Cuu Dulli (Genèse) 38

Suudaba nǝ̃ Tamar cɔ̃mmã

Gùú nã-i, Suudaẃ fǝ̃ǝ̃ ǹ-hlǝ wù bluuba nãã, ǹ-maar Adulam tabiɛdiɛ nãã, bà be-yǝ wà Hira.

2 Gɩ̀ sùɔ́gɩ nã, wú kãã da Kanãã yiɛntabiɛ Suwa bisĩɛ̃w, wú tuu ǹ-dii-yǝ nǝ̃ ciɛ. Bà gáa fǝ̃ǝ̃ bà ɲĩɛ̃,

3 wú tuu kusuugu ǹ-huu pũmpɩrblɩ. Suudaẃ suu-yǝ wà Ɛr.

4 Wù gáa tuu kúsúudagǝ hlo, wú huu pũmpɩrblɩ ǹ-suu-yǝ wà Onã.

5 Nã̀ã ga ver ǹ-tuu gɩdagǝ hlo ǹ-huu pũmpɩrblɩ ǹ-suu-yǝ wà Sela. Sela huumã nã, Suudaẁ yáá Kesibɩgɩ nã-i.

6 Suudaẃ fǝ̃ǝ̃ ǹ-suro ǹ-kãã caa ciɛdiɛ bà be-yǝ Tamar ǹ-juo hã wù byadĩɛ̃l Ɛrw.

7 Nǝ̃ Suuda byadĩɛ̃l Ɛr wáà cɔ̃mmã̀ mãã mã̀ yáá mã̀ã bla Fɩraa-Dũnnũw nã ǹ-car, wú ce wú ku.

8 Gɩ̀-i, Suudaẃ fǝ̃ǝ̃ ǹ-waa nǝ̃ Onãw wà: «Kuganãã ǹ vũnvũɔ̃'n ciɛ nã, ń ce ǹ mãã ǹ saa ń ce dìí mãã, báa ya wù furũũgɩ ji guu nã.»

9 Nǝ̃ Onãẁ mãã wù yáá wùu fǝ̃ǝ̃ wà tãnkuur wáà síì ba wù yo, wú juo ba wu-ń kuganãã cijalw nã cĩĩnũũgɩ nã, wu-ń fǝ̃ǝ̃ wà wù bibyasǝ'n hũmmã nàa mã̀ jo mã̀ ji hlǝ gùú bǝ̃ǝ̃gu, wú hiirǝǝ ǹ-tũnũũ mã̀ nã ɲũũrũũgu, wù vũnvũɔ̃ báa ji da ǹ-da tãnkuur.

10 Gɩ̀-lǝ gɩ̀ sáa dwal Fɩraa-Dũnnũw nã, wú fǝ̃ǝ̃ ce wùú yo, wú ku.

11 Gɩ̀-i, Suudaẃ fǝ̃ǝ̃ ǹ-waa nǝ̃ wù bíɛ́'n ciɛ Tamarw wà: «Ǹ mãã ǹ jáa ba blakuuciɛw nnĩĩ nã, ver ń kũũ n ga jiraa ǹ tǝ suɔgu ń ba ǹ fennãã gùú bǝ̃ǝ̃guu mãã mǝ̃̀ bíɛ́ Selaw ji hi bibiɛw.» Suudaw nã̀ã ba wù waa wù kusuugɩ nã wà: «Sela yo, wu báa ji ce ǹ-ku wù vũnvãnãã'n tammã.» Gɩ̀-i, Tamarẃ fǝ̃ǝ̃ ǹ-ver ǹ-kũũ wù tǝ suɔgu.

12 Bãncin gɩ̀ furũũgɩ nã, Suwa bisĩɛ̃w mãã wù yáá Suuda ciɛw, wú fǝ̃ǝ̃ ǹ-ku. Suudaẁ gáa yu wù dɔ̃mmã nã ǹ-tã, wú fǝ̃ǝ̃ ǹ-ta wù maar Timǝ̃nã lǝri bá nǝ̃ wù jambla Hiraw, Adulam tabiɛw, bà kã bàá mãã bà hul bà mǝ̃gaa tũmãm'n kwaasǝri, bà nãã.

