Cuu Dulli (Genèse) 34

Yakuba bisĩɛ̃ Dinã cɔ̃mmã

Yuudagǝ, Dinãw mãã Leyaba nǝ̃ Yakuba bisĩɛ̃w, wù yáá wùu hlǝ ǹ-ta wù ga dǝ̃ǝ̃ lǝ'n canããba.

2 Hivitɩ nũɔ̃ntaa'n yuuntii Hamɔr bíɛ́ Sisɛmẃ da-yǝ, wú fǝ̃ǝ̃ ǹ-blǝ ǹ-mǝ̃rǝ̃ǝ̃ nǝ̃-yǝ fãngããgɩ nã.

3 Yakuba bisĩɛ̃ Dinã cɔ̃mmã́ blǝ wù yuugu ǹ-ce wù cɔ̃mmã́ dwal wù nã wú kãã puɔr ǹ-gbǝ̃ǝ̃ wù nã, wà wu caa wú taa-yǝ.

4 Sisɛmẃ waa nǝ̃ wù tǝ Hamɔrw wà: «Kã n ga cirǝ̃ǝ̃ busul wáà nãkruɔgɩ nã ǹ-hã-m, mǝ̃̀ caa mǝ̃́ taa-yǝ.»

5 Yakubaẁ yáá wùu nɔ̃ wà Sisɛmw bǝ̃́ǝ̃lǝ̃́ǝ̃ wù bisĩɛ̃w nã, nǝ̃ wù byanããbà mãã bà yáá bàa ta wancendi jierɩ nã, wù sáa waa cɔ̃m, wú fennãã bà verɩmmã nã.

6 Sisɛm tǝ Hamɔrẃ juo suro ǹ-kã Yakubaw nãã, wù ga wanãã nǝ̃-yǝ.

7 Yakuba byanããbà gáa ver ǹ-hlǝ jierɩ nã, bá juo nɔ̃ dìí nǝ̃n cíé. Bá da nã́ã́ Sisɛmw túuráa bà nã-i, bà hiɛgá juo dũ ǹ-ji maa gɩ̀ sùɔ́gu. Nã̀ã wa Sisɛmẁ yáá wùu ce dìí mãã ǹ-mǝ̃rǝ̃ǝ̃ nǝ̃ Yakuba bisĩɛ̃w, diihũɔ̃dǝ sǝ. Isɩrayɛlgu, díɛ̀dɩ tuugɩ̀ sǝ̃n saa dɩ́ ce.

8 Hamɔrẃ fǝ̃ǝ̃ ǹ-waa nǝ̃-ba wà: «Bisĩɛ̃ wáà cɔ̃mmã̀ jã́nnã́ mǝ̃̀ bíɛ́ Sisɛm kusuugɩ nã. Hlã́ã̀-yǝ nǝ̃-yǝ wú dii-yǝ nǝ̃ ciɛ.

9 Yáalà yí ba yì taa yì ɲĩɛ̃: bláà ɲì hã-yáà nǝ̃ ɲì bisiiba yí ba yì taa, nǝ̃ ɲí ba ɲì hũɔ̃ yì bɩgaaba ɲì taa.

10 Ɲi ji ba dìɛ jirammã nã yì tuɔra, ɲi ji ba ɲì hla nã yì yiɛgu, ǹ-ba ɲì veraa ɲì nãkrɔnɲã nã, ǹ-da ɲì yir'n hlɔ̃mmã.»

11 Sisɛm nǝ̃ wù hla, wú fǝ̃ǝ̃ ǹ-waa nǝ̃ bisĩɛ̃'n tǝw nǝ̃ wù vũnvãnããba wà: «Mǝ̃̀ cirǝ̃ǝ̃ cirǝ̃ǝ̃ ɲì nã-i, ɲi mãã ɲì ji caa kuu wo kuu mãã mǝ̃̀ saa, mǝ̃̀ ji hã-ɲã́ã̀ nǝ̃-gǝ.

12 Ɲi ji gbǝ̃ǝ̃ ǹ-ja ɲì bisĩɛ̃'n solli gùú tammãã mãã mã̀ dwal ɲì nã, nǝ̃ ɲincindɩ min mãã ɲì caa-ɲã, mǝ̃̀ ji hã-ɲã́ã̀ nǝ̃-ɲã. Dìí nǝ̃n gbǝ̃́ǝ̃lã́, ɲí hã-m nǝ̃ bisĩɛ̃ wáà mǝ̃́ taa-yǝ.»

13 Sisɛmẁ mãã wù yáá wùu bǝ̃ǝ̃lǝ̃ǝ̃ bà tǝ̃ǝ̃ Dinãw nã, gɩ̀-i, Yakuba tãnkuuraabá vuu-yǝ nǝ̃ wù tǝw min.

14 Bá waa nǝ̃-ba wà: «Bibiɛw mãã bà sáa síì-yǝ, yi síì gbǝ̃ǝ̃ ǹ-hã-yǝ nǝ̃ yì tǝ̃̀ǝ̃́w wú taa-yǝ, yi-ń ce-dǝ, gɩ̀ ji ba circɔ̃m-i yì saa.

15 Cɔ̃mmã dɩn mã́ nìɛ, ɲi-ń ce mã̀-lǝ, ɲi mãã ɲì caa dìi, yi ji ce-dǝ: dɩ̀-lǝ dɩ̀-i ɲí ce bá síì ɲì yiɛ'n bibyanããba min.

