii nã, ǹ-ga faal wuusaalw nã. Dɩ́ mǝ̃gaa ǹ-tugulǝǝ bà nã, bá ba bà ne bà ɲĩɛ̃. 34 Bà yáá bàa hã wù-lǝ nǝ̃ gùú wuurii mãã, wú ce bá hiil dìí nã, ǹ-hã-ba, nǝ̃ Bɛ̃nsamɛ̃ dǝl-lǝ, wú ce bá hiil dɩ̀-lǝ dɩ́ ba dɩ̀ ta wù vũnvãnãã'n dǝlli yin ndii! Bá ɲũɔ̃ bà min nǝ̃ Yisefuw ǹ-ji fǝ̃ǝ̃ wà ba ɲṹɔ̃lã́.