Cuu Dulli (Genèse) 32

Gɩ̀ taakaalciibǝǝgu, Labãẃ curuɔ ǹ-suro ǹ-pɩpɩrĩɛ̃ wù bisiiba nã nǝ̃ bà byanããba nã̀ã pã wù nɔ̃fɩnfaagu ǹ-hã-ba nã̀ã ver ǹ-ta ǹ-kũũ.

Yakubaẁ tɩgɩnǝ̃ǝ̃ wù maar Eso jǝ̃ǝ̃lǝ̃mmã

2 Yakubaẁ jáa suro ǹ-tuu hlũũgu ǹ-ba wù maar, Dũnnũ mɛlɛgɛdaabá jǝ̃ǝ̃lǝ̃ǝ̃ wù nã.

3 Wù jáa da-ba, wú waa wà: «Dũnnũ sɩrǝǝsɩba wanjiram'n sùɔ́-i nnĩĩ!» Nã̀ã suu-gǝ wà Mãhanayim^a.

4 Yakubaẃ tĩɛ̃ tĩɛ̃taabá ta wù yigagɩ nã ǹ-kã wù vũnvũɔ̃ Esow nãã Seyiir yiɛgu, Edɔ̃m jierɩ nã,

5 nã̀ã waa nǝ̃-ba wà: «Wáalà nǝ̃ mǝ̃̀ tii Esow wà wù mããcier Yakubaw wa ɲí juo waa nǝ̃-yǝ wà wu kã́ã́ ǹ-ga jiraa Labã kuugɩ nã ǹ-hǝ̃ǝ̃sǝ ǹ-ji hi kuɔkuɔgu,

6 wú nǝ̃ ninɲã, nǝ̃ kǝkũmnããba, nǝ̃ mããcieraaba: bibyanãã nǝ̃ canãã. Wà wùú tĩ́ɛ̃lã́ ɲí juo waa ǹ-ja wù tiiẃ da ǹ-ne wù yiɛgu.»

7 Tĩɛ̃taabà jáa ver, bá juo waa nǝ̃ Yakubaw wà: «Yi kã́ã́ ǹ-ga hi ǹ vũnvũɔ̃ Esow, wùú yo wú nàa wù jo ǹ jǝ̃ǝ̃lǝ̃mmã nǝ̃ cwa tũndiiw.»

8 Gbǝrsǝrɩ́ mǝ̃gaa ǹ-blǝ Yakubaw dugɔ, wú buruɔ wù bluuba nã nǝ̃ wù tũmba nǝ̃ wù wuramba, nǝ̃ wù ninɲã, nǝ̃ wù ɲũgɔ̃minããba kurɔnɲã hǝ̃ǝ̃lɲã,

9 nã̀ã waa nǝ̃-ba wà: «Esow-ń juo du byarɩ nã nǝ̃ kuruɔgɩ dɩngu, kuruɔdaagɩ̀ gbǝ̃ǝ̃ ǹ-kwar-i.»

10 Gɩ̀ furũũgɩ nã, wú cirǝ̃ǝ̃ Dũnnũw nã wà: «Mǝ̃̀ tǝvũnvũɔ̃ Ibramã Dũnnũw, nǝ̃ mǝ̃̀ tǝ Isiyaga Dũnnũ, Fɩraa-Dũnnũw mãã wù wáalá nǝ̃-m wà mǝ̃́ ver ǹ-kã mǝ̃̀ lǝrɩ nã, ǹ-kãã ba dàa mǝ̃̀ suɔntaabaa tuɔra, wà n ji ce-m nǝ̃ diifɩnfaari.

11 Yíǹ pɩ́gará mã́ã̀ nǝ̃ gùú kusufɩnfaagu nǝ̃ gùú yalntasǝrii mãã, mã́ã mãã ǹ mããcierw, mǝ̃n sǝ̃n saa nǝ̃ dɩ̀-lǝ. Mǝ̃̀ yáá mǝ̃̀ huɔl Surdɛ̃gu gùú nã mãã, mǝ̃̀ yáá nǝ̃ mǝ̃̀ valblɩri dɩndɩn-i, nǝ̃ kuɔkuɔ-lǝ mǝ̃́ nǝ̃ kurɔnɲã hǝ̃ǝ̃l-i.

