Cuu Dulli (Genèse) 31

Yakubaẃ juo nɔ̃ wà Labã byanããba wáalá wà wu túulá bàá tǝ ɲin-i ǹ-gbaala,

2 nã̀ã ga juo ne ǹ-da wà ba yáá gùú tammãã haasǝgu nǝ̃ Labãw, bá sǝ gɩ̀ tammã hlo.

3 Gɩ̀-i, Fɩraa-Dũnnũẃ waa nǝ̃-yǝ wà: «Ver ń maar ǹ tǝba yiɛgu, n ga ba ǹ suɔntaabaa tuɔra. Mǝ̃̀ ji ba ǹ saa.»

4 Yakubaẁ yáá jierɩ nã-i nǝ̃ wù tũmba nǝ̃ wù wuramba, nã̀ã tĩɛ̃ ǹ-be Arsɛlw nǝ̃ Leya bá kã wù nãã,

5 ǹ-kãã waa nǝ̃-ba wà: «Mǝ̃̀ níé ǹ-da wà mǝ̃̀ cɔ̃mmã̀ yáá mã̀ dwal ɲì tǝw nã dĩɛ̃lãmmã nã gùú tammã, mã̀ sǝ̃n dwal wù nã hlo gɩ̀ tammã. Nǝ̃ mǝ̃̀ tǝẁ yáá wù bũũ gùú Dũnnũw, wù yáá nǝ̃-m.

6 Ɲimãã nǝ̃ ɲì hla, ɲi fǝ̃́ǝ̃lã́ wà mǝ̃ cíé mããcemmã ǹ-hã ɲì tǝw nǝ̃ mǝ̃̀ hiɛga min-i.

7 Nǝ̃ dɩ̀-lǝ dɩ̀ min drɔ, wù yáá wù pã-m nǝ̃ gùu, wú dugurǝǝ mǝ̃̀ nã ǹ-hwar-gǝ ǹ-ji da bǝ̃ǝ̃cin. Nǝ̃ Dũnnũẁ sáa hũɔ̃ ǹ-ya wú ba wù ji bǝ̃ǝ̃lǝ̃ǝ̃ mǝ̃̀ nã.

8 Ɲì tǝẁ yáá wu-ń waa, wà kwasǝnɲinɲãã mãã ɲã-ń ba ɲã̀ sáa mǝ̃gaa ǹ-yalliɛ nã ɲã̀ã́ ji ba mǝ̃n ɲinɲã, ǹ-da kwasǝnɲinɲã min ɲã̀ã ba ɲã̀ huu biibaa mãã bà sáa mǝ̃gaa ǹ-yalliɛ nã. Nǝ̃ wù yáá wu-ń waa, wà kwasǝnɲinɲãã mãã ɲã̀ã mǝ̃gaa ǹ-yalliɛ nã ɲã̀ã́ ji ba mǝ̃n ɲinɲã, ǹ-da kwasǝnɲinɲã min ɲã̀ã ba ɲã̀ huu biibaa mãã bàa mǝ̃gaa ǹ-yalliɛ nã-i.

9 Dũnnũw hṹɔ̃lã́ ɲì tǝ kwasǝnɲinɲã ǹ-hã-m.

10 Gùú bǝ̃ǝ̃guu mãã kwasǝnɲinɲã̀ yáá ɲã̀ yugo ɲã̀ ɲĩɛ̃, mǝ̃̀ yáá mã̀ã cɔ dãnsãndɩ nã ǹ-da wà bliɛbaa mãã bà yáá bà yugo tũmũũ nǝ̃nũɔ̃nããba, nǝ̃ wuruɔ nǝ̃nũɔ̃nããba, bà sáá bàa mǝ̃gaa ǹ-yalliɛ nã, nǝ̃ badaabá mǝ̃gaa ǹ-yalliɛ nã.

11 Dũnnũ mɛlɛgɛẃ fǝ̃ǝ̃ ǹ-be-m dãnsãn díɛ́ nã wà: “Yakuba!” Mǝ̃́ siɛ-yǝ wà: “Mǝ̃̀ síɛlá.”

12 Wú waa nǝ̃-m wà mǝ̃́ ciir mǝ̃̀ yigagu ǹ-ne, bliɛba min mãã bà yugo Labã tũmũũ nǝ̃nũɔ̃nããba nǝ̃ wù wuruɔ nǝ̃nũɔ̃nããba, bá nǝ̃ bàa mǝ̃gaa ǹ-yalliɛ nã, yindagǝ nã bà sáa mǝ̃gaa ǹ-yalliɛ nã. Wà wu díɛ́ Labã cíé-m nǝ̃ dìí mãã, gùú cíé dɩ́ ba nnĩĩ.

