Cuu Dulli (Genèse) 25

Ibramã kuugu nǝ̃ wù huɔnbii'n cɔ̃mmã

Ibramãẃ tuu ciɛdiɛ hlo, bá be-yǝ wà Ketura.

2 Keturaẃ huu byanããba ǹ-hã-yǝ. Wù byanãã'n yiriɛga-i nnĩĩ: Simǝ̃rãw, Yosãw, Medãw, Mãdiyãw, Isebakɩw, nǝ̃ Suwaw.

3 Yosãẃ huu Sabaw nǝ̃ Dedãw. Dedã huɔnbiiba-i nǝ̃ Asuurɩm nũɔ̃ntaaba, nǝ̃ Letusɩ nũɔ̃ntaaba, nǝ̃ Lewumi nũɔ̃ntaaba.

4 Mãdiyã byanããba-i nnĩĩ: Efaw, nǝ̃ Efɛrw, nǝ̃ Hanɔkɩw, nǝ̃ Abidaw, nǝ̃ Ɛldaw. Ketura huɔnbiiba-i nǝ̃ bà-lǝ bà min.

5 Ibramãẃ hã Isiyagaw nǝ̃ wù nãkruɔɲinɲã min.

6 Wù díɛ́ gùú byanããba nǝ̃ gùú canããba mãã bà yáá jirammã nã bà min, nǝ̃ bà sǝ bàa taa ɲĩɛ̃ nǝ̃-ba, wú hã bàá yo nǝ̃ ɲindaɲã. Nǝ̃ wù jáa wa wù ji ku, wú tĩɛ̃ bá ta ǹ-hal Isiyagaw nãã ǹ-kãã ba dàa bǝ̃ǝ̃'n pal'n yiɛgu.

7 Ibramãẁ díɛ́ bii gundii nǝ̃ gwasiɛl nǝ̃ nũɔ̃sɔ̃ nǝ̃ gà ndii-i (175)

8 nã̀ã da ǹ-ku. Wù mǝ̃́gará ǹ-vǝ̃ǝ̃ dugɔ, ǹ-da vũnvãnsǝhuhordǝdi, nã̀ã ji da wú duu wù tǝvũnvãnããba nã.

9 Wù kúú, wù byanããbaa mãã Isiyagaw nǝ̃ Sɩmãyilaw bá kãã dii wù pĩɛ̃ndi Makɩpela tãnferdarǝ nã, Hitɩ nũɔ̃ntii Sohar bíɛ́ Ɛfrɔ̃ fugagɩ nã Mãmɩre tuɔragu.

10 Ibramãẁ yáá wùu sǝ̃ǝ̃ fuga gúɔ̀ Hitɩ bluu'n saa-i. Gùú sùɔ́gɩ-i, bà díilá wù ciɛ Sɩraw, nã̀ã dii wùú yo.

11 Ibramãẁ kúú furũũgɩ nã, Dũnnũẃ piɛ wù nãkrɔfɩnfaagu wù bíɛ́ Isiyagaw drɔ. Wù yáá dàa jirammã nã Lahayi-Orɔyi hũnfuu'n tuɔragɩ-i.

Sɩmãyila nũɔ̃ntaaba

12 Ibramã bíɛ́ Sɩmãyilaẁ mãã wù díɛ́-yǝ nǝ̃ Misɩra yiɛntacijal Agarw, Sɩra waciɛw, wùú nũɔ̃ntaa'n cɔ̃mmã-i nnĩĩ.

13 Sɩmãyila nũɔ̃ntaa'n yiriɛga-i nnĩĩ gà duu gà ɲĩɛ̃ nã: Nebayɔtɩw Sɩmãyila byavũnvũɔ̃w, Kedarw, Adɩbeyɛlw, Mibsamw,

14 Misemãw, Dumaw, Masaw,

15 Hadadɩw, Temaw, Yeturw, Nafisɩw, nǝ̃ Kɛdɩmaw.

16 Bàá yáá Sɩmãyila byanãã nũɔ̃sɔ̃ nǝ̃ bà hǝ̃ǝ̃l báà. Bà yáá, curo wo curo, nũɔ̃gɩ dɩn yuugɩ nã, nǝ̃ wù mãã gùú lǝrɩ nã mãã, bá ba bà be-dǝ nǝ̃ wù yiiri.

17 Sɩmãyilaẁ díɛ́ bii gundii nǝ̃ gur nǝ̃ nũɔ̃sɔ̃ nǝ̃ nɩrhǝ̃ǝ̃l-i (137), nã̀ã ji da wú duu wù tǝvũnvãnããba nã.

18 Wù huɔnbiibaa yáá dàa jirammã nã ǹ-tuu Havilãgu fuwɔ ǹ-ga hi Suurgu dìi, Misɩra nũɔ̃gɩ nã ǹ-kã Asirii yiɛgu. Bà yáá bàa jiraa ǹ-pyar bà dǝ nǝ̃ Ibramã huɔnbii'n dɩgaliɛw.

