Cuu Dulli (Genèse) 12

Ibram belli

Fɩraa-Dũnnũẃ waa nǝ̃ Ibramw: «Hlǝ ǹ yiɛgu, ń ya ǹ cwanããbá ba nǝ̃ ǹ suɔntaa yo bá ba. Mǝ̃̀ mãã mǝ̃̀ ji pɩgaa-n nǝ̃ gùú sùɔ́guu mãã, ń maar gùú sùɔ́gu.

2 Mǝ̃̀ ji ce ǹ tãnkuuraa'n tãnkuuraabá ɲũrũɔ̃ fuwɔ ǹ-ce codũlli ǹ-hã-n, nã̀ã piɛ mǝ̃̀ nãkrɔfɩnfaagu ǹ drɔ. Nã̀ã ce ǹ yiirɩ́ hlǝ. Yíi ji ce mǝ̃̀ nãkrɔfɩnfaagɩ́ hi cwaa'n dɩgaliɛw.

3 Gùú taabaa nǝ̃n pã-n nǝ̃ nɔ̃fɩnfaagu, mǝ̃̀ ji piɛ mǝ̃̀ nãkrɔfɩnfaagu gɩ̀ taaba drɔ, nǝ̃ wùú nǝ̃n pã-n nǝ̃ nɔ̃bɩblaagu, mǝ̃̀ piɛ mǝ̃̀ nãkrɔbɩblaagu wù drɔ. Mǝ̃̀ ji ta yíi nã-i ǹ-piɛ mǝ̃̀ nãkrɔfɩnfaagu coplaaga min drɔ, cuu nã.»

4 Dũnnũẁ yáá wùu waa-dǝ nǝ̃ Ibramw gùú tammã, wú ce-dǝ nĩĩgu. Wú suro, wù hǝ̃ǝ̃'n bíɛ́w mãã bà be-yǝ wà Lɔtɩ, wùú yo, wú kã bá ta. Ibramẁ yáá wù hlǝ Harã lǝri gùú nã, wù yáá nǝ̃ bii gwasiɛl nǝ̃ nũɔ̃sɔ̃ nǝ̃ ga ndii-i.

5 Wú tuu wù ciɛw nǝ̃ wù hǝ̃ǝ̃'n bíɛ́ Lɔtɩw. Nã̀ã tuu bà nãkruɔɲinɲã min, nǝ̃ lwɛbaa mãã bà yáá bà sǝ̃ǝ̃nã Harã lǝri, ǹ-tuu Kanãã hlũũgu. Bà gáa kãã hi Kanãã yiɛgu,

6 bá taal lǝri fuwɔ ǹ-ga kãã hi yiɛdagǝ bà be-gǝ wà Sisɛm, Morɛ tubikugǝ̃ngããgu nãã. Gɩ̀ bǝ̃ǝ̃gu, Kanãã yiɛntaabà yáá dàa bàa jiraa gɩ̀ sùɔ́gɩ nã.

7 Fɩraa-Dũnnũẃ kãã hillaa Ibramw nã gɩ̀ sùɔ́gɩ nã, nã̀ã waa nǝ̃-yǝ wà: «Mǝ̃̀ ji hã ǹ huɔnbiiba nǝ̃ yiɛ gúɔ̀gɩ min.» Fɩraa-Dũnnũẁ mãã wù hílláa Ibramw nã, wú fǝ̃ǝ̃ ǹ-mã Dũnnũẁ siijãnsuɔdagǝ ǹ-ba wù jãn Fɩraa-Dũnnũw.

8 Nã̀ã fǝ̃ǝ̃ ǹ-suro gɩ̀ sùɔ́gɩ nã, ǹ-maar gùú sùɔ́guu mãã nǝ̃ tãnũnɲã, Betɛl lǝ'n bǝ̃ǝ̃'n pal'n yiɛgu, ǹ-kãã sa wù kuɔli, Betɛl lǝrɩ́ ba bǝ̃ǝ̃'n jãnɩm'n yiɛgu nǝ̃ Ayi lǝrɩ ba bǝ̃ǝ̃'n pal'n yiɛgu, nã̀ã fǝ̃ǝ̃ ǹ-mã Fɩraa-Dũnnũ siijãnsuɔdagǝ hlo, nã̀ã cirǝ̃ǝ̃ Fɩraa-Dũnnũw nã gɩ̀ sùɔ́gɩ nã, ǹ-be-yǝ wà: «Mǝ̃̀ tii.»