13 Nã̀ã waa nǝ̃-m wà: “Mã́ã-i Dũnnũw mãã wù pɩ́gará wù hla ǹ-ja-n Betɛl lǝri, gùú sùɔ́guu mãã ǹ fṹũlã́ tɩntãndi nã̀ã tũn nɔ̃mmã dɩ̀ nã. Ǹ hlã-m nǝ̃ ǹ nũɔ̃gu dɩdarǝ nã gùú sùɔ́gɩ-i. Yindiɛ, suro ń tuu hlũũgu, ń hlǝ lǝ díɛ́ nã, ń maar ń kũũ.” »

14 Arsɛlba nǝ̃ Leyaw, bá siɛ-yǝ wà: «Hãmĩĩ sǝ nǝ̃ yuɔr yì tǝ suɔ'n sɔtuucɔ̃mmã nã hlo.

15 Wù súurá-yáà nã̀ã ver ǹ-wuu gùú jinɲãã nǝ̃n yáá ɲã̀ saa ɲã́ hã-yáà. Wù sáa tuu yí ba noraa sǝ gɩ̀ tammã-ì?

16 Gɩ̀-lǝ gɩ̀ nã, Dũnnũẁ hṹɔ̃lã́ kuu wo kuu wù saa, gɩ̀ ji ba hãmĩĩ kuu-i nǝ̃ yì tãnkuuraaba. Yíi ce Dũnnũw mãã wà n ce dìi.»

17 Yakubaẃ suro ǹ-tɩgɩnǝ̃ǝ̃ wù wariɛga nã, nã̀ã tuu wù tãnkuuraaba nǝ̃ wù canããba ǹ-piɛ-ba wù ɲũgɔ̃minããba drɔ.

18 Wù yáá wùu da gùú kwasǝnɲinɲã nǝ̃ gùú nãkrɔɲinɲã min mãã Aram Nɩgǝraagɩ nã, wú tuu-ɲã wù jo wù ji kũũ nǝ̃-ɲã wù tǝ suɔgɩ nã Kanãã yiɛgu.

19 Gɩ̀-lǝ gɩ̀ bǝ̃ǝ̃gu, Arsɛl tǝ Labãẁ yáá wùu ta wù ga hul^a ǹ-mǝ̃gaa wù tũmãm'n kwaasǝri, Arsɛlẃ jãn ǹ-ŋmã wù tǝ kiiba.

20 Bà jáa wa bá ta, Yakubaẁ sáa hũɔ̃ ǹ-waa cɔ̃m nǝ̃ Aram yiɛntabiɛw Labãw, wú vuu-yǝ nã̀ã ta.

21 Nã̀ã suro ǹ-tuu wù nãkrɔɲinɲã min ǹ-ta kwarɩmmã. Wú kãã huɔl Efratɩ lwaagu ǹ-ba wù maar Galaadɩ tãnũn'n yiɛgu.

Labãẁ ɲǝ̃ǝ̃ ǹ-duu Yakubaw nã

22 Gɩ̀ bãnɲã siɛlnã yuugu, bá waa nǝ̃ Labã wà Yakubaw kwárrá.

23 Wú suro ǹ-tuu wù bluuba, bá ɲǝ̃ǝ̃ ǹ-duu wù nã bãn nɩrhǝ̃ǝ̃l kusuugɩ nã ǹ-kãã hi-yǝ Galaadɩ tãnũnɲã nã.

24 Taagà jáa cu, Dũnnũẃ waa cɔ̃mmã nǝ̃ Aram yiɛntabiɛw Labãw dãnsãndɩ nã wà: «Báa ce ń waa diibɩblar nǝ̃ Yakubaw.»

25 Labãẁ gáa kãã hi Yakubaw wùu nǝ̃ǝ̃ wù kuɔli Galaadɩ tãnũnɲã sǝ̃ǝ̃nã, wùú yo nǝ̃ wù bluuba, bá nǝ̃ǝ̃ bà dǝlli.

26 Labãẃ waa nǝ̃ Yakubaw wà: «Ǹ cíé bii nnĩĩ? Ǹ vúuráa mǝ̃̀ nã ǹ-tuu mǝ̃̀ bisiiba ǹ-ta nǝ̃-ba nã́ã́ n blǝ́rá-ba byarcesuɔ nã-i ǹ-ga ce bá ba kasoduuntaaba.

