Cuu Dulli (Genèse) 15

Fɩraa-Dũnnũba twanɲũɔ̃gǝgu nǝ̃ Ibram

Gɩ̀-lǝ gɩ̀ furũũgɩ nã, Fɩraa-Dũnnũẃ juo pɩgaa wù hla nǝ̃ Ibram. Wú waa nǝ̃-yǝ wà: «Ibram, báa sɔ̃ cɔ̃m nã, mã́ã-i ǹ ciitiiw mǝ̃̀ ji pã-n piyɛ̃.»

2 Ibramẃ waa nǝ̃-yǝ wà: «Mǝ̃̀ tii, Fɩraa-Dũnnũ, ǹ ji hã-m nǝ̃ bii gɩ́ ba gɩ̀ ji pyar mǝ̃̀ dugɔw? Mǝ̃̀ sǝ nǝ̃ tãnkuur, Eliyesɛrw mãã wù hlǝ Damãsɩ lǝri wùú ji tuu mǝ̃̀ sùɔ́gu.

3 Ǹ sáa hã-m nǝ̃ honãã, mǝ̃̀ mããcier Eliyesɛrw ji tuu mǝ̃̀ sùɔ́gu.»

4 Fɩraa-Dũnnũẃ waa nǝ̃-yǝ wà: «Nĩĩgu sǝ, wùú síì tuu ǹ sùɔ́gu, yíi wuuhuhorw ji tuu-gǝ.»

5 Wú ce Ibramẃ hlǝ taasǝ̃ǝ̃nǝ̃ǝ̃gu nã̀ã waa nǝ̃-yǝ: «Ciir ǹ yuugu ń ne drɔkuɔli, nǝ̃ ń ja ŋmĩɛ̃gaa ń ne, nǝ̃-ń ba ǹ ji gbǝ̃ǝ̃ ǹ-ja-ga. Ǹ furũũgɩ ji ɲũrũɔ̃ nĩĩgɩ-i.»

6 Ibramẃ hũɔ̃ ǹ-piɛ wù nãkruɔgu Fɩraa-Dũnnũ cãwandɩ nã. Gùú cíé Fɩraa-Dũnnũẃ waa wà cosũɔ̃lyǝ-i nǝ̃-yǝ.

7 Nã̀ã fǝ̃ǝ̃ ǹ-waa nǝ̃ Ibramw hlo wà: «Mã́ã-i Fɩraa-Dũnnũw. Mã́ã cíé ń hlǝ Uur lǝri, Kalde yiɛgu, ǹ-juo hã-n nǝ̃ yiɛ gúɔ̀gɩ́ ce ǹ kuugu.»

8 Ibramẃ fǝ̃ǝ̃ ǹ-yugu-yǝ wà: «Mǝ̃̀ tii Fɩraa-Dũnnũ, mǝ̃̀ ji ce danii nã̀ã fǝ̃ǝ̃ wà dɩ̀ ji ba mã́ã dǝlli-i?»

9 Fɩraa-Dũnnũẃ waa nǝ̃-yǝ wà: «Ga jo nǝ̃ biiga siɛl nǝ̃ǝ̃ nǝ̃nũɔ̃nw, biiga siɛl wuruɔw, biiga siɛl tugɔlaw, nǝ̃ hũɔ̃rũɔ̃w, nǝ̃ tǝbuhũɔ̃rũɔ̃w ǹ-ji hã-m nǝ̃-ɲã.»

10 Ibramẃ kãã caa gɩ̀ kwasǝnɲinɲã ǹ-jo ǹ-juo ko-ɲã, nã̀ã taalaa ɲã̀ nã yanɲã hǝ̃nhǝ̃lɲã, ǹ-kra gɩ̀ yanɲã nã ɲã́ vĩĩ ɲã̀ ɲĩɛ̃. Nǝ̃ diɛrnɲin-lǝ, wù sáa taalaa ɲã̀-lǝ ɲã̀ nã.

