Cuu Dulli (Genèse) 33

Yakubaba nǝ̃ Esow, bà jǝ̃ǝ̃lǝ̃ǝ̃ bà ɲĩɛ̃

Yakubaẁ jáa wà wu ne, ǹ-ne ǹ-da wù vũnvũɔ̃ Esoẁ jo nǝ̃ cwa tũndiiw. Wú buruɔ wù tãnkuuraaba nã ǹ-hã bà ɲũba. Bà ɲũbaa yáá nǝ̃ Leyaw, nǝ̃ Arsɛlw, nǝ̃ canããba hǝ̃ǝ̃lbaa mãã bà yáá mããcemmã nã wù saa.

2 Nã̀ã fǝ̃ǝ̃ ǹ-ce mããcieraaba hǝ̃ǝ̃l báàbá ta yigagɩ nã nǝ̃ bà tãnkuuraaba, nǝ̃ bà-lǝ bà furũũgɩ nã, Leyaẃ duu nã nǝ̃ wù tãnkuuraaba, nǝ̃ Arsɛlbá faal nǝ̃ Yisefuw.

3 Yakubaw nǝ̃ wù hla, wú ta dĩɛ̃lãmmã nã bà min yigagɩ nã ǹ-kuulǝǝ ɲũũrũũgu ǹ-ji da yin nɩrhǝ̃ǝ̃l nã̀ã ga da wù kuganãã wù vũnvũɔ̃w nã.

4 Gɩ̀-i, Esoẃ sɔ̃ ǹ-jǝ̃ǝ̃lǝ̃ǝ̃ wù nã ǹ-kãã hi wú blǝ ǹ-pɩpɩrĩɛ̃ wù nã, dudwalɩmmã́ ce gɩ̀ cwaaba hǝ̃ǝ̃lba min bá ba bà tũnũũ ɲiɲirãmmã nã.

5 Esoẁ jáa ne ǹ-da canããba nǝ̃ tãnkuuraaba, wú waa wà: «Ɲí nǝ̃ halǝmblaa-i nǝ̃ báà-lǝ?» Yakubaẃ siɛ-yǝ wà: «Mã́ã mãã ǹ mããcierw, Dũnnũẁ níé mǝ̃̀ yiɛgu nã̀ã hã-m nǝ̃ gùú tãnkuuraaba, bà-i.»

6 Canããba hǝ̃ǝ̃l báà mãã bà yáá mããcemmã nã Yakubaw saa, bá wáà ǹ-kuganãã nǝ̃ bà tãnkuuraaba ǹ-juo kuulǝǝ.

7 Leya yo, wú wáà ǹ-kuganãã nǝ̃ wù tãnkuuraaba ǹ-juo kuulǝǝ. Bà min furũũgɩ nã, Yisefu yo nǝ̃ Arsɛlw, bá wáà ǹ-kuganãã ǹ-juo kuulǝǝ.

8 Esoẃ waa wà: «Ǹ yáá ǹ caa ń juo ce bii nǝ̃ kwasǝnɲin'n kurɔnɲãã mãã mǝ̃̀ jállá nǝ̃-ɲã nnĩĩ?» Yakubaẃ siɛ-yǝ wà: «Yigantii, mǝ̃̀ júó nǝ̃-ɲã mǝ̃̀ ji hã-n, ń da ǹ-ne mǝ̃̀ yiɛgu.»

9 Esoẃ waa nǝ̃-yǝ wà: «Mǝ̃̀ hǝ̃ǝ̃, mǝ̃n dalaagɩ̀ yúú mǝ̃̀ yinɲã, yíì ya ǹ ɲinɲã́ ba ǹ saa.»

10 Yakubaẃ siɛ-yǝ wà: «Báa ce nnĩĩ mǝ̃̀ cirǝ̃ǝ̃ cirǝ̃ǝ̃ ǹ nã-i! Nǝ̃-ń ba nã̀ã hũɔ̃ ǹ-ne mǝ̃̀ yiɛgu, mǝ̃̀ júó mǝ̃̀ ji bũũ-n nǝ̃ kuu wo kuu mãã, hũɔ̃-gǝ. Mǝ̃̀ jállá nǝ̃-n, nǝ̃ ń hũɔ̃ ǹ-ce-m nǝ̃ gùú diifɩnfaarii mãã, gɩ́ nǝ̃ nã́ã́ mǝ̃̀ jállá nǝ̃ Dũnnũ-i.