27 Bii cíé ń ŋmã ǹ-kwar nǝ̃-m? Ǹ cíé nnĩĩ-i ǹ-vuuraa mǝ̃̀ nã. Mǝ̃ nã́ã̀ ba mã̀ã fǝ̃ǝ̃ ǹ tallɩ nã, mǝ̃ nã́ã̀ ya ń ta dudwalɩmmã nã nã̀ã ce hlãnɲã, nǝ̃ ɲããmǝ̃ǝ̃linɲã ǹ-tĩɛ̃-n.

28 Nǝ̃ ǹ cíé-dǝ nnĩĩ, mǝ̃̀ sáa da ǹ-pɩpɩrĩɛ̃ mǝ̃̀ bisiiba nã nǝ̃ bà tãnkuuraaba nã. Gɩ̀ sùɔ́gɩ nã, ǹ sáa ce cɔ̃nfǝ̃ǝ̃gǝ sǝ.

29 Mǝ̃̀ yáá mǝ̃̀ ji gbǝ̃ǝ̃ ǹ-ce-ɲã́ã̀ nǝ̃ diibɩblaari, nǝ̃ ǹ tǝ Dũnnũẁ wáalá nǝ̃-m dãnsãndɩ nã yisuɔgu wà mǝ̃ báa waa diibɩblar nǝ̃-n.

30 Yindiɛ, ǹ tǝ suɔ'n kũũm'n nũũgɩ̀ mãã gɩ̀ bla gɩ̀ ko-n, nǝ̃ ń suro wà ń ta ta-i, nǝ̃ bii cíé ń ŋmã mǝ̃̀ kiiba?»

31 Yakubaẃ siɛ Labãw wà: «Mǝ̃̀ yáá mǝ̃̀ sɔ̃ ǹ nãã wà n ji hũɔ̃ mǝ̃̀ canããba, gùú cíé.

32 Nǝ̃ yindiɛ, hãmĩĩ sǝ̃ǝ̃nã, nǝ̃-ń da ǹ kiiba gùú tii saa, ko gɩ̀ tiiw. Ne mǝ̃̀ wariɛga yì bluu'n yinɲã nã, nǝ̃-ń da kuu wo kuu mãã ǹ kuugu, tuu-gǝ ń maar.» Yakubaẁ sáá wùu fǝ̃ǝ̃ wà Arsɛlw ŋmã́ã́ ǹ-tuu wù tǝ Labã kiiba.

33 Labãẃ jãn ǹ-ne Yakuba kuɔli, nǝ̃ Leya kuɔli, nã̀ã jãn ǹ-ne bà mããcieraaba hǝ̃ǝ̃lbaa mãã Silpaba nǝ̃ Bilaw bà kuɔli, wù sáa da kuu. Wú fǝ̃ǝ̃ ǹ-hlǝ Leya kúɔ́lɩ nã, ǹ-kãã jãn Arsɛl dǝllɩ nã,

34 nã̀ã da wù-lǝ wùú yáá wùu tuu wù tǝ kiiba. Wù yáá wùu tuu-ba ǹ-dii ɲũgɔ̃minãã'n ũɔ̃gu taara, nã̀ã jiraa ǹ-yiirǝǝ bà nã. Labãẃ ne kúɔ́l'n kusuugɩ min, wù sáa da kuu.

35 Arsɛlẃ fǝ̃ǝ̃ ǹ-waa nǝ̃-yǝ wà: «Tɩtii, báa gãnãã nǝ̃-m. Nǝ̃-ń da mǝ̃̀ sáa suro ǹ-hiraa ǹ yigagɩ nã nã̀ã jiraa nnĩĩ, mǝ̃̀ blǝ́rá nã-i.» Labãẃ ne, ǹ-ne, ǹ-ne wù sáa ji da wù kiiba.

