Sɩmãyila huumã
16
Ibram ciɛ Sarayiẁ sáá wùu da tãnkuur, nǝ̃ wacijaldiɛẁ yáá dàa wù saa, bà be-yǝ Agar, wù yáá wù hlǝ Misɩra yáá.
2 Sarayiẃ fǝ̃ǝ̃ ǹ-waa nǝ̃ wù blaw wà: «Ǹ díɛ́, Fɩraa-Dũnnũẁ sáa hã-m nǝ̃ tãnkuur. Ba ǹ mǝ̃rǝ̃ǝ̃ nǝ̃ mǝ̃̀ waciɛw, yindagǝ nã, Fɩraa-Dũnnũw ji ce wú huu wudiɛ ǹ-hã-m.» Ibramẃ nɔ̃ ǹ-hã Sarayiw.
3 Ibram ciɛ Sarayiẃ fǝ̃ǝ̃ ǹ-tuu wù waciɛ Agarw ǹ-hã wù blaw, wú ce-yǝ wù ciɛ. Dɩ̀ cíé Ibram jiram'n bii nũɔ̃sɔ̃nã wɩ̀-i Kanãã yiɛgu.
4 Wù gáa cɔ nǝ̃ Agarw, wú fǝ̃ǝ̃ ǹ-hiraa kusuugu. Gɩ̀-lǝ gɩ̀ nã, Agarẃ juo ba wù ce yandi nǝ̃ wù tii Sarayiw hlo.
5 Gùú nã-i, Sarayiẃ fǝ̃ǝ̃ ǹ-waa nǝ̃ Ibramw wà: «Nǝ̃-ń da nãdɔ̃mmã ji ba mã̀ hi-m, dɩ̀ hlǝ́rá yíi nã-i. Mǝ̃n-lǝ mã́ã hlã-n nǝ̃ mǝ̃̀ waciɛw, nǝ̃ wù jáa hiraa kúsúugɩ nã, wú juo ba wù ce yandi nǝ̃-m. Fɩraa-Dũnnũẃ tũɔ̃l-dǝ ǹ-hã yíí nǝ̃ mã́ã̀!»
6 Ibramẃ fǝ̃ǝ̃ ǹ-waa nǝ̃ Sarayiw wà: «Yíi waciɛ-i, dìí mãã dɩ̀ dwal ǹ nã, ǹ ji gbǝ̃ǝ̃ ǹ-ce-yǝ nǝ̃-dǝ.» Sarayiẃ fǝ̃ǝ̃ ǹ-juo ba wù kãnnã Agarw fuwɔ wu ji kwar ǹ-ta.
7 Fɩraa-Dũnnũ mɛlɛgɛẃ kãã hi-yǝ hũnnaalw tuɔra jerkwaarɩ nã, Suur hlũũgɩ nã.
8 Wú fǝ̃ǝ̃ ǹ-yugu-yǝ wà: «Sarayi waciɛ Agar, ǹ hlǝ́rá haa-i, nǝ̃ ǹ kã haa-ì?» Agarẃ siɛ-yǝ wà: «Mǝ̃̀ kwar nǝ̃ mǝ̃̀ tii Sarayi-i.»
9 Fɩraa-Dũnnũ mɛlɛgɛẃ ver ǹ-waa nǝ̃-yǝ wà: «Ver ń maar ǹ tii nãã, n ga ba ǹ nɔ̃ ǹ hã-yǝ.
10 Mǝ̃̀ ji hã-n nǝ̃ honããgu piyɛ̃ fuwɔ curo'n síì gbǝ̃ǝ̃ ǹ-pɩgaa ǹ-fǝ̃ǝ̃ bà nũɔ̃gu.
11 Ne ǹ mãã gùú sùɔ́gu nnĩĩ, ń nǝ̃ kúsúu-i, ǹ ji huu pũmpɩrblɩ-i. Fɩraa-Dũnnũẁ mãã wù nṹɔ̃́ ǹ-hã-n, ǹ hujãncɔ̃mmã nã, ǹ ji suu wù yiiri wà Sɩmãyila.
12 Ǹ bíɛ́ wáá ji ba nã́ã́ jernkǝkũm-i. Cwaaba min bà ji ba wù-lǝ wù byarntaa-i, wùú yo, wú ba cwaaba min byarntiiw. Wù ji pyar ǹ-ga ba wù dǝ nǝ̃ wù cwanããba min.»
13 Agarẃ ba wù waa wù kusuugɩ nã wà: «Dũnnũw mãã wù da-m, nã́ã́ mǝ̃ díɛ́ wɩ̀-i níɛ̀-i?» Nǝ̃ gùú Fɩraa-Dũnnũw nǝ̃n wáalá cɔ̃mmã nǝ̃-yǝ, Agarẃ fǝ̃ǝ̃ ǹ-suu wù yiiri wà: «Ɛl-Wurɔyi, yíi-i Dũnnũw mãã wù da-m.»
14 Gùú cíé, hũnfuugu mãã Kadɛsɩgu nǝ̃ Beredɩ sǝ̃ǝ̃gɩ nã, bá suu-gǝ wà Biɛr-Lahayi-Orɔyi, wà «Nũmǝ̃nãtii mãã wù da-m, wù hũnfuugu.»