Cuu Dulli (Genèse) 4

Kayɛ̃ba nǝ̃ Abɛl cɔ̃mmã

Hawabà gáa fǝ̃ǝ̃ bà ɲĩɛ̃ nǝ̃ wù blaw, wú tuu kusuugu, ǹ-huu Kayɛ̃w, nã̀ã waa wà: «Fɩraa-Dũnnũẁ cíé mǝ̃́ da pũmpɩrblɩ.»

2 Gɩ̀ furũũgɩ nã, wú juo huu Kayɛ̃ hǝ̃ǝ̃ Abɛlw. Abɛlẃ juo ba tũnciir, nǝ̃ Kayɛ̃ẃ ba secierw.

3 Kayɛ̃ẁ gáa tɩgɩnǝ̃ǝ̃ wù dũmmã nã, wú hiil mãdamã ǹ-kãã jãn Fɩraa-Dũnnũw nǝ̃-mã.

4 Abɛl yo, wú jãn-yǝ nǝ̃ wù tũmbiibaa mãã baadĩɛ̃lããba, nã̀ã hiil nɔ̃m'n ɲinɲã ǹ-hã-yǝ. Fɩraa-Dũnnũẃ blǝ Abɛl siimã.

5 Nǝ̃ wù sáa blǝ Kayɛ̃ mǝ̃gãmmã, Kayɛ̃ hiɛgá dũ ǹ-car, wù yigagɩ́ ɲǝ̃ǝ̃.

6 Fɩraa-Dũnnũẃ waa nǝ̃ Kayɛ̃w: «Bii cíé ǹ hiɛgá dũ? Ǹ bla danii ń ɲǝ̃ǝ̃ ǹ yigagu?

7 Sulammã nã, nǝ̃-ń mǝ̃gaa ǹ-blǝ ǹ hla nã, ǹ yuugɩ̀ ji ciir. Nǝ̃-ń ba ǹ sáa mǝ̃gaa ǹ-blǝ ǹ hla nã, diicĩɛ̃rǝ'n kwãmmã́ nàa mã̀ dǝ̃ǝ̃-n ǹ dũndɔ̃lnũɔ̃gɩ nã, mã̀ caa mã ji blǝ-n. Nǝ̃ yíí, gbǝ̃ǝ̃ ń hi mã̀ nã.»

8 Yuudagǝ, Kayɛ̃ẃ waa nǝ̃ wù hǝ̃ǝ̃ Abɛlw: «Ji ta fugagɩ nã!» Bà gáa hi fugagu, Kayɛ̃ẃ du wù hǝ̃ǝ̃ Abɛlw nã, ǹ-mũũ ǹ-ko-yǝ.

9 Gùú nã-i, Fɩraa-Dũnnũẃ fǝ̃ǝ̃ ǹ-yugu Kayɛ̃w wà: «Ǹ hǝ̃ǝ̃ Abɛl wɩ̀-i haa-i?» Kayɛ̃ẃ siɛ-yǝ wà: «Mǝ̃̀ sáa fǝ̃ǝ̃! Mã́ã náalá mǝ̃́ ba mǝ̃̀ cii wù nã-ì?»

10 Fɩraa-Dũnnũẃ waa nǝ̃-yǝ wà: «Ǹ cíé bii nnĩĩ-lǝ? Ǹ hǝ̃ǝ̃'n twammãã mãã ɲũũrũũgu, mã̀ kaaluugɩ́ nìɛ gɩ̀ jo gɩ̀ hi-m.

11 Mǝ̃̀ ji piɛ mǝ̃̀ nãkrɔbɩblaagu ǹ drɔ. Ǹ tṹnṹũ ǹ hǝ̃ǝ̃ twammã nã, ǹ-hã gùú hlɔ̃mmãã mãã mã́ ɲũɔ̃, mǝ̃̀ ji ɲǝ̃ǝ̃ ǹ-hiil-n gɩ̀ hlɔ̃mmã nã gùú twam'n cɔ̃mmã nã-i.

12 Ǹ ji ba nǝ̃-ń kɔ̃ fugagu, kuu'n síì fa ǹ saa. Nǝ̃ ń ba ǹ vyannãcurow, ǹ síì gbǝ̃ǝ̃ ǹ-jiraa sùɔ́gɩ dɩn.»

13 Kayɛ̃ẃ waa nǝ̃ Fɩraa-Dũnnũw: «Ǹ mãã ǹ piɛ gùú ywaruuguu mãã mǝ̃̀ drɔ, gɩ̀ dɩ́sɩrǝ́ǝ mǝ̃̀ nã ǹ-car.

14 Ne! Nǝ̃-ń juo ɲǝ̃ǝ̃ ǹ-hiil-m hlɔ̃nfɩnfam mã́ã̀mã̀ nã jimããgu, gɩ́ nǝ̃ nã́ã́ n ɲǝ̃́ǝ̃lã́ ǹ-pyar-m ǹ hla nã-i. Mǝ̃̀ ji ba vyannãcurow, nã̀ã ba mǝ̃̀ síì gbǝ̃ǝ̃ ǹ-jiraa sùɔ́gɩ dɩn, gùú tii nǝ̃n jal nǝ̃-m wù ji gbǝ̃ǝ̃ ǹ-ko-m.»

