Cuu Dulli (Genèse) 22

Dũnnũẁ dǝ̃ǝ̃ Ibramãw ǹ-ne

Gɩ̀ furũũgɩ nã, Dũnnũẃ wa wu dǝ̃ǝ̃ Ibramãw ǹ-ne, wu-ń ba wù ji nɔ̃ ǹ-hã-yǝ. Wú be-yǝ wà: «Ibramã!» Ibramãẃ siɛ-yǝ wà: «mã́ã-i nnĩĩ!»

2 Dũnnũẃ fǝ̃ǝ̃ ǹ-waa nǝ̃-yǝ wà: «Tuu ǹ bíɛ́ Isiyagaw, ǹ kadiinw, ǹ cituublɩw, ń maar Moriya yiɛgu, mǝ̃̀ ga ja-n nǝ̃ tãnũũdagǝ gɩ̀ sùɔ́gɩ nã, n ga jãn-yǝ nǝ̃ siimãã mãã bà ye-mã nǝ̃ yellɩ nã ń hã-m.»

3 Gɩ̀ taakaal taajãlũũgɩ nã, Ibramãẃ curuɔ ǹ-bǝr siijãndǝ̃ndanɲã, ǹ-tuu wù mããcieraaba hǝ̃ǝ̃lba, ǹ-tɩgɩnǝ̃ǝ̃ tuuli min nã, ǹ-piɛ wù kǝkũmw drɔ, nã̀ã tuu wù bíɛ́ Isiyagaw, bá tuu hlũũguu ǹ-ba bà maar gùú sùɔ́guu mãã Dũnnũẁ pɩ́gará-yǝ nǝ̃-gǝ.

4 Bà waal'n bãnɲã siɛlnã yuugu, Ibramãẃ ba wù maa wù da gùú tãnũũguu mãã bà yáá bà kã gɩ̀ nã.

5 Gɩ̀-i, wú fǝ̃ǝ̃ ǹ-waa nǝ̃ wù mããcieraabaa wà: «Ɲimãã, hyárrà nǝ̃ kǝkũmw dìɛ nhlíɛ̀. Mã́ã̀, nǝ̃ mǝ̃̀ bíɛ́w, yi ji yuguraa ǹ-ga bũũ Dũnnũw nã̀ã ver ǹ-jo yì min ɲì nãã.»

6 Ibramãẃ tuu siijãndǝ̃ndanɲã ǹ-piɛ ǹ-hã wù bíɛ́ Isiyagaw, nã̀ã tuu dǝ̃ǝ̃mã nǝ̃ puruɔgu nǝ̃ wù hla, bá ta bà yuguraa bà min.

7 Isiyagaẃ fǝ̃ǝ̃ ǹ-waa nǝ̃ wù tǝw wà: «Tɩtii!» Ibramãẃ siɛ-yǝ wà: «Ǹ wa bii mã́ã biɛ?» Isiyagaẃ wa: «Yí nǝ̃ dǝ̃ǝ̃mã nǝ̃ danɲã, nǝ̃ tũmblɩw mãã yi ga ye-yǝ ǹ-jãn siimã wɩ̀-i haa-i?»

8 Ibramãẃ siɛ-yǝ wà: «Mã́ã bíɛ́, Dũnnũw nǝ̃ wù hla, wùú ga da tũmblɩw mãã yi ga jãn-yǝ nǝ̃-yǝ.» Gɩ̀ cwaaba hǝ̃ǝ̃lbá ba bà wáà bà maar bà min.

9 Bà gáa hi Dũnnũẁ yáá wùu pɩgaa-yǝ nǝ̃ gùú sùɔ́gu, Ibramãẃ tuu tɩntrãga ǹ-suguraa gà nã gà ɲĩɛ̃ drɔ, ǹ-tuu danɲã ǹ-piɛ gɩ̀ nã, nã̀ã blǝ wù bíɛ́ Isiyagaw ǹ-vaa-yǝ ǹ-tuu ǹ-piɛ-yǝ danɲã drɔ,

10 nã̀ã fǝ̃ǝ̃ ǹ-tuu puruɔgu ǹ-ba wù jo wù ji cǝ̃ǝ̃ wù bũɔ̃gu.

