Cuu Dulli (Genèse) 18

Dũnnũẁ juo tu nǝ̃ Ibramãw wà Sɩra ji huu pũmpɩrblɩ ǹ-hã-yǝ

Fɩraa-Dũnnũẁ hílláa Ibramãw nã gùú tammã mã̀-i nnĩĩ: bǝ̃ǝ̃gɩ̀ jáa vǝ̃ǝ̃, vuvǝ̃ǝ̃mã́ juo bũũ ǹ-car, Ibramãẃ fǝ̃ǝ̃ hlǝ ǹ-jiraa wù kuɔblɩ'n dũndɔ̃l'n nũɔ̃gɩ nã Mãmɩre tubiɲingǝ̃ngãnɲã tuɔra,

2 ǹ-ji paa ne ǹ-gbǝ cwaaba siɛldaba nã bà sáa ɲirǝ̃ǝ̃ ǹ-hal nǝ̃-yǝ. Wù gáa da-ba, wú tĩĩ ǹ-suro wù kuɔblɩ'n dũndɔ̃l'n nũɔ̃gɩ nã, ǹ-sɔ̃ ǹ-jǝ̃ǝ̃lǝ̃ǝ̃-ba, ǹ-kãã kuulǝǝ bà yigagɩ nã, nã̀ã fyãn-ba.

3 Wú fǝ̃ǝ̃ ǹ-waa wà: «Mǝ̃̀ tii, nǝ̃-ń ba ǹ caa ń ne mǝ̃̀ yiɛgu, mǝ̃̀ cirǝ̃ǝ̃ cirǝ̃ǝ̃ ǹ nã-i, báa ta ń maa mǝ̃̀ kuɔli.

4 Mǝ̃̀ cirǝ̃ǝ̃ ǹ nã, yáalà bá jo nǝ̃ hũmmã ǹ-ji hã ɲí saar ɲì vyanɲã, nǝ̃ ɲí jiraa ɲí fiisaa tubikuu gúɔ̀ taara.

5 Mǝ̃̀ ga ce bá ce gɩdagǝ fiyãã ǹ-ji hã ɲí wuu. Gɩ̀-lǝ gɩ̀ nã, ɲi-ń suro ǹ-tuu hlũũgu, ɲi ga da kɩkǝmmã ǹ-ba ɲì wáà. Ɲi mãã ɲì júó ǹ-ji vaa nǝ̃-m, yáalà mǝ̃́ ce gɩdagǝ ǹ-hã-ɲã́ã̀.» Gɩ̀-i, bá siɛ-yǝ wà: «Gɩ̀ sǝ nǝ̃ kuu, ǹ díilá cɔ̃m wo cɔ̃m ǹ hiɛga nã, yíi ce-mã fiɛya.»

6 Gɩ̀-i, Ibramãẃ sɔ̃ ǹ-jãn kuɔblɩrɩ nã ǹ-kãã waa nǝ̃ Sɩraw wà: «Hiil jũnflãmmã kãntii yiiga siɛlga ń du-mã ń hyã burẁ kaliɛ.»

7 Nã̀ã fǝ̃ǝ̃ ǹ-sɔ̃ ǹ-ta gbala nã, ǹ-kãã blǝ nǝ̃ǝ̃blɩdiɛ wùu bũũ, ǹ-hã wù mããcierdiɛ wú ko-yǝ, ǹ-hlɩ-yǝ bá kãã taa wù kũɔ̃mã kaliɛ.

8 Kũɔ̃mã̀ gáa be, Ibramãẃ jo nǝ̃-mã nǝ̃ nɔ̃nɔ̃kũmũw nǝ̃ nɔ̃nɔ̃kɛnɛw min ǹ-juo hã noraaba, wù-lǝ nã̀ã fǝ̃ǝ̃ ǹ-hiraa ǹ-ba wù cii-ba tubikuugu taara nǝ̃ bá ba bà wuu wuuri.

9 Gùú nã-i, bá fǝ̃ǝ̃ ǹ-yugu-yǝ wà: «Ǹ ciɛ Sɩraw nǝ̃ haa-ì?» Wú siɛ-ba wà: «Wú nìɛ kuɔblɩ'n kusuugɩ nã.»

10 Noraa báà sǝ̃ǝ̃nã, wudiɛ fǝ̃ǝ̃ ǹ-waa wà: «Mǝ̃̀ ga ver ǹ-jo ǹ nãã cuudiɛnã tam mã́ã̀, ǹ ciɛ Sɩraẁ ji huu pũmpɩrblɩ.» Sɩraẁ yáá wùu hiraa Ibramã furũnyiɛgu ǹ-ba wù nɔ̃ bà cãwanĩɛ̃ga.

11 Sɩraẁ sáá wùu da tãnkuur wù pǝǝbisǝrɩ nã dìi, nǝ̃ bà mãã bà yáá bàa vãnãã nǝ̃ Ibramãw, wù sáá wù ji gbǝ̃ǝ̃ ǹ-da tãnkuur hlo.