13 Tamarẁ gáa nɔ̃ wà wù curɔw nàa wù kã Timǝ̃nã lǝri, wù ga ce bá hul ǹ-mǝ̃gaa tũmãm'n kwaasǝri.

14 Gɩ̀-i, wú suro ǹ-hiil wù yáá wùu dii gùu kuulanãmba ǹ-ba wù yu wù bla dɔ̃mmã nã, ǹ-kra, nã̀ã fǝ̃ǝ̃ ǹ-tuu musuɔrdiɛ ǹ-finǝ̃ǝ̃ ǹ-suu wù yigagɩ nã, ǹ-ta ǹ-kãã jiraa Enãyim lǝ nũɔ̃gɩ nã, ǹ-ba wù fennãã wù curɔw nã. Timǝ̃nã lǝ'n hlũũgɩ̀ ta sùɔ́gɩ-i. Sulammã nã, Tamarẁ yáá wùu ga juo fǝ̃ǝ̃ wà Selaẁ jáa hi bibiɛ, nǝ̃ ba sáa ji ce wú haal hũmmã ǹ-hã-yǝ.

15 Wù mãã wù yáá wùu finǝ̃ǝ̃ musuɔrw ǹ-suu wù yigagɩ nã, Suudaẁ gáa kãã da-yǝ nnĩĩ, wú ne wà fíí wú suur wù hla-i wù hã bibyanããba.

16 Wù sáa fǝ̃ǝ̃ wà wù bíɛ́'n ciɛ-i, wú fǝ̃ǝ̃ ǹ-yiɛl ǹ-kã wù nãã hlũũ'n nũɔ̃gɩ nã, ǹ-kãã waa nǝ̃-yǝ wà: «Hei! Ǹ ji hũɔ̃ mǝ̃́ mǝ̃rǝ̃ǝ̃ nǝ̃-n-ì?» Cijalẃ siɛ-yǝ wà: «Mǝ̃-ń hũɔ̃, ǹ ji hã-m nǝ̃ bii?»

17 Wú siɛ-yǝ wà: «Mǝ̃̀ kwasǝnɲin'n kuruɔgu sǝ̃ǝ̃nã, mǝ̃̀ ga tĩɛ̃ wurɔblɩdiɛ ǹ-ji hã-n.» Tamarẃ siɛ-yǝ wà: «Nnĩĩ-lǝ, ǹ ji hã-m nǝ̃ bii mǝ̃́ kra gɩ nã, ǹ-ba mǝ̃̀ fennãã wurɔblɩ'n jollɩ nã?»

18 Biɛẃ yugu-yǝ wà: «Yíǹ wa mǝ̃́ hã-n nǝ̃ bii?» Cijalẃ siɛ-yǝ wà: «Mǝ̃̀ caa gùú mǝ̃myãrii mãã nǝ̃n ce ń dii-dǝ ǹ bũɔ̃gɩ nã, ǹ-ba ǹ nɩsɩ ǹ ɲinɲã nã nǝ̃-dǝ, nǝ̃ ǹ mãã nã̀ã kɩ-dǝ nǝ̃ gùú ɲĩĩnǝ̃ǝ̃blɩrii mãã ǹ ba ǹ dii-dǝ ǹ bũɔ̃gɩ nã, nǝ̃ ǹ valblɩrii mãã ǹ nãkruɔgɩ nã.» Biɛẃ fǝ̃ǝ̃ ǹ-hã-yǝ nǝ̃-ɲã, nã̀ã kãã mǝ̃rǝ̃ǝ̃ nǝ̃-yǝ. Wú tuu kusuugu.

19 Tamarw nã̀ã fǝ̃ǝ̃ ǹ-suro ǹ-ta ǹ-kũũ, ǹ-kãã fɩr musuɔrw mãã wù yáá wùu finǝ̃ǝ̃-yǝ wù yuugu nǝ̃ wù yigagɩ nã ǹ-kra, nã̀ã dii wù kuulanãmbaa mãã wù dii-ba wù yu wù bla dɔ̃mmã nã.

20 Suudaẃ fǝ̃ǝ̃ kãã tĩɛ̃ wù jamblaw Adulam tabiɛw, wà wú kãã hã cijalw nǝ̃ wurɔblɩw, nã̀ã hũɔ̃ wù ɲinɲã ǹ-ga hã-yǝ. Biɛẃ kãã naa cijalw gɩ̀ sùɔ́gɩ nã.

21 Wú kãã ce yugummã Enãyim lǝntaaba saa wà: «Cijalw mãã wù yáá wùu jiraa Enãyim lǝ'n hlũũ'n nũɔ̃gɩ nã, wù suur wù hla wù hã bibyanããba, wú nàa haa-ì?» Bá siɛ-yǝ wà: «Cijal'n sáa hi ǹ-jiraa ǹ-ba wù suur wù hla níɛ́ nã.»

