Cuu Dulli (Genèse) 6

Nũhũ bato mãl'n cɔ̃mmã

Cwaabà jáa ba bà ɲũrũɔ̃ cuu nã, nã̀ã juo ba bà huu cicabiiba,

2 gɩ̀-i, Dũnnũ cwaadabá wa bisii báàbá fla ǹ-car, bá fǝ̃ǝ̃ ǹ-juo ce bà min mãã bà cɔ̃mmã dwállá bà nã, bá ba bà canãã.

3 Gɩ̀-i, Fɩraa-Dũnnũẃ fǝ̃ǝ̃ ǹ-waa wù kusuugɩ nã wà: «Yindiɛgu, mǝ̃̀ díilá gùú Yuflǝw curow nã nǝ̃ wú ba nũmǝ̃nãw, mǝ̃̀ síì ya wù maa bii gundii nǝ̃ bii guuri wù saa. Wù mãã cãnkũɔ̃mã wù ji ba wù ku.»

4 Gùú bǝ̃ǝ̃guu yáá cokukuraabà yáá dìɛ cuu nã. Bà-lǝ bàá yáá gɩ̀ bǝ̃ǝ̃'n ciciɛnããba, bà yiriɛgàa hlǝ. Dũnnũ cwaadaba yáá bàa taa cwaa'n bisiiba ǹ-huu-ba. Bà dũllɩ̀ hǝ̃́ǝ̃sǝ́ cuuw nã nã̀ã ji da dɩ́ guu nã.

5 Fɩraa-Dũnnũẃ da wà cwaa'n gaacĩɛ̃yaga jáa ba gà ɲũrũɔ̃ ǹ-car, nǝ̃ ba-ń jiraa yuu wo yuu, bá ba bà kãn diibɩblaari dɩn.

6 Gɩ̀ cɔ̃mmã́ ca Fɩraa-Dũnnũw nã, fuwɔ wú ba wù ne wà wu nã́ã̀ báa nǝ̃ǝ̃ curow cuu nã.

7 Gùú nã-i, wú fǝ̃ǝ̃ ǹ-waa wà: «Mǝ̃̀ nǝ̃́ǝ̃lã́ gùú curow mãã, mǝ̃̀ ji hiil-yǝ cuu nã, ǹ-tuu curow nã, ǹ-ga ta kwasǝnɲinɲã nã, ǹ-ga hlǝ baafuulǝbaba nã, ǹ-ga kra diɛrnɲinɲã nã. Mǝ̃̀ jáa ba mǝ̃̀ ne wà mǝ̃ nã́ã̀ báa nǝ̃ǝ̃-ɲã.»

8 Nǝ̃ Nũhũ-lǝ, Fɩraa-Dũnnũẃ ne wù yiɛgu.

9 Nũhũ nũɔ̃ntaa'n cɔ̃mmã-i nnĩĩ: Nũhũw, cosũɔ̃lyǝ yáá, wù sáá wù ce cɔ̃ncĩɛ̃m wù bǝ̃ǝ̃ntaaba sǝ̃ǝ̃nã, nã̀ã ba yà sũɔ̃l Dũnnũ hlũũgɩ nã.

10 Wú juo huu pũmpɩrbiiba siɛl: Sɛmw, Kamw, nǝ̃ Safɛtɩw.

11 Gɩ̀ bǝ̃ǝ̃gu, cuuẁ yáá wùu bǝ̃ǝ̃lǝ̃ǝ̃ ǹ-car. Hyadũgaaciega dɩndɩn yáá gàa yu-yǝ.

12 Dũnnũẁ gáa ne cuuw ǹ-da yà bǝ̃ǝ̃lǝ̃ǝ̃ ǹ-car, cwaaba min bà ce gaabɩbliɛga sɔnɲã min,

13 gùú nã-i, Dũnnũẃ waa nǝ̃ Nũhũw wà: «Cwaabà jáa bǝ̃ǝ̃lǝ̃ǝ̃ cuu nã nǝ̃ hyadũgaaciega, mǝ̃̀ ji guu wù nã nǝ̃ bàá yo bà min nã.

14 Tuu dagbǝ̃ǝ̃gǝgu, ń mǝ̃gaa batokɩnkandi, nǝ̃ ń buruɔ wù kusuugɩ nã, nǝ̃ ń tuu kuuguu mãã nã́ã́ virɲin-i ń tĩĩ wù kusuugu nǝ̃ wù furũũ yo.

15 Nǝ̃ ń ce wù daamã bà nãkrɔgban gundii bà siɛl, wù hanãmmã nãkrɔgban gwaahǝ̃ǝ̃l nǝ̃ nũɔ̃sɔ̃ wù haarɩmmã bà nãkrɔgban gur nǝ̃ nũɔ̃sɔ̃.

16 Ce bato wáà, ń suguraa wù nã kusunɲã siɛl: taarakuugu, sǝ̃ǝ̃nãkuugu, nǝ̃ drɔkuugu. Nǝ̃ ń ya sɔhlaagɩ́ ba nãkrɔgbaagɩ dɩn, gɩ̀-lǝ gɩ́ ba flãntiɛrw. Nǝ̃ ń fǝ̃ǝ̃ ń sa cugǝǝgu, ń suu wù yuugɩ nã. Nǝ̃ ń hiil dũndɔ̃lli bato gbɩgaagɩ nã.

17 Nǝ̃-ń ce dɩ̀-lǝ ǹ-tã, mǝ̃n ga tĩɛ̃ dɔkɩnkandarǝ dɩ́ jo cuu nã, ǹ-ji ko ǹ-baal nũmǝ̃nãɲinɲã min, ɲũũrũũɲinɲã min ɲã́ kurǝǝ ǹ-baal.

18 Nǝ̃ yíǹ-lǝ, mǝ̃̀ ji ce yí ɲũɔ̃ twammã nǝ̃-n, cɔ̃m'n síì hi-n, ǹ ji jãn batow nã, ɲí nǝ̃ ǹ ciɛw nǝ̃ ǹ byanãã yo bá jãn curo wo curo nǝ̃ wù ciɛw.

19 Nǝ̃ ń dii kwasǝnɲin'n plaaga min gà hǝ̃nhǝ̃l, lɔw nǝ̃ nǝ̃nũɔ̃nw ɲí da ǹ-ba nũmǝ̃nãw ɲì min nã.

20 Nũmǝ̃nãɲin'n plaaga min gà ga jo ǹ nãã ɲì hǝ̃nhǝ̃l, lɔ nǝ̃ nǝ̃nũɔ̃nw: diɛrnɲinɲã min nǝ̃ kwasǝnɲinɲã, ǹ-ga kãã hi baafuulǝbaba nã, ba báa ji da ǹ-kurǝǝ.

21 Tuu wuur'n plaaga min ń jãn nǝ̃-ga batow nã, ɲi ga ba ɲì wuu, nã̀ã ba ɲì hã kwasǝnɲin yo ɲã́ ba ɲã̀ wuu.»

22 Fɩraa-Dũnnũẁ wáalá cɔ̃m wo cɔ̃m nǝ̃ Nũhũw, wú ce mã̀ min nĩĩgu.