Cuu Dulli (Genèse) 14

Mɛlkisɩdɛkɩẁ cirǝ̃ǝ̃ Dũnnũw nã wù hã Ibramãw

Gùú nã mãã Amǝ̃rafɛlẁ gáa ba Sineyar yiɛ'n mũɔ̃riw, Ariyɔkɩẃ ba Ɛlasar lǝ'n mũɔ̃riw, Kedɔrlawomɛrẃ ba Elam yiɛ'n mũɔ̃riw, nǝ̃ Tɩdalẃ ba Goyim lǝ'n mũɔ̃riw,

2 bá kãã du byaari nǝ̃ Beraw, Sodɔm lǝ'n mũɔ̃riw, nǝ̃ Birsaw, Gomɔr lǝ'n mũɔ̃riw, nǝ̃ Sɩnavɩw, Adamã lǝ'n mũɔ̃riw, nǝ̃ Semebɛrw, Seboyim lǝ'n mũɔ̃riw, nǝ̃ Bela lǝ'n mũɔ̃riw, badaabà be gɩ̀ lǝri wà Suwar lǝri.

3 Bà kã́ã́ ǹ-ga tɩgɩnǝ̃ǝ̃ bà ɲĩɛ̃ Sidim jũɔ̃gɩ nã, jimããnããw gɩ̀ sùɔ́gɩ́ nǝ̃ gùu suu nã nǝ̃ lwaakɩnkandi mãã bà be-mã wà Lwaakulǝ-i.

4 Bà yáá bà nɔ̃ bà hã Kedɔrlawomɛrw bii nũɔ̃sɔ̃ nǝ̃ gà hǝ̃ǝ̃l kusuugɩ nã, nã̀ã ga fǝ̃ǝ̃ ǹ-ciɛ ǹ-cii bà hla-n gɩ̀ bii nũɔ̃sɔ̃ nǝ̃ gà siɛlnã blɩri.

5 Gɩ̀ bii nũɔ̃sɔ̃ nǝ̃ gà nnǝ̃ǝ̃nã blɩri, Kedɔrlawomɛrẃ suro nǝ̃ gùú mũɔ̃rããbaa mãã bà yáá bàa duu wù nã, ǹ-kãã ko Erfayitɩ nũɔ̃ntaaba Asɩtero-Kanayim lǝri, ǹ-ko Susitɩ bluuba Hãmgu, ǹ-ko Emimɩ bluuba Save-Kiryatɛm lǝri,

6 ǹ-ko Horitɩ bluuba bà tãnũũgɩ nã Seyiir yiɛgu, ǹ-maa ǹ-ga maar Ɛl-Paarã jerkwar'n nũɔ̃gɩ nã.

7 Nã̀ã ver ǹ-jo Ɛ̃nɩ-Misepatɩ nã, bà ja Kadɛsɩgɩ-i nĩĩgu. Bá kãã ɲǝ̃ǝ̃ ǹ-hũɔ̃ Amalɛkɩ nũɔ̃ntaa'n yiɛgɩ min, ǹ-pya Amoritɩ nũɔ̃ntaa yo bà lǝrɩ nã, bà be-dǝ wà Hasasɔ̃-Tamar.

8-9 Gɩ̀-i, Sodɔm lǝ'n mũɔ̃riw, nǝ̃ Gomɔr lǝ'n mũɔ̃riw, Adamã lǝ'n mũɔ̃riw, Seboyim lǝ'n mũɔ̃riw, nǝ̃ Bela lǝ'n mũɔ̃riw (bà be dɩ̀-i Suwar lǝ), bá hlǝ ǹ-kãã da bà ɲĩɛ̃ nǝ̃ Kedɔrlawomɛrw Elam yiɛ'n mũɔ̃riw, nǝ̃ Tɩdalw, Goyim lǝ'n mũɔ̃riw, nǝ̃ Amǝ̃rafɛlw, Sineyar yiɛ'n mũɔ̃riw, nǝ̃ Ariyɔkɩw Ɛlasar lǝ'n mũɔ̃riw Sidim lǝ'n jũɔ̃gɩ nã. Mũɔ̃rããba nnǝ̃ǝ̃bá suro bà ndiiba yuunã.

10 Gudrɔ̃ fosǝrɩ̀ yáá dìi ɲũrũɔ̃ Sidim lǝ'n jũɔ̃gɩ nã, Sodɔm lǝ'n mũɔ̃riw, nǝ̃ Gomɔr lǝ'n mũɔ̃riw, bà kwarɩmmã nã badaabá kãã dũn gɩ̀ fosǝrɩ nã, bà dɩgaliɛẃ kwar ǹ-ta ǹ-kãã ŋmǝ̃ǝ̃rǝ̃ǝ̃ tãnũnɲã nã.

