Cuu Dulli (Genèse) 11

Babɛl dopɩpuɔlaa'n cɔ̃mmã

Gɩ̀-lǝ gɩ̀ bǝ̃ǝ̃ntaabà yáá bà waa tammã dɩn-i.

2 Cwaabà jáa suro bà waaraa bà kã bǝ̃ǝ̃'n pal'n yiɛgu, ǹ-kãã da yiɛdagǝ bà be-gǝ Sineyar yiɛ, gɩ̀ sùɔ́gɩ nã, tãnũnɲã̀ sáá dàa, bá jiraa dàa gùú sùɔ́gu.

3 Nã̀ã fǝ̃ǝ̃ ǹ-waa nǝ̃ bà ɲĩɛ̃ wà: «Jówà yí mã jaabiiga, nǝ̃ yí mǝ̃gaa yí hyã-ga dǝ̃ǝ̃mã nã.» Bá fǝ̃ǝ̃ ǹ-tuu mǝ̃raa'n jaabiiga tɩntrã'n suɔnãw, nǝ̃ gudrɔ̃w ba jaar'n suɔnãw.

4 Bá waa nǝ̃ bà ɲĩɛ̃ wà: «Jówà yí mã lǝdarǝ nǝ̃ yí mã dopɩpuɔlaadagǝ, gɩ́ ba gɩ̀ jĩɛ̃ drɔkuɔlɩ nã, gɩ̀-lǝ gɩ̀ nã, yì yiirɩ ji hlǝ nǝ̃ yi báa ji da ǹ-gasǝraa cuu nã.»

5 Fɩraa-Dũnnũẃ hiirǝǝ ǹ-juo ne cwaabà yáá bà mã gùú lǝrii, nǝ̃ gùú dopɩpuɔlaaguu mãã.

6 Gɩ̀-i, wú waa wà: «Cwaabà mãã dũllɩ dɩndii nã̀ã ba bà waa tammã dɩnmã, gùú cíé bá du gúɔ́gɩ nã, mǝ̃-ń yaala bá ce gɩ́ tã, bà ji ba bà ce bà kusunã cɔ̃m'n dɩn-i, cɔ̃m'n síì ywar-ba hlo.

7 Yi ji hiirǝǝ ǹ-ga gaala bà cãwanĩɛ̃ga nã, ba báa ba bà nɔ̃ bà ɲĩɛ̃ tammã hlo.»

8 Fɩraa-Dũnnũẃ dii ǹ-gaala bà nã, bá buruɔ ǹ-ta cuu yanɲã min nã, lǝ'n mãllɩ́ bannã.

9 Fɩraa-Dũnnũẁ gáalá cwaa'n cãwanĩɛ̃ga nã gùú sùɔ́gɩ-i, bá ba bà sǝ̃n nɔ̃ bà ɲĩɛ̃ tammã. Gùú cíé bá suu gɩ̀ sùɔ́'n yiiri wà Babɛl lǝri. Cwaabà yáá gùú sùɔ́gɩ-i, nã̀ã ji pisɩrĩɛ̃ ǹ-baal cuu nã.

Vũnvãnãã'n yiriɛga, ǹ-tuu Sɛmw nã, ǹ-ga kra Ibramw nã

10 Sɛm nũɔ̃ntaa cɔ̃mmã-i nnĩĩ: Dɔkɩnkandɩ́ kaalaa, gɩ̀ biiga hǝ̃ǝ̃lnãw, Sɛmẃ huu pũmpɩrblɩ, ǹ-suu wù yiiri wà Arpasadɩ, gɩ̀-lǝ gɩ̀ nã, Sɛmẁ yáá nǝ̃ bii gundii-i (100).

11 Arpasadɩ huum'n furũũgɩ nã, Sɛmẃ ce bii tũndii gundii (500) hlo ǹ-da tãnkuuraadaba ǹ-pya nã hlo, nã̀ã fǝ̃ǝ̃ ǹ-ji ku.

12 Arpasadɩẁ jáa da bii gur nǝ̃ nũɔ̃sɔ̃ nǝ̃ gà ndiiga, wú huu pũmpɩrblɩ, ǹ-suu-yǝ wà Sela.

13 Sela huum'n furũũgɩ nã, Arpasadɩẃ ce bii tũndii nǝ̃ biiga siɛl (403) hlo, ǹ-da tãnkuuraadaba ǹ-pya nã hlo nã̀ã fǝ̃ǝ̃ ǹ-ji ku.

