Cuu Dulli (Genèse) 13

Ibramba burɔmmã nǝ̃ wù hãsɩblɩ Lɔtɩw

Ibramw hlǝ Misɩra yiɛgu, bá nǝ̃ wù ciɛw nǝ̃ Lɔtɩw nǝ̃ wù nãkruɔɲinɲã min, ǹ-maar Negɛvɩgu.

2 Ibramẁ yáá wùu gbaala. Wù yáá nǝ̃ kwasǝnɲinɲã piyɛ̃ nǝ̃ jinɲã nǝ̃ sãnã yo piyɛ̃.

3 Wú kãã suro Negɛvɩgu, ǹ-kãã jiraa dĩɛ̃lãmmã nã, Betɛl lǝri nǝ̃ Ayi lǝ'n sǝ̃ǝ̃gɩ nã,

4 nã̀ã mã Dũnnũ siijãnsuɔgu. Wú kãã cirǝ̃ǝ̃ Fɩraa-Dũnnũw nã gɩ̀ sùɔ́gɩ nã, ǹ-be-yǝ wà: «Mǝ̃̀ tii.»

5 Lɔtɩẁ mãã wù yáá wù duu wù nã, wùú yo, wù yáá nǝ̃ nãkrɔkwasǝnɲinɲã: tũmba, wuramba, nǝ̃ ninɲã. Wù yáá nǝ̃ wù hla'n kuɔya yo.

6-7 Kanãã yiɛntaaba nǝ̃ Peresɩ bluuba yo, bà yáá dàa jirammã nã gɩ̀ yiɛgu. Kwasǝnɲinɲã juo ɲũrũɔ̃ ǹ-car, bà wanjirammã juo kol bà nã. Yuudagǝ, byaarɩ́ kãã suro Ibram wanciinããba nǝ̃ Lɔtɩ wanciinãã'n sǝ̃ǝ̃gɩ nã.

8 Gùú nã-i, Ibramẃ fǝ̃ǝ̃ ǹ-waa nǝ̃ Lɔtɩw wà: «Hãmĩĩ, yi nǝ̃ sùɔ́gɩ dɩn-i, yi sǝ̃n saa yí gǝ̃ǝ̃ nǝ̃ yì ɲĩɛ̃. Yì wanciinãã yo, bà sǝ̃n saa bá gǝ̃ǝ̃ nǝ̃ bà ɲĩɛ̃.

9 Hlɔ̃mmãã dɩndɩn máarà nnĩĩ. Yi ji gbǝ̃ǝ̃ ǹ-buruɔ. Yíǹ maar ɲiɲũɔ̃ yiɛgu, mǝ̃n ji kã nãdĩĩ yiɛgu, nǝ̃-ń kã nãdĩĩ yiɛgu, mǝ̃n ji ta ɲiɲũɔ̃ yiɛgu.»

10 Lɔtɩẃ ciir wù yuugu, ǹ-ne ǹ-da Surdɛ̃ hlɔ̃nfɩnfammã maar fuwɔ ǹ-ga hi Suwar lǝri. Gùú bǝ̃ǝ̃guu mãã Fɩraa-Dũnnũẁ sáá wùu hi guu Sodɔm lǝri nǝ̃ Gomɔr lǝri, sùɔ́ gúɔ̀, gɩ̀ yáá nã́ã́ Fɩraa-Dũnnũ nãnkuɔtuurì yáá nĩĩgu, nã́ã́ Misɩra yiɛguu mãã gùú tammã nã̀ã ba nǝ̃ hũm yo dugɔ.

11 Gɩ̀ Surdɛ̃ hlɔ̃mmã́ dwal Lɔtɩw nã, wú fɩr wù kuɔli, bá buruɔ bà ɲĩɛ̃ nã, wú kãã sa-dǝ bǝ̃ǝ̃'n pal'n yiɛgu.

12 Ibram-lǝ wú ba dàa Kanãã yiɛgu. Lɔtɩẃ kãã jiraa Surdɛ̃ liɛga nã, nã̀ã sa wù kuɔyaga ǹ-maar fuwɔ Sodɔm lǝri.

13 Gɩ̀ lǝntaabà yáá bàa bla nã̀ã ba bà ce bà jãn Fɩraa-Dũnnũ nǝ̃ bà gaacĩɛ̃yaga piyɛ̃.

Fɩraa-Dũnnũẁ pã wù nũɔ̃gu nǝ̃ Ibramw

14 Lɔtɩẁ gáa pyar Ibramw nã gùú nã, Fɩraa-Dũnnũẃ waa nǝ̃ Ibramw wà: «Ciir ǹ yuugu ń ne, ǹ-tuu ǹ mãã ǹ hyárá gùú sùɔ́gu ǹ-maar bǝ̃ǝ̃'n pal'n yiɛgu, nǝ̃ ń ne ǹ-maar bǝ̃ǝ̃'n jãnɩm'n yiɛgu, nǝ̃ ń yiil ǹ-ne ǹ-maar ǹ nãdĩĩ yiɛgu, nǝ̃ ǹ ɲiɲũɔ̃ yiɛgu,

15 ǹ mãã ǹ da gùú hlɔ̃mmãã mãã nnĩĩ, mǝ̃̀ hã-n nǝ̃-mã, yíì nǝ̃ ǹ huɔnbiiba mã́ ba ɲì mǝ̃gãmmã fɩraa.

16 Mǝ̃̀ ji ce ǹ huɔnbiibá ɲũrũɔ̃ nã́ã́ hlɔ̃mpieri mãã gùú tuugu. Curo'n síì gbǝ̃ǝ̃ ǹ-ja yíi yo ǹ furũntaaba.

17 Mǝ̃̀ hã yíi-i nǝ̃ sùɔ́ gúɔ̀gɩ min. Suro ń waaraa gɩ̀ nã, ǹ-tuu gɩ̀ yuugɩ nã ǹ-ga kra gɩ̀ mlãrɩ nã. Gɩ̀ min yíi kuu-i.»

18 Ibramẃ fǝ̃ǝ̃ ǹ-suro wù kuɔyaga ǹ-kãã nǝ̃ǝ̃-ga Mãmɩre tubiɲingǝ̃ngãnɲã nãã, Hebrɔ̃ lǝri tuɔra. Wú fǝ̃ǝ̃ ǹ-mã Fɩraa-Dũnnũ siijãnsuɔgu.