Cuu Dulli (Genèse) 17

Gùú mãã gɩ̀ ji ba gɩ̀ pɩgaa twanɲũɔ̃gǝgu

Ibramẁ gáa da bii jiɛtuu nǝ̃ nũɔ̃sɔ̃ nǝ̃ densǝw, Fɩraa-Dũnnũẃ fǝ̃ǝ̃ ǹ-juo hillaa wù nã, nã̀ã waa nǝ̃-yǝ wà: «Mã́ã-i Fãngããgɩmintii Dũnnũw. Ba ǹ wáà sũɔ̃lɩmmã nã nǝ̃ ń ba ǹ ce dìí mãã dɩ̀ dwal mǝ̃̀ nã.

2 Yi ji ɲũɔ̃ twammã, nǝ̃ mǝ̃́ ce ǹ furũũgɩ́ ɲũrũɔ̃.»

3 Ibramẃ fǝ̃ǝ̃ ǹ-duruu ǹ-curǝǝ Dũnnũ yiganãyiɛgu, nǝ̃ Dũnnũẁ ba dàa wù waa nǝ̃-yǝ wà:

4 «Yi ɲṹɔ̃lã́ twammã gùú cɔ̃mmã nã, mã̀-i nnĩĩ: coplaa'n huɔgɩ̀ ji hlǝ ǹ nã.

5 Ǹ mãã ǹ ji ba coplaa'n huɔ gúɔ̀gɩ tǝw, bà síì ba bà be-n Ibram hlo, bà ji ba bà be-n wà Ibramã-i.

6 Mǝ̃̀ ji ce ǹ furũũgɩ́ ɲũrũɔ̃ fuwɔ coplaaga piyɛ̃. Halle coplaa'n yuntaa yo, bà ji hlǝ yíi huɔnbiiba nã-i.

7 Yi cíé gùú twanɲũɔ̃gǝgu, gɩ̀ síì ba yíi dɩn kuu sǝ. Nǝ̃-ń ji ba ǹ sɩriɛ-i yo, yi ji ba nǝ̃ ǹ huɔnbiiba fɩraa. Mã́ã ji ba ǹ Dũnnũw nǝ̃ ǹ huɔnbii yo bà yow.

8 Ǹ mãã ǹ jiraa ǹ waaraa gùú Kanãã yiɛgɩ nã mãã, norsǝrɩ nã, mǝ̃̀ ji hã-ɲã́ã̀, ɲi nǝ̃ ǹ huɔnbiiba nǝ̃ gɩ̀ yiɛgɩ min. Mã̀ ji ba bà nãkruɔ mǝ̃gãmmã fɩraa, nǝ̃ mǝ̃n ba bà Dũnnũw.»

9 Dũnnũẃ ver ǹ-waa nǝ̃ Ibramãw wà: «Yi ɲṹɔ̃lã́ gùú twammã mãã, yíì, ɲí nǝ̃ ǹ huɔnbiiba min fuwɔ ǹ-ga hi bà kǝǝri, ɲi saa ɲí blǝ-mã.

10 Mǝ̃̀ mãã mǝ̃̀ kra gùú hlũũgɩ nã ǹ-hã-ɲã́ã̀, yíí, nǝ̃ ǹ huɔnbii yo, ɲi saa ɲí ce-gǝ, gɩ̀-i nnĩĩ: bibiɛ wo bibiɛ mãã ɲì sǝ̃ǝ̃nã, ɲi saa ɲí síì-yǝ.

11 Ɲi ji ba ɲì ce síìmã, gùú ji ba gɩ̀ pɩgaa wà mǝ̃̀ cíé yí ɲũɔ̃ twammã nǝ̃-ɲã́ã̀.

12 Ǹ furũntaaba sǝ̃ǝ̃nã, pũmpɩrblɩ wo pũmpɩrblɩw mãã wù ji huu, wù bãn nɩrsiɛlnã yuugu, ɲi saa ɲí síì-yǝ. Ɲi sǝ̃́ǝ̃lã́ gùú lwɛba, nǝ̃ bà mãã bà ji huu gùú tãnkuuraabaa mãã ǹ suɔgu, ɲi saa ɲí síì bàá yo nĩĩgɩ-i. Halle ǹ nũɔ̃'n curo nǝ̃n ba wù sǝ yo.

13 Curo'n sǝ̃n saa wú yanãã, wú ba yà huu yíi suɔ-i, yindagǝ nã nã̀ã sǝ̃ǝ̃ wuusǝ̃ǝ̃yǝ wo, ɲi saa ɲí síì-yǝ. Gùú ji ce yí ɲṹɔ̃lã́ gùú twammã, mã̀ duorɩ ba ɲì cãndɩ nã. Gɩ̀ twanɲũɔ̃cɔ̃mmã̀ sǝ̃n saa mã́ tã ǹ-da.

