Cuu Dulli (Genèse) 37

Yisefu dãnsǝ̃lãga

Yakuba tǝẁ yáá wù jiraa wù waaraa gùú yiɛgɩ nã Kanãã yiɛgu, wù gáa ku, Yakubaẃ fǝ̃ǝ̃ ǹ-ta ǹ-kãã jiraa gɩ̀ yiɛgɩ nã.

2 Yakubaw mãã bà be-yǝ Isɩrayɛl, wùú nũɔ̃ntaa'n cɔ̃mmã-i nnĩĩ: Wù canããbaa mãã Bilaba nǝ̃ Silpaw, bà tãnkuuraabà yáá bà cii tũmba nǝ̃ wuramba nã. Bà hǝ̃ǝ̃ Yisefuẁ yáá nǝ̃ bii nũɔ̃sɔ̃ nǝ̃ nɩrhǝ̃ǝ̃l wɩ̀-i, nã̀ã ba wu-ń ce wú ba wù duu bà nã wancendɩ nã. Bà yáá nǝ̃ gùú yirbɩblaarii mãã, wù-lǝ wú ba wù jo wù taa-dǝ wù ja bà tǝw.

3 Isɩrayɛlẁ yáá wùu vǝ̃ǝ̃ ǹ-tã nã̀ã da Yisefuw, gùú yáá gùu ce Yisefu cɔ̃mmã́ dwal wù nã ǹ-ɲǝ̃ǝ̃ wù vũnvãnããba. Isɩrayɛlẃ ce bá ɲǝ̃gãr kuulaafɩnfayǝdiɛ bàa mǝ̃gaa ǹ-yalliɛ wù nã, ǹ-hã-yǝ.

4 Wù vũnvãnããbà gáa fǝ̃ǝ̃ wà wù cɔ̃mmã dwal bà tǝw nã ǹ-ɲǝ̃ǝ̃ bà-lǝ bà min min, Yisefu cɔ̃mmã́ juo bla bà nã, fuwɔ bá juo ba bà sǝ̃n waa cãwaafɩnfar nǝ̃-yǝ hlo.

5 Yuudagǝ, Yisefuẃ juo cɔ dãnsãndɩ nã, nã̀ã kãã taa-dǝ ǹ-ja wù vũnvãnããba. Wù cɔ̃mmã́ paa ǹ-juo mǝ̃gaa ǹ-bla bà nã.

6 Wú waa nǝ̃-ba wà: «Níyà, mã́ã cúɔ́ dãnsãndarǝ nã.

7 Yi yáá yì hã dũmmã yì kra-mã nã cincula cincula. Mǝ̃n cincondɩ́ juo ciir ǹ-hiraa yin dɩnw, ɲimãã cinculagá juo tɩsɩnǝ̃ǝ̃ gà yunɲã nã ǹ-caliɛ mǝ̃n dǝllɩ nã.»

8 Wù vũnvãnããbá yugu-yǝ wà: «Nã́ã́ n sǝ̃n kãn wà yíi ji ba yì yuuntiiw, yindagǝ nã wà yíi ji ba yì yuugɩ nã-ì?» Yisefu cɔ̃mmã́ juo ba mã̀ bla wù vũnvãnããba nã mã̀ piɛ kuu, wù dãnsǝ̃lãga nǝ̃ wù cãwanĩɛ̃'n cɔ̃mmã nã.

9 Yisefuẃ juo ver ǹ-cɔ dãnsãndarǝ nã, nã̀ã taa-dǝ ǹ-ja wù vũnvãnããba wà: «Mǝ̃̀ cúɔ́ dãnsãndarǝ nã hlo. Dãnsãn díɛ́ nã, bǝ̃ǝ̃gu, hyargaagu, nǝ̃ ŋmĩɛ̃ nũɔ̃sɔ̃ nǝ̃ dɩ̀ dɩndi, ɲã̀ã juo tɩsɩnǝ̃ǝ̃ fuwɔ ǹ-ji kuulǝǝ mǝ̃̀ yigagɩ nã.»

10 Yisefuẁ gáa taa-dǝ ǹ-ja wù tǝ yo, wú gãnãã nǝ̃-yǝ wà: «Bii dãnsãn-i nǝ̃ dɩ̀-lǝ? Ǹ kãn wà hãmĩĩ nǝ̃ ǹ ɲũw, nǝ̃ ǹ vũnvãnããba nǝ̃ ǹ hǝ̃ǝ̃ yo, yi saa yí kuulǝǝ ǹ yigagɩ nã-ì?»

