Cuu Dulli (Genèse) 39

Yisefuẁ kãã ba Misɩra tabiɛ Potifaar kuugɩ nã

Sɩmãyila nũɔ̃ntaabá kã nǝ̃ Yisefuw Misɩra yiɛgu. Misɩra yiɛntabiɛdiɛẁ yáá dàa bà be-yǝ Potifaar, wù-lǝ wú kãã sǝ̃ǝ̃-yǝ bà saa. Misɩra yuuntigǝ̃ngã'n tuɔratiidiɛ yáá, nã̀ã ver ǹ-ba Misɩra yuuntigǝ̃ngã hla'n gardɩba yuuntiiw.

2 Fɩraa-Dũnnũẃ ba nǝ̃ Yisefuw, wu-ń ce cɔ̃m wo cɔ̃m, mã́ fa wù saa. Wù yáá wùu kãã jiraa wù tii Misɩra yiɛntabiɛ'n suɔ-i.

3 Wù gáa da wà Fɩraa-Dũnnũw nàa nǝ̃ Yisefuw, wù gaaciega min min nã, gá ba gà fa wù saa,

4 wú juo ne Yisefu yiɛgu, ǹ-kra-yǝ wú ba wù hla'n suɔ'n yuugɩ nã, nã̀ã ce wú ba cɔ̃mmã min yigagɩ nã.

5 Ǹ-tuu gùú bǝ̃ǝ̃guu mãã Potifaarẁ jáa kra Yisefuw nã, wú ba wù hla'n suɔ'n yuugɩ nã, nã̀ã ce wú ba cɔ̃mmã min yigagɩ nã. Fɩraa-Dũnnũẃ ne Yisefu cɔ̃mmã, nã̀ã piɛ wù nãkrɔfɩnfaagu Misɩra yiɛntabiɛ'n nãkruɔɲinɲã drɔ. Wù nãkrɔfɩnfaagɩ́ ba Misɩra tabiɛ suɔ'n ɲinɲã, nǝ̃ wù fugasǝ'n ɲin yo ɲã̀ drɔ.

6 Potifaarẃ dii wù nãkruɔɲinɲã min cɔ̃mmã Yisefuw nãkruɔgɩ nã, nã̀ã hiil wù nũɔ̃gu cɔ̃mmã min nã, gɩ-ń vã ǹ-hlǝ wù hla'n wuur'n cɔ̃mmã dɩn nã. Yisefuẁ yáá saa curo, nǝ̃ wù yiga yo, gɩ́ ba gɩ̀ fa nellɩ nã.

Yisefuba nǝ̃ Potifaar ciɛ'n cɔ̃mmã

7 Bǝ̃ǝ̃daagɩ̀ gáa hi gɩ̀-lǝ furũũgɩ nã, wù tii'n ciɛ'n yinɲã́ juo hlǝ wù nã. Wú waa nǝ̃-yǝ wà: «Jo n ji mǝ̃rǝ̃ǝ̃ nǝ̃-m.»

8 Yisefuẃ hla nã̀ã waa nǝ̃ wù tii'n ciɛ wà: «Mǝ̃̀ tiiẁ díilá wù suɔgɩ min cɔ̃mmã ǹ-hã mã́ã̀-i, wù sǝ̃n yugu-m nǝ̃ cɔ̃m.

9 Suɔ gúɔ́ nã, curo'n fãngãã'n sǝ gùu maa mǝ̃̀ kuugu cɔ̃m nã. Nǝ̃ gɩ-ń vã ǹ-hlǝ yíǹ nã, yíi mãã wù ciɛw, wù sáa ɲǝ̃ǝ̃-m nǝ̃ cɔ̃m. Mǝ̃̀ ji ba danii mǝ̃́ gbǝ̃ǝ̃ ǹ-ce diicĩɛ̃rǝ díɛ̀ dɩ̀ tuugu, nã̀ã ce ǹ-jãn Dũnnũ yo wù nã.»

10 Yuu wo yuu, Potifaar ciɛẁ yáá wù waa nǝ̃ Yisefuw, wà wú mǝ̃rǝ̃ǝ̃ nǝ̃-yǝ, nǝ̃ wù sáá wù nɔ̃ wù hã-yǝ.

11 Yuudagǝ, Yisefuẃ wa wù jãn ǹ-ga ce wù mããcemmã duugɩ nã, suɔ'n mããcieraabà sáá dàa.

12 Potifaar ciɛẃ tĩɛ̃ ǹ-blǝ wù kuulaaw wà wú ta ǹ-mǝ̃rǝ̃ǝ̃ nǝ̃-yǝ. Yisefuẃ nǝ̃nǝ̃ǝ̃ wù kuulaaw nã ǹ-hã-yǝ, nã̀ã sɔ̃ ǹ-hlǝ taasǝ̃ǝ̃nǝ̃ǝ̃gu.

13 Cijalẁ gáa da yà sɔ̃ ǹ-hlǝ nã̀ã nǝ̃nǝ̃ǝ̃ kuulaaw nã ǹ-hã-yǝ,

14 wú be wù mããcieraaba ǹ-waa nǝ̃-ba wà: «Níyà! Mǝ̃̀ blaẁ júó nǝ̃ Hebru bíɛ́ wáà, wú juo ba wù dii wù yinɲã yì nã. Wù júó wa wú juo duruu mǝ̃̀ drɔ. Mǝ̃̀ jáa kaasǝ,

15 wú sɔ̃ ǹ-hlǝ nã̀ã nǝ̃nǝ̃ǝ̃ wù kuulaaw nã ǹ-hã-m.»

16 Cijalẃ kra kuulaa nã, ǹ-ba wù cii wù blaw.

17 Wù blaẁ gáa jo, wú taa gùú dɩ̀ dɩndii ǹ-ja-yǝ wà: «Ǹ júó nǝ̃ gùú lɔw mãã Hebru bíɛ́ wáà, wú juo ba wù dii wù yinɲã mǝ̃̀ nã.

18 Mǝ̃̀ jáa ba mǝ̃̀ kaasǝ mǝ̃̀ be cwaaba, wú nǝ̃nǝ̃ǝ̃ wù kuulaa nã duugɩ nã, nã̀ã sɔ̃ ǹ-hlǝ.»

19 Yisefu tii Potifaarẁ gáa nɔ̃ wù ciɛw wáalá dìi wà: «Ne ǹ wabiɛẁ cíé-m nǝ̃ dìí mãã.» Wù hiɛgá juo dũ.

20 Wú ce bá blǝ Yisefuw ǹ-dii-yǝ kasoduugɩ nã, bà mãã bà dii yuuntii'n yuɔrɔtaaba gùú suɔgu. Yisefuẃ ba dàa kasoduugɩ nã.

Yisefu kasoduu'n cɔ̃mmã

21 Fɩraa-Dũnnũẃ ba nǝ̃ Yisefuw, ǹ-pɩgaa-yǝ nǝ̃ wù kusufɩnfaagu, gùú cíé kasoduu'n yuuntiiẃ ne wù yiɛgu.

22 Wú ce wú ba wù cii kasoduuntaaba min nã. Yisefuẁ yáá cɔ̃mmã min yigagɩ nã.

23 Fɩraa-Dũnnũẁ bla nǝ̃ Yisefuw, cɔ̃mmã min mã́ ba mã̀ fa wù saa, kasoduu'n yuuntiiẃ ba wù sǝ̃n yugu-yǝ nǝ̃ mãdamã hlo.