Cuu Dulli (Genèse) 40

Gɩ̀-lǝ gɩ̀ furũũgɩ nã, Misɩra yuuntigǝ̃ngãw mãã bà yáá bà be-yǝ wà Farawunã, wù kwãm'n yuuntiiw, bá nǝ̃ wù burhyãrãã'n yuuntiiw, bá juo yuɔruɔ nǝ̃ yuuntigǝ̃ngãw.

2 Yuuntigǝ̃ngã'n hiɛgá dũ nǝ̃-ba.

3 Wú ce bá suu bà nã gardɩba yuuntii'n kasoduugɩ nã, Yisefuẁ yáá dàa gùú kasoduugɩ nã mãã.

4 Gardɩba yuuntiiẃ dii bà cɔ̃mmã min ǹ-hã Yisefuw, wú ba wù blǝ bà nã. Bá ce bǝ̃ǝ̃dagǝ kasoduugɩ nã gɩ̀ sùɔ́gɩ nã.

Yisefuẁ fɩr kasoduuntaaba hǝ̃ǝ̃ldaba dãnsǝ̃lã

5 Yuudagǝ yisuɔ, ǹ-ya bá ba kasoduugɩ nã, wùú mãã Misɩra yuuntigǝ̃ngã kwãm'n yuugɩ nã, nǝ̃ wùú mãã wù burhyãrãã'n yuugɩ nã, bá cɔ bà dǝ'n dãnsãn. Dãnsãn wo dãnsãn, dɩ̀ yáá dɩ̀ pɩgaa dɩ̀ dǝ'n cɔ̃m-i.

6 Gɩ̀ ciibǝǝgɩ nã, Yisefuẃ jo bà nãã, ǹ-juo da bà min bà yigasǝri ɲǝ̃ǝ̃mã nã.

7 Wú yugu-ba: «Danii ɲì yigasǝrɩ́ huu jimããgu nĩĩ-lǝ?»

8 Bá waa nǝ̃-yǝ: «Yi cúɔ́ dãnsǝ̃lãdaga nã, nǝ̃ yi síì da curow fɩr-ga ǹ-ja hãmĩĩ nìɛ.» Yisefuẃ waa nǝ̃-ba wà: «Dũnnũ fɩ́rrǝ̀ dãnsǝ̃lãga. Táalà ɲì dãnsǝ̃lãga ɲí ja-m.»

9 Kwãm'n yuuntiiẃ taa wù dǝlli ǹ-ja Yisefuẁ wà: «Mǝ̃n dãnsãndɩ nã, mǝ̃̀ díɛ́ ɛrsɛ̃ tuudagǝ-i, gɩ̀ yáá mǝ̃̀ yigagɩ nã.

10 Ɛrsɛ̃ tuu gúɔ̀gɩ̀ yáá nǝ̃ nɔ̃́ǹɲã siɛl. Gɩ́ dii gbarnããba, gɩ̀ plɩmmã́ hlǝ ǹ-vãnãã, ǹ-ŋmǝ̃ǝ̃ ɛrsɛ̃ biiga, gàa be.

11 Gɩ̀-lǝ gɩ̀ nã, yuuntigǝ̃ngã'n ɲããɲũɔ̃kuugɩ̀ yáá mǝ̃̀ nãkruɔgɩ nã. Mǝ̃́ jar ɛrsɛ̃ biiga ǹ-fii gà hũmmã ǹ-dii gɩ̀ nã, ǹ-hã-yǝ.»

12 Yisefuẃ waa nǝ̃-yǝ wà: «Ǹ dãnsãn'n yuugɩ-i nnĩĩ. Nɔ̃́ǹɲã siɛl ɲã́ã̀ɲã̀ pɩgaa bãnɲã siɛl-i.

13 Bãnɲã siɛl kusuugɩ nã, yuuntigǝ̃ngãẁ ji ver ǹ-piɛ-n drɔgu, wù ji be-n ǹ-ver ǹ-kra ǹ nã ǹ mããcemmã nã hlo, ǹ ji ba nǝ̃-ń ce ń dii yuuntigǝ̃ngã'n ɲããɲũɔ̃kuugu wù nãkruɔgɩ nã nã́ã́ ǹ yáá ǹ ce-dǝ nĩĩguu mãã.