11 Yisefu vũnvãnããbà yáá bà ce-yǝ nǝ̃ holsǝri, nǝ̃ bà tǝ-lǝ, wú ba wù kãnãã dãnsǝ̃lã gáà nã.

Yisefu vũnvãnããba suur-yǝ ǹ-hã bà ta nǝ̃-yǝ Misɩra yiɛgu

12 Yisefu vũnvãnããbá juo maar wancendɩ nã, Sisɛm lǝri, nǝ̃ bà tǝ Yakuba kwasǝnɲinɲã.

13 Yuudagǝ, Isɩrayɛlẃ waa nǝ̃ Yisefuw wà: «Ǹ vũnvãnããbá nàa nǝ̃ kwasǝnɲinɲã Sisɛm lǝri tuɔra. Jo mǝ̃ ji tĩɛ̃-n bà nãã!» Yisefuẃ siɛ-yǝ wà: «Gɩ̀ sǝ nǝ̃ kuu, tɩtii.»

14 Wú ver ǹ-waa nǝ̃-yǝ hlo wà: «Kã n ga dǝ̃ǝ̃ ǹ vũnvãnããba ń ne, nǝ̃ ń ne kwasǝnɲin'n kuruɔ yo, ba-ń ba dàa hinnǝ̃, ń jo n ji waa mǝ̃́ nɔ̃.» Bà yáá Hebrɔ̃ nɩgǝraagɩ nã-i, nǝ̃ Yakubaẃ tĩɛ̃ Yisefuw. Yisefuẁ gáa hi Sisɛm lǝri,

15 biɛdiɛẃ kãã jal nǝ̃-yǝ, wù waaraa wù caa hlũũgu paari sǝ̃ǝ̃nã. Biɛẃ yugu-yǝ wà: «Ǹ caa bii?»

16 Yisefuẃ siɛ-yǝ wà: «Mǝ̃̀ caa mǝ̃̀ vũnvãnãã-i, bá nǝ̃ kwasǝnɲin'n kuruɔgu, ǹ sáa da-ba-ì?»

17 Biɛẃ waa nǝ̃-yǝ wà: «Bà sórrá nhlíɛ̀ nã. Mǝ̃̀ nṹɔ̃́ bà waa nǝ̃ bà ɲĩɛ̃ wà ba kã Dotã lǝ-i.» Yisefuẃ kãã caa-ba ǹ-ga da-ba Dotã lǝri.

18 Wù vũnvãnããbà gáa maa ǹ-da wù jo halbaa, bá blǝ wù kukwo'n cɔ̃mmã́ saa,

19 nã̀ã waa nǝ̃ bà ɲĩɛ̃ wà: «Dãnsǝ̃lãntiiw jówà nnĩĩ.

20 Yáalà yí ko-yǝ yí nǝ̃ǝ̃ yí dii-yǝ hũnfuudagǝ nã, nǝ̃ yí kã yi ga waa wà jerguyodiɛ gáa blǝ-yǝ, gɩ̀-lǝ gɩ̀ nã, yi ji da wù dãnsǝ̃lã gáà mãã gà ji ce gùú tammã.»

21 Wurbɛnẃ nɔ̃-dǝ, nã̀ã ba wù ne wú kor Yisefuw ǹ-hiil-yǝ bà nãkrɔnɲã nã. Wú waa nǝ̃-ba wà: «Bláá ya yí ko-yǝ.»

22 Wurbɛnẁ mãã wù yáá wù caa wú kor-yǝ, ǹ-ver-yǝ wú kũũ wù tǝw nãã, wú fǝ̃ǝ̃ ǹ-ver ǹ-waa nǝ̃-ba wà: «Bláá ko-yǝ. Nǝ̃́ǝ̃lã̀ ɲí dii-yǝ jerkwar'n hũnfuu gúɔ̀ nã. Bláá ce-yǝ nǝ̃ cɔ̃m.»