11 Kuu wo kuu mãã mǝ̃̀ guudalaagu, Dũnnũẁ níé mǝ̃̀ yiɛ-i, nã̀ã hã-m nǝ̃ ɲinɲã min. Ce kukuɔya, nǝ̃ ń hũɔ̃ ɲã̀ã́ mãã mǝ̃̀ júó nǝ̃-ɲã mǝ̃̀ ji hã-n.» Yakubaẃ gbǝ̃ǝ̃ nǝ̃ Esow fuwɔ wu ga hũɔ̃-ɲã.

12 Esoẃ fǝ̃ǝ̃ ǹ-waa nǝ̃-yǝ wà: «Ya yí suro níɛ́ nã yí tuu hlũũgu yí ta, mǝ̃̀ ji ba ǹ tuɔra.»

13 Yakubaẃ siɛ-yǝ wà: «Yigantii, ǹ fǝ̃́ǝ̃lã́ wà tãnkuuraaba sǝ nǝ̃ kɩkǝm, nǝ̃ mǝ̃̀ tũmba nǝ̃ wuramba nǝ̃ nindaaɲã́ nìɛ ɲã̀ hã ɲã̀ biibá ba bà ŋmãsã, yi-ń hla nã̀ã guur ǹ-ce halle yuugɩ dɩn waali dɩn, kwasǝnɲinɲã min ɲã̀ ga kurǝǝ.

14 Yíì, ba ǹ maar mǝ̃̀ yiga nã. Mǝ̃n ji ba mǝ̃̀ tiɛsǝ mǝ̃̀ kwasǝnɲinɲã nǝ̃ mǝ̃̀ tãnkuuraaba mǝ̃̀ duu ǹ nã furũũgɩ nã Seyiir yiɛgu.»

15 Esoẃ waa nǝ̃-yǝ wà: «Gùú cwaabaa mãã bà duu mǝ̃̀ nã, mǝ̃̀ ji ya badaabá ba dìɛ nǝ̃-n.» Yakubaẃ siɛ-yǝ wà: «Ã-ãã, gɩ̀ sáa hi gɩ̀-lǝ gɩ̀ sùɔ́gu! Dìí nǝ̃n gbǝ̃́ǝ̃lã́, yíi mãã mǝ̃n yigantiiw, ń hũɔ̃ ǹ-hyar-m nǝ̃ kusufɩnfaagu.»

16 Gùú yuugɩ dɩngu dàa, Esoẃ suro ǹ-tuu hlũũgu ǹ-ba wù maar Seyiirgu.

17 Nǝ̃ Yakuba-lǝ, wú suro ǹ-ta ǹ-maar Sukɔtɩ lǝri. Gɩ̀ sùɔ́gɩ nã, wú kãã mã wù hla'n duugu nã̀ã nǝ̃ǝ̃ wù kwasǝnɲin'n gballiɛnããba. Gùú cɔ̃mmã nã-i, bá be sùɔ́ gúɔ̀ wà Sukɔtɩ. Sukɔtɩ yuugɩ-i wà gballiɛnãã.

Yakubaẁ kãã jiraa Kanãã yiɛgu Sisɛm lǝri

18 Yakubaẁ vérrá Aram Nɩgǝraagɩ nã ǹ-kãã hi hihinǝ̃mmã nã Sisɛm lǝri, Kanãã yiɛgu, wú nǝ̃ǝ̃ wù kuɔli ǹ-jiraa dàa lǝ'n nũɔ̃gɩ nã.

19 Yakubaẁ yáá wùu ce wù kuɔli gùú sùɔ́gu, wú sǝ̃ǝ̃-gǝ Sisɛm tǝ Hamɔr huɔnbiibaa saa jiibii gundiiw.

20 Gɩ̀ furũũgɩ nã, wú mã siijãnkuudagǝ gɩ̀ sùɔ́gɩ nã nã̀ã suu-gǝ wà Ɛl Elohe Isɩrayɛl, dɩ̀ yuugɩ-i wà Dũnnũw, Isɩrayɛl Dũnnũw.