Cuu Dulli (Genèse) 19

Dũnnũẁ guu Sodɔm lǝrɩ nã, nã̀ã ya Lɔtɩw nǝ̃ wù cwanããba dɩn bá ba

Bǝ̃ǝ̃'n jãnɩmmã nã, mɛlɛgɛba hǝ̃ǝ̃l báà nǝ̃n yáá bàa hlǝ Ibramã kuugɩ nã, bá juo ba bà hi Sodɔm lǝ'n kusuugu, ǹ-saa nǝ̃ Lɔtɩẁ yáá wùu jiraa lǝ'n nũɔ̃gɩ nã, lǝntaabà mãã bà tɩgii gùú sùɔ́gu. Wù gáa ne ǹ-da bà jo, wú suro ǹ-jǝ̃ǝ̃lǝ̃ǝ̃-ba, ǹ-kãã kuulǝǝ ɲũũrũũgu nã̀ã fyãn-ba.

2 Nã̀ã fǝ̃ǝ̃ ǹ-waa nǝ̃-ba wà: «Mã́ã tǝba, mǝ̃̀ cirǝ̃ǝ̃ ɲì nã-i, cíyà kukuɔya nǝ̃ ɲí jo ɲi ji hyar mǝ̃̀ suɔgu. Bà ga jo nǝ̃ hũmmã ǹ-ji hã ɲí saar ɲì vyanɲã, nǝ̃ ɲí cɔ dìɛ, nã̀ã ji da ɲí tuu hlũũgu cicuɔ'n ciibǝǝgu.» Mɛlɛgɛbá siɛ Lɔtɩw wà: «Ã-ãã, yi ji cɔ taasǝ̃ǝ̃nǝ̃ǝ̃gu, lǝ'n kusuugɩ nã.»

3 Lɔtɩẃ hla nã̀ã waa ǹ-gbǝ̃ǝ̃ bà nã. Bá fǝ̃ǝ̃ ǹ-kã bá ta bà min Lɔtɩ duugɩ nã. Lɔtɩẃ kãã ce bá hĩɛ̃ nũɔ̃sǝn wuuri ǹ-hã bá wuu, ǹ-ce bà norsǝri.

4 Ǹ-ya bá ba bà sǝ bàa hi ǹ-mǝ̃rnãã, Sodɔm lǝ'n conɲã min vũnvãtaaba min, gɩ̀ pũmpɩriiba ǹ-ga kra gɩ̀ byanvãnããba nã, bà min bá hlǝ ǹ-juo caliɛ suɔgɩ nã.

5 Bá kãã ba bà be Lɔtɩẁ bà waa nǝ̃-yǝ wà: «Noraabaa nǝ̃n júó ǹ nãã dɩndǝ̃mbǝ̃ǝ̃ nũɔ̃ gúɔ̀ nã, hiil-ba ń hã yí kãã mǝ̃rǝ̃ǝ̃ nǝ̃-ba.»

6 Lɔtɩẃ fǝ̃ǝ̃ ǹ-hlǝ ǹ-jo bà nãã. Wù hlǝmmã nã duu'n kusuugɩ nã, wú naa ǹ-suu fieri wù furũnyiɛgu,

7 nã̀ã fǝ̃ǝ̃ ǹ-waa nǝ̃-ba wà: «Mã́ã cwanãã, bláá ce diibɩblar díɛ̀dɩ̀ tuugu.

8 Mǝ̃̀ cirǝ̃ǝ̃ cirǝ̃ǝ̃ ɲì nã-i, cíyà kukuɔya! Bláá ce bluu báà nǝ̃ kuu, bà júó ǹ-ji hyar mã́ã saa-i, mǝ̃̀ síì gbǝ̃ǝ̃ ǹ-ya cɔ̃mmã hi-ba. Ɲi-ń ba ɲì ji hũɔ̃ mǝ̃̀ bisiiba hǝ̃ǝ̃lbaa mãã dìɛ bà sǝ bàa hi ǹ-fǝ̃ǝ̃ bibiɛ, mǝ̃́ hiil-ba ǹ-hã-ɲã́ã̀, ɲi ga ce-ba nǝ̃ dìí mãã dɩ̀ dwal ɲì nã.»

