Cuu Dulli (Genèse) 36

Esoẁ kãã jiraa Edɔ̃mgu

Esow mãã bà be-yǝ wà Edɔ̃m, wù nũɔ̃ntaa'n cɔ̃mmã-i nnĩĩ.

2 Esoẁ táalá Kanãã yiɛ'n canãã-i. Bà-i nnĩĩ: Adaw mãã Hitɩ nũɔ̃ntii Elɔ̃ bisĩɛ̃w, nǝ̃ Ana bisĩɛ̃ Oholibamãw mãã Hivitɩ bíɛ́ Sibeyɔ̃ huɔnbisĩɛ̃w.

3 Nã̀ã taa Basɩmãtɩw mãã Sɩmãyila bisĩɛ̃w nǝ̃ Nebayɔtɩ nãndiɛw.

4 Adaẃ huu Elifasɩw ǹ-hã Esow, nǝ̃ Basɩmãtɩẃ huu Eruwɛlw ǹ-hã-yǝ.

5 Oholibamãẃ huu Yewusɩw nǝ̃ Yalamw, nǝ̃ Koraw ǹ-hã-yǝ. Bà-i Eso byanããbaa mãã wù húulá-ba Kanãã yiɛgu.

6 Esoẃ suro ǹ-tuu wù canããba, nǝ̃ wù byanããba, nǝ̃ wù bisiiba, nǝ̃ wù suɔntaaba min, nǝ̃ wù kwasǝnɲinɲã ǹ-pya wù yáá wùu da gùú dalaaguu mãã Kanãã yiɛgu ǹ-ta gɩ̀ dǝ'n yiɛ ǹ-hal wù hǝ̃ǝ̃ Yakubaw nã.

7 Bà kwasǝnɲinɲã̀ yáá ɲã̀ã bũũ ǹ-car, gùú cíé bá ba bà sáá bà ji gbǝ̃ǝ̃ ǹ-jiraa bà min. Bà yáá bà jiraa bà waaraa gùú yiɛgɩ nã mãã, bà kwasǝnɲinɲã̀ sáá ɲã̀ ji ba ɲã̀ gbǝ̃ǝ̃ ɲã̀ da wuurɩ́ ba dɩ̀ hiil-ɲã.

8 Gùú nã-i, Esow mãã bà be-yǝ wà Edɔ̃m, wú kãã jiraa dàa Seyiir yiɛ'n tãnũnɲã sǝ̃ǝ̃nã.

Eso nũɔ̃ntaaba

9 Esow mãã wù yáá Edɔ̃m nũɔ̃'n tǝvũnvũɔ̃w, nã̀ã ba wù yáá jirammã nã Seyiir yiɛ'n tãnũnɲã sǝ̃ǝ̃nã, wùú nũɔ̃ntaa'n cɔ̃mmã-i nnĩĩ,

10 wù byanãã'n yiriɛga-i nnĩĩ: wù ciɛ Ada bíɛ́ Elifasɩw, nǝ̃ wù ciɛ Basɩmãtɩ bíɛ́ Eruwɛlw.

11 Elifasɩ byanããbaa yáá nnĩĩ: Temãw, Omarw, Sefow, Gatamw, nǝ̃ Kenãsɩw.

12 Timǝ̃nãbà yáá bà min jirammã nã nǝ̃ Eso bíɛ́ Elifasɩw, Elifasɩẁ sáá wùu taa-yǝ. Timǝ̃nãẃ huu bíɛ́ ǹ-hã-yǝ, wɩ̀-i Amalɛkɩw. Bà-lǝ bà-i Eso huɔnbiiba bá nǝ̃ wù ciɛ Adaw.

13 Eruwɛl byanããba-i nnĩĩ: Nahatɩw, Seraw, Samãw, nǝ̃ Misaw. Bà-i Eso huɔnbiiba nǝ̃ wù ciɛ Basɩmãtɩw.

14 Eso ciɛw-i nǝ̃ Oholibamãw. Wù-lǝ wù tǝw-i nǝ̃ Anãw, nã̀ã ba Sibeyɔ̃ huɔnbisĩɛ̃w. Eso wáà bá nǝ̃ Oholibamãw, bà byanããba-i nnĩĩ: Yewusɩw, Yalamw, nǝ̃ Koraw.

15-16 Eso huɔnbiibaa mãã yuntaabaa Edɔ̃mgu, bà-i nnĩĩ: Temãw, Omarw, Sefow, Kenãsɩw, Koraw, Gatamw, nǝ̃ Amalɛkɩw. Eso byavũnvũɔ̃ Elifasɩw mãã wù díɛ́-yǝ nǝ̃ wù ciɛ Adaw, wù-lǝ wùú byanãã-i.

17 Yuntaabaa mãã bà hlǝ́rá Eso bíɛ́ Eruwɛl nũɔ̃gɩ nã, Edɔ̃mgu, bà-i nnĩĩ: Nahatɩw, Seraw, Samãw nǝ̃ Misaw. Bà-i Eso huɔnbiiba bá nǝ̃ wù ciɛ Basɩmãtɩw.