15 Fɩraa-Dũnnũẃ waa nǝ̃-yǝ wà: «Curo wo curo mãã wù ji mũũ ǹ-ko-n, mǝ̃̀ ji hiil mǝ̃̀ mããjaamã yin nɩrhǝ̃ǝ̃l gɩ̀ tii nã.» Fɩraa-Dũnnũẃ nɩsɩ Kayɛ̃ nã, curow-ń jal nǝ̃-yǝ, nã̀ã da-gǝ, wu báa ko-yǝ.

Kayɛ̃ nũɔ̃ntaa'n cɔ̃mmã

16 Kayɛ̃ẃ ta ǹ-hal Fɩraa-Dũnnũw tuɔra, ǹ-kãã ba sùɔ́guu mãã bà be-gǝ wà Nɔdɩ, Edɛ̃n bǝ̃ǝ̃'n pal'n yiɛgu.

17 Kayɛ̃bà gáa fǝ̃ǝ̃ bà ɲĩɛ̃ nǝ̃ wù ciɛw, wù ciɛ tuu kusuugu, ǹ-juo huu pũmpɩrblɩ, wù suu-yǝ wà Enɔkɩ. Kayɛ̃ẃ juo mã lǝdarǝ, ǹ-suu-dǝ nǝ̃ wù bíɛ́'n yiiri wà Enɔkɩ.

18 Enɔkɩẃ juo suro ǹ-huu Iradɩw, Iradɩẃ juo huu Mehuyahɛlw, Mehuyahɛlẃ juo huu Metukayɛlw, Metukayɛlẃ juo huu Lemɛkɩw.

19 Lemɛkɩẁ jáa suro, wú taa canããba hǝ̃ǝ̃l. Wuudĩɛ̃lw Ada, wudiɛw Siila.

20 Adaẃ juo huu Yabalw. Wanciinããbaa mãã jiraa bà waaraa, bàá tǝvũnvũɔ̃w wɩ̀-i nǝ̃ Yabalw.

21 Yabal hǝ̃ǝ̃w bà yáá bà be-yǝ wà Yubal. Wùú jáa ba fyãhulǝǝba, nǝ̃ tomǝ̃ǝ̃lǝ̃ǝ̃'n tǝvũnvũɔ̃w.

22 Siila yo, wú juo huu pũmpɩrblɩ, bá suu wù yiiri wà Tubal-Kayɛ̃. Wùú yáá flãbiɛw, wù kul kwaɲinɲã yindagǝ nã kwabyãr'n ɲinɲã. Wù-lǝ wù tǝ̃ǝ̃ yáá bà be-yǝ Nããmã.

23 Yuudagǝ, Lemɛkɩẃ juo hyar hlǝ̃ǝ̃ gúɔ̀, ǹ-waa nǝ̃ wù canããba: «Ada, Siila, nṹwã̀ ɲí hã-m! Lemɛkɩ canãã, jǝ̃́ǝ̃lã̀ ɲì tɔ̃nɲã ɲí nɔ̃ mǝ̃̀ cãwandi. Gùú tii nǝ̃n mũũ-m, mǝ̃̀ ko-yǝ, nǝ̃ halle tãnkuurw-ń cor-m mǝ̃̀ ko-yǝ.

24 Cwa nɩrhǝ̃ǝ̃l nǝ̃n ba wù saa wú ko ǹ-hiil Kayɛ̃ wuɔlw, cwa gwasiɛl nǝ̃ nũɔ̃sɔ̃ nǝ̃ nɩrhǝ̃ǝ̃l sáalà wú ko ǹ-hiil mǝ̃̀ wuɔlw.»

25 Adɩmãbá juo huu pũmpɩrblɩdiɛ hlo bá nǝ̃ wù ciɛ Hawaw. Hawaẃ suu wù yiiri wà Sɛtɩ. Nã̀ã waa wà: «Kayɛ̃ẁ yáá wùu ko Abɛlw, Dũnnũẁ jáa hã-m nǝ̃ pũmpɩrblɩdiɛ, mǝ̃́ dii wùú sùɔ́ nã wɩ̀-i.»

26 Sɛtɩ yo, wú juo huu pũmpɩrblɩdiɛ ǹ-suu-yǝ wà Enɔsɩ. Cwaabà dúú nã bà bũũ Dũnnũw gùú nã-i, ǹ-ba bà be-yǝ wà mǝ̃̀ Tii.