9 Nã̀ã fǝ̃ǝ̃ ǹ-tuu Negɛvɩ'n hlũũgu, ǹ-ba wù jiraa wù maar.

Ibramba nǝ̃ Sarayiba maarɩmmã Misɩra yiɛgu

10 Nũmdamã plǝ, mã́ kãã jãn gɩ̀ yiɛgɩ nã, Ibramẃ fǝ̃ǝ̃ ǹ-ta Misɩra yiɛgu ǹ-kãã jiraa ǹ-ce bãndaɲã gɩ̀ sùɔ́gɩ nã.

11 Bà gáa kuganãã Misɩra nũɔ̃gɩ nã, wú fǝ̃ǝ̃ ǹ-waa nǝ̃ wù ciɛ Sarayiw wà: «Sarayi! Mǝ̃̀ hṹɔ̃lã́ wà n fa fa,

12 Misɩra yiɛntaaba-ń ga da-n, bà ga waa wà mã́ã ciɛ-i nǝ̃-n, bà ga ko-m, nǝ̃ yíǹ ba nũmǝ̃nãw.

13 Yi-ń ga hi, ń waa nǝ̃-ba wà ǹ tǝ̃ǝ̃-i nǝ̃-m. Gɩ̀-lǝ gɩ̀ tammã, bà ga yaa-m, nã̀ã mǝ̃gaa ǹ-blǝ-m yíi cɔ̃mmã nã-i.»

14 Ibramẁ gáa hi Misɩra yiɛgu, Misɩra yiɛntaabá da wà wù ciɛw fa ǹ-car.

15 Misɩra yiɛntaa'n yuuntigǝ̃ngãw mãã bà be-yǝ Farawunã, wù sɩrǝǝsɩba yuntaadaabà gáa da-yǝ, bá fǝ̃ǝ̃ ǹ-kãã pĩĩ wù nã ǹ-ja-yǝ, bá fǝ̃ǝ̃ ǹ-ce bá kãã blǝ gɩ̀ cijalw ǹ-juo hã-yǝ nǝ̃-yǝ.

16 Gùú cɔ̃mmã nã-i, wú fǝ̃ǝ̃ ǹ-mǝ̃gaa ǹ-blǝ Ibramw, nã̀ã hã-yǝ nǝ̃ tũmba, wuramba, ninɲã nǝ̃ mããcieraaba, bibyanãã nǝ̃ canãã, kǝkũmlwɛba, nǝ̃ nǝ̃nũɔ̃nããba nǝ̃ ɲũgɔ̃minããba.

17 Nǝ̃ Dũnnũẃ fǝ̃ǝ̃ ǹ-juo piɛ ywarcindi Misɩra yuuntigǝ̃ngãw drɔ, bá nǝ̃ wù suɔntaa yo bà drɔ, Ibramw ciɛ Sarayi cɔ̃mmã nã.

18 Gùú nã-i, Misɩra yuuntigǝ̃ngãẃ fǝ̃ǝ̃ ǹ-be Ibramw ǹ-juo waa nǝ̃-yǝ wà: «Ǹ cíé-m danii gɩ̀ tammã? Danii ń ba ǹ sáa waa nǝ̃-m wà ǹ ciɛ-i!

19 Ǹ bla danii nã̀ã waa wà ǹ tǝ̃ǝ̃-i? Nã̀ã ya mǝ̃́ dii-yǝ nǝ̃ ciɛ. Ǹ ciɛ wɩ̀-i nnĩĩ! Tuu-yǝ ń ba ǹ maar!»

20 Nã̀ã fǝ̃ǝ̃ ǹ-waa nǝ̃ wù bluuba wà bá kãã hiil-yǝ nǝ̃ hlũũgu wú maar nǝ̃ wù ciɛw nǝ̃ wù nãkruɔɲinɲã min.