12 Gɩ̀-i, Sɩraẁ duruu ɲĩɛ̃gɩ nã wù kusuugɩ nã nã̀ã ba wù waa wù kusuugɩ nã wà: «Mããjaam mã́ã̀-lǝ, canvũɔ̃ mã́ã tuugu, nǝ̃ mǝ̃̀ suɔntibyanvũɔ̃ wáá hãmĩĩ ji kuganãã yì ɲĩɛ̃ nã cĩĩnũũgɩ nã wanĩĩ?»

13 Gùú nã-i, Fɩraa-Dũnnũẃ fǝ̃ǝ̃ ǹ-yugu Ibramãw wà: «Sɩraẁ bla danii wú ba wù ɲã-m? Bii cíé wú ba wù kãn wà wù-lǝ wu vǝ̃́ǝ̃lã́ ǹ-car wu síì gbǝ̃ǝ̃ ǹ-da tãnkuur?

14 Cɔ̃mdaamã̀ mãã mã̀ sǝ̃n ywar Fɩraa-Dũnnũẁ sǝ, mǝ̃̀ ga ver ǹ-ji hi Sɩraw yà da pũmpɩrblɩ cuudiɛnã tam mã́ã̀.»

15 Gbǝrsǝrɩ́ blǝ Sɩraẁ wú fǝ̃ǝ̃ ǹ-waa wà: «Mǝ̃n sáa ɲã dɛ!» Fɩraa-Dũnnũẃ fǝ̃ǝ̃ ǹ-siɛ-yǝ wà: «Ya! Ǹ ɲĩ́ɛ̃́!»

Ibramãẁ cirǝ̃ǝ̃ Dũnnũw nã ǹ-hã Sodɔm lǝntaaba

16 Cwaa báà, bà gáa suro wà ba ta, bá suro ǹ-ba bà ne Sodɔm lǝ'n yiɛgu nã̀ã ga fǝ̃ǝ̃ ǹ-tuu gɩ̀ hlũũgu ǹ-ba bà maar. Ibramã yo, wú kã bá ta ǹ-ba wù kã wù ga hiil-ba nǝ̃ hlũũgu.

17 Bà gáa ba hlũũgɩ nã, Fɩraa-Dũnnũẃ ba wù waa wù hiɛga nã, wà: «Mǝ̃̀ mãã mǝ̃̀ ga ce dìí mãã Sodɔm lǝri, mǝ̃̀ síì ŋmǝ̃ǝ̃rǝ̃ǝ̃ dɩ̀ nã nǝ̃ Ibramãw.

18 Wù ji ba codũlgǝ̃ngããrdarǝ tǝvũnvũɔ̃-i, dìí mãã dɩ̀ ji ba nǝ̃ fãngããgu. Mǝ̃̀ ji ta wùú nã-i ǹ-piɛ mǝ̃̀ nãkrɔfɩnfaagu coplaaga min nã, cuu nã.

19 Mǝ̃̀ níé ǹ-hiil wɩ̀-i, wu ji da ǹ-kal wù pũmpɩriiba nǝ̃ wù huɔnbiiba min bá ba bà wáà mǝ̃̀ hlũsǝri. Nã̀ã pɩgaa bá ba bà ce cɔ̃nsũɔ̃lɩmmã nǝ̃ mǝ̃̀ kusunã cɔ̃mmã. Gùú ji ce, mǝ̃̀ plã mǝ̃̀ nũɔ̃gu nǝ̃ Ibramãw dìí nã, mǝ̃́ ce-dǝ.»

20 Gùú nã-i, Fɩraa-Dũnnũẃ fǝ̃ǝ̃ ǹ-waa nǝ̃ Ibramãw wà: «Mǝ̃̀ nṹɔ̃́ gaabɩbliɛcin ǹ-kã Sodɔm lǝntaaba nǝ̃ Gomɔr lǝntaa'n yiɛgu, wà bà gaacĩɛ̃yagà jáa maa gɩ̀ sùɔ́gu.

21 Mǝ̃̀ ji hɩr ǹ-kãã dǝ̃ǝ̃-ba ǹ-ne. Gà min mãã mǝ̃̀ nṹɔ̃́-ga, ga-ń ba sulam nǝ̃n ba, mǝ̃̀ ji fǝ̃ǝ̃.»

22 Bà sǝ̃ǝ̃nã, cwaaba hǝ̃ǝ̃lbá fǝ̃ǝ̃ ǹ-ta Sodɔm lǝri, nǝ̃ Fɩraa-Dũnnũ-lǝ, wú kã bá ba dàa Ibramãw.

23 Ibramãẃ fǝ̃ǝ̃ ǹ-vã ǹ-kuganãã wù nã, nã̀ã yugu-yǝ wà: «Fɩraa-Dũnnũ, nã́ã́ sulammã nã n ji hũɔ̃ juo per lǝ'n cobɩbliɛba nǝ̃ cosũɔ̃lbaba min nã-ì?