Esoba nǝ̃ Yakuba cɔ̃mmã

19 Isiyaga nũɔ̃ntaa cɔ̃mmã-i nnĩĩ: Ibramã bíɛ́ yáá nǝ̃ Isiyagaw:

20 Isiyagaẁ jáa da bii gwaahǝ̃ǝ̃lw, wú tuu Erbekaw ǹ-dii-yǝ nǝ̃ ciɛ. Erbeka tǝ̃ǝ̃ yáá nǝ̃ Aram yiɛntabiɛ Labãw, nã̀ã ba Aram yiɛntabiɛ Betuwɛl mãã wù hlǝ Aram Nɩgǝraagɩ nã, wù bisĩɛ̃w.

21 Erbekaẁ yáá wùu ĩɛ̃, Isiyagaẃ cirǝ̃ǝ̃ Fɩraa-Dũnnũw nã ǹ-hã-yǝ. Dũnnũẃ nɔ̃ wù cirǝ̃mmã, nã̀ã ce Erbekaẃ juo hiraa kúsúugɩ nã.

22 Kúsúu gúɔ̀gɩ́ juo ba pɩplãmba, bá ba ba-ń ce bá ba bà juu bà ɲĩɛ̃ wù kusuugɩ nã. Wú waa wà: «Hamã nã-i díɛ̀dɩ́ ba dɩ̀ hi-m?» Nã̀ã suro ǹ-ta ǹ-kãã yugurǝǝ Fɩraa-Dũnnũw nã ǹ-ne.

23 Fɩraa-Dũnnũẃ siɛ-yǝ wà: «Coplaaga hǝ̃ǝ̃l ji hlǝ ǹ kusuugɩ nã. Ǹ ji huu codũliɛga hǝ̃ǝ̃l. Dɩdaarɩ̀ ji ba dɩdarǝ'n yuugɩ nã, nǝ̃ vũnvãtiiẁ ji ba wuusaal'n mããcierw.»

24 Erbeka kúsúu'n huumã̀ jáa hi, wú juo huu pɩplãmba.

25 Wú huu wuudĩɛ̃lẃ ba gbãmblaw: kwaasǝrɩ̀ ji suu wù cãndɩ min nã nã́ã́ wù díilá kwasǝnkuu'n cãlũũ-i. Bá be-yǝ wà Eso.

26 Eso huum'n furũũgɩ nã, wù hǝ̃ǝ̃ẃ huu ǹ-duu wù nã. Wù hlǝmmã nã, wù yáá wùu fuɔ Eso viɛsullɩ nã. Bá be wù-lǝ wà Yakuba. Bà huum'n bǝ̃ǝ̃gu, Isiyagaẁ yáá nǝ̃ bii gwasiɛl-i.

27 Gɩ̀ furũũgɩ nã, tãnkuuraaba hǝ̃ǝ̃l báàbá juo vãnãã. Esoẃ juo ba donsotigǝ̃ngãw, jerwaaraagɩ̀ dwal wù nã. Nǝ̃ Yakuba-lǝ, wú ba wù yáá mũngotii-i wu-ń ce wú ba byar kuɔya'n kusuugɩ nã. Kuɔya'n jirammãã yáá mã̀ dwal wù nã.

28 Jerkũɔ̃m'n cɔ̃mmã̀ yáá mã̀ dwal Isiyagaw nã, gùú cíé Eso cɔ̃mmã́ ba mã̀ yáá mã̀ dwal wù nã. Nǝ̃ Yakuba cɔ̃mmã́ ba mã̀ dwal Erbekaw nã.

29 Yuudagǝ, Esoẁ gáa hlǝ jier waaraagu ǹ-juo hi Yakubaẃ hĩɛ̃ dĩɛ̃mĩɛ̃duɔgu. Wù yáá wùu ywar ǹ-car.

30 Wú waa nǝ̃-yǝ wà: «Mǝ̃̀ cirǝ̃ǝ̃ cirǝ̃ǝ̃ ǹ nã-i, ya mǝ̃́ nãn ǹ dɔbumbɛ̃mũũ gúɔ̀, mǝ̃̀ ywárrá ǹ-car.» Gùú cɔ̃mmã̀ cíé bá suu-yǝ wà Edɔ̃m. Edɔ̃m yuugɩ-i wà guubumbɛ̃mũũ.

31 Yakubaẃ siɛ-yǝ wà: «Hã-m nǝ̃ ǹ vũnvãnsǝri haasǝ.»

32 Esoẃ waa wà: «Nũmmã̀ jo mã̀ ji ko-m-i, vũnvãnsǝ díɛ̀dɩ̀ pyar bii dugɔ-i dɩ̀ hã-m?»

33 Yakubaẃ siɛ-yǝ wà: «Pã ǹ nũɔ̃gu nǝ̃-m haasǝ.» Esoẃ pã wù nũɔ̃gu nǝ̃-yǝ wà wu hlã-yǝ nǝ̃ wù vũnvãnsǝ'n sùɔ́gu.

34 Gɩ̀-i, Yakubaẃ hã-yǝ nǝ̃ burw nǝ̃ dĩɛ̃mĩɛ̃duɔgu wú wuu nã̀ã ɲũɔ̃, nã̀ã suro ǹ-ta. Wù sáa ne wù vũnvãnsǝ'n sùɔ́gɩ́ ba kuu wù yigagɩ nã.