Cuu Dulli (Genèse) 35

Yakubaẁ hlǝ Sisɛm lǝri ǹ-maar Betɛl lǝri

Yuudagǝ, Dũnnũẃ waa nǝ̃ Yakubaw wà: «Suro ń maar Betɛl lǝri ǹ-ga jiraa dàa gɩ̀ sùɔ́gɩ nã, nǝ̃ ń mã siijãnkuugu ń hã-m. Gùú nã mãã ǹ yáá ǹ kwar nǝ̃ ǹ vũnvũɔ̃ Esow, mǝ̃̀ yáá mã̀ã hillaa ǹ nã gùú sùɔ́gɩ-i.»

2 Yakubaẃ fǝ̃ǝ̃ ǹ-waa nǝ̃ wù suɔntaaba nǝ̃ gùú cwaabaa nǝ̃n yáá bà duu wù nã wà: «Nǝ̃́nǝ̃̀ǝ̃ kiiba nã mãã ɲi hṹɔ̃lã́-ba niɛriɛ'n yiɛgu, nǝ̃ ɲí per ɲì hla nã nǝ̃ ɲí hiil ɲì kuulanãmba, nǝ̃ ɲí dii badaba.

3 Tɩ́gɩnǝ̃̀ǝ̃ yí maar Betɛl lǝri, mǝ̃̀ ga mã siijãnkuugu ǹ-hã gùú Dũnnũw mãã wù hṹɔ̃lã́ ǹ-blǝ mǝ̃̀ cirǝ̃mmã, mǝ̃̀ ywaruu'n bǝ̃ǝ̃gu, nã̀ã ba wù yáá nǝ̃-m, waalɩ nã.»

4 Bá fǝ̃ǝ̃ ǹ-tuu bà kiibaa nǝ̃n ya bà saa nǝ̃ bà tɔ̃mǝ̃mĩĩga, ǹ-hã Yakubaw nǝ̃-ɲã. Wú kãã kuɔsǝ fuugu ǹ-dii-ɲã tubikukɩnkandii mãã Sisɛm lǝ'n nũɔ̃gɩ nã, gɩ̀ taaragu.

5 Yakubaba nǝ̃ wù byanããbà jáa suro ǹ-tuu hlũũgu ǹ-ba bà maar, Dũnnũẃ juo dii gbǝrsǝdarǝ tùú, gɩ̀ sùɔ́'n tuɔra lǝntaaba nã, curo'n sáa siɛ ǹ-suro ǹ-ɲǝ̃ǝ̃ ǹ-duu ba nã.

6 Yakubaw nǝ̃ wù cwaaba min bá kãã hi Lusɩ lǝri, Kanãã yiɛgu. Nǝ̃-ń nɔ̃ wà Lusɩ lǝri, bà ja Betɛl lǝ-i.

7 Gɩ̀ sùɔ́gɩ nã, wú kãã mã siijãnkuugu ǹ-suu gɩ̀ yiiri wà: «Ɛl Betɛl». Sulammã nã, gùú nã mãã wù yáá wù kwar nǝ̃ wù vũnvũɔ̃w, Dũnnũẁ yáá wùu hillaa wù nã gùú sùɔ́gɩ-i.

8 Deboraw mãã wù yáá wù hã Erbekaw nǝ̃ ŋmãmmã wù tãnkuursǝrɩ nã, wù gáa ku, bá dii wù pĩɛ̃ndi tubikugǝ̃ngããdagǝ taaragu, Betɛl lǝri tuɔra. Bà dúú nã, ǹ-ba bà be tubikuu gúɔ̀ gùú yuugɩ-i dìi, wà kaaluu'n tubikuu.

9 Yakubaẁ jáa ver hlǝ Aram Nɩgǝraagɩ nã, Dũnnũẃ hillaa wù nã hlo nã̀ã piɛ wù nãkrɔfɩnfaagu wù drɔ,

10 nã̀ã waa nǝ̃-yǝ wà: «Bà yáá bà be-n wà Yakuba, bà síì ba bà be-n gɩ̀ tammã hlo. Yindiɛ, bà ji ba bà be-n wà Isɩrayɛl.» Dũnnũw nã̀ã fǝ̃ǝ̃ ǹ-suu-yǝ wà Isɩrayɛl.

11 Dũnnũẃ fǝ̃ǝ̃ ǹ-piɛ wù nãkrɔfɩnfaagu wù drɔ nã̀ã waa nǝ̃-yǝ hlo wà: «Mã́ã-i, Fãngããgɩmintii Dũnnũw. Mǝ̃̀ ji ce ǹ huɔnbiibá ɲũrũɔ̃, ń da ǹ-ba coplǝrdarǝ tǝvũnvũɔ̃w, halle nã̀ã ba coplacin tǝvũnvũɔ̃w, yuntaaba ji hlǝ yíi nũɔ̃gɩ nã-i.

12 Mǝ̃̀ plã mǝ̃̀ nũɔ̃gu nǝ̃ Ibramãw nǝ̃ Isiyagaw wà mǝ̃ ji hã-ba nǝ̃ gùú yiɛguu mãã, mǝ̃̀ ji hã yíi-i nǝ̃-gǝ. Nǝ̃ furũũgɩ nã, mǝ̃ ji hã ǹ huɔnbiiba nǝ̃-gǝ.»

