Cuu Dulli (Genèse) 21

Isiyaga huum'n cɔ̃mmã

Fɩraa-Dũnnũẁ mãã wù yáá wùu pã wù nũɔ̃gu ǹ-hã Sɩraw, wú juo ce-dǝ ǹ-hã-yǝ ǹ-vaa nǝ̃ wù nũɔ̃ nã cãwandi.

2 Dũnnũẁ yáá wùu pɩgaa gùú bǝ̃ǝ̃guu mãã, Sɩraẁ túulá kusuugu gùú bǝ̃ǝ̃gɩ-i ǹ-juo huu pũmpɩrblɩ. Gɩ̀ bǝ̃ǝ̃gu, Ibramãẁ yáá wùu vǝ̃ǝ̃ ǹ-tã.

3 Sɩraẁ díɛ́ gùú biɛẁ mãã, Ibramãẃ fǝ̃ǝ̃ ǹ-suu wù yiiri wà Isiyaga. Yir díɛ́ dɩ̀ fɩrɩmmã-i wà: «Wù ɲĩ́ɛ̃́.»

4 Isiyaga huum'n bãn nɩrsiɛlnã yuugu, wù tǝ Ibramãẃ síì nã́ã́ Dũnnũ wáalá-dǝ nǝ̃-yǝ gùú tuugu.

5 Ibramãẁ yáá nǝ̃ bii gundii wɩ̀-i, wù bíɛ́ Isiyaga huum'n blɩri.

6 Sɩraẃ waa wà: «Dũnnũẁ gáa jo nǝ̃ ɲĩɛ̃guu ǹ-ji hã-m. Curo wo curo mãã wù ji nɔ̃ Isiyaga cɔ̃m mã́ã̀mã̀ nã, yi ji ba yì ɲã yì min.»

7 Nã̀ã fǝ̃ǝ̃ ǹ-waa ǹ-tu hlo wà: «Halii yáá wù ji gbǝ̃ǝ̃ ǹ-waa nǝ̃ Ibramãw wà mǝ̃n ji da tãnkuuraa bá ŋmãsã mǝ̃̀ ŋmãmmã? Nǝ̃ gɩ̀-i nnĩĩ, mǝ̃̀ díɛ́ pũmpɩrblɩ ǹ-hã-yǝ wù byanvãsǝrɩ nã!»

Ibramãẁ ɲǝ̃ǝ̃ ǹ-hiil Agarba nǝ̃ Sɩmãyilaw wù suɔgu

8 Tãnkuurẁ jáa vǝ̃ǝ̃, Sɩraẃ hiil wù nũɔ̃gu ŋmãmmã nã. Gɩ̀-lǝ gɩ̀ yuugu, Ibramãẃ ce bá ce paaruugǝ̃ngããdagǝ.

9 Sɩra gáa da Agarẁ díɛ́ gùú biɛw bá nǝ̃ Ibramãẁ wù paaraa,

10 wú fǝ̃ǝ̃ ǹ-waa nǝ̃ Ibramãw wà: «Ɲǝ̃ǝ̃ ń tĩɛ̃ waciɛ wáá mãã nnĩĩ, bá nǝ̃ wù bíɛ́w. Wù bíɛ́ wáà sǝ̃n saa wú kã bá wuu sùɔ́guu nǝ̃ mǝ̃̀ bíɛ́ Isiyagaw!»

11 Ibramãẃ ba wù ne Agar bíɛ́ yo, wùú bíɛ́-i, gɩ̀ cãwandɩ́ ca wù nã dugɔ.

12 Nǝ̃ Dũnnũẃ fǝ̃ǝ̃ ǹ-waa nǝ̃ Ibramãw wà: «Báa ya pũmpɩrblɩẁ bá nǝ̃ ǹ waciɛ'n cɔ̃mmã ca ǹ nã. Ǹ huɔnbiibà mãã bà ji hlǝ Isiyagaw nã, Sɩraw-ń waa kuu wo kuu, yíí nɔ̃ ǹ-hã-yǝ.

13 Ǹ waciɛ'n bíɛ́ yo, wù mãã ǹ bíɛ́w, mǝ̃̀ ji ce wùú yo wú ba codũldarǝ'n tǝvũnvũɔ̃w.»

14 Gɩ̀ taakaalciibǝǝgu, Ibramãẃ curuɔ ǹ-tuu wuuri nǝ̃ hũndiibarw, ǹ-dii hũmmã wù nã, ǹ-piɛ ǹ-hã Agarw nãã hã-yǝ nǝ̃ tãnkuur yo, ǹ-hiil-yǝ suɔgɩ nã. Agarẃ ta ǹ-kãã ba wù vĩɛ̃ Bɛrseba lǝ'n jerkwaarɩ nã.

15 Hũmmã̀ gáa tã hũndiibarw nã, Agarẃ kãã mǝ̃rǝ̃ǝ̃ tãnkuurw nã partuudagǝ taara,

16 nã̀ã ta ǹ-kãã jiraa halbaa ǹ-ba wù waa nǝ̃ wù hla wà: «Mǝ̃n síì gbǝ̃ǝ̃ ǹ-blǝ mǝ̃̀ tãnkuurẁ ji ba wù naa mǝ̃̀ yinɲã nã.» Nã̀ã jiraa dàa gɩ̀ dǝ'n yiɛgu ǹ-ba wù kaal wù higinãã.

