Cuu Dulli (Genèse) 28

Isiyagaẃ be Yakubaw ǹ-juo pã wù nɔ̃fɩnfaagu nǝ̃-yǝ, nǝ̃ bá da ǹ-nǝ̃nǝ̃ǝ̃ bà ɲĩɛ̃ nã, nã̀ã waa dɩ́ gbǝ̃ǝ̃ nǝ̃-yǝ wà: «Báa tuu ciɛ Kanãã yiɛgu.

2 Suro ń maar ǹ ɲũw tǝ Betuwɛl kuugɩ nã Aram Nɩgǝraagɩ nã. Gɩ̀ sùɔ́gɩ nã, tuu ǹ blǝvũɔ̃ Labã bisĩɛ̃diɛ ǹ-dii-yǝ nǝ̃ ciɛ.

3 Fãngããgɩmintii Dũnnũẃ ta ǹ yigagɩ nã, nã̀ã hã-n nǝ̃ tãnkuuraaba piyɛ̃ ń da ǹ-ba coplacin tǝvũnvũɔ̃w.

4 Wù píɛlá wù nãkrɔfɩnfaagu Ibramãw drɔ gùú tammã, wú piɛ-gǝ yíì nǝ̃ ǹ huɔnbiiba drɔ nĩĩgɩ-i, nã̀ã ce ǹ mãã ǹ jiraa ǹ waaraa gùú yiɛgɩ nã mãã norsǝrɩ nã wù hlã Ibramã nǝ̃-gǝ, gɩ́ ba ǹ kuugu.»

5 Isiyagaẃ hã Yakubaw nǝ̃ hlũũgu, wú hlǝ ǹ-ta wù maar Aram yiɛntabiɛw Betuwɛl bíɛ́ Labã kuugɩ nã, Aram Nɩgǝraagɩ nã, Esoba nǝ̃ Yakuba bà ɲũ Erbeka tǝ̃ǝ̃-i nǝ̃ Labãw.

6 Esoẃ juo nɔ̃ wà Isiyagaw plã wù nɔ̃fɩnfaagu ǹ-hã Yakubaw, nã̀ã tĩɛ̃ wú ta Aram Nɩgǝraagɩ nã wù ga tuu ciɛ, nã̀ã nɔ̃ wà wu yáá wù pã wù nɔ̃fɩnfaagu nǝ̃-yǝ gùú bǝ̃ǝ̃gu, wu wáalá dɩ́ gbǝ̃ǝ̃ nǝ̃-yǝ wà wu báa ce ǹ-tuu busul Kanãã yiɛgu,

7 nǝ̃ wà Yakubaw hṹɔ̃lã́ wù tǝba nǝ̃ wù ɲũ yalli, nã̀ã hlǝ ǹ-ta wù maar Aram nɩgǝraagɩ nã.

8 Esoẃ fǝ̃ǝ̃ ǹ-fǝ̃ǝ̃ wà Kanãã yiɛ'n bisii'n cɔ̃mmã sǝ̃n dwal wù tǝ Isiyagaw nã.

9 Wú waa wà wu ji tuu ciɛdiɛ, nã̀ã suro ǹ-ta ǹ-kãã hi Ibramã bíɛ́ Sɩmãyilaw, wú tuu wù-lǝ wù bisĩɛ̃ Mahalatɩw mãã Nebayɔtɩ nãndiɛ ǹ-dii-yǝ nǝ̃ ciɛ.

Yakuba dãnsãndi

10 Yakubaẃ hlǝ Bɛrseba lǝri ǹ-ba wù maar Harã lǝri.

11 Wù gáa kãã hi sɔhlaadagǝ nã, bǝ̃ǝ̃gɩ́ tã ǹ-guɔruɔ wù nã, wú fǝ̃ǝ̃ ǹ-cɔ dàa gɩ̀ sùɔ́gɩ nã. Wú tuu tɩntãndarǝ ǹ-piɛ wù yuugu dɩ̀ nã, nã̀ã mǝ̃rǝ̃ǝ̃.

12 Wú mǝ̃rǝ̃ǝ̃ wú cɔ dãnsãndarǝ nã ǹ-da tɩnɩdiɛ sũɔ̃lɩmmã nã, yà tuu ɲũũrũũgɩ nã ǹ-ga ba wù jĩɛ̃ drɔkuɔlɩ nã, nǝ̃ Dũnnũ mɛlɛgɛbá ba bà yugo wù drɔ bà yuguraa nã̀ã ba bà hɩr.