12 Ce kukuɔya nǝ̃ ń kor-m mǝ̃̀ vũnvũɔ̃ Eso nãkrɔnɲã nã. Mǝ̃́ sɔ̃ wà wu báa ga juo ko-m, mã́ã̀ nǝ̃ mǝ̃̀ canããba, nǝ̃ mǝ̃̀ tãnkuuraaba min.

13 Yíi nǝ̃ ǹ hla ǹ wáalá nǝ̃-m wà n ji ce-m nǝ̃ diifɩnfaari sulammã nã, nã̀ã ce mǝ̃̀ huɔnbiibá ɲũrũɔ̃ nã́ã́ baanũɔ̃'n hlɔ̃mper-i, bá ba bà síì gbǝ̃ǝ̃ ǹ-ja ǹ-fǝ̃ǝ̃ bà nũɔ̃gu.»

14 Yakubaẃ fǝ̃ǝ̃ ǹ-cɔ dàa gɩ̀ sùɔ́gɩ nã gɩ̀-lǝ gɩ̀ yisuɔgu. Wù kwasǝnɲinɲã sǝ̃ǝ̃nã, wú tũɔ̃l ǹ-hiil badaba, wù ji bũũ wù vũnvũɔ̃w Esow nǝ̃-ba:

15 wuruɔ nǝ̃nũɔ̃nãã trãngwaahǝ̃ǝ̃lw nǝ̃ siibonãã guuri, nǝ̃ tũmũũ nǝ̃nũɔ̃nãã trãngwaahǝ̃ǝ̃lw nǝ̃ tugɔliɛ guuri,

16 nǝ̃ ɲũgɔ̃minããbaa mãã bàa huu, bà-lǝ gur nǝ̃ nũɔ̃sɔ̃ nǝ̃ bà biiba, nǝ̃ nǝ̃ǝ̃ nǝ̃nũɔ̃nãã gwaahǝ̃ǝ̃lw nǝ̃ bliɛ nũɔ̃sɔ̃w, nǝ̃ kǝkũm nǝ̃nũɔ̃nãã gur nǝ̃ kǝkũmlwɛ nũɔ̃sɔ̃w, wù ga hã wù vũnvũɔ̃ Esow.

17 Wú hã wù mããcieraaba nǝ̃-ba bà dǝ bà dǝ, nã̀ã waa nǝ̃-ba wà: «Bláà ɲì maar mǝ̃n yiga nã, nǝ̃ yáalà sɔhlaagɩ́ ba kwasǝnɲin'n kurɔnɲã sǝ̃ǝ̃nã.»

18 Nã̀ã waa nǝ̃ mããcierdĩɛ̃lw wà: «Mǝ̃̀ vũnvũɔ̃ Esow-ń ga jal nǝ̃-n nã̀ã yugu-n wà halii curo-i nǝ̃-n, wà nǝ̃ ń kã haa-i, nǝ̃ halii kwasǝnɲin'n kuruɔ máarà ǹ yigagɩ nã,

19 siɛ-yǝ wà wù mããcier Yakuba bɩgaa-i, wu tĩ́ɛ̃lã́-n wà ń juo bũũ-yǝ nǝ̃-ɲã, nǝ̃ wùú nǝ̃ wù hla wú nàa wù jo furũũgɩ nã.»

20 Wú waa gùú dɩ̀ dɩndɩndɩ-i nǝ̃ bà hǝ̃ǝ̃lnãyow nǝ̃ bà siɛlnãyow, nǝ̃ cwaaba min mãã bà yáá bà duu kwasǝnɲin'n kurɔnɲã nã wà: «Ɲi-ń ga jal nǝ̃ Esow, wáalà gùú dɩ̀ dɩndɩndɩ-i nǝ̃-yǝ.

21 Ǹ-pya nã, wáalà nǝ̃-yǝ wà wù mããcier Yakubaẃ nàa wù duu nã furũũgɩ nã.» Yakubaẁ yáá wù kãn wù hiɛga nã wà wu-ń tĩɛ̃ ɲinɲã́ ta wù yiga nã ǹ-kãã bũũ-yǝ, wù hiɛgà ji sɩrĩɛ̃ nǝ̃-yǝ, wú jǝ̃ǝ̃lǝ̃ǝ̃ wù nã nãkrɔnɲã hǝ̃ǝ̃l.

