Cuu Dulli (Genèse) 3

Curo'n diicĩɛ̃rǝdĩɛ̃lããrǝdi

Fɩraa-Dũnnũẁ yáá wùu nǝ̃ǝ̃ gùú jerbɩganããba, waalẁ yáá wù fǝ̃ǝ̃rǝ̃ǝ̃ ǹ-ɲǝ̃ǝ̃ bà min. Yuudagǝ, waalẃ yugu cijalw wà: «Nã́ã́ sulam-iì wà Dũnnũw wáalá wà ɲi báa wuu nãnkuɔtur díɛ̀ dɩ̀ tubikuu'n blɩ gbal wa?»

2 Cijalẃ waa nǝ̃ waalw wà: «Yi ji gbǝ̃ǝ̃ ǹ-wuu nãnkuɔtur'n tubiɲin'n biiga.

3 Nǝ̃ tubikuuguu mãã nãnkuɔtur'n sǝ̃ǝ̃gɩ nã, Dũnnũẁ wáalá wà gɩ̀ sǝ̃n saa yí wuu gɩ̀ blɩri, gɩ̀ sǝ̃n saa yí jĩɛ̃ dɩ̀ nã yo. Yi-ń hla nã̀ã ce-dǝ, yi ji kurǝǝ.»

4 Waalẃ waa nǝ̃ cijalw wà: «Kwasǝ-i dɛ! Ɲi síì kurǝǝ!

5 Dũnnũẁ fǝ̃́ǝ̃lã́ wà gùú yuuguu mãã ɲi-ń wuu tubikuu gúɔ̀gɩ blɩri, ɲì yinɲã ji cugurǝǝ, ɲí ba wùú tammã ǹ-ba ɲì fǝ̃ǝ̃ diifɩnfaari ǹ-pyariɛ diibɩblaarɩ nã.»

6 Cijalẃ ne wà tubikuu'n biigà fa nellɩ nã, ga ji dwal wuum yo mã̀ nã, nã̀ã ba gà ji hã-yǝ nǝ̃ cɔ̃nfǝ̃ǝ̃gǝgu. Wú jar tubikuu'n blɩdarǝ ǹ-wuu, nã̀ã hã wù blaẁ yáá wù tuɔra, wùú yo, wú wuu.

7 Cwaaba hǝ̃ǝ̃lba min bà yinɲã́ cugurǝǝ, bá da wà bá nǝ̃ turkwɛ-i. Gɩ̀-i, bá jar figietuu'n pɩpɩrãnɲã ǹ-ɲǝ̃gãr-ɲã ǹ-ce pɩrãnɲã ǹ-hyã.

8 Bãsɩrãgǝgɩ nã, bá nɔ̃ Fɩraa-Dũnnũw yà juo ba wù waaraa nãnkuɔtuurɩ nã. Biɛw, bá nǝ̃ wù ciɛw, bá sɔ̃ ǹ-ŋmǝ̃ǝ̃rǝ̃ǝ̃ nãnkuɔtur'n tubiɲinɲã nã.

9 Fɩraa-Dũnnũẃ be biɛw ǹ-yugu-yǝ wà: «Ń nàa haa-ì?»

10 Biɛẃ waa nǝ̃-yǝ wà: «Mǝ̃̀ nṹɔ̃́ ǹ yallɩ nã nãnkuɔtuurɩ nã, nǝ̃ mǝ̃̀ mãã nǝ̃ turkwaari, gbǝrsǝrɩ́ blǝ-m, mǝ̃́ ŋmǝ̃ǝ̃rǝ̃ǝ̃.»

11 Dũnnũẃ yugu-yǝ wà: «Halii wáalá nǝ̃-n wà ń nǝ̃ turkwar-ì? Mǝ̃̀ ɲǝ̃́ǝ̃lã́-n wà n báa wuu gùú tubikuu'n blɩrii mãã, nã́ã́ n sáa wuu dìí sǝ-ì?»