11 Fɩraa-Dũnnũ mɛlɛgɛẃ fǝ̃ǝ̃ ǹ-ba wù be-yǝ drɔkuɔlɩ nã dìi wà: «Ibramã, Ibramã!» Ibramãẃ siɛ-yǝ wà: «mã́ã-i nnĩĩ!»

12 Wú waa nǝ̃-yǝ wà: «Báa jĩɛ̃ pũmpɩr wáá nã, báa ce-yǝ nǝ̃ diibɩblar, ǹ mãã ǹ sáa vũɔ̃-yǝ nǝ̃ ǹ bíɛ́w, ǹ kadiinw, mǝ̃̀ fǝ̃́ǝ̃lã́ kuɔkuɔ-lǝ wà ń sɔ̃ Dũnnũw nã.»

13 Ibramãẃ wa wú cĩɛ̃ ǹ-ne, ǹ-paa ǹ-ne ǹ-gbǝ tugɔladiɛ nã wù yenĩɛ̃ga finǝ̃ǝ̃ ǹ-blǝ partuudagǝ nã. Wú fǝ̃ǝ̃ ǹ-kãã fɩr-yǝ ǹ-juo ye-yǝ ǹ-jãn Dũnnũw wù bíɛ́'n sùɔ́ nã.

14 Ibramãẃ suu gɩ̀ sùɔ́'n yiiri wà: «Fɩraa-Dũnnũẁ ga da ǹ-hã hãmĩĩ.» Gùú cíé bá ba bà waa jimããnããw wà: «Fɩraa-Dũnnũẁ mãã wù ga da ǹ-hã-yáà gùú tãnũũgɩ nã.»

15 Fɩraa-Dũnnũ mɛlɛgɛẃ ver ǹ-ba drɔkuɔlɩ nã dìi nã̀ã be Ibramãw yin hǝ̃ǝ̃lnãw.

16 Wú waa nǝ̃-yǝ wà: «Fɩraa-Dũnnũ nũɔ̃nãcãwandɩ-i nnĩĩ: Ǹ mãã ǹ hṹɔ̃lã́ ǹ-ce-dǝ, ǹ sáa vũɔ̃-m nǝ̃ ǹ kadiinw, mã́ã yo, mǝ̃̀ waasǝ mǝ̃̀ hla'n yiiri nǝ̃-n wà

17 mǝ̃̀ ji piɛ mǝ̃̀ nãkrɔfɩnfaagu ǹ drɔ, nã̀ã ce ǹ huɔnbiibá ɲũrũɔ̃ nã́ã́ drɔŋmĩɛ̃-i, yindagǝ nã lwaakɩnkan'n hlɔ̃mper'n tammã. Bà ji gbǝ̃ǝ̃ bà ɲããtaaba nã ǹ-ɲǝ̃ǝ̃ ǹ-hũɔ̃ bà liɛga.

18 Ǹ mãã ǹ nṹɔ̃́ ǹ-hã-m, mǝ̃̀ ji ta yíi huɔnbiiba nã-i ǹ-piɛ mǝ̃̀ nãkrɔfɩnfaagu coplaaga min nã cuu nã.»

19 Ibramãẃ ver ǹ-jo wù mããcieraaba nãã, bá tuu hlũũgu ǹ-ba bà maar Bɛrseba yiɛgu. Ibramãẃ kãã jiraa dàa gɩ̀ sùɔ́gɩ nã.

Nahɔr nũɔ̃ntaa'n cɔ̃mmã

20 Dìí furũũgɩ nã-i, Ibramãẃ juo nɔ̃ wà wù hǝ̃ǝ̃ Nahɔr ciɛ Milka díɛ́ pũmpɩrbiiba.

21 Usɩw yáá bà vũnvũɔ̃w, Buusɩẃ duu nã, nǝ̃ Aram tǝ Kǝmuwɛlw,

22 Kesɛdɩw, Haasow, Pildasɩw, Yidɩlafɩw, nǝ̃ Betuwɛlw.

23 Betuwɛl-lǝ wùú húulá Erbekaw. Ibramã hǝ̃ǝ̃ Nahɔr ciɛ Milka díɛ́ gùú pũmpɩrii nɩrsiɛl wɩ̀-i.

24 Nahɔrbà yáá bà min nǝ̃ cijaldiɛ, bà be-yǝ wà Erumã. Bà sáá bà taa bà ɲĩɛ̃ nǝ̃-yǝ. Wùú yo, wù díɛ́ gùú tãnkuuraaba, bà-i nnĩĩ: Tebaaw, Gahamw, Tahasɩw, nǝ̃ Maakaw.