36 Yakuba hiɛgá dũ nǝ̃-yǝ wú waa nǝ̃-yǝ wà: «Mǝ̃̀ bǝ̃́ǝ̃lǝ̃́ǝ̃ bii nã-i, dàa mǝ̃̀ cíé bii ǹ-jãn ǹ nã nǝ̃ ń suro ǹ-ba ǹ ɲǝ̃ǝ̃ ǹ duu mǝ̃̀ nã nnĩĩ tammã?

37 Ǹ níé mǝ̃̀ wariɛga, ǹ jáa da bii gùú mãã gùú ba ǹ suɔ'n kuugu? Ǹ díɛ́ gùu, pɩgaa-gǝ ń ja mǝ̃̀ bluuba nǝ̃ ń ja ǹ bɩgaa yo nǝ̃-gǝ, bá da ǹ-tũɔ̃l-dǝ ǹ-hã-yáà.

38 Mǝ̃̀ cíé bii guuri ǹ saa, ǹ sáa hi ǹ-nɔ̃ wà ǹ tũmũũ yindagǝ nã ǹ wuruɔ'n kúsúugɩ bǝ̃́ǝ̃lǝ̃́ǝ̃. Ǹ pya nã, mǝ̃̀ sáa hi ǹ-ko tugɔla ǹ kwasǝnɲinɲã sǝ̃ǝ̃nã ǹ-wuu.

39 Mǝ̃̀ sáa hi ǹ-jo nǝ̃ ǹ kwasǝnkuudagǝ ǹ-ji hã-n wà jerbɩganãã kúó-gǝ, gɩ̀-lǝ gɩ̀ durummã min mã̀ yáá mã́ã drɔ-i. Bà yáá ba-ń ŋmã ǹ kwasǝnɲinɲã bǝ̃ǝ̃nãgu yindagǝ nã yisuɔgu, nǝ̃-ń ce ń ce mǝ̃́ hã-n nǝ̃ ɲã̀ suɔnãw.

40 Bǝ̃ǝ̃nãgu, bǝ̃ǝ̃gɩ̀ yáá gɩ̀ hyã-m, nǝ̃ yisuɔgu yɔgà ba gà ywar-m, ǹ-ce mǝ̃́ ba mǝ̃̀ sáá mǝ̃̀ gbǝ̃ǝ̃ mǝ̃̀ duɔsǝ.

41 Mǝ̃̀ hṹɔ̃lã́ ǹ-ce bii guuri ǹ suɔgu. Mǝ̃̀ cíé mããcemmã ǹ-hã-n bii nũɔ̃sɔ̃ nǝ̃ gà nnǝ̃ǝ̃ kusuugɩ nã ǹ-da ǹ-taa ǹ bisiibà hǝ̃ǝ̃lba, nã̀ã ce bii nãndienw ǹ caa kwasǝnɲinɲã. Nǝ̃ ǹ yáá ǹ pã-m nǝ̃ gùu, ǹ dúgurǝ́ǝ mǝ̃̀ nã ǹ-hwar-gǝ ǹ-ji da bǝ̃ǝ̃cin.

42 Mǝ̃̀ tǝ vũnvũɔ̃ Ibramã Dũnnũw, wùú mãã wù yáá wù ce mǝ̃̀ tǝ Isiyagaẃ ba wù ɲãnãã, wùú nã́ã̀ ba wù sáa pɛ mǝ̃̀ nã, ǹ yáá ǹ ji ya mǝ̃́ ver nǝ̃ mǝ̃̀ nãkwasǝ-i. Nǝ̃ Dũnnũẁ díɛ́ mǝ̃̀ mããjaamã, nǝ̃ gùú mããcegbǝ̃ǝ̃mãã mãã mǝ̃̀ cíé-mã ǹ-hã-n. Gùú yisuɔguu nǝ̃n tíɛ́ nnĩĩ, wù píirǝ́-n.»

43 Labãẃ waa nǝ̃ Yakubaw wà: «Bisii báà, mã́ã bɩgaa-i, bà tãnkuuraaba, mã́ã bɩgaa-i, nǝ̃ kwasǝnɲin ɲã́ã̀, mã́ã ɲin-i, kuu wo kuu mãã ǹ da-gǝ nnĩĩ, mã́ã kuu-i. Nǝ̃ ǹ-tuu jimããgu, mǝ̃̀ síì gbǝ̃ǝ̃ ǹ-ce kuu hlo ǹ-hã mǝ̃̀ bisiiba, yindagǝ nã ǹ-ce ǹ-hã bà tãnkuuraabaa mãã bà húulá-ba.

