Cuu Dulli (Genèse) 50

Yakuba blaa'n cɔ̃mmã

Yakubaẁ jáa ku, Yisefuẃ kãã duruu wù pĩɛ̃ndii drɔ, ǹ-juo piɛ wù sãnũũgu wù tǝ kuugɩ nã, nã̀ã ba wù kaal. 2 Nã̀ã waa nǝ̃ tãcieraabaa mãã wù mããcemmã nã, wà bá mǝ̃gaa wù tǝ pĩɛ̃ndi bà da ǹ-kãã dii-dǝ. Bá fǝ̃ǝ̃ ǹ-mǝ̃gaa Isɩrayɛl pĩɛ̃ndi. 3 Ǹ-vaa nǝ̃ bà hlũũgu, tãcieraabà cíé bãn gwaahǝ̃ǝ̃l wɩ̀-i ǹ-ba bà ha-dǝ nǝ̃ latɩkolonɔ̃mmã dɩ báa ji da ǹ-bǝ̃ǝ̃lǝ̃ǝ̃. Misɩra yiɛntaabà cíé bãn gwasiɛl nũɔ̃sɔ̃-i Yakuba blaagɩ nã.

4 Bà jáa ce Yakuba blaagu ǹ-tã, Yisefuẃ waa nǝ̃ Misɩra yuuntigǝ̃ngã'n cokuganãmba wà: «Ɲi-ń ba ɲĩ̀ĩ ne mǝ̃̀ yiɛgu, cíyà kukuɔya nǝ̃ ɲí kã ɲi ga waa nǝ̃ Misɩra yuuntigǝ̃ngãw wà 5 mǝ̃̀ tǝw wáalá wù ji ku, wu cíé mǝ̃́ pã mǝ̃̀ nũɔ̃gu nǝ̃-yǝ wà wu-ń ku, wu káá gùú pĩɛ̃ndiitãnfierii mãã Kanãã yiɛgu, wà mǝ̃ ji kãã dii-yǝ gùú sùɔ́gɩ-i. Wà mǝ̃n wa wú ce kukuɔya nã̀ã hã-m nǝ̃ hlũũgu mǝ̃́ kãã dii wù pĩɛ̃ndi nã̀ã jo.» 6 Misɩra yuuntigǝ̃ngãẃ hã Yisefuw nǝ̃ hlũũgu wà wú kãã dii wù tǝ pĩɛ̃ndi ǹ-da ǹ-suu wù cãwandi.

7 Yisefuẃ suro ǹ-tuu hlũũgu ǹ-ba wù maar wù tǝ pĩɛ̃ndiigǝgu. Misɩra yuuntigǝ̃ngã'n cogǝ̃ngĩɛ̃ba, nǝ̃ wù nũɔ̃sǝn taaba min nǝ̃ Misɩra vũnvãtaaba min bá tĩɛ̃-yǝ bá maar. 8 Yisefu suɔntaaba nǝ̃ wù vũnvãnããba nǝ̃ wù tǝ suɔntaaba min bá kã bá ta. Bà tíɛ́ nã̀ã ya tãnkuuraa'n dɩndɩn-i dàa Gosɛngu nǝ̃ kwasǝnɲinɲã. 9 Wotorotaaba nǝ̃ sǝ̃nsonããntaa yo, bà yáá bàa kã bá ta. Cwaabaa nǝ̃n dúulá wù nã bá kã, cwaa'n dũl sáá. 10 Bà jáa kãã hi Gorɛ̃n-Atadɩgu^a Surdɛ̃ bǝ̃ǝ̃'n pal'n yiɛgu, bá hiraa ǹ-nǝ̃ǝ̃ kuu'n kaaluugɩ nã nǝ̃ fãngããgu, bà yu cugutii'n dɔ̃mmã nã. Gɩ̀ sùɔ́gɩ nã, Yisefuẃ ce wù tǝ blaa'n cɔ̃mmã ǹ-ji da bãn nɩrhǝ̃ǝ̃lw. 11 Kanãã yiɛntaabaa nǝ̃n yáá jirammã nã gɩ̀ yiɛgɩ nã, bà jáa da blaa gúɔ̀ cel'n tammã sùɔ́ gúɔ̀ nã, bá fǝ̃ǝ̃ wà blaakɩnkan-i Misɩra yiɛntaabaa saa. Gùú cíé bá ba bà be gɩ̀ sùɔ́gu wà Abɛl-Misɩrayim. Gɩ̀ yuugɩ-i wà Misɩra yiɛntaa'n blaagu. Gɩ̀ sùɔ́gɩ́ nàa Surdɛ̃ bǝ̃ǝ̃'n pal'n yiɛgu. 12 Yakubaẁ yáá wùu waa dìí mãã nǝ̃ wù byanããba, bá fǝ̃ǝ̃ ǹ-ce-dǝ. 13 Bá tuu wù pĩɛ̃ndi ǹ-maar nǝ̃-dǝ Kanãã yiɛgu ǹ-ga dii-dǝ tãnfieri mãã Makɩpela fugagɩ nã Mãmɩre tuɔragu. Ibramãẁ yáá wùu sǝ̃ǝ̃ gɩ̀ fugagu Hitɩ nũɔ̃ntii Ɛfrɔ̃ẁ saa ǹ-ce pĩɛ̃ndiitãnfer díɛ́dɩ́ ba wù dǝlli. 14 Yakuba diim'n furũũgɩ nã, Yisefuẃ ver ǹ-maar Misɩra yiɛgu nǝ̃ wù vũnvãnããba nǝ̃ wù hǝ̃ǝ̃ min nǝ̃ cwaabaa nǝ̃n yáá bàa duu wù nã ǹ-kã wù tǝ diimã.