11 Bàá nǝ̃n gbǝ̃́ǝ̃lã́ bà nã, bá kãã kaala Sodɔm lǝri nǝ̃ Gomɔr lǝ'n ɲinɲã min nǝ̃ bà wariɛga min ǹ-ta.

12 Ibram hãsɩblɩ Lɔtɩẁ yáá dàa Sodɔm lǝ-i, bá blǝ wùú yo ǹ-ta nǝ̃-yǝ nǝ̃ wù nãkruɔɲinɲã min.

13 Kwartiidíɛ juo ta ǹ-ja Ibramw nǝ̃-dǝ, Hebru biɛw. Wù yáá wùu jiraa Amoritɩ nũɔ̃ntii Mãmɩre tubiɲingǝ̃ngãnɲã sǝ̃ǝ̃nã. Ɛsɩkɔlba nǝ̃ Anɛrw, bàá cwanĩĩ yáá nǝ̃ Mãmɩrew. Gɩ̀ bà siɛlba min bà yáá Ibram furũũgɩ nã.

14 Wù-lǝ wù gáa siɛ ǹ-nɔ̃ wù hãsɩblɩ'n blǝm'n cɔ̃mmã nã, wú suro tɩgɩnǝ̃ǝ̃ bà mãã nũɔ̃gɩ dɩnguu nǝ̃ bàá mãã, cwa gundii bà siɛl nǝ̃ cwa nũɔ̃sɔ̃ nǝ̃ nɩrsiɛl, bá suro ǹ-ba bà ɲǝ̃ǝ̃ bà duu bà ɲããtaaba nã, fuwɔ Dan lǝri dìi.

15 Ibramẃ kãã buruɔ wù bluuba nã, bá fǝ̃ǝ̃ ǹ-kãã du-ba yisuɔgu. Bá ko ǹ-gbǝ̃ǝ̃ bà nã ǹ-ɲǝ̃ǝ̃ ǹ-duu bà nã ǹ-ga maar Hobagu dìi Damãsɩ lǝ'n ɲiɲũɔ̃gɩ nã.

16 Wú kãã ɲǝ̃ǝ̃ ǹ-hũɔ̃ bà ɲinɲã min, ǹ-hũɔ̃ wù hãsɩblɩ Lɔtɩ yo, nǝ̃ wù nãkruɔɲinɲã min, nǝ̃ canããba nǝ̃ bà cwanããba.

17 Ibramẁ gáa gbǝ̃ǝ̃ mũɔ̃riw Kedɔrlawomɛrw nǝ̃ wù nãmũɔ̃rããbaa mãã bà yáá nǝ̃-yǝ, Sodɔm lǝ'n mũɔ̃riẃ juo jǝ̃ǝ̃lǝ̃ǝ̃-yǝ Save jũɔ̃gɩ nã, dɩ̀ yuugɩ-i wà mũɔ̃ri'n jũɔ̃gu.

18 Mɛlkisɩdɛkɩẃ yáá Salɛm lǝ'n mũɔ̃riw, nã̀ã ba puruɔntiiw Drɔ-Dũnnũw saa. Wú jo nǝ̃ wuuri nǝ̃ ɛrsɛ̃ kwãmmã,

19 nã̀ã cirǝ̃ǝ̃ Dũnnũw nã wà wú piɛ wù nãkrɔfɩnfaagu Ibramw wà: «Drɔ-Dũnnũw mãã wù nǝ̃́ǝ̃lã́ drɔkuɔli nǝ̃ ɲũũrũũgu, wú piɛ wù nãkrɔfɩnfaagu Ibramw drɔ.

20 Mǝ̃̀ bũũ Drɔ-Dũnnũw, wùú mãã wù blǝ́rá ǹ ɲããtaaba ǹ-hã-n.» Gùú nã-i, Ibramẁ ɲǝ̃́ǝ̃lã́ ǹ-hũɔ̃ gùú ɲinɲãã mãã byarcesuɔgɩ nã, wú hã-yǝ nǝ̃ ɲã̀ yuɔm nũɔ̃sɔ̃nãw.

21 Gɩ̀-lǝ gɩ̀ nã, Sodɔm lǝ'n mũɔ̃riw mãã wù yáá wùu jo bà nãã, wú waa nǝ̃ Ibramw wà: «Ya mǝ̃̀ cwaabá ba mǝ̃̀ saa, nǝ̃ ń ba nǝ̃ wariɛgaa mãã ǹ ɲǝ̃́ǝ̃lã́ ǹ-hũɔ̃-ga byarcesuɔgɩ nã.»

22 Ibramẃ waa nǝ̃-yǝ wà: «Mǝ̃̀ haar mǝ̃̀ nãkruɔgu, ǹ-waasǝ Fɩraa-Dũnnũw mãã Drɔgu, wùú mãã wù nǝ̃́ǝ̃lã́ drɔkuɔli nǝ̃ ɲũũrũũgu.

23 Wà, mǝ̃̀ síì jĩɛ̃ ǹ nãkrɔkuu nã, halle jisɩblɩ-i wo, viɛtaator-i wo, n báa ji waa wà yíi cíé mǝ̃́ ba kuutii.

24 Mǝ̃̀ sǝ̃n caa kuu ǹ saa, fuwɔ mǝ̃̀ bluuba, nǝ̃ bà wúulá gùú, nǝ̃ mǝ̃̀ pyannãtaaba, Anɛrw, Ɛsɩkɔlw nǝ̃ Mãmɩrew, bà-lǝ bà ji tuu bà guɔgu.»