Cuu Dulli (Genèse) 23

Sɩra pĩɛ̃ndiitãnfer'n cɔ̃mmã

Sɩraẁ díɛ́ bii gundii nǝ̃ gur nǝ̃ nɩrhǝ̃ǝ̃l-i, nã̀ã ji da wú ku.

2 Wù kúú Kiriyat-Arba lǝ-i, badaabá be-gǝ wà Hebrɔ̃ lǝ, Kanãã yiɛgu. Wù kúú, Ibramãẃ ce wù blaagu, nã̀ã yu wù dɔ̃mmã nã.

3 Gɩ̀ furũũgɩ nã, wú suro pĩɛ̃ndi tuɔra, ǹ-kãã ba wù wanãã nǝ̃ Hitɩ nũɔ̃ntaaba. Wù yáá wù waa nǝ̃-ba wà:

4 «Tatii-i nǝ̃-m, norii-i nǝ̃-m jirammã nã ɲì sǝ̃ǝ̃nã. Hlã́ã̀-m nǝ̃ sùɔ́dagǝ, mǝ̃́ sǝ̃ǝ̃-gǝ, ǹ-dii mǝ̃̀ ciɛ'n pĩɛ̃ndi.»

5 Hitɩ nũɔ̃ntaabá siɛ-yǝ wà:

6 «Yuuntii, Dũnnũẁ cíé ń ba cogǝ̃ngã yì sǝ̃ǝ̃nã. Gùú sùɔ́gɩ-ń dwal ǹ nã, kã n ga dii ǹ ciɛw. Yì sǝ̃ǝ̃nã, ǹ síì wa ń dii ǹ ciɛw curo'n pĩɛ̃ndiitãnfierɩ nã, wú vũɔ̃-n nǝ̃-dǝ.»

7 Ibramãẃ suro ǹ-kuulǝǝ Hitɩ bluu'n yigagɩ nã, bàá mãã gɩ̀ yiɛntaaba,

8 nã̀ã waa nǝ̃-ba wà: «Ɲi-ń ba ɲĩ̀ĩ hũɔ̃ wà mǝ̃́ dii mǝ̃̀ ciɛw ɲì yiɛgu, círǝ̃̀ǝ̃ Sohar bíɛ́ Ɛfrɔ̃ nã,

9 wà wú suur tãnfierii mãã wù fuga'n nũɔ̃gɩ nã Makɩpelagu, ǹ-hã-m. Wú suur-gǝ gɩ̀ sollɩ nã ɲì min yinɲã nã, mǝ̃́ sǝ̃ǝ̃-gǝ, pĩɛ̃ndiitãnfer'n sùɔ́ gúɔ̀gɩ ji da ǹ-ba mǝ̃̀ hla'n kuugu.»

10 Hitɩ nũɔ̃ntii Ɛfrɔ̃ẁ yáá dàa wùu jiraa nǝ̃ wù bluuba tɩgim'n sùɔ́gɩ nã lǝ'n dũndɔ̃llɩ nã. Wú hiil wù yalli bà min yinɲã nã, ǹ-siɛ Ibramãw wà:

11 «Ã-ãã, Yuuntii, gɩ̀ sáa hi mǝ̃́ suur fugagu nǝ̃ tãnfierii mãã gɩ̀ nũɔ̃gɩ nã ǹ-hã-n. Mǝ̃̀ hã-n nǝ̃-ɲã, mǝ̃̀ yiɛntaaba min yinɲã nã, kã n ga dii ǹ ciɛw dɩ̀ nã.»

12 Ibramãẃ ver ǹ-kuulǝǝ gɩ̀ yiɛntaa'n yigagɩ nã,

13 nã̀ã hiil wù yalli ǹ-waa nǝ̃ Ɛfrɔ̃w, bà min bá da ǹ-nɔ̃ wà: «Báa ya dɩ́ ba nnĩĩ! Ya mǝ̃́ pã fuga'n jinɲã ǹ-hã-n. Hũɔ̃-ɲã, mǝ̃́ da ǹ-kãã dii mǝ̃̀ ciɛ'n pĩɛ̃ndi.»

14 Ɛfrɔ̃ẃ siɛ-yǝ wà:

15 «Ne Yuuntii! Jiibii tũndii fugagɩ̀ síì bǝ̃ǝ̃lǝ̃ǝ̃ cɔ̃m nã, yì sǝ̃ǝ̃gɩ nã nǝ̃ yíì. Kã ń dii ǹ ciɛ gɩ̀ nã.»

16 Bà gáa waa ǹ-gbǝ, Ibramãẃ pã jiibii tũndii ǹ-vaa nǝ̃ bà cǝrcieraa'n jiiblǝtammã nã ǹ-hã Ɛfrɔ̃w, nã́ã́ wù jíɛ́-ga nĩĩguu mãã Hitɩ nũɔ̃ntaaba min yinɲã nã.

17 Ǹ-tuu gɩ̀-lǝ gɩ̀ bǝ̃ǝ̃gu, Ɛfrɔ̃ fugagu mãã Makɩpelagu, Mãmɩre bǝ̃ǝ̃'n pal'n yiɛgu nǝ̃ gùú tãnfierii mãã gɩ̀ nã, nǝ̃ gùú tubiɲinɲã min mãã gɩ̀ kusunã

18 ɲã́ juo ba Ibramã ɲinɲã. Dɩ̀ cíé Hitɩ nũɔ̃ntaaba min mãã bà yáá bà ta lǝ'n nũɔ̃gɩ bà jãn dɩ̀ kusunã, bà yinɲã nã-i.

19 Gɩ̀ furũũgɩ nã, Ibramãẃ kãã dii wù ciɛ Sɩraw Makɩpela fuga'n tãnfierɩ nã, Mãmɩre tuɔragu. Nǝ̃-ń nɔ̃ wà Mãmɩre, bà ja Hebrɔ̃ lǝ-i Kanãã yiɛgu.

20 Hitɩ nũɔ̃ntaabá hiraa dɩ̀ nã wà sùɔ́ gúɔ̀gɩ min nǝ̃ tãnfer díɛ̀, ɲã̀ ji ba Ibramã ɲin-i, wú ba wù dii wù cwaaba.