Dìí nǝ̃n cíé Yakuba kúú furũũgɩ nã

15 Yakuba kúú furũũgɩ nã, Yisefu vũnvãnããba, bá waa wà: «Yì tǝẁ mãã wù jáa ku kuɔkuɔgu, Yisefuẁ ji gbǝ̃ǝ̃ ǹ-suro yi yuunã ǹ-ce-yáà nǝ̃ diibɩblaari ǹ-hiil wù wuɔlw.» 16 Bá tĩɛ̃ ǹ-waa nǝ̃ Yisefuw wà: «Ǹ tǝẁ wáalá wu ji ku, wù wáalá cãwan díɛ̀-i nǝ̃-yáà nã̀ã da ǹ-ku. 17 Wù wáalá wà yi waa nǝ̃-n wà hãmĩĩ cíé-n nǝ̃ gùú diibɩblaari, wà ń ne yì hujãndi nǝ̃ ń ya dɩ́ tã ǹ hiɛga nã. Hãmĩĩ mãã yì bũũ Dũnnũ dɩnw nǝ̃ ǹ tǝw, ce kukuɔya nǝ̃ ǹ hiil-dǝ ǹ hiɛga nã.» Bà jáa kãã waa cãwan díɛ̀ ǹ-ja Yisefuw, wú fǝ̃ǝ̃ ǹ-ba wù kaal. 18 Wù vũnvãnããba, bá suro nǝ̃ bà hla ǹ-jo wù nãã. Bà gáa juo hi-yǝ bá fuuraa wù taara nã̀ã waa nǝ̃-yǝ wà: «Yi cíé ǹ lwɛ-i.» 19 Yisefuẃ siɛ-ba wà: «Bláá jã cɔ̃m! Mǝ̃n sáa ji ba Dũnnũ sǝ mǝ̃̀ ji pã-ɲã́ã̀ nǝ̃ ɲì diicĩɛ̃rǝdi. 20 Ɲi wáalá ɲí ce-m nǝ̃ diibɩblaari, nǝ̃ Dũnnũẃ sáa hũɔ̃. Wú ver diibɩblar díɛ̀dɩ́ ba diifɩnfaari ǹ-da ǹ-kor cocin, nã́ã́ ɲi mãã ɲi da-dǝ jimããgu gùú tammã. 21 Bláá jã cɔ̃m hlo. Mǝ̃̀ ji ba mǝ̃̀ val-ɲã́ã̀ nǝ̃ ɲì suɔntaaba min.» Wù jáa waa cãwaadudwaliɛga nǝ̃-ba nnĩĩ nã, bà hiɛgá sɩrĩɛ̃.

Yisefu kúúcɔ̃mmã

22 Yisefubá ba dàa Misɩra yiɛgu nǝ̃ wù tǝ suɔntaaba. Wù díɛ́ bii gundii nǝ̃ bii nũɔ̃sɔ̃-i nã̀ã da ǹ-ku. 23 Wù díɛ́ wù bíɛ́ Efrayim tãnkuuraa'n tãnkuuraaba nǝ̃ wù yinɲã, nǝ̃ Mãnãse bíɛ́ Makir tãnkuuraa yo, bà húulá wùú gũnɲã^b drɔ-i. 24 Yuudagǝ, Yisefuẃ waa nǝ̃ wù vũnvãnããba nǝ̃ wù hǝ̃ǝ̃w wà: «Mǝ̃n kuugɩ̀ píɛlá nã, nǝ̃ dɩ̀ káaláa wà Dũnnũw ga juo pɛ ɲì nã. Wù plã wù nũɔ̃gu wà wu ji hã Ibramãw nǝ̃ Isiyagaw nǝ̃ Yakubaw nǝ̃ gùú yiɛguu mãã, wù ji hiil-ɲã́ã̀ Misɩra yiɛgu ǹ-kã nǝ̃-ɲã́ã̀ gɩ̀ yiɛgu.» 25 Yisefuẃ waa dɩ́ gbǝ̃ǝ̃ nǝ̃-ba wà: «Plã́ã̀ ɲì nũɔ̃gu nǝ̃-m wà ɲi ji tuu mǝ̃̀ pĩɛ̃ndi ǹ-maar nǝ̃-dǝ, dɩ̀ káaláa wà Dũnnũw ga juo pɛ ɲì nã.» 26 Yisefuẁ kúú Misɩra yiɛgu gùú bǝ̃ǝ̃gu, wù yáá nǝ̃ bii gundii nǝ̃ bii nũɔ̃sɔ̃-i. Bá ce latɩkolonɔ̃mmã ǹ-ha wù pĩɛ̃ndi, dɩ báa ji da ǹ-bǝ̃ǝ̃lǝ̃ǝ̃ nã̀ã dii-yǝ pĩɛ̃ndiikuugɩ nã ǹ-kra.