9 Nǝ̃ bá hla nã̀ã waa nǝ̃-yǝ wà: «Ta ń hal! Báa cii hãmĩĩ nǝ̃ wantammã! Yíi mãã niɛrabiɛ yíi ji pɩgaa hãmĩĩ nǝ̃ cɔ̃nfǝ̃ǝ̃gǝgu kɛ-i? Nĩĩgu nǝ̃n ba, dìí mãã dɩ̀ ji hi-n, dɩ̀ ji maa bluu báàbà dǝlli!» Nã̀ã fǝ̃ǝ̃ ǹ-naa ǹ-tĩɛ̃ Lɔtɩw, nã̀ã wa bá juo juu ǹ-ka fieri.

10 Gɩ̀-i, noraaba hǝ̃ǝ̃l báàbà fǝ̃ǝ̃ ǹ-tĩɛ̃ ǹ-blǝ Lɔtɩw ǹ-fa dii-yǝ duu'n kusuugɩ nã, nã̀ã suu fieri.

11 Cwaaba min mãã bà yáá bàa sɔ̃ ǹ-ji suu dũndɔ̃llɩ nã, ǹ-tuu gɩ̀ baasaalaaba nã, ǹ-ga kra gɩ̀ vũnvãnããba nã, bá ce bà min bá yɩr. Bá ba bà síì gbǝ̃ǝ̃ ǹ-caa ǹ-da dũndɔ̃lli.

12 Cwaaba hǝ̃ǝ̃l báàbá fǝ̃ǝ̃ ǹ-yugu Lɔtɩw wà: «Ǹ cwanããdaabá nìɛ lǝ díɛ̀ dɩ̀ kusunã-ì? Ń nìɛ nǝ̃ biɛnãã, bisii, yindagǝ nã curɔnãã-ì? Nǝ̃-ń ba dìɛ nǝ̃ curo wo curo dìɛ lǝ díɛ́dɩ nã, ce bà min bá hlǝ dɩ̀ nã.

13 Yi ji guu lǝ díɛ̀dɩ nã. Fɩraa-Dũnnũẁ nṹɔ̃́ lǝ díɛ̀ dɩ̀ cwaa'n gaabɩbliɛcin'n cɔ̃mmã nã, gùú cíé wú tĩɛ̃-yáà wà yí juo guu dɩ̀ nã.»

14 Lɔtɩẃ fǝ̃ǝ̃ ǹ-suro ǹ-sɔ̃ ǹ-kã pũmpɩrbiibaa mãã bà yáá bàa blǝ wù bisiiba hǝ̃ǝ̃lba nã wà ba ji taa-ba bà nãã ǹ-kãã waa nǝ̃-ba wà: «Sórrà ɲì gbɩraanã yí hlǝ lǝ díɛ́ nã! Fɩraa-Dũnnũẁ jo wù ji guu dɩ̀ nã-i.» Bá hla nã̀ã ba bà ne wà fíí wú ce cǝ̃̀ǝ̃́m-i.

15 Taajãlũũ'n nũɔ̃gɩ nã, mɛlɛgɛbá ba bà sugulǝ Lɔtɩw wà: «Suro ń tuu hlũũgu kaliɛ, ɲi nǝ̃ ǹ ciɛw, nǝ̃ ǹ bisiiba hǝ̃ǝ̃lba, nǝ̃-ń yaala Dũnnũw-ń ga jo wù ji per wù hiil cobɩbliɛba, wù báa ji per ǹ-ta nǝ̃ ɲì min.»

16 Lɔtɩẁ gáa wa wú finǝ̃ǝ̃, wù hujãndɩ blǝ Fɩraa-Dũnnũw. Wú ce mɛlɛgɛba blǝ ǹ-hiil-yǝ lǝ'n kusuugɩ nã bá nǝ̃ wù ciɛw nǝ̃ wù bisiiba hǝ̃ǝ̃lba.

17 Bà gáa hlǝ nǝ̃-ba lǝ'n kusuugɩ nã, mɛlɛgɛẃ dɩndiɛ waa nǝ̃ Lɔtɩw wà: «Nǝ̃-ń ba ǹ caa ń ba nũmǝ̃nãw, sɔ̃ ń kwar, báa cĩɛ̃ ń ne ǹ furũnyiɛ, báa hiraa sùɔ́ nã. Nǝ̃-ń ba ǹ sǝ̃n caa Dũnnũẁ ga juo per ǹ-ta-n nǝ̃ cobɩbliɛba min, hlǝ lǝ díɛ̀dɩ̀ yiɛ'n hlɔ̃mmã nã, ń sɔ̃ ǹ-kã ǹ-ga ŋmǝ̃ǝ̃rǝ̃ǝ̃ tãnũũgɩ nã.»

