Cuu Dulli (Genèse) 26

Isiyagabà kã nǝ̃ Erbekaw Abimelɛkɩ kuugɩ nã

Nũmdamã plǝ, mã́ juo jãn gɩ̀ yiɛgɩ nã, mã̀ã́ mãã mã̀ dǝ nǝ̃ Ibramã bǝ̃ǝ̃'n mǝ̃gãmmã. Isiyagaẃ suro ǹ-ba wù maar Geragu, Filisɩ yiɛntaa'n mũɔ̃ri Abimelɛkɩ kuugɩ nã.

2 Fɩraa-Dũnnũẃ hillaa wù nã, nã̀ã waa nǝ̃-yǝ wà: «Báa ce ń kã Misɩra yiɛgu, nǝ̃ kã n ga jiraa gùú yiɛgɩ nã mãã mǝ̃̀ ji pɩgaa-n nǝ̃-gǝ.

3 Ba dàa gɩ̀ sùɔ́gɩ nã. Mǝ̃̀ ji ba ǹ saa, nã̀ã piɛ mǝ̃̀ nãkrɔfɩnfaagu ǹ drɔ. Yíi nǝ̃ ǹ huɔnbiiba, mǝ̃̀ ji hã-ɲã́ã̀ nǝ̃ hlɔ̃m mã́ã̀, nǝ̃ mǝ̃̀ plã mǝ̃̀ nũɔ̃gu nǝ̃ ǹ tǝ Ibramãw dìí mãã dɩ̀ nã, mǝ̃̀ ji ce dɩ́ suu.

4-5 Mǝ̃̀ ji ce ǹ huɔnbiibá ɲũrũɔ̃ nã́ã́ drɔŋmĩɛ̃-i, nã̀ã hã-ba nǝ̃ hlɔ̃m mã́ã̀ min. Ibramãẁ mãã wù nṹɔ̃́ ǹ-hã-m, nã̀ã ɲãl mǝ̃̀ cãwandi, mǝ̃̀ mãã mã̀ã kra dìí nã, nǝ̃ gàá mãã mǝ̃̀ wa mǝ̃́ ji ce-ga, nǝ̃ mǝ̃̀ hlũũgɩ nã, mǝ̃̀ ji ta wùú nã-i ǹ-piɛ mǝ̃̀ nãkrɔfɩnfaagu coplaaga min nã cuuw nã.»

6 Gùú nã-i, Isiyagaẃ jiraa dàa Geragu.

7 Gɩ̀ yiɛntaabà gáa wa bá yugu ǹ-fǝ̃ǝ̃ wù ciɛ'n cɔ̃mmã, wú waa nǝ̃-ba wà wù tǝ̃ǝ̃-i. Erbekaẁ yáá wù fa, gùú cíé wú ba wù yáá wù sɔ̃ wà wu-ń wa wù ciɛ-i, ba ji blǝ ǹ-ko-yǝ Erbeka cɔ̃mmã nã.

8 Isiyagaẃ jiraa ǹ-hǝ̃ǝ̃sǝ dàa gɩ̀ sùɔ́gɩ nã. Yuudagǝ, Abimelɛkɩw mãã Filisɩ yiɛntaa'n mũɔ̃ri, wù yáá wù ne flãntiɛrw nã, ǹ-ne ǹ-da Isiyagaba nǝ̃ wù ciɛ Erbekaw, bà hurǝǝ bà ɲĩɛ̃ nã bà paaraa.

9 Abimelɛkɩẃ tĩɛ̃ ǹ-be Isiyagaw ǹ-juo waa nǝ̃-yǝ wà: «Dɩ̀ káaláa wà ǹ ciɛ-i nǝ̃ Erbekaw. Nǝ̃ bii cíé ń vuu-yáà wà ǹ tǝ̃ǝ̃-i?» Wú siɛ-yǝ wà: «Mǝ̃̀ yáá mǝ̃̀ sɔ̃ wà ba báa ji ko-m wù cɔ̃mmã nã.»

10 Abimelɛkɩẃ waa nǝ̃-yǝ wà: «Ǹ cíé-yáà nǝ̃ bii gɩ̀-lǝ gɩ̀ tammã? Gɩ nã́ã̀ ce nã́ã́ mǝ̃̀ lǝntiidiɛ mã́rrã́ nǝ̃-yǝ, ǹ yáá ǹ ji ce yí ba yuɔrɔtaaba.»