14 Selaẁ jáa da bii gur nǝ̃ nũɔ̃sɔ̃w, wú huu pũmpɩrblɩ ǹ-suu-yǝ Ebɛr.

15 Ebɛr huum'n furũũgɩ nã, Selaẃ ce bii tũndii nǝ̃ biiga siɛl (403), ǹ-da tãnkuuraadaba ǹ-pya nã hlo nã̀ã fǝ̃ǝ̃ ǹ-ji ku.

16 Ebɛrẁ jáa da bii gur nǝ̃ nũɔ̃sɔ̃ nǝ̃ gà nnǝ̃ǝ̃ga, wú huu pũmpɩrblɩ, ǹ-suu-yǝ Pɛlɛgɩ.

17 Pɛlɛgɩ huum'n furũũgɩ nã, Ebɛrẃ ce bii tũndii nǝ̃ bii gur nǝ̃ nũɔ̃sɔ̃ (430) ǹ-da tãnkuuraadaba ǹ-pya nã hlo nã̀ã fǝ̃ǝ̃ ǹ-ji ku.

18 Pɛlɛgɩẁ jáa da bii gur nǝ̃ nũɔ̃sɔ̃w, wú huu pũmpɩrblɩ, ǹ-suu-yǝ Erehuw.

19 Erehu huum'n furũũgɩ nã, Pɛlɛgɩẃ ce bii trãngwaahǝ̃ǝ̃l nǝ̃ bii densǝ (209), ǹ-da tãnkuuraadaba ǹ-pya nã hlo nã̀ã fǝ̃ǝ̃ ǹ-ji ku.

20 Erehuẁ jáa da bii gur nǝ̃ nũɔ̃sɔ̃ nǝ̃ gà hǝ̃ǝ̃lga, wú huu pũmpɩrblɩ, ǹ-suu-yǝ Serugu.

21 Erehuẃ ce bii trãngwaahǝ̃ǝ̃l nǝ̃ bii nɩrhǝ̃ǝ̃l (207), Serugu huum'n furũũgɩ nã, ǹ-da tãnkuuraadaba ǹ-pya nã hlo, nã̀ã fǝ̃ǝ̃ ǹ-ji ku.

22 Seruguẁ jáa da bii gur nǝ̃ nũɔ̃sɔ̃w, wú huu pũmpɩrblɩ, bá be-yǝ Nahɔr.

23 Nahɔr huum'n furũũgɩ nã, Seruguẃ ce bii trãngwaahǝ̃ǝ̃l (200), ǹ-da tãnkuuraadaba ǹ-pya nã hlo, nã̀ã ji fǝ̃ǝ̃ ǹ-ji ku.

24 Nahɔrẁ jáa da bii gur nǝ̃ densǝw, wú huu pũmpɩrblɩ, ǹ-suu-yǝ wà Tera.

25 Tera huum'n furũũgɩ nã, Nahɔrẃ ce bii gundii nǝ̃ bii nũɔ̃sɔ̃ nǝ̃ densǝ (119), ǹ-da tãnkuuraadaba ǹ-pya nã hlo nã̀ã fǝ̃ǝ̃ ǹ-ji ku.

26 Teraẁ jáa da bii gwasiɛl nǝ̃ nũɔ̃sɔ̃w, wú huu pũmpɩrbiiba siɛl, Ibramw, Nahɔrw, nǝ̃ Harãw.

27 Tera nũɔ̃ntaa'n cɔ̃mmã-i nnĩĩ: Ibramw, Nahɔrw, nǝ̃ Harãw. Harãẃ juo huu Lɔtɩw.

28 Harãẃ juo ku nã̀ã hã wù tǝw. Wù kúú Uur lǝrɩ-i wù húulá gùú sùɔ́guu mãã, Kalde yiɛgu.

29 Ibramẃ juo taa Sarayiw, nǝ̃ Nahɔrẃ taa Harã bisĩɛ̃ Milkaw. Harã biɛẁ yáá nǝ̃ Isɩka yo.

30 Sarayiẁ yáá wùu ĩɛ̃, wù sáá nǝ̃ tãnkuur.

31 Teraẃ kãã suro Uur lǝri, Kalde yiɛgu, nǝ̃ wù bíɛ́ Ibramw, nǝ̃ wù bíɛ́ Harã bíɛ́ Lɔtɩw, nǝ̃ wù bíɛ́ Ibramã ciɛ Sarayiw, ǹ-ta bà maar Kanãã yiɛgu. Bà gáa hi Harã lǝri bá jiraa dàa.

32 Teraẃ ce bii trãngwaahǝ̃ǝ̃l nǝ̃ biiga ndii-i (205) nã̀ã fǝ̃ǝ̃ ǹ-ku dàa Harã lǝri.