13 Dũnnũw nã̀ã fǝ̃ǝ̃ ǹ-ta ǹ-hal gùú sùɔ́gɩ nã mãã wù wáalá cɔ̃mmã nǝ̃ Yakubaw.

14 Dũnnũẁ wáalá cɔ̃mmã nǝ̃ Yakubaw gùú sùɔ́gu, wú tuu tɩntãndarǝ ǹ-fũũ-dǝ nã̀ã tũn nɔ̃mmã nǝ̃ ɛrsɛ̃ kwãmmã dɩ̀ drɔ ǹ-kra dɩ̀ nã dɩ̀ dǝ ǹ-hã Dũnnũw.

15 Dũnnũẁ mãã wù wáalá cɔ̃mmã nǝ̃-yǝ gùú sùɔ́gu, Yakubaẃ suu-gǝ wà Betɛl.

Bɛ̃nsamɛ̃ huum'n cɔ̃mmã nǝ̃ Arsɛl kúúcɔ̃mmã

16 Yakubabá suro nǝ̃ wù suɔntaaba ǹ-hlǝ Betɛl lǝri ǹ-ba bà maar. Bà gáa wa ba ji kuganãã Efrata lǝrɩ nã, Arsɛl kúsúugɩ́ blǝ-yǝ, wú huu tãnkuur. Wù honããgɩ̀ yáá nǝ̃ gbǝ̃ǝ̃mã.

17 Wù honããgɩ̀ mãã gɩ̀ yáá gùu ga gbǝ̃ǝ̃ nnĩĩ nã, cijalw mãã wù ce canããbá ba bà huu, wú waa nǝ̃-yǝ wà: «Báa jã cɔ̃m, ǹ díɛ́ pũmpɩrblɩ-i hlo.»

18 Nǝ̃ Arsɛlẁ mãã wù yáá wù hũɔ̃ nũgɔ, wù jáa wa wù ji naa gùú nã mãã, wú be tãnkuurw wà Bɛn-Oni, gɩ̀ yuugɩ-i wà, mǝ̃̀ ywaruu'n bíɛ́w. Nǝ̃ wù tǝ Yakuba-lǝ, wú fǝ̃ǝ̃ ǹ-suu-yǝ wà, Bɛ̃nsamɛ̃. Bɛ̃nsamɛ̃ yuugɩ-i wà, nãdĩĩ'n nãkruɔ'n bíɛ́.

19 Arsɛlẃ ku, bá dii wù pĩɛ̃ndii Efrata lǝrii mãã bá be-dǝ kuɔkuɔgu wà Betɩlehɛm lǝ, gɩ̀ lǝ'n hlũũ'n nũɔ̃gɩ nã.

20 Yakubaẃ tuu tɩntãndarǝ ǹ-kra-dǝ wù pĩɛ̃ndiitãnfieri drɔ. Bà be tɩntãn díɛ́ wà Arsɛl pĩɛ̃ndiitãnfer'n tɩntãn. Tɩntãn díɛ̀dɩ́ nàa ǹ-ji hi jimããnããw.

21 Gɩ̀ furũũgɩ nã, Isɩrayɛlẃ suro ǹ-hlǝ Betɛl lǝri nǝ̃ wù suɔntaaba ǹ-maar Migɩdal-Edɛr bãntũɔ̃daagɩ nã ǹ-ga ce wù kuɔli ǹ-jiraa dàa.

22 Ǹ-ya Isɩrayɛlẃ ba jirammã nã gɩ̀ sùɔ́gɩ nã, wù bíɛ́ Wurbɛnẃ ba wù kã wù cɔ nǝ̃ gùú cijalw mãã bà yáá min jirammã nã nǝ̃ wù tǝw, bà be-yǝ wà Bila, wú nɔ̃-dǝ. Isɩrayɛl tãnkuuraa nũɔ̃sɔ̃ nǝ̃ bà hǝ̃ǝ̃lba-i nnĩĩ.

23 Leyaẁ húulá wù byadĩɛ̃l Wurbɛnw, nã̀ã huu Simeyɔ̃w, nǝ̃ Leviw, nǝ̃ Suudaw, nǝ̃ Isɩkarw nǝ̃ Sabulɔ̃w.

24 Arsɛlẃ huu Bɛ̃nsamɛ̃ba nǝ̃ Yisefuw ǹ-hã-yǝ.

25 Arsɛl mããcier Bilaẃ huu Danw nǝ̃ Nɛfɩtaliw ǹ-hã-yǝ.

26 Leya mããcier Silpaẃ huu Gadɩw, nǝ̃ Asɛrw ǹ-hã-yǝ. Bà-i Yakuba tãnkuuraabaa mãã wù húulá-ba Aram Nɩgǝraagɩ nã.

27 Yakubaẃ suro ǹ-kã wù tǝ Isiyaga kuugɩ nã Mãmɩregu, Kiriyat-Arba lǝri tuɔra, badaabá be-gǝ wà Hebrɔ̃ lǝ. Wù tǝvũnvũɔ̃ Ibramãw nǝ̃ wù tǝ Isiyagaw, bà yáá bàa jiraa gùú sùɔ́gɩ-i.

28 Isiyagaẁ díɛ́ bii trohǝ̃ǝ̃l nǝ̃ bii gur (180)

29 nã̀ã ji da wú ku. Wù mǝ̃́gará ǹ-vǝ̃ǝ̃ dugɔ ǹ-da biicin nã̀ã ji da wú duu wù tǝvũnvãnããba nã. Wù kúú, wù byanããbaa mãã Esow nǝ̃ Yakubaw, bá dii wù pĩɛ̃ndi.