13 Fɩraa-Dũnnũẃ hiraa wù tuɔra ǹ waa nǝ̃-yǝ wà: «Mã́ã-i Fɩraa-Dũnnũw, ǹ tǝvũnvũɔ̃ Ibramã Dũnnũw nǝ̃ Isiyaga Dũnnũw. Ǹ mã́rrã́ gùú hlɔ̃mmã nã nnĩĩ, mǝ̃̀ ji hã yíi nǝ̃ ǹ huɔnbiiba nǝ̃-mã.

14 Ǹ huɔnbiibà ji ɲũrũɔ̃ ǹ-ba nã́ã́ hlɔ̃mper-i. Ɲi ji jiraa ǹ-tuu bǝ̃ǝ̃'n pal'n yiɛgu ǹ-ga kra bǝ̃ǝ̃'n jãnɩm'n yiɛgu, nã̀ã tuu bǝ̃ǝ̃'n nãdĩĩyiɛgu ǹ-ga kra bǝ̃ǝ̃'n ɲiɲũɔ̃yiɛgu. Mǝ̃̀ ji ta yíi nã-i ɲã́ nǝ̃ ǹ huɔnbiiba ǹ-piɛ mǝ̃̀ nãkrɔfɩnfaagu coplaaga min nã cuuw nã.

15 Mǝ̃́ nìɛ ǹ saa. Ǹ mãã ǹ ji kã sùɔ́ wo sùɔ́, mǝ̃̀ ji ba mǝ̃̀ cii ǹ nã, nã̀ã ta ǹ yigagɩ nã ǹ-jo nǝ̃-n yiɛ gúɔ̀ nã. Mǝ̃̀ síì sĩĩnǝ̃ǝ̃ ǹ cɔ̃mmã nã, fuwɔ mǝ̃̀ plã mǝ̃̀ nũɔ̃gu dìí nã, mǝ̃ ji ce-dǝ.»

16 Yakubaẃ fǝ̃ǝ̃ ǹ-nĩĩ wù duɔsǝmmã nã, nã̀ã waa wà: «Mǝ̃n sáá mã̀ã fǝ̃ǝ̃ wà Fɩraa-Dũnnũẃ nìɛ nhlíɛ̀, nǝ̃ yàá wú nìɛ!»

17 Gbǝrsǝrɩ́ blǝ-yǝ, wú ba wù waa wà: «Gɩ̀ saa curo ń sɔ̃ sùɔ́ gúɔ́ nã! Sɔmǝ̃ǝ̃lǝ̃ǝ̃gǝ sǝ, Dũnnũ suɔ-i nǝ̃ Dũnnũ suɔ'n dũndɔ̃l-i nhlíɛ̀!»

18 Yakubaẃ fǝ̃ǝ̃ ǹ-curuɔ ǹ-suro ciibǝpuruugu, ǹ-tuu gùú tɩntãndii mãã wù yáá wùu piɛ wù yuugu dɩ̀ nã ǹ-mǝ̃gaa ǹ-kra dɩ́ sũɔ̃l, ǹ-ji da ǹ-ba wù kãnãã, nã̀ã tũn nɔ̃mmã dɩ̀ yuu'n yiɛgɩ nã,

19 nã̀ã fǝ̃ǝ̃ ǹ-suu lǝ díɛ̀ yiiri wà Betɛl. Betɛl yuugɩ-i wà Dũnnũ suɔ. Haasǝgu, bà yáá bà be lǝ díɛ̀ wà Lusɩ.

20 Dɩ̀-lǝ dɩ̀ furũũgɩ nã, Yakubaẃ tuu nũɔ̃gu wà: «Dũnnũw-ń ba mǝ̃̀ saa, nã̀ã cii mǝ̃̀ nã mǝ̃́ maar mǝ̃̀ waalɩ nã, nã̀ã hã-m nǝ̃ wuuri nǝ̃ kuulanãmba mǝ̃́ dii,

21 nã̀ã ce mǝ̃́ ver hinnǝ̃ mǝ̃̀ tǝ suɔgu, gɩ̀-lǝ gɩ̀ nã Fɩraa-Dũnnũẁ ji ba mǝ̃̀ Dũnnũw.

22 Nǝ̃ mǝ̃̀ kárrá gùú tɩntãndɩ nã dɩ́ ba dɩ̀ ce mǝ̃́ ba mǝ̃̀ kãnãã, dɩ̀ ji ba Dũnnũ suɔ-i. Nǝ̃ kuu wo kuu mãã wù ji hã-m nǝ̃-gǝ, mǝ̃̀ ji ba mǝ̃-ń ce mǝ̃́ buruɔ gɩ̀ nã tiɛm nũɔ̃sɔ̃ nã̀ã tuu gɩ̀ tiɛmã dɩnmã ǹ-ji hã-yǝ gɩ́ ba jagaw.»