23 Yisefuẁ gáa yii ǹ-kuganãã bà nã, bá blǝ-yǝ ǹ-hiil wù kuulaafɩnfayǝw mãã wù yáá wù bũɔ̃gɩ nã.

24 Nã̀ã blǝ ǹ-nǝ̃ǝ̃ ǹ-dii-yǝ hũnfuudagǝ nã. Gɩ̀ hũnfuugɩ̀ sáá nǝ̃ hũm gɩ̀-lǝ gɩ̀ bǝ̃ǝ̃gu.

25 Nã̀ã kãã jiraa wà ba wuu wuur-i. Bà gáa wa bá ne, ǹ-ne ǹ-da Sɩmãyila nũɔ̃ntaabàa hlǝ Galaadɩ yiɛgu, bà ɲũgɔ̃minããbàa tuu kɩmdamã plǝ. Bà yáá bà ce tĩɛ̃gu nǝ̃ kɩmdaamã, nǝ̃ mãdaamã́ ba mã̀ hũũgɩ̀ dwal. Sɩmãyila nũɔ̃ntaabà yáá bà kã bà ga suur-mã Misɩra yiɛgu.

26 Suudaẃ waa nǝ̃ wù vũnvãnããba nǝ̃ wù hãmba wà: «Yi-ń ko yì hǝ̃ǝ̃w, nã̀ã ŋmǝ̃ǝ̃rǝ̃ǝ̃ wù kúúcɔ̃mmã nã, gɩ̀ ji pyar bii dugɔ-i ǹ-hã-yáà?

27 Yi-ń suur-yǝ ǹ-hã Sɩmãyila nũɔ̃ntaaba, gùú búɔlá nã, nǝ̃ bláá ya yí ce-yǝ nǝ̃ diibɩblar! Yì hǝ̃ǝ̃-i. Yí nǝ̃ twammã dɩn-i.» Bá fǝ̃ǝ̃ ǹ-hũɔ̃ wù yalli.

28 Sɩmãyila nũɔ̃ntaaba mãã bà hlǝ Mãdiyãgu, bà cǝrcieraabà gáa ba bà ta gɩ̀ sùɔ́gɩ nã, Yisefu vũnvãnããbá fǝ̃ǝ̃ ǹ-hiil-yǝ fuugɩ nã, ǹ-suur-yǝ ǹ-hã-ba bà yiɛ'n gɩ̀ bǝ̃ǝ̃'n jiibii^a gur, bá ta nǝ̃-yǝ Misɩra yiɛgu.

29 Wurbɛnẁ gáa ver ǹ-kã hũnfuugɩ nã, wù sáa da Yisefuw, wù kusuugɩ́ cu, gùú cíé wú fa ǹ-taalaa wù kuulanãmba nã.

30 Nã̀ã kãã waa nǝ̃ wù hãmba wà: «Pũmpɩrẁ sɩraa fuugɩ nã, mǝ̃̀ ji ce mǝ̃̀ hla danii?»

31 Yisefu vũnvãnããbá fǝ̃ǝ̃ ǹ-ko siibuw, nã̀ã tuu wù kuulaafɩnfayǝw ǹ-ɲĩɛ̃-yǝ twammã nã.

32 Bá tĩɛ̃ Yisefu kuulaafɩnfayǝ wáà mãã bàa mǝ̃gaa ǹ-yalliɛ wù nã ǹ-hã bà tǝw, nã̀ã waa nǝ̃-yǝ wà: «Yi díɛ́ kuulaa wáà, ne-yǝ ń ne ǹ bíɛ́ yow nǝ̃n ba.»

33 Yakubaẃ fǝ̃ǝ̃ ǹ-fǝ̃ǝ̃ kuulaaw, wú waa wà: «Mã́ã bíɛ́'n kuulaa-i! Jerguyodiɛ kúó Yisefuw, dɩ̀ káaláa wù fla ǹ-jãrãã wù nã.»

34 Yakubaẃ fa ǹ-taalaa wù kuulanãmba nã, ǹ-yu wù bíɛ́'n dɔ̃mmã nã, nã̀ã kaal wù blaa'n kaaluugu bãncin.

35 Wù byanããba nǝ̃ wù bisiibá jo wà bá juo puɔr-yǝ, ǹ-puɔr ǹ-ji naa. Wú hla nã̀ã ba wù waa wà: «Mǝ̃̀ ji kaal mǝ̃̀ bíɛ́'n kuugu fuwɔ ǹ-ji duu wù nã cugutaa'n wanjiram'n sùɔ́gɩ nã.» Nã̀ã ba kaaluugɩ nã.

36 Mãdiyã yiɛntaabá kãã suur Yisefuw Misɩra yiɛgu ǹ-hã Potifaarw. Misɩra yuuntigǝ̃ngãw mãã bà yáá bà be-yǝ wà Farawunã, Potifaarẁ yáá wù tuɔratiidiɛ-i, nã̀ã ba yuuntigǝ̃ngã wáà hla'n gardɩba yuuntiiw.