18 Lɔtɩẃ fǝ̃ǝ̃ ǹ-siɛ-yǝ wà: «Mǝ̃̀ taaba, bláá ya dɩ̀-lǝ dɩ́ ce!

19 Sulam-i, ǹ níé ǹ mããcier mã́ã yiɛgu, nã̀ã pɩgaa-m nǝ̃ ǹ kusufɩnfaagu ǹ-ya mǝ̃́ ba nũmǝ̃nãw, nǝ̃ mǝ̃n sɩga gbǝ̃ǝ̃ ǹ-hi tãnũũgu nǝ̃ ń du nã ǹ-ba ǹ guu lǝrɩ nã, gɩ̀ ywaruugɩ-ń hi-m, mǝ̃̀ ji ku.

20 Ne lǝblɩ díɛ̀, dɩ̀ ɲírǝ̃́ǝ̃ ǹ-kol ǹ-car, nã̀ã ba dìi piɛ nã. Mǝ̃̀ cirǝ̃ǝ̃ ǹ nã-i, ya mǝ̃́ sɔ̃ ǹ-ga ŋmǝ̃ǝ̃rǝ̃ǝ̃ gùú sùɔ́gu. Gɩ̀-lǝ gɩ̀ nã, mǝ̃̀ síì ku.»

21 Wú waa nǝ̃-yǝ wà: «Mǝ̃̀ hṹɔ̃lã́ ǹ cirǝ̃mmã, cɔ̃m'n síì hi lǝ díɛ̀ mãã ǹ wáalá dɩ̀ cɔ̃mmã.

22 Sɔ̃ ń maar ǹ gbɩraanã ǹ-ga ŋmǝ̃ǝ̃rǝ̃ǝ̃, nǝ̃-ń ba ǹ sáa hi, gɩ̀ sùɔ́gɩ nã, mǝ̃̀ síì gbǝ̃ǝ̃ ǹ-ce cɔ̃m.» Gùú cíé bá juo ba bà be lǝ díɛ̀ wà Suwar lǝ. Dɩ̀ fɩrɩmmã-i wà cɔ̃nsaalammã.

23 Bǝ̃ǝ̃gɩ̀ jáa ba gɩ̀ hãnãã, Lɔtɩ yo, wú ba wù jãn Suwar lǝri.

24 Gùú nã-i, Fɩraa-Dũnnũẃ fǝ̃ǝ̃ ǹ-ce hlɔ̃mmãã mãã mã̀ ye nǝ̃ dǝ̃ǝ̃mã́ hlǝ drɔgu nã́ã́ duɔ-i ǹ-juo suu Gomɔr lǝri nǝ̃ Sodɔm lǝrɩ nã. Fɩraa-Dũnnũ-lǝ wùú cíé-dǝ.

25 Wú guu gɩ̀ liɛga nã ǹ-ta ǹ-ga tuu gɩ̀-lǝ gɩ̀ yiɛgɩ min. Wú guu cwaaba min nã nǝ̃ kuu wo kuu mãã gɩ̀ pa ɲũũrũũgu.

26 Lɔtɩ ciɛẃ kãã hla nã̀ã cĩɛ̃ ǹ-ne wù furũnyiɛgu, wú cin dɔ̃ntɩntãndi.

27 Ciibǝpuruugɩ nã, Ibramãẃ hlǝ ǹ-kã gùú sùɔ́gu mãã wù yáá kã bá kãã da bà ɲĩɛ̃ nǝ̃ Fɩraa-Dũnnũw.

28 Wù gáa ne Sodɔm lǝri nǝ̃ Gomɔr lǝri nǝ̃ gɩ̀ yiɛgɩ min, wú da ɲũɔ̃sǝdarǝ dɩ̀ yuguraa drɔgu nã́ã́ suɔ cáalá.

29 Dũnnũẁ gáa ba wù guu gɩ̀ yiɛ'n liɛga nã, wú ne Ibramã cɔ̃mmã nã̀ã hiil Lɔtɩ nũɔ̃gu gùú bǝ̃ǝ̃gu mãã wù gáa ba wù guu liɛga nã mãã Lɔtɩẁ yáá jirammã nã gà nã.