11 Dũnǝ̃ǝ̃bá juo suu gɩ̀ kwasǝnɲin'n kũɔ̃mã nã, Ibramẃ ɲǝ̃ǝ̃ ǹ-yuu-ba.

12 Bǝ̃ǝ̃'n jãnɩm'n bǝ̃ǝ̃gu, duɔsǝmdamã plǝ, mã́ tuu Ibramw, gbǝrsǝdaarɩ́ juo blǝ-yǝ fuwɔ ǹ-ji car.

13 Fɩraa-Dũnnũẃ fǝ̃ǝ̃ ǹ-waa nǝ̃-yǝ wà: «Mǝ̃̀ waa ǹ-ja-n, ǹ huɔnbiibà ga kãã ce norsǝri niɛriɛ'n yiɛgu. Bà ga blǝ-ba ǹ-ce-ba lwɛba gɩ̀ sùɔ́gɩ nã, ǹ-kãnnã-ba fuwɔ ǹ-ji da bii tũndiiw (400).

14 Nǝ̃ mǝ̃-ń ga piir gɩ̀ yiɛ'n cwaaba nã gùú nã mãã, bà ga hlǝ gɩ̀ nã nǝ̃ nãkruɔɲinɲã piyɛ̃.

15 Nǝ̃ yíǹ-lǝ, ǹ ji vǝ̃ǝ̃ piyɛ̃, nã̀ã fǝ̃ǝ̃ ǹ-duu ǹ vũnvãnããba nã hyasɩrãgǝgɩ nã, bá dii ǹ pĩɛ̃ndi.

16 Amoritɩ nũɔ̃ntaa'n gaacĩɛ̃yagà mãã gà sáa hi ǹ-maa gɩ̀ sùɔ́gu sǝ, nǝ̃ mǝ̃́ ba mǝ̃̀ ji da ǹ-ɲǝ̃ǝ̃ ǹ-hiil-ba, ǹ huɔnbiibaa mãã bà ga ba dàa norsǝri nã, bà ga kurǝǝ bà nũɔ̃gɩ nã, ǹ ga da nɔ̃nɲã siɛl. Ɲã̀ nnǝ̃ǝ̃nãẁ ga hlǝ ǹ-ver ǹ-jo níɛ́.»

17 Kuugɩ̀ gáa blĩĩ, wù yáá wùu taal kwasǝnɲin'n yanɲãã mãã ǹ-kra, wú da ɲũɔ̃sǝdarǝ nǝ̃ dãncaalammã, mã̀ã juo jãn ǹ-ta kwasǝnɲin'n yan ɲã́ã̀ ɲã̀ sǝ̃ǝ̃gɩ nã.

18 Fɩraa-Dũnnũẁ cíé bá ɲũɔ̃ twammã nǝ̃ Ibramw gùú yuugɩ-i. Nǝ̃ wú fǝ̃ǝ̃ ǹ-waa nǝ̃ Ibramw wà: «Mǝ̃̀ hã-n nǝ̃ mǝ̃̀ nũɔ̃gu wà ǹ-tuu Misɩra lwaagɩ nã, fuwɔ ǹ-ga kra lwaakɩnkandii mãã bà be-dǝ wà Efratɩ, mǝ̃̀ hlã ǹ huɔnbiiba nǝ̃ gɩ̀ min.

19 Gɩ̀ sùɔ́ntaaba-i nnĩĩ: Kenitɩ bluuba, Kenisitɩ bluuba, Kadɩmonitɩ bluuba,

20 Hitɩ nũɔ̃ntaaba, Peresɩ bluuba, Erfayitɩ nũɔ̃ntaaba,

21 Amoritɩ nũɔ̃ntaaba, Kanãã yiɛntaaba, Girgasitɩ nũɔ̃ntaaba, nǝ̃ Sebuusɩ nũɔ̃ntaaba.»