18 Eso ciɛ Oholibamã byanããba-i nnĩĩ: Yuuntii Yewusɩw, nǝ̃ Yuuntii Yalamw, nǝ̃ Yuuntii Koraw, bà-lǝ ba-i yuntaabaa mãã bà hlǝ́rá Eso ciɛ Oholibamã nã, Ana bisĩɛ̃w.

19 Eso huɔnbiibaa mãã bà yáá yuntaaba, bàá yáá nĩĩgu. Bà be bà-i Edɔ̃m nũɔ̃ntaaba.

20-21 Horitɩ bíɛ́ Seyiir huɔnbiibà yáá Edɔ̃m yiɛntadĩɛ̃lããba. Bà yuntaabaa yáá nnĩĩ: Lotãw, Sobalw, Sibeyɔ̃w, Anaw, Disɔ̃w, Esɛrw, nǝ̃ Disãw. Seyiir byanãã yáá.

22 Lotã byanããbaa yáá nǝ̃ Horiw nǝ̃ Hemãmw, nǝ̃ wù tǝ̃ǝ̃ ba nǝ̃ Timǝ̃nãw.

23 Sobal byanããbaa yáá nnĩĩ: Alvãw, Mãnãhatɩw, Ebalw, Sefow, nǝ̃ Onãmw.

24 Sibeyɔ̃ byanããbaa yáá nnĩĩ: Ayaw bá nǝ̃ Anaw. Anaẁ díɛ́ hũmmã jerkwaarɩ nã, gùú bǝ̃ǝ̃guu mãã wù yáá wù cii wù tǝ Sibeyɔ̃ kǝkũmnããba nã.

25 Ana tãnkuuraaba-i nnĩĩ: Disɔ̃w bá nǝ̃ Oholibamãw.

26 Disɔ̃ byanããba-i nǝ̃ Hɛmdãw, Ɛsɩbãw, Itrãw nǝ̃ Kerãw.

27 Esɛr byanããba-i nǝ̃ Bilehãw, Savãw, nǝ̃ Akãw.

28 Disã byanããbaa yáá nǝ̃ Usɩba nǝ̃ Arãw.

29-30 Horitɩ bluu'n yuntaabaa mãã bà járrá Seyiir yiɛgɩ nã, bà-i nnĩĩ: Lotãw, Sobalw, Sibeyɔ̃w, Anaw, Disɔ̃w, Esɛrw, nǝ̃ Disãw.

31 Gùú yuntaabaa nǝ̃n járrá Edɔ̃mgu nǝ̃ yuntaabà ji da ǹ-jiraa Isɩrayɛlgu, bà-i nnĩĩ:

32 Bewɔr bíɛ́ Belaẁ járrá Edɔ̃m yuuntasǝrɩ nã wù lǝrii yáá Dinaba lǝri.

33 Wù-lǝ wù kúú'n furũũgɩ nã, Bosɩra lǝntabiɛ Sera bíɛ́ Yobabɩẃ tuu wù sùɔ́gu ǹ-jiraa yuuntasǝrɩ nã.

34 Yobabɩẁ jáa ku, Temã yiɛntabiɛdiɛ bà be-yǝ wà Husam, wù-lǝ wú tuu wù sùɔ́gu ǹ-jiraa yuuntasǝrɩ nã.

35 Husamẁ jáa ku, Bedadɩ bíɛ́ Hadadɩw mãã wù hlǝ Avitɩ lǝri, wú tuu wù sùɔ́gu ǹ-jiraa yuuntasǝrɩ nã. Wù-lǝ wùú gbǝ̃́ǝ̃lã́ Mãdiyã yiɛntaaba nã Mohabɩ yiɛgu.

36 Hadadɩẁ jáa ku, Masɩreka lǝntabiɛ Samlaẃ tuu wù sùɔ́gu ǹ-jiraa yuuntasǝrɩ nã.

37 Samlaẁ jáa ku, Sahulw mãã Erhovotɩ lǝrii mãã lwaa'n nũɔ̃gɩ nã, wú tuu wù sùɔ́gu ǹ-jiraa yuuntasǝrɩ nã.

38 Sahulẁ jáa ku, Akibɔr bíɛ́ Bal-Hanãẃ tuu wù sùɔ́gu ǹ-jiraa yuuntasǝrɩ nã.

39 Bal-Hanãẁ jáa ku, Hadarẃ tuu wù sùɔ́gu ǹ-jiraa yuuntasǝrɩ nã. Wù yáá wù hlǝ Pawu lǝ-i, nǝ̃ wù ciɛẃ ba nǝ̃ Mesahabɩ bisĩɛ̃ Mãtrɛdɩ bisĩɛ̃ Metabeyɛlw.

40-43 Eso huɔnbiiba-i nǝ̃ Edɔ̃m nũɔ̃ntaaba, bà yuntaa'n yiriɛga-i nnĩĩ ǹ-vaa nǝ̃ bà nũɔ̃gu nǝ̃ bà yanɲã: Timǝ̃nãw, Alɩvaw, Yetɛtɩw, Oholibamãw, Elaw, Pinɔ̃w, Kenasɩw, Temãw, Mibɩsarw, Magɩdiɛlw, nǝ̃ Iramw. Bà-lǝ bà-i Edɔ̃m yuntaabaa mãã bàa jiraa bà dǝ'n yanɲã nã bà yiɛgu.