Cuu Dulli (Genèse) 29

Yakubabá gbǝ nǝ̃ Labã bisĩɛ̃ Arsɛlw

Yakubaẃ suro ǹ-tuu hlũũgu ǹ-ba wù maar gùú liɛga nã mãã bǝ̃ǝ̃'n pal'n yiɛgu.

2 Yuudagǝ, wú da hũnfuudagǝ jierɩ nã. Bà yáá bà kã nǝ̃ kwasǝnɲinɲã gùú hũnfuugɩ nã-i ɲã́ ba ɲã̀ ɲũɔ̃ hũmmã. Wú da tũmba nǝ̃ wuramba, kurɔnɲã siɛl fiisammã nã gɩ̀ tuɔra. Tɩntãnkɩnkandaarɩ̀ yáá dàa dìi suu gɩ̀ nũɔ̃gɩ nã.

3 Kwasǝnɲin'n kurɔnɲã min ɲã̀ yáá ɲã-ń juo jaliɛ, wanciinããba-ń ce bá bin tɩntãn díɛ̀ ǹ-cugur hũnfuu'n nũɔ̃gu ǹ-hã kwasǝnɲinɲã nǝ̃ hũmmã ɲã́ ɲũɔ̃, nã̀ã ver ǹ-bin-dǝ ǹ-suu gɩ̀ nũɔ̃gu.

4 Yakubaẃ yugu wanciinããba wà: «Mã́ã cwanãã, ɲi hlǝ haa-ì?» Bá siɛ-yǝ wà: «Yi hlǝ Harã lǝ-i.»

5 Wú ver ǹ-yugu-ba wà: «Ɲi fǝ̃ǝ̃ fǝ̃ǝ̃ Labãw-ì? Nahɔr bíɛ́'n bíɛ́w.» Bá siɛ-yǝ wà: «Ũwũũ, yi fǝ̃ǝ̃ fǝ̃ǝ̃-yǝ.»

6 Wú yugu-ba wà: «Wú nàa hinnǝ̃-ì?» Bá waa wà: «Wú nàa hinnǝ̃. Wù bisĩɛ̃ Arsɛlẃ jówà nǝ̃ kwasǝnɲinɲã nnĩĩ nã.»

7 Wú waa nǝ̃-ba wà: «Bǝ̃ǝ̃gɩ́ nìɛ dìɛ dìɛ, bà tɩgim'n bǝ̃ǝ̃gɩ̀ sáa hi ǹ-hi, hlã́ã̀ kwasǝnɲinɲã nǝ̃ hũmmã ɲã́ ɲũɔ̃ nǝ̃ ɲí ver nǝ̃-ɲã ɲã ga wuuraa.»

8 Bá siɛ-yǝ wà: «Yi síì gbǝ̃ǝ̃ ǹ-hã-ɲã nǝ̃ hũmmã ɲã́ ɲũɔ̃ kuɔkuɔgu. Yi saa yí cii kwasǝnɲinɲã min ɲã́ jo ǹ-jaliɛ nã̀ã da ǹ-bin tɩntãndɩ́ hal hũnfuu'n nũɔ̃gɩ nã ǹ-hã-ɲã nǝ̃ hũmmã ɲã́ ɲũɔ̃.»

9 Yakubaẁ bla wù waa cɔ̃mmã nǝ̃-ba, Arsɛlẃ kãã jo nǝ̃ wù tǝ tũmba ǹ-ji hi-ba. Wanciin yáá nǝ̃-yǝ.

10 Yakubaẁ jáa ne ǹ-da wù blǝvũɔ̃ Labã bisĩɛ̃ Arsɛlw nǝ̃ wù blǝvũɔ̃'n tũmba, wú wáà ǹ-kãã bin tɩntãndii mãã hũnfuu'n nũɔ̃gɩ nã dɩ́ hal ǹ-hã wù blǝvũɔ̃'n tũmba nǝ̃ hũmmã bá ɲũɔ̃.

11 Nã̀ã kãã pɩpɩrĩɛ̃ Arsɛlw nã, dudwalɩmmã́ ce wú ba wù kaal wù higinãã.

12 Wú fǝ̃ǝ̃ ǹ-waa nǝ̃ Arsɛlw wà: «Ǹ tǝ cwanĩĩ-i nǝ̃-m, mã́ã̀, Erbeka bíɛ́-i nǝ̃-m.» Arsɛlẃ fǝ̃ǝ̃ ǹ-sɔ̃ ǹ-kãã taa-dǝ nǝ̃ wù tǝw.