11 Abimelɛkɩẃ be wù lǝntaaba ǹ-gbǝ bà nã wà gùú tii nǝ̃n jĩɛ̃ Isiyagaw nã, yindagǝ nã wù ciɛw nã, wu ji ce bá ko gɩ̀ tiiw.

12 Isiyagaẃ kɔ̃ dũmmã lǝ díɛ́ nã. Dũnnũẃ piɛ wù nãkrɔfɩnfaagu wù drɔ, wú da mã̀ tuugu yin gundii gùú blɩrɩ dɩndɩndɩ nã.

13 Kuugɩ́ juo ba gɩ̀ piɛ wù nãkruɔɲinɲã nã, fuwɔ ǹ-ce wú juo gbaala ǹ-car.

14 Wù yáá nǝ̃ tũmãm'n kurɔnɲã, nǝ̃ wuram'n ɲinɲã nǝ̃ nin'n ɲinɲã, nǝ̃ mããcieraaba piyɛ̃. Filisɩ yiɛntaa'n yinɲã́ juo ba ɲã̀ hlǝ Isiyagaw nã.

15 Wù tǝ Ibramãẁ yáá dìɛ nũmǝ̃nãw gùú nã mãã, nã̀ã ce wù mããcieraabá ka gùú hũnfonɲã, hwolsǝ'n cɔ̃mmã nã, bá gbǝraa ɲã̀ nã nǝ̃ hlɔ̃mmã ǹ-suu ɲã̀ nã.

16 Abimelɛkɩẃ fǝ̃ǝ̃ ǹ-waa nǝ̃ Isiyagaw wà: «Hlǝ ń hal yi nãã, ǹ jáa dɩsɩrǝǝ ǹ-maa-yáà ǹ-car.»

17 Isiyagaẃ hlǝ bà yiɛgɩ nã ǹ-ta ǹ-kãã jiraa dàa Gera lǝ'n nɩgǝraagɩ nã.

18 Wù tǝ Ibramãẁ yáá nũmǝ̃nã nã̀ã ce bá ka gùú hũnfonɲã nǝ̃ Filisɩ yiɛntaabá dii hlɔ̃mmã ǹ-gbǝraa ɲã nã, wù kúú'n furũũgɩ nã, wú ce bá haal-ɲã. Wù tǝẁ yáá wùu suu-ɲã nǝ̃ gùú yiriɛgaa mãã, wú ver ǹ-suu-ɲã nǝ̃-ga.

19 Yuudagǝ, Isiyaga mããcieraabá kãã kuɔsǝ hũnfuudagǝ nɩgǝraagɩ nã, ǹ-kãã hlǝ hũnnaaldiɛ nã.

20 Gera wanciinããbá kã bá kãã ce byaari nǝ̃ Isiyaga wanciinããba hũm mã́ã̀mã̀ cɔ̃mmã nã wà bàá hũm-i. Isiyagaẃ fǝ̃ǝ̃ ǹ-suu hũnfuu gúɔ̀ yiiri wà Esɛkɩ. Esɛkɩ yuugɩ-i wà byaari.

21 Wù mããcieraabá ka hũnfuudagǝ hlo, ǹ-ver ǹ-da cincaruudagǝ gùú yo gɩ̀ cɔ̃mmã nã. Isiyagaẃ suu gùú yo gɩ̀ yiiri wà Sitɩnã. Sitɩnã yuugɩ-i wà cincaruu.

22 Bá ta ǹ-hlǝ gɩ̀ sùɔ́gɩ nã ǹ-kãã ka hũnfonɲã siɛlnãw. Bà sáa da byaari gɩ̀-lǝ gɩ̀ cɔ̃mmã nã, gɩ̀-i, Isiyagaẃ suu-gǝ wà Erhovotɩ. Erhovotɩ yuugɩ-i wà sɔmǝ̃ǝ̃lǝ̃ǝ̃gǝ. Nã̀ã ba wù waa wà yindiɛ Fɩraa-Dũnnũẁ hlã-ba nǝ̃ sɔmǝ̃ǝ̃lǝ̃ǝ̃gǝ bà mããcemmã́ da ǹ-kã nǝ̃ yigagu yiɛ gúɔ̀ nã.

23 Wú fǝ̃ǝ̃ ǹ-suro gɩ̀ sùɔ́gɩ nã, ǹ-ta Bɛrseba lǝri.

24 Gɩ̀ yisuɔgɩ nã, Fɩraa-Dũnnũẃ hillaa wù nã nã̀ã waa nǝ̃-yǝ wà: «Ǹ tǝ Ibramã Dũnnũ-i nǝ̃-m. Báa sɔ̃ cɔ̃m nã, mǝ̃́ nìɛ ǹ saa. Mǝ̃̀ mããcier Ibramã cɔ̃mmã nã, mǝ̃̀ ji piɛ mǝ̃̀ nãkrɔfɩnfaagu ǹ drɔ nã̀ã ce ǹ huɔnbiibá ɲũrũɔ̃.»