22 Gɩ̀-i, wú tĩɛ̃ kwasǝnɲinɲã́ ta wù yiga nã, nã̀ã cɔ dàa wù wanjiram'n sùɔ́gɩ nã.

Yakubaẁ kã bá nar nǝ̃ Dũnnũw

23 Gùú yisuɔgɩ dɩngu dàa, Yakubaẃ suro ǹ-tuu wù canããba hǝ̃ǝ̃lba, nǝ̃ wù mããcieraaba hǝ̃ǝ̃lbaa mãã cicanããba, nǝ̃ wù byanãã nũɔ̃sɔ̃ nǝ̃ wù dɩnw ǹ-ce bá huɔl Yabɔkɩ^b wanhuɔlw.

24 Wú tuu-ba, ǹ-ce bá kãã huɔl Yabɔkɩ jurjurw nǝ̃ wù nãkrɔɲinɲã min,

25 nã̀ã ba dàa nǝ̃ wù dɩn. Curodiɛ jo wù nãã, bá nar ǹ-ji hi taajãlũũgu.

26 Biɛẁ jáa da wà wu síì gbǝ̃ǝ̃ ǹ-nar Yakubaw, wú mũũ ǹ-guu wù nĩɛ̃lɩ nã,

27 nã̀ã waa nǝ̃-yǝ wà: «Taagà píɛlá nã, ya mǝ̃́ ta.» Yakubaẃ siɛ-yǝ wà: «Gbal-i! Nǝ̃-ń ba ǹ sáa pã ǹ nɔ̃fɩnfaagu nǝ̃-m, mǝ̃̀ síì ya ń ta.»

28 Biɛẃ yugu-yǝ wà: «Bà be-n danii?» Wú siɛ-yǝ wà: «Mǝ̃̀ yiir-i Yakuba.»

29 Biɛẃ fǝ̃ǝ̃ ǹ-waa nǝ̃-yǝ wà: «Ǹ mãã ǹ nárrá nǝ̃ Dũnnũw nǝ̃ cwaa yo, nã̀ã gbǝ̃ǝ̃ bà nã, bà síì ba bà be-n Yakuba hlo, nǝ̃ bà ji ba bà be-n Isɩrayɛl-i.»

30 Yakubaẃ waa nǝ̃-yǝ wà: «Mǝ̃̀ cirǝ̃ǝ̃ cirǝ̃ǝ̃ ǹ nã-i, pɩgaa-m nǝ̃ ǹ yiirii.» Wú waa nǝ̃-yǝ wà: «Ǹ caa ń fǝ̃ǝ̃ mǝ̃̀ yiiri hamã nã-i?» Nã̀ã fǝ̃ǝ̃ ǹ-pã wù nɔ̃fɩnfaagu ǹ-hã Yakubaw.

31 Yakubaẃ waa wà: «Mǝ̃̀ díɛ́ Dũnnũw nǝ̃ mǝ̃̀ yinɲã nã̀ã ba dìɛ nũmǝ̃nã.» Gùú cíé wú suu sùɔ́ gúɔ̀ wà Penuwɛl. Penuwɛl yuugɩ-i wà, Dũnnũ yiga.

32 Bǝ̃ǝ̃gɩ̀ sórrá gùú nã mãã, Yakubaẁ yáá wùu huɔl Penuwɛl wanhuɔlw. Wù nĩɛ̃lɩ̀ mãã dɩ̀ yáá dìi guu nã, wú ba wù wáà wù diisǝ.

33 Biɛẁ mãã wù yáá wùu mũũ ǹ-guu Yakuba nĩɛ̃lɩ nã, gùú cíé, ǹ-tuu ǹ-ji vaa nǝ̃ jimããgu, Isɩrayɛl bluubà sǝ̃n wuu kwasǝnɲin'n cuur'n tĩĩ mãã nĩɛ̃l'n sùɔ́gɩ nã.