13 Labãẁ jáa yii ǹ-nɔ̃ wù tǝ̃ǝ̃ bíɛ́ Yakubaw cɔ̃mmã, wú sɔ̃ ǹ-ta wù jǝ̃ǝ̃lǝ̃mmã, ǹ-kãã pɩpɩrĩɛ̃ wù nã nã̀ã kũũ nǝ̃-yǝ wù suɔgu. Bà gáa hi, Yakubaẃ tuu ǹ-taa cɔ̃mmã min ǹ-ja-yǝ.

14 Labãẃ fǝ̃ǝ̃ ǹ-waa nǝ̃-yǝ wà: «Yíì nǝ̃ mã́ã̀, twammã dɩn cwaa-i nǝ̃-yáà. Mã́ã cwanĩĩ-i nǝ̃-n.» Yakubaẃ fǝ̃ǝ̃ ǹ-ba dàa ǹ-ce hyargaagɩ dɩngu Labã kuugɩ nã.

Yakuba cataacɔ̃mmã

15 Yuudagǝ, Labãẃ waa nǝ̃ Yakubaw wà: «Sulam-i, mǝ̃̀ cwanĩĩ-i nǝ̃-n, nǝ̃ gɩ̀ sáa saa ń ba ǹ ce mããcemmã ǹ hã-m mǝ̃ǝ̃lǝ̃ǝ̃. Ǹ mãã ǹ caa mǝ̃́ pã-n nǝ̃ gùu, waa-gǝ mǝ̃́ nɔ̃.»

16 Labãẁ yáá nǝ̃ bisiiba hǝ̃ǝ̃l, bà yáá bà be vũnvãtiiw wà Leya, nã̀ã ba bà be wuusaalw wà Arsɛl.

17 Leya yinɲã̀ yáá ɲã̀ fa nellɩ nã, nǝ̃ Arsɛlẃ ba wù fa, nã̀ã saa curo.

18 Arsɛl cɔ̃mmã́ juo dwal Yakuba nã, wú waa nǝ̃ Labã wà: «Mǝ̃̀ ji ce mããcemmã ǹ-hã-n bii nɩrhǝ̃ǝ̃l kusuugɩ nã, ǹ-da ǹ-taa ǹ bisɛ̃saal Arsɛlw.»

19 Labãẃ fǝ̃ǝ̃ ǹ-waa wà: «Mǝ̃-ń hã yíì nǝ̃-yǝ, gɩ̀ ji dwal mǝ̃̀ nã ǹ-ɲǝ̃ǝ̃ mǝ̃́ hã nǝ̃ǝ̃nĩĩtii nǝ̃-yǝ. Nnĩĩ-lǝ, ba dìɛ mǝ̃̀ suɔgu.»

20 Arsɛl cɔ̃mmã nã, Yakubaẃ ba dàa ǹ-ba wù ce mããcemmã wù hã Labãw bii nɩrhǝ̃ǝ̃l kusuugɩ nã. Arsɛl cɔ̃mmã̀ yáá mã̀ dwal Yakubaw nã ǹ-car, fuwɔ bii gáàgá juo ta nã́ã́ bãn-i wù yinɲã nã.

21 Yakubaẃ fǝ̃ǝ̃ ǹ-waa nǝ̃ Labã wà: «Mǝ̃̀ mããcem'n bìigà jáa suu. Hã-m nǝ̃ mǝ̃̀ ciɛw, mǝ̃̀ caa mǝ̃́ kuganãã wù nã.»

22 Labãẃ fǝ̃ǝ̃ ǹ-jar gɩ̀ sùɔ́ntaaba min cataawuurɩ nã.

23 Taagà jáa cu, wú fǝ̃ǝ̃ ǹ-tuu wù bisĩɛ̃ Leya ǹ-kãã hã Yakubaw, bá fǝ̃ǝ̃ bà ɲĩɛ̃.

24 Nã̀ã fǝ̃ǝ̃ ǹ-ce wù mããcier Silpaẃ kãã ba wù bisĩɛ̃ Leya mããcierw.

25 Taagà jáa kaalaa, Yakubaẃ ne ǹ-da wà Leya-i, wú waa nǝ̃ Labã wà: «Ǹ cíé-m danii nnĩĩ-lǝ? Mǝ̃̀ cíé mããcemmã ǹ-hã-n Arsɛl cɔ̃m nã-i, bincɔ̃m nã-i ń dugurǝǝ mǝ̃̀ nã?»