22 Wú ver ǹ-kã Suudaw nãã, ǹ-kãã waa nǝ̃-yǝ wà: «Mǝ̃̀ sáa ga da-yǝ. Gɩ̀ sùɔ́ntaaba nǝ̃ bà hla, bá ver ǹ-ba bà waa nǝ̃-m wà cijal'n sáa hi ǹ-jiraa ǹ-ba wù suur wù hla gɩ̀ sùɔ́gɩ nã.»

23 Suudaẃ siɛ-yǝ wà: «Wù sǝ̃n ya ɲã́ ba dàa! Yi síì gbǝ̃ǝ̃ ǹ-ba yì hiil yì hla kwãmmã nã. Mǝ̃́ tĩɛ̃ wurɔblɩw, nǝ̃ yíi yo, ń kã ǹ sáa ga da-yǝ.»

24 Hyarsǝrɩ siɛl furũũgɩ nã, bá juo waa nǝ̃ Suudaw wà wù bíɛ́'n ciɛ Tamarw súurá wù hla nã ǹ-hã bibyanããba, wà wu nàa nǝ̃ kúsúu. Suudaẃ waa nǝ̃-ba wà: «Kã́ã̀ ɲi ga hyã-yǝ nũmǝ̃nãw.»

25 Bà gáa ba bà hiil-yǝ gùú bǝ̃ǝ̃gu, wú tĩɛ̃ bá kãã waa nǝ̃ wù curɔ Suudaw wà: «Ne mǝ̃myãr díɛ̀ mãã dɩ̀ nɩsɩ ɲinɲã nã, dɩ̀ ɲĩĩnǝ̃ǝ̃blɩri, nǝ̃ valblɩ díɛ̀, gùú biɛw mãã wù hlã-m nǝ̃ kúsúu gúɔ̀, wùú ɲin-i.» Nã̀ã fǝ̃ǝ̃ ǹ-waa wà: «Gbǝ̃ǝ̃ ń fǝ̃ǝ̃ gɩ̀ tiiw.»

26 Suudaẃ fǝ̃ǝ̃ ǹ-hũɔ̃ wà wùú ɲin-i, nã̀ã waa wà: «Cijalẁ sáa yuɔruɔ ǹ-hi mã́ã̀, mǝ̃n yáá mǝ̃̀ saa mǝ̃́ hã mǝ̃̀ bíɛ́ Selaw nǝ̃-yǝ, nǝ̃ mǝ̃̀ sáa ji ce-dǝ.» Suudaẁ sáa ji ver ǹ-kuganãã wù nã ǹ-da.

27 Bá juo fǝ̃ǝ̃ wù huum'n bǝ̃ǝ̃gu wà wu nǝ̃ pɩplãm-i wù kusuugɩ nã.

28 Wù huum'n bǝ̃ǝ̃gu, wuudĩɛ̃lẃ hiil wù nãkruɔgu, cijalw nǝ̃n yáá wù pɛ wù nã wú ba wù huu, wù-lǝ wú blǝ caalii'n nãkruɔgu ǹ-vaa jisɩbumbɛ̃mããrdarǝ wù nãkruɔgɩ nã, nã̀ã waa wà: «Wáàw-i wuudĩɛ̃lw.»

29 Nǝ̃ caaliiẃ fǝ̃ǝ̃ ǹ-ɲǝ̃ǝ̃ ǹ-hũɔ̃ wù nãkruɔgu, nǝ̃ wù nãyoẃ ver ǹ-juo hlǝ dĩɛ̃lãmmã nã. Dɩ́ tugulǝǝ cijalw nã wù ba wù waa wà: «Ǹ cúgurǝ́ bii wantam-i nnĩĩ-lǝ?» Gɩ̀-i, Suudaẃ fǝ̃ǝ̃ suu-yǝ wà Perɛsɩ, dɩ̀ yuugɩ-i wà cugurɩm.

30 Gɩ̀ furũũgɩ nã, wuusaalẃ fǝ̃ǝ̃ ǹ-hlǝ nǝ̃ jisɩbumbɛ̃mããri wù nãkruɔgɩ nã, Suudaẃ suu-yǝ wà Sera. Sera yuugɩ-i wà guubumbɛ̃mããguu mãã gɩ̀ caalaa.