Mohabɩ bluuba nǝ̃ Amon bluuba wanhlǝm'n sùɔ́gu

30 Gbǝrsǝrɩ̀ mãã dɩ̀ blǝ́rá Lɔtɩẁ ba wù síì ciɛ ǹ-ba Suwar lǝ'n kusuugɩ nã, wú fǝ̃ǝ̃ ǹ-suro ǹ-ta ǹ-kãã jiraa tãnũũdagǝ paalaagɩ nã, nǝ̃ wù bisiiba hǝ̃ǝ̃lba.

31 Yuudagǝ, nãndavũnvũɔ̃ẃ waa nǝ̃ wuusaalw wà: «Bibiɛ'n sɩriɛ dìɛ níɛ́ wùu mãã wù ga juo tuu hãmĩĩ nã́ã́ bà mãã bà hi bà tuu canããba gùú tammãã mãã sùɔ́ wo sùɔ́, nǝ̃ yì tǝ yo wú ba yà vǝ̃ǝ̃,

32 jo yi ji ce yì tǝ ɲũɔ̃ ɛrsɛ̃ kwãmmã́ blǝ-yǝ, nã̀ã da ǹ-ce wú mǝ̃rǝ̃ǝ̃ nǝ̃-yáà. Yi-ń da tãnkuuraaba, gɩ̀-lǝ gɩ̀ tammã wù nũɔ̃gɩ síì guu nã.»

33 Gɩ̀-lǝ gɩ̀ yuu'n yisuɔgu dàa, bá ce bà tǝẃ ɲũɔ̃ kwãmmã fuwɔ mã́ blǝ-yǝ. Vũnvãtiiẃ fǝ̃ǝ̃ ǹ-kã ǹ-kãã ce bà tǝẁ mǝ̃rǝ̃ǝ̃ nǝ̃-yǝ. Ɛrsɛ̃ kwãmmã̀ mãã mã̀ yáá mã̀ã blǝ tiiyǝw, wù sáa fǝ̃ǝ̃ wù bisãvũnvũɔ̃w jã́nnã́ wù drɔ gùú bǝ̃ǝ̃gu, wù sáa fǝ̃ǝ̃ wù hlǝm'n bǝ̃ǝ̃ yo.

34 Gɩ̀ taakaalgu, vũnvãyoẃ waa nǝ̃ wuusaalw wà: «Ǹ díɛ́, mǝ̃̀ gáa ce-dǝ. Yisuɔgu, mǝ̃̀ gáa gbǝ̃ǝ̃ ǹ-ce wú mǝ̃rǝ̃ǝ̃ nǝ̃-m. Ya yí ce wú ɲũɔ̃ hlo! Gɩ̀ híí yíi-i jimããgu. Hãmĩĩ ji ce wù nũɔ̃gɩ ba gɩ̀ síì guu nã.»

35 Bá fǝ̃ǝ̃ ǹ-ce bà tǝẃ ɲũɔ̃ ɛrsɛ̃ kwãmmã́ blǝ-yǝ gùú yo gɩ̀ yisuɔgɩ nã, nǝ̃ wuusaalẃ kãã ce wú mǝ̃rǝ̃ǝ̃ nǝ̃-yǝ. Tiiyǝẁ sáa fǝ̃ǝ̃ wù jãnɩm'n bǝ̃ǝ̃, wù sáa fǝ̃ǝ̃ wù hlǝm'n bǝ̃ǝ̃.

36 Lɔtɩ bisiiba hǝ̃ǝ̃l báà, bá juo tuu kusunɲã.

37 Vũnvãyoẃ juo huu pũmpɩrblɩ ǹ-suu wù yiiri wà Mohabɩ. Wùú jáa ba Mohabɩ bluu'n nũɔ̃gɩ min vũnvãtiiw. Bà nũɔ̃gɩ nìɛ ǹ-ji hi jimããnããw.

38 Wuusaal yo, wú juo huu pũmpɩrblɩ ǹ-suu wù yiiri wà Bɛn-Ami. Wù-lǝ wùú jáa ba Amon bluu'n nũɔ̃gɩ min vũnvãtiiw. Bàá yo, bà nũɔ̃gɩ́ nìɛ ǹ-ji hi jimããnããw.