17 Dũnnũẁ gáa nɔ̃ tãnkuur'n kaaluugɩ nã, wù mɛlɛgɛẃ fǝ̃ǝ̃ ǹ-be Agarw drɔkuɔlɩ nã dìi, ǹ-yugu-yǝ wà: «Agar, hamã-i ǹ nã? Yíi báa jã cɔ̃m, Dũnnũẁ nṹɔ̃́ tãnkuur'n kaaluugɩ nã, fuwɔ wù mãã gùú sùɔ́guu dìi.

18 Suro, ga blǝ ǹ-suro tãnkuurw, nǝ̃ ń mǝ̃gaa ǹ-blǝ-yǝ wù nãkruɔgɩ nã. Mǝ̃̀ ji ce wú ba codũlgǝ̃ngãrdarǝ'n tǝvũnvũɔ̃w.»

19 Dũnnũẃ fǝ̃ǝ̃ ǹ-ce Agarẃ ne ǹ-da hũnfuudagǝ nǝ̃ hũmmã. Wú kãã kaa-mã ǹ-dii hũndiibar yisɩri ǹ-juo hã tãnkuurẃ ɲũɔ̃.

20-21 Dũnnũẃ cii tãnkuurw nã. Wù jáa vǝ̃ǝ̃, wú ta ǹ-kãã jiraa Paarã jerkwaarɩ nã, ǹ-ga juo ba tǝ̃ǝ̃tuurgǝ̃ngãw. Wù ɲũẁ ga kãã caa Misɩra tacijaldiɛ ǹ-hã wú taa.

Ibramãba nǝ̃ Abimelɛkɩw bà ɲũɔ̃ twammã

22 Gùú bǝ̃ǝ̃gɩ-i, Abimelɛkɩba nǝ̃ wù sɩrǝǝsɩba yuuntii Pikɔlw, bà kã́ã́ Ibramãw nãã ǹ-kãã waa nǝ̃-yǝ wà: «Dũnnũẃ nǝ̃ ǹ saa ǹ gaaciega min nã.

23 Nǝ̃ waasǝ ǹ Dũnnũẁ kuɔkuɔgu níɛ́w, wà n síì hlǝ mã́ã̀ nǝ̃ mǝ̃̀ tãnkuuraaba nǝ̃ mǝ̃̀ huɔnbii'n furũũgɩ nã. Mǝ̃̀ blǝ́rá-n nǝ̃ gùú kusufɩnfaagu, yíi yo, blǝ-m nǝ̃ ń blǝ gùú yiɛguu mãã nã̀ã jiraa gɩ̀ nã nǝ̃ gùú kusufɩnfaagɩ dɩngɩ-i.»

24 Ibramãẃ fǝ̃ǝ̃ ǹ-waasǝ.

25 Abimelɛkɩ bluubà mãã bà yáá bàa ɲǝ̃ǝ̃ ǹ-hũɔ̃ hũnfuudagǝ, Ibramãẃ fǝ̃ǝ̃ ǹ-ba wù gãnãã nǝ̃-yǝ gɩ̀ cɔ̃mmã nã.

26 Abimelɛkɩẃ siɛ-yǝ wà: «Mǝ̃̀ sáa fǝ̃ǝ̃ bàá nǝ̃n cíé gɩ̀ cɔ̃mmã. Yíi yo, ǹ sáa ba ǹ ji waa-dǝ nǝ̃-m. Gɩ-ń ba gɩ̀ sǝ jimããgu sǝ, mǝ̃n sáá mã̀ã nɔ̃-dǝ.»

27 Ibramãẃ fǝ̃ǝ̃ ǹ-blǝ tũmba, wuramba, nǝ̃ ninɲã ǹ-hã Abimelɛkɩw, nǝ̃ gɩ̀ cwaaba hǝ̃ǝ̃lba fǝ̃ǝ̃ ǹ-ɲũɔ̃ twammã.

28 Ibramã hiil tũmbii nɩrhǝ̃ǝ̃l ǹ-kra bà nã bà dǝ.

29 Gùú nã-i, Abimelɛkɩẃ fǝ̃ǝ̃ ǹ-yugu Ibramãw wà: «Hamã nã-i ń hiil tũmbii nɩrhǝ̃ǝ̃l wáà-lǝ wù dǝ?»

30 Wú siɛ-yǝ wà: «Mǝ̃̀ ji hã-n nǝ̃ tũmbii nɩrhǝ̃ǝ̃l wáà, ǹ ji ba nǝ̃-ń da-ba, ń da ǹ-kãnãã wà mã́ã káá hũnfuu gúɔ̀.»

31 Gɩ̀ cwaaba hǝ̃ǝ̃lbà mãã bà wáasǝ́ bà nɔ̃nɲã ǹ-hã bà ɲĩɛ̃ gɩ̀ sùɔ́gɩ nã, gùú cíé bá be-gǝ wà Bɛrseba lǝri, wà waasǝm'n hũnfuugu.

32 Bà ɲṹɔ̃lã́ twammã gùú tammã-i. Abimelɛkɩba nǝ̃ wù sɩrǝǝsɩba yuuntii Pikɔlw, bá suro ǹ-ver ǹ-maar Filisɩ yiɛgɩ nã.

33 Ibramãẃ kãã so fiisuudagǝ Bɛrseba lǝri, wù círǝ̃́ǝ̃ Fɩraa-Dũnnũw nã gùú sùɔ́gɩ-i ǹ-be-yǝ wà Dũnnũ mãã fɩraa.

34 Ibramãẃ ba dàa ǹ-hǝ̃ǝ̃sǝ Filisɩ yiɛgɩ nã.