44 Dɩ̀ mãã gɩ̀-lǝ gɩ̀ tammã, jo mã́ã̀ nǝ̃ yíì yí ɲũɔ̃ twammã, cɔ̃mmã̀ saa mã́ ba yì sǝ̃ǝ̃gɩ nã.»

45 Yakubaẃ fǝ̃ǝ̃ ǹ-tuu tɩntãndarǝ ǹ-kra dɩ̀ nã sũɔ̃lɩmmã nã.

46 Gɩ̀ furũũgɩ nã, wú waa nǝ̃ wù bluuba wà bá tɩgii tɩntrãdaga. Bá biɛriɛ gà nã ǹ-juo tɩgii-ga ǹ-ce-ga nǝ̃ piiri, nã̀ã fǝ̃ǝ̃ ǹ-wuu wuuri piir díɛ́ drɔ.

47 Labãẃ suu sùɔ́ gúɔ̀ wà Yegar Sahaduta, nǝ̃ Yakuba-lǝ wú suu-gǝ wà Galɛd.

48 Labãẃ waa wà: «Tɩntrã'n piir díɛ̀ ji ba yì sǝ̃ǝ̃gɩ nã cɔ̃m mã́ã̀ nã. Gùú cɔ̃mmã nã-i, bá ba bà be sùɔ́ gúɔ̀ wà Galɛd. Galɛd yuugɩ-i wà, wùú mãã sǝ̃ǝ̃gɩ nã, wù piiri.

49 Nã̀ã ver ǹ-ba bà be-gǝ hlo wà Misɩpa. Misɩpa yuugɩ-i wà, gùú sùɔ́guu mãã bà ji ba bà cii yì nã. Labãẁ súulǝ́-gǝ gɩ̀ tammã ǹ-waa wà ba-ń ji haliɛ bà ɲĩɛ̃ nã ǹ-ba bà sǝ̃n da bà ɲĩɛ̃, Fɩraa-Dũnnũ yinɲã́ ba bà nã.

50 Nǝ̃-ń ga ba ǹ ce mǝ̃̀ bisiibá ba bà ywar, nã̀ã ver ǹ-tuu canããdaba, fǝ̃ǝ̃ wà curo síì ba yì sǝ̃ǝ̃gɩ nã, nǝ̃ Dũnnũw nǝ̃ wù hla, wùú ji ba yì sǝ̃ǝ̃gɩ nã.»

51 Labã nã̀ã fǝ̃ǝ̃ ǹ-waa nǝ̃ Yakubaw wà: «Ne tɩntãnpiir díɛ̀, mǝ̃̀ káráa dɩ̀ nã yì sǝ̃ǝ̃gɩ nã, nǝ̃ ne tɩntãn díɛ́ mãã dìi sũɔ̃l.

52 Piir díɛ̀, nǝ̃ tɩntãn díɛ̀ ji ba yì sǝ̃ǝ̃gɩ nã. Mǝ̃n sǝ̃n saa mǝ̃́ maa sùɔ́ gúɔ̀ ǹ-kã ǹ yiɛgu nǝ̃ kãnɩmbɩblammã, nǝ̃ yíi yo ǹ sǝ̃n saa ń maa-gǝ ǹ-jo mǝ̃̀ yiɛgu nǝ̃ kãnɩmbɩblammã.

53 Ibramã Dũnnũw, nǝ̃ Nahɔr Dũnnũw, bá tũɔ̃l-dǝ ǹ-hã-yáà.» Yakuba tǝ Isiyagaẁ yáá wù ɲãnãã gùú Dũnnũw mãã wù yigagɩ nã, Yakubaẃ waasǝ wù-lǝ wù yiirɩ nã.

54 Gɩ̀ furũũgɩ nã, Yakubaẃ jãn siimã tãnũũgɩ nã, nã̀ã jar wù bluuba wuurɩ nã. Bá wuu wuuri, nã̀ã cɔ dàa tãnũũgɩ nã.