26 Labãẃ ver ǹ-siɛ-yǝ wà: «Hãmĩĩ saa, bà sǝ̃n da bà hiil bisɛ̃saalw vũnvãyo'n yigagɩ nã.

27 Ya vũnvãyo'n cataayunɲã́ jal sɩgagu haasǝ, nǝ̃ gɩ̀ furũũgɩ nã, yi ji hã-n nǝ̃ wuusaal yo. Nǝ̃ ǹ ji ver ǹ-ce bii nɩrhǝ̃ǝ̃l-i hlo mǝ̃̀ saa mããcemmã nã.»

28 Yakubaẃ hũɔ̃ Labã yalli ǹ-ce Leya cataacɔ̃m'n yunɲã́ jal sɩgagu. Labãẃ fǝ̃ǝ̃ ǹ-hã-yǝ nǝ̃ wù bisĩɛ̃ Arsɛlw, wú dii-yǝ nǝ̃ ciɛ.

29 Labã nã̀ã fǝ̃ǝ̃ ǹ-ce wù mããcier Bilaẃ kãã ba wù bisĩɛ̃ Arsɛl mããcierw.

30 Yakubaẃ kãã cɔ nǝ̃ Arsɛl yo, wù cɔ̃mmã̀ yáá mã̀ dwal wù nã ǹ-ɲǝ̃ǝ̃ Leyaw, wú ver ǹ-ce bii nɩrhǝ̃ǝ̃ldaga hlo ǹ-ce mããcemmã ǹ-hã Labã.

Yakuba tãnkuuraaba

31 Fɩraa-Dũnnũẁ jáa da wà Leya cɔ̃mmã̀ sǝ̃n dwal Yakubaw nã ǹ-hi Arsɛlw, wú ce Leyaẃ ba wù huu nǝ̃ Arsɛl-lǝ, wù yáá wùu ĩɛ̃.

32 Leyaẃ juo tuu kusuugu ǹ-huu pũmpɩrblɩ, nã̀ã suu wù yiiri wà Wurbɛn^a, ǹ-waa wà: «Fɩraa-Dũnnũẁ díɛ́ mǝ̃̀ mããjaamã. Yindiɛ, mǝ̃̀ cɔ̃mmã̀ ji dwal mǝ̃̀ blaw nã.»

33 Wú ver ǹ-hiraa kúsúugɩ nã ǹ-huu wù byanããba hǝ̃ǝ̃lnãw, nã̀ã waa wà: «Fɩraa-Dũnnũẁ nṹɔ̃́ mǝ̃̀ cirǝ̃mmã nã, wà mǝ̃̀ cɔ̃mmã̀ sáá mã̀ dwal mǝ̃̀ blaw nã, gɩ̀-i, wú hã-m nǝ̃ biɛ hlo.» Wú suu wù yiiri wà Simeyɔ̃^b.

34 Wú hiraa kúsúudagǝ nã hlo ǹ-huu wù byanããba siɛlnãw nã̀ã waa wà: «Mǝ̃̀ húulá pũmpɩrbiiba siɛlba ǹ-hã mǝ̃̀ blaw. Yindiɛ, wù ji ɲǝ̃gãr mǝ̃̀ nã.» Yakubaẃ fǝ̃ǝ̃ ǹ-suu wù yiiri wà Levi^c.

35 Leyaẃ ver ǹ-tuu kusuugu ǹ-huu wù byanããba nnǝ̃ǝ̃nãw nã̀ã waa wà: «Kuɔkuɔ-lǝ, mǝ̃̀ ji bũũ Fɩraa-Dũnnũw!» Nã̀ã suu wù yiiri wà Suuda^d. Suuda honãã'n furũũgɩ nã, wú fǝ̃ǝ̃ ǹ-hiraa wù honããgu.