25 Isiyagaẃ mã siijãnsuɔgu gɩ̀ sùɔ́gɩ nã nã̀ã cirǝ̃ǝ̃ Fɩraa-Dũnnũw nã ǹ-be wù yiiri. Gɩ̀ furũũgɩ nã, wú sa wù kuɔli gɩ̀ sùɔ́gɩ nã, nã̀ã ce wù mããcieraabá ka hũnfuudagǝ.

Isiyagabà ɲũɔ̃ twammã nǝ̃ Abimelɛkɩw

26 Gɩ̀ furũũgɩ nã, Abimelɛkɩẃ juo hlǝ Geragɩ nã ǹ-kã Isiyagaw nãã. Bà yáá nǝ̃ Ahusatɩw, Abimelɛkɩw-ń wa wú ce cɔ̃m, wù yugu wɩ̀-i haasǝ nã̀ã da ǹ-ce-mã, bá nǝ̃ wù sɩrǝǝsɩba yuuntii Pikɔlw.

27 Isiyagaẃ fǝ̃ǝ̃ ǹ-yugu-ba wà: «Mǝ̃̀ cɔ̃mmã̀ blárá ɲì nã ɲí ɲǝ̃ǝ̃ ǹ-hiil-m ɲì yiɛgu, nã̀ã ga suro ɲì jo mǝ̃̀ nãã, ɲí jo wanĩĩ?»

28 Bá siɛ-yǝ wà: «Yi díɛ́ wà Fɩraa-Dũnnũẃ nìɛ yíǹ saa, gùú cíé yí ne wà gɩ sáalá yíì nǝ̃ hãmĩĩ yí pã yì nɔ̃nɲã ǹ-hã yì ɲĩɛ̃, nã̀ã ɲũɔ̃ twammã.

29 Hãmĩĩ yo yi mãã yì sáa ywar-n, nã̀ã ce-n nǝ̃ diifɩnfaari dɩn, ǹ-ya ń hlǝ yì yiɛgu hihinǝ̃mmã nã, pã ǹ nũɔ̃gu nǝ̃-yáà wà yíǹ síì ce-yáà nǝ̃ diibɩblar. Yindiɛ Fɩraa-Dũnnũẁ píɛlá wù nãkrɔfɩnfaagu ǹ drɔ.»

30 Isiyagaẃ hĩɛ̃-ba nǝ̃ nũɔ̃sǝn wuuri bá wuu, nã̀ã ɲũɔ̃.

31 Gɩ̀ taakaalciibǝǝgu, bá curuɔ puurpuur ǹ-pã bà nɔ̃nɲã nǝ̃-ba ɲĩɛ̃. Gɩ̀ furũũgɩ nã, wú hã-ba nǝ̃ hlũũgu bá buruɔ bà ɲĩɛ̃ nã hihinǝ̃mmã nã.

32 Gùú yuugɩ dɩngu dàa, Isiyaga mããcieraabà yáá bà ka gùú hũnfuugu, bá juo waa gɩ̀ cɔ̃mmã ǹ-ja-yǝ wà ba díɛ́ hũmmã gɩ̀ nã.

33 Isiyagaẃ suu gɩ̀ yiiri wà Siiba. Siiba yuugɩ-i wà n plã ǹ nũɔ̃gu. Gùú cíé ǹ-ji vaa nǝ̃ jimããgu, bá ba bà be sùɔ́ gúɔ̀ wà Bɛrseba. Bɛrseba yuugɩ-i wà nũɔ̃'n pãl'n hũnfuugu.

Eso cataacɔ̃mmã

34 Esoẁ táalá canããba hǝ̃ǝ̃lba gùú bǝ̃ǝ̃gu, wù yáá nǝ̃ bii gwaahǝ̃ǝ̃l-i. Wù yáá wùu taa Hitɩ nũɔ̃ntii Beri bisĩɛ̃ Yehuditɩ-i nǝ̃ Hitɩ yiɛntabiɛ Elɔ̃ bisĩɛ̃ Basɩmãtɩw.

35 Bá juo ce cuu jirammã́ ba mã̀ ca Isiyagaba nǝ̃ Erbeka kwãnɲã nã.