Cuu Dulli (Genèse) 7

Dɔkɩnkan'n cɔ̃mmã

Fɩraa-Dũnnũẃ waa nǝ̃ Nũhũw: «Cuu wáà taaba sǝ̃ǝ̃nã, mǝ̃̀ sáa da curo yà sũɔ̃l nã́ã́ yíi sǝ. Suro ń jãn batow nã, ɲí nǝ̃ ǹ suɔntaaba.

2 Blǝ kwasǝnɲinɲãã mãã ǹ ji gbǝ̃ǝ̃ ǹ-jãn-m nǝ̃-ɲã, lwɛ nɩrhǝ̃ǝ̃l, nǝ̃ nǝ̃nũɔ̃nãã nɩrhǝ̃ǝ̃l, nǝ̃ ń blǝ ɲã̀ã́ mãã ǹ síì gbǝ̃ǝ̃ ǹ-jãn-m nǝ̃-ɲã, lɔw dɩn, nǝ̃ nǝ̃nũɔ̃nw dɩn.

3 Nǝ̃ ń blǝ drɔdiɛrnɲin yo, plaaga min, lwɛba nǝ̃ nǝ̃nũɔ̃nããba nɩrhǝ̃nhǝ̃l. Gɩdagǝ'n dũllɩ báa ji guu nã.

4 Ǹ-tuu jimãã nã, bãn nɩrhǝ̃ǝ̃l, mǝ̃̀ ji ce duɔgɩ nɔ̃ bãn gwaahǝ̃ǝ̃l nǝ̃ yisɔsǝ gwaahǝ̃ǝ̃l kusuugɩ nã. Mǝ̃̀ nǝ̃́ǝ̃lã́ gùú nũmǝ̃nãɲinɲãã mãã, mǝ̃̀ ji guu ɲã̀ min nã.»

5 Fɩraa-Dũnnũẁ wáalá cɔ̃m wo cɔ̃m nǝ̃ Nũhũw, wú ce mã̀ min.

6 Nũhũẁ yáá nǝ̃ bii tũndii trãngwaahǝ̃ǝ̃lw-i (600), dɔkɩnkan'n jol'n bǝ̃ǝ̃gu cuu nã.

7 Wú jãn batow nã nǝ̃ wù ciɛw, nǝ̃ wù byanããba, bá nǝ̃ bà canããba min, hũmmã báa ji tuu-ba.

8 Kwasǝnɲinɲãã mãã bà ji gbǝ̃ǝ̃ ǹ-jãn Dũnnũẁ nǝ̃-ɲã, nǝ̃ ɲã̀ã́ mãã bà síì gbǝ̃ǝ̃ ǹ-jãn Dũnnũẁ nǝ̃-ɲã, nǝ̃ diɛrnɲinɲã nǝ̃ baafuulǝbaba,

9 ɲã̀ min ɲã́ juo jãn batow nã, Nũhũw tuɔra, ɲã̀ hǝ̃nhǝ̃l, nã́ã́ Dũnnũẁ mãã wù yáá wùu waa-dǝ nǝ̃ Nũhũw gùú tammã.

10 Bãn nɩrhǝ̃ǝ̃lẁ jáa suu, dɔhũmmã́ juo suu cuu nã.

11 Gùú blɩrii mãã Nũhũ díɛ́ bii tũndii trãngwaahǝ̃ǝ̃lw (600), gɩ̀ hyarsǝrɩ hǝ̃ǝ̃lnã, bãn nũɔ̃sɔ̃ nǝ̃ nɩrhǝ̃ǝ̃l yuugu, hũmmã́ du nã ǹ-ba mã̀ juu mã̀ hlǝ ɲũũrũũ hũm'n sɔnɲã min nã. Drɔkuɔl yo, dɩ́ cugur, hũmmã́ ba mã̀ tũnũũ.

12 Duɔgɩ́ nɔ̃ cuu nã, ǹ-ji da bãn gwaahǝ̃ǝ̃l, nǝ̃ yisɔsǝ gwaahǝ̃ǝ̃l.

13 Gùú yuugɩ-i, Nũhũẁ jã́nnã́ batow nã nǝ̃ wù ciɛw, nǝ̃ wù byanããba, Sɛmw, Kamw nǝ̃ Safɛtɩw nǝ̃ wù byanãã'n canããba siɛlba.

14-15 Ǹ-tuu kwasǝnɲin'n plaaga min, jerbɩganããba, suɔnbɩganããba, baafuulǝbaba, fuwɔ ǹ-ga kra diɛrnɲinɲã nã, bá ba bà jo bà jãn bà hǝ̃nhǝ̃l, Nũhũ drɔ,

16 lɔ nǝ̃ nǝ̃nũɔ̃n, nã́ã́ Dũnnũẁ yáá wùu waa-dǝ nǝ̃-yǝ gùú tammã. Bà gáa jãn ǹ-tã gùú nã, Fɩraa-Dũnnũẃ suu fieri nǝ̃ wù hla.

17 Duɔgɩ́ juo nɔ̃ bãn gwaahǝ̃ǝ̃l. Hũmmã́ juo yu ǹ-ba mã̀ yuguraa nǝ̃ batow min.

18 Hũmmã ga juo ɲũrũɔ̃ fuwɔ batow ji diɛ ǹ-ba wù waaraa.

19 Hũmmã́ ba mã̀ yuguraa fuwɔ ǹ-ji suu tãndɩdaalanɲã min yunɲã nã cuu nã.

20 Hũmmãã nǝ̃n yáá gɩ̀ tãnũn'n yunɲã nã, mã̀ haarɩmmã yáá nãkrɔgban ywargǝ-i.

21 Nũmǝ̃nãɲinɲã min nǝ̃n yáá cuu nã: diɛrnɲinɲã, kwasǝnɲinɲã, baafuulǝbaba, halle cwaa yo, bà min bá guu nã.

22 Nũmǝ̃nãɲinɲã min nǝ̃n yáá cuu nã, ɲã̀ min ɲã́ kurǝǝ ǹ-baal.

23 Nũmǝ̃nãɲinɲãã nǝ̃n yáá cuu nã, Fɩraa-Dũnnũẃ guu ɲã̀ min nã. Cwaa wo, kwasǝnɲin wo, baafuulǝba wo, ǹ-ga kra drɔdiɛrnɲinɲã nã. Nũhũw, nǝ̃ bàá nǝ̃n yáá batow kusunã, bàá dɩn, bá yanãã.

24 Hũmmã́ juo yu ǹ-ba cuu nã ǹ-ji da bãn gwãntrahǝ̃ǝ̃l nǝ̃ bãn nũɔ̃sɔ̃.