16 Gɩ̀-lǝ gɩ̀ nã, yi ji ba yi hã-ɲã́ã̀ nǝ̃ yì bisiiba ɲí ba ɲì taa, nã̀ã ba yi taa ɲimãã yo ɲì bɩgaaba. Yi ga juo jiraa ɲi tuɔra, yí jãn yì ɲĩɛ̃ nã ǹ-ba coplǝri dɩndi.

17 Nǝ̃ ɲi-ń ba ɲì sáa hũɔ̃ ǹ-síì, yi ji hũɔ̃ yì tǝ̃̀ǝ̃́w ɲì saa, ǹ-ver ǹ-ta.»

18 Bà cãwandɩ́ dwal Hamɔrw nã bá nǝ̃ wù bíɛ́ Sisɛmw.

19 Yakuba bisĩɛ̃'n cɔ̃mmã̀ mãã mã̀ yáá mã̀ dwal Sisɛmw nã ǹ-car, bà wáalá kuu wo kuu nǝ̃-yǝ, wù sáa yiilǝǝ nǝ̃-dǝ, wú suro ǹ-ta ǹ-kãã ce-dǝ. Sulammã nã, bà nũɔ̃gɩ nã bà yáá bà ne Sisɛmw-i.

20 Hamɔrbá suro nǝ̃ Sisɛmw ǹ-kã lǝntaabaa mãã ba-ń ce bá ba bà tɩgii gùú sùɔ́guu lǝ'n dũndɔ̃llɩ nã, nã̀ã waa nǝ̃-ba wà:

21 «Cwaa báà, cɔ̃nhuhorɩmmã́ nǝ̃ bà kusunɲã nã, ǹ-kã yì yiɛgu. Yáalà yí ya bá jiraa yì yiɛgu, ǹ-ba bà veraa bà nãkrɔnɲã nã, nã̀ã wa yì yiɛgɩ̀ bṹũlã́ ǹ-car. Yi ji ba yì tuu bà bisiiba yì taa-ba, nã̀ã ba yì hiil yì bɩgaaba yì hã-ba.

22 Yi-ń siɛ ǹ-hũɔ̃ ǹ-síì yì bibyanããba min bàá tammã, bà ji hũɔ̃ ǹ-kã yi jiraa yì min yí ba coplǝrɩ dɩndi.

23 Yi-ń siɛ ǹ-hũɔ̃ dɩ̀-lǝ, bá da ǹ-ba yì sǝ̃ǝ̃nã, bà kwasǝnɲinɲã nǝ̃ bà nãkrɔɲinɲã min ɲã̀ sɩga juo ba hãmĩĩ ɲinɲãã sǝ-ì?»

24 Cwaaba minw mãã bà yáá dàa lǝ'n dũndɔ̃llɩ nã, bà min bá hũɔ̃ Hamɔrba nǝ̃ wù bíɛ́ Sisɛm yalli. Lǝ'n bibyanããba min bá ce bá síì-ba.

25 Bãnɲã siɛlnã yuugu, bà tapãnɲã̀ mãã ɲã̀ sáá ɲã̀ã hi ǹ-buɔ, Yakuba tãnkuuraaba sǝ̃ǝ̃nã bà hǝ̃ǝ̃lbá hlǝ, Simeyɔ̃ba nǝ̃ Leviw, ǹ-tuu bà dãngunãba, Dinã tǝ̃ǝ̃baa yáá. Bá kãã jãn lǝ'n kusuugɩ nã nã́ã́ cɔ̃m'n sɩriɛ-i, nã̀ã ga kãã ko ǹ-baal bibyanããba min.

26 Bá ko Hamɔr yo, bá nǝ̃ wù bíɛ́ Sisɛmw nǝ̃ dãngunãw. Bà hlǝmmã nã Sisɛm suɔgu, bá fǝ̃ǝ̃ ǹ-tuu bà tǝ̃ǝ̃ Dinãw ǹ-ta nǝ̃ wù min.

27 Bà mãã bà yáá bàa bǝ̃ǝ̃lǝ̃ǝ̃ bà tǝ̃̀ǝ̃́w nã nnĩĩ, gùú cíé bà jáa ko-ba, Yakuba tãnkuuraa'n dɩgaliɛẃ jãn ǹ-kaala kuu wo kuu mãã gɩ̀ yáá bà saa lǝ'n kusuugɩ nã.

28 Bá jãn ǹ-blǝ tũmba nǝ̃ wuramba, nǝ̃ ninɲã nǝ̃ kǝkũmnããba, nǝ̃ ɲinɲã min mãã ɲã̀ yáá lǝrɩ nã nǝ̃ jierɩ nã.

29 Bá tuu ǹ-ta nǝ̃ bà gbaasǝrɩ min nã̀ã tuu bà tãnkuuraaba nǝ̃ bà canããba ǹ-ta nǝ̃-ba, nã̀ã jãn ǹ-kaala bà don'n wariɛga min.

30 Gɩ̀-i, Yakubaẃ waa nǝ̃ Simeyɔ̃ba nǝ̃ Leviw wà: «Ɲi píɛlá diibɩblaari mǝ̃̀ drɔ. Mǝ̃̀ cɔ̃mmã̀ ji bla Kanãã yiɛntaaba nã nǝ̃ Peresɩ bluuba nã ɲimãã cɔ̃mmã nã-i. Yi sǝ dugɔ, bà ga tɩgii bà ɲĩɛ̃ ǹ-juo du-m, ǹ-ko ǹ-baal-yáà nǝ̃ mǝ̃̀ suɔntaaba.»

31 Bá siɛ-yǝ wà: «Biɛ wáà sáá wù saa wú blǝ ǹ-ce yì tǝ̃̀ǝ̃́w nã́ã́ wú suur wù hla-i wù hã bibyanããba.»