Cuu Dulli (Genèse) 8

Nũhũẁ hlǝ batow nã

Nǝ̃ Dũnnũẁ sáa sĩĩnǝ̃ǝ̃ Nũhũ nã nǝ̃ kwasǝnɲinɲã min mãã ɲã̀ yáá dàa batow kusunã. Dũnnũẃ juo suro saluudagǝ gɩ́ ba gɩ̀ fiir hũm mã́ã̀, mã́ ba mã̀ furuɔ.

2 Ɲũũrũũhũm'n sɔsǝri, nǝ̃ drɔkuɔl yo, dɩ́ juo suu. Duɔgɩ́ fǝ̃ǝ̃ ǹ-kaalaa.

3 Yuu wo yuu, kuugɩ́ ba gɩ̀ hlǝ hũmmã nã. Bãn gwãntrahǝ̃ǝ̃l nǝ̃ bãn nũɔ̃sɔ̃nã yuugu, hũmmã furuɔ.

4 Hirasǝ nɩrhǝ̃ǝ̃lnã bãn nũɔ̃sɔ̃ nǝ̃ nɩrhǝ̃ǝ̃lnã yuugu, batoẃ juo hiraa Araratɩ tãnũũdagǝ drɔ. Gɩ̀ yiɛgu, tãnũnɲã̀ yáá ɲã̀ã bũũ.

5 Hũmmã́ ba mã̀ furuɔ fuwɔ ǹ-ji hi hirasǝ nũɔ̃sɔ̃nãw. Gɩ̀ hiraa'n yudĩɛ̃lããgu, tãnũn'n yunɲã́ curuɔ.

6 Bãn gwaahǝ̃ǝ̃lẁ jáa suu, Nũhũẁ yáá wùu hiil gùú flãntiɛrw mãã batow nã, wú fǝ̃ǝ̃ ǹ-cugur-yǝ.

7 Wú hiil uɔ-uɔw, wú ba wu-ń ce wú maar ǹ-ga waaraa nã̀ã ver ǹ-jo, nǝ̃ hũmmã ji da mã́ fo ǹ-baal ɲũũrũũgu.

8 Wú fǝ̃ǝ̃ ǹ-juo hiil tǝbuhũɔ̃rũɔ̃w, wà wú kãã ne hũmmã-ń ba mã̀ã fo ǹ-tã.

9 Tǝbuhũɔ̃rũɔ̃ẃ maar, wù sáa ga da wanyaam'n sùɔ́. Hũmmã̀ yáá mã̀ã ɲũũrũũ sɔnɲã min. Wú ver ǹ-jo Nũhũ nãã batow kusunã, wú hiil wù nãkruɔgu ǹ-blǝ ǹ-dii-yǝ.

10 Wú ya bãn nɩrhǝ̃ǝ̃lw ta, nã̀ã fǝ̃ǝ̃ ǹ-hiil tǝbuhũɔ̃rũɔ̃w hlo.

11 Dɩndǝ̃mbǝ̃ǝ̃gu, hũɔ̃rũɔ̃ẃ ver ǹ-jo Nũhũ nãã, nǝ̃ Olivie tuu'n pɩpɩrǝ̃birĩɛ̃gu wù nũɔ̃gɩ nã. Gɩ̀-lǝ gùú gáa ce Nũhũẃ fǝ̃ǝ̃ wà hũmmã fúrúɔ ɲũũrũũgu.

12 Wú ya gɩ́ ce bãn nɩrhǝ̃ǝ̃l hlo, nã̀ã hiil tǝbuhũɔ̃rũɔ̃ẃ maar, wù sáa ga ver ǹ-jo wù nãã hlo.

13 Nũhũẁ díɛ́ bii tũndii trãngwaahǝ̃ǝ̃l nǝ̃ dɩ̀ dɩndii (601) gùú nã, gɩ̀ hiradĩɛ̃lũũ'n yudĩɛ̃lããgu, hũmmã́ fo ǹ-baal ɲũũrũũgu. Nũhũẃ fǝ̃ǝ̃ ǹ-cugur bato cugǝǝgu, ǹ-ne ǹ-da hlɔ̃mmãã min mã̀ã kuul.

14 Hirasǝrɩ hǝ̃ǝ̃lnã bãn gur nǝ̃ nɩrhǝ̃ǝ̃l yuugu, ɲũũrũũgɩ́ kuul ǹ-baal.

15 Gùú nã-i, Dũnnũẃ waa nǝ̃ Nũhũw:

16 «Hlǝ batow nã, ɲi nǝ̃ ǹ ciɛ yo, nǝ̃ ǹ byanããba nǝ̃ bà canããba min nã.

17 Ciɛl nũmǝ̃nãɲinɲã min mãã batow nã: kwasǝnɲinɲã nǝ̃ diɛrnɲin yo, nǝ̃ baafuulǝbaba min, bá huu ǹ-ɲũrũɔ̃ dugɔ, ǹ-buruɔ cuu sɔnɲã min nã.»

18 Nũhũẃ hlǝ bá nǝ̃ wù ciɛw, nǝ̃ wù byanããba nǝ̃ bà canããba min.

19 Kwasǝnɲin yo, ɲã́ hlǝ, diɛrnɲinɲã nǝ̃ baafuulǝbaba, pla pla.

20 Nũhũẃ mã Dũnnũ siim'n sùɔ́dagǝ, nã̀ã blǝ kwasǝnɲinɲã nǝ̃ diɛrnɲinɲãã mãã bà ji gbǝ̃ǝ̃ ǹ-jãn-yǝ nǝ̃-ɲã, ɲã̀ denden, ǹ-jãn Fɩraa-Dũnnũw nǝ̃ gùú siimãã mãã bà ye-mã nǝ̃ yellɩ nã.

21 Wù gáa dii gɩ̀ siimãã ǹ-ba wù ye-mã dǝ̃ǝ̃mã nã, mã̀ hũũdudwaluugɩ́ kãã hi Fɩraa-Dũnnũw, wú waa wà: «Mǝ̃̀ síì piɛ mǝ̃̀ nãkrɔbɩblaagu hlɔ̃mmã nã, cwaa'n cɔ̃mmã nã hlo, halle ba-ń ba bà ce gaabɩbliɛga bà tãnkuurammã nã dìi. Mǝ̃̀ síì guu cuu ɲinɲã nã nnĩĩba tammã hlo.

22 Hlɔ̃mmã-ń ba dìɛ-lǝ, dũmmã̀ ji ba mã̀ dũũ nã̀ã ba mã̀ tɩgii, vuvǝ̃ǝ̃mã nǝ̃ yɔgà ji ba dìɛ, hubǝ̃ǝ̃gu nǝ̃ hufyallɩ̀ ji ba dìɛ, bǝ̃ǝ̃nãgu nǝ̃ yisuɔgɩ̀ ji ba dìɛ.»