14 Gùú tii nǝ̃n ba wù sáa síì, wù hlárá wù sáa wáà twanɲũɔ̃gǝ gúɔ̀gɩ̀ hlũũ-i. Gɩ̀ saa ɲí hiil-yǝ ɲì sǝ̃ǝ̃nã.»

15 Dũnnũẃ ver ǹ-waa nǝ̃ Ibramãw hlo wà: «Ǹ ciɛ-lǝ, gɩ̀ sǝ̃n saa ń ba ǹ be-yǝ Sarayi hlo, wù yiirɩ̀ ji ba wà Sɩra.

16 Mǝ̃̀ ji piɛ mǝ̃̀ nãkrɔfɩnfaagu wù drɔ wú huu pũmpɩrblɩ. Mǝ̃̀ ji piɛ mǝ̃̀ nãkrɔfɩnfaagu wù drɔ, wú ba coplacin'n ɲũw. Wù ji huu coplacin'n yuntaaba.»

17 Ibramãẃ duruu ǹ-curǝǝ, Dũnnũ yiganãyiɛgu, ǹ-ba wù ɲã, nã̀ã ba wù waa wù hiɛga nã wà: «Bii gundiitiiẁ ji gbǝ̃ǝ̃ ǹ-huu tãnkuurw danii? Nǝ̃ Sɩraw mãã nǝ̃ bii jiɛtuu nǝ̃ nũɔ̃sɔ̃ wù ji tuu kusuugu danii ǹ-huu tãnkuurw?»

18 Nã̀ã fǝ̃ǝ̃ ǹ-waa nǝ̃ Dũnnũw wà: «Mǝ̃n mãã mǝ̃̀ kaal dìí nã, ń cii Sɩmãyilaw nã nǝ̃ ń piɛ ǹ nãkrɔfɩnfaagu wù drɔ!»

19 Dũnnũẃ siɛ-yǝ wà: «Nĩĩgu sǝ. Ǹ ciɛ Sɩra-lǝ, wùú ji huu pũmpɩrblɩ ǹ-hã-n, nǝ̃ ń suu wù yiiri wà Isiyaga. Mǝ̃̀ plã mǝ̃̀ nũɔ̃gu gùú cɔ̃mmã nã, mǝ̃̀ ji hã-yǝ nǝ̃-mã, nã̀ã hã wù huɔnbii yo nǝ̃-mã. Gɩ̀ twanɲũɔ̃cɔ̃mmã̀ síì tã ǹ-da.

20 Nǝ̃ ǹ círǝ̃́ǝ̃ dìí nã mãã Sɩmãyila cɔ̃mmã nã, mǝ̃̀ nṹɔ̃́-dǝ. Mǝ̃̀ ji piɛ mǝ̃̀ nãkrɔfɩnfaagu wù drɔ, mǝ̃̀ ji ce wù furũũgɩ́ ɲũrũɔ̃ piyɛ̃. Wù ji huu yuntaaba ǹ-ji da nũɔ̃sɔ̃ nǝ̃ bà hǝ̃ǝ̃l, ǹ-ba codũliɛcin'n tǝvũnvũɔ̃w.

21 Nǝ̃ yi ɲṹɔ̃lã́ gùú twam-lǝ, mã̀ ji duu Isiyaga nã-i, ǹ ciɛ Sɩraw mãã wù ji huu wùú mãã cuudiɛnã tam mã́ã̀.»

22 Dũnnũẁ gáa wanãã nǝ̃ Ibramãw ǹ-tã, wú ta nǝ̃ wú ba.

23 Gùú yuugɩ dɩngu dàa, Ibramãẃ blǝ wù bíɛ́ Sɩmãyilaw, nǝ̃ wù lwɛba min, bàá nǝ̃n húulá wù suɔgu, nǝ̃ wù sǝ̃́ǝ̃lã́ bàá mãã, bibyanããba min ǹ-ce bá síì-ba nã́ã́ Dũnnũw mãã wù wáalá-dǝ gùú tammã.

24-25 Ibramãẁ yáá nǝ̃ bii jiɛtuu nǝ̃ nũɔ̃sɔ̃ densǝ-i nǝ̃ bá síì-yǝ, nǝ̃ wù bíɛ́ Sɩmãyila-lǝ wú ba nǝ̃ bii nũɔ̃sɔ̃ nǝ̃ gà siɛl.

26 Ibramãbà síilǝ́ yuugɩ dɩngɩ-i bá nǝ̃ wù bíɛ́ Sɩmãyilaw,

27 nǝ̃ wù suɔntaaba min mãã bibyanããba, bàá nǝ̃n húulá dàa, nǝ̃ wù sǝ̃́ǝ̃lã́ gùú baasǝ̃ǝ̃babaa mãã.