24 Gɩ-ń ba nã́ã́ Sodɔm lǝri cosũɔ̃lbaba gwaahǝ̃ǝ̃l nǝ̃ nũɔ̃sɔ̃ nàa, nã́ã́ n síì hũɔ̃ ǹ-ce lǝntaaba min gaacĩɛ̃ya'n dũndɔw cwa gwaahǝ̃ǝ̃l nǝ̃ nũɔ̃sɔ̃ wáà cɔ̃mmã nã-ì? Nã́ã́ sulammã nã ǹ ji hũɔ̃ ǹ-juo per cobɩbliɛba nǝ̃ cosũɔ̃lba báà yo, bà min-ì?

25 Ǹ síì hũɔ̃ ǹ-ko cobɩblayǝw nǝ̃ cosũɔ̃lyǝw tammã dɩnmã! Dɩ̀-lǝ dɩ̀ káaláa, ǹ síì hũɔ̃ ǹ-ce-dǝ. Ǹ síì hũɔ̃ ǹ-blǝ-ba nǝ̃ nãkruɔgɩ dɩngu! Wùú mãã wù ji jar cuu min sugolli, wù síì gbǝ̃ǝ̃ ǹ-ba nã́ã́ wù sáa sũɔ̃l!»

26 Fɩraa-Dũnnũẃ siɛ-yǝ wà: «Sodɔm lǝ'n kusuugɩ nã, mǝ̃-ń da cosũɔ̃lbaba gwaahǝ̃ǝ̃l nǝ̃ nũɔ̃sɔ̃w, bà-lǝ bà cɔ̃mmã nã, mǝ̃̀ ce lǝntaaba min gaacĩɛ̃ya'n dũndɔw-i!»

27 Ibramãẃ siɛ-yǝ wà: «Mǝ̃̀ tii, mǝ̃n sǝ kuu, hlɔ̃m-i nǝ̃-m, mǝ̃́ nǝ̃ nã́ã́ cuu-i, mǝ̃̀ nũɔ̃gɩ jáa bũũ, mǝ̃n síì ciɛ ǹ-kã yí fa cãwandɩ nã nǝ̃ yíí. Nǝ̃ mǝ̃n cirǝ̃ǝ̃ cirǝ̃ǝ̃ ǹ nã-i, ń ce kukuɔya.

28 Nǝ̃ ba-ń ba bà sáa suu cosũɔ̃lba gwaahǝ̃ǝ̃l nǝ̃ nũɔ̃sɔ̃w, nã̀ã ba cosũɔ̃lba gwaahǝ̃ǝ̃l nǝ̃ bà ndiiba, nã́ã́ n ji naa ń guu lǝntaaba min nã nã̀ã wa cosũɔ̃lba bà ndiiba dɩn, ba mãã bà náalá-ì?» Fɩraa-Dũnnũẃ siɛ-yǝ wà: «Mǝ̃-ń da cosũɔ̃lba gwaahǝ̃ǝ̃l nǝ̃ bà ndiiba, mǝ̃̀ síì guu lǝrɩ nã!»

29 Ibramãẃ ver ǹ-yugu-yǝ hlo wà: «Nǝ̃ ba-ń ba cwa gwaahǝ̃ǝ̃l-lǝ?» Fɩraa-Dũnnũẃ siɛ-yǝ wà: «Ba-ń suu cwa gwaahǝ̃ǝ̃lw, mǝ̃̀ ya dɩ́ ba-i.»

30 Ibramãẃ waa wà: «Mǝ̃̀ tii, yíí báa ya ǹ hiɛga dũ, ya mǝ̃́ wanãã hlo. Nǝ̃ gɩ-ń ba nã́ã́ cosũɔ̃lbaba gur nǝ̃ nũɔ̃sɔ̃ dɩndɩn-i-lǝ?» Fɩraa-Dũnnũẃ siɛ-yǝ wà: «Mǝ̃-ń da cosũɔ̃lbaba gur nǝ̃ nũɔ̃sɔ̃w, mǝ̃̀ ya lǝntaaba min bá ba-i.»

31 Ibramãẃ waa wà: «Mǝ̃̀ tii yíí ce mǝ̃̀ kafal, nã̀ã wa dìí sǝ mǝ̃̀ nũɔ̃gɩ̀ jáa bũũ ǹ-car. Nǝ̃ ba-ń ba cwa gur dɩndɩn nǝ̃n bà-lǝ?» Fɩraa-Dũnnũẃ siɛ-yǝ wà: «Cosũɔ̃lbaba gur-ń da, mǝ̃̀ síì guu dɩ̀ nã.»

32 Ibramãẃ waa wà: «Mǝ̃̀ tii, ce mǝ̃̀ kafal, báa ya ǹ hiɛgá dũ, ya mǝ̃́ yugu-n nǝ̃ dɩ dɩn díɛ́ ǹ-faal. Nǝ̃ ba-ń ba cwa nũɔ̃sɔ̃-lǝ?» Fɩraa-Dũnnũẃ siɛ-yǝ wà: «Cwa nũɔ̃sɔ̃w-ń da, bà-lǝ bà cɔ̃mmã nã, mǝ̃̀ síì guu lǝrɩ nã.»

33 Fɩraa-Dũnnũẁ gáa wanãã nǝ̃ Ibramãw ǹ-tã, wú ta, Ibramã yo, wú ta ǹ-kũũ.