14 Nǝ̃ nǝ̃-n ga ba nã̀ã ga da ǹ hla nã gùú nã mãã, báa ga sĩĩnǝ̃ǝ̃ mǝ̃̀ cɔ̃mmã nã. Ce-m nǝ̃ kusufɩnfaagu, nǝ̃ ń waa mǝ̃̀ cɔ̃mmã ń ja yuuntigǝ̃ngãw, mǝ̃́ da ǹ-hlǝ kasoduu gúɔ̀ nã.

15 Bà blǝ́rá-m fãngããgɩ nã, ǹ-hlǝ nǝ̃-m yì yiɛgu, Hebruba yiɛgu, ǹ-jo nǝ̃-m níɛ́ nã. Nǝ̃ níɛ́ yo, mǝ̃̀ sáa ce cɔ̃m, mã̀ã́ mãã mã̀ híí kasoduu'n cɔ̃m.»

16 Burhyãrãã'n yuuntii yo, wù gáa da Yisefuw yà fɩr dãnsãn díɛ̀dɩ yuugɩ́ dwal, wú waa nǝ̃-yǝ wà: «Mã́ã yo, mǝ̃̀ cúɔ́ dãnsãndarǝ nã. Dãnsãn díɛ̀dɩ̀ kusunã, cicerɩnɲã siɛlɲã̀ yáá mǝ̃̀ yuugɩ nã nǝ̃ burw ɲã̀ kusunã.

17 Drɔciceruugɩ nã, burplacindɩ̀ yáá dàa, bà kã bà ga hã yuuntigǝ̃ngãw nǝ̃-yǝ, nǝ̃ tafyãmbá ba bà fo-yǝ mǝ̃̀ yuugɩ nã.»

18 Yisefuẃ fǝ̃ǝ̃ ǹ-waa nǝ̃-yǝ wà: «Dɩ̀ yuugɩ-i nnĩĩ. Cicerɩnɲã siɛl ɲã́ã̀ɲã̀ pɩgaa bãnɲã siɛl-i.

19 Bãnɲã siɛl kusuugɩ nã, yuuntigǝ̃ngãẁ ji haar ǹ yuugu, wù ji haar-n fuwɔ n ji ba ǹ sǝ̃n caa gɩ̀ haarɩmmã. Wù ji nũũ-n tubikuudagǝ nã tafyãmbá ba bà jo bà fo ǹ kũɔ̃mã.»

20 Gɩ̀ bãnɲã siɛlnã yuugɩ̀ yáá gùu vaa nǝ̃ yuuntigǝ̃ngã huum'n yuu'n paaruu-i. Wú ce bá hĩɛ̃ nũɔ̃sǝn wuuri ǹ-hã wù cokuganãmba min, nã̀ã haar ɲããɲũɔ̃n'n yuuntiiw, nǝ̃ burhyãrãã'n yuuntiiw, wù cokuganãm'n yinɲã nã.

21 Wú ver ǹ-kra ɲããɲũɔ̃n'n yuuntii nã wù mããcemmã nã, wú ba wù dii yuuntigǝ̃ngã ɲããɲũɔ̃kuugu wù nãkruɔgɩ nã.

22 Nã̀ã ce bá nũũ burhyãrãã'n yuuntiiw nã́ã́ Yisefuẁ yáá wùu fɩr bà dãnsǝ̃lã'n yuugu ǹ-ja-ba nĩĩguu mãã.

23 Nǝ̃ dɩ̀-lǝ dɩ̀ min nã, ɲããɲũɔ̃n'n yuuntiiẁ sáa kãnãã Yisefu cãwandɩ nã, wú sĩĩnǝ̃ǝ̃ wù cɔ̃mmã nã.