12 Biɛẃ waa nǝ̃-yǝ wà: «Ǹ hlã-m nǝ̃ gùú ciɛw mãã, wùú hlã-m nǝ̃ tubikuu'n blɩ díɛ̀ mǝ̃́ wuu.»

13 Fɩraa-Dũnnũẃ waa nǝ̃ cijalw wà: «Ǹ cíé bii nnĩĩ-lǝ?» Wú waa nǝ̃-yǝ wà: «Waalẁ vúulá-m, mǝ̃́ wuu-dǝ.»

14 Gɩ̀-lǝ gɩ̀-i, Fɩraa-Dũnnũẃ waa nǝ̃ waalw wà: «Ǹ mãã ǹ cíé dɩ̀-lǝ, suɔnbɩganããba nǝ̃ jerbɩganããba min sǝ̃ǝ̃nã, mǝ̃̀ ji piɛ mǝ̃̀ nãkrɔbɩblaagu yíi drɔ-i. Ǹ ji ba ǹ fuulǝǝ ǹ kusuugɩ nã, nã̀ã ba ǹ mũɔ̃ hlɔ̃mmã fuwɔ n ji ta ǹ ga ku.

15 Mǝ̃̀ ji dii ɲããsǝri ɲì sǝ̃ǝ̃gɩ nã nǝ̃ cijalw, nã̀ã dii-dǝ ǹ honããgu nǝ̃ cijal'n honãã'n sǝ̃ǝ̃gɩ nã. Wù honãã'n nũɔ̃ntaabà ji ba ba-ń da-n, bá ca ǹ-mũũraa ǹ yuugɩ nã, yíi yo, nǝ̃-ń hi bà nũɔ̃ntiidiɛ, ń duu wù viɛgu.»

16 Dũnnũẃ waa nǝ̃ cijalw wà: «Mǝ̃̀ ji ce-n, nǝ̃-ń tuu kusuugu ń ywar nǝ̃-gǝ, nǝ̃ gɩ̀ huum yo, mã́ ca ǹ nã ǹ-car. Ǹ ji ba ǹ ɲǝ̃gãr ǹ blaw nã, nǝ̃ wù-lǝ wú ba ǹ yuugɩ nã.»

17-18 Nã̀ã waa nǝ̃ bibiɛw wà: «Ǹ mãã ǹ nṹɔ̃́ ǹ-hã ǹ ciɛw, nã̀ã wuu tubikuu'n blɩrii mãã mǝ̃̀ yáá mã̀ã ɲǝ̃ǝ̃-n nǝ̃-dǝ, mǝ̃̀ piɛ mǝ̃̀ nãkrɔbɩblaagu hlɔ̃mmã nã yíi cɔ̃mmã nã-i. Huɔnɲã nǝ̃ hĩɛ̃bɩblaagɩ̀ ji ba gɩ̀ hlǝ hlɔ̃mmã nã. Ǹ ji ba ǹ val ǹ hla nǝ̃ ɲã̀ã́ mãã ɲã̀ pa ɲũũrũũ-i. Ǹ ji ba nǝ̃-ń ce ń ywar, nã̀ã da ǹ nũɔ̃'n wuuri, fuwɔ ǹ-ji ta ǹ-ga ku.

19 Ǹ ji ba nǝ̃-ń ce ń fuflɔ̃rũɔ̃, nã̀ã da ǹ nũɔ̃'n wuuri, fuwɔ ǹ-ji ver ǹ-ga jãn hlɔ̃mmã nã mãã ǹ hlǝ́rá mã̀ nã. Hlɔ̃m-i nǝ̃-n, ǹ ji ver gùú hlɔ̃mmã nã-i.»

20 Adɩmãẃ suu wù ciɛw wà Hawa, wà wɩ̀-i cuu taaba min ɲũw. (Sulammã nã, yir díɛ̀ dɩ̀ fɩrɩmmã-i wà nũmǝ̃nãsǝri.)

21 Fɩraa-Dũnnũẃ ce jerbɩganãã'n cãlũnɲã ǹ-dii ǹ-hã-ba.

22 Nã̀ã fǝ̃ǝ̃ ǹ-waa wà: «Ɲi díɛ́, curow mãã wù jáa ba hãmĩĩ tammã, ǹ-ba wù fǝ̃ǝ̃ diifɩnfaari ǹ-pyariɛ diibɩblaarɩ nã. Gɩ̀ sǝ̃n saa yí yaala wú jar nũmǝ̃nãsǝ'n tuu'n blɩri. Wu-ń wuu gɩ̀ blɩri, wù síì ku ǹ-da.»

23 Fɩraa-Dũnnũẃ ɲǝ̃ǝ̃ ǹ-hiil Adɩmãba nǝ̃ Hawaw Edɛ̃n nãnkuɔtuurɩ nã, wú maar ǹ-ga ba wù kɔ̃ hlɔ̃mmãã mãã wù híilá-yǝ mã̀ nã.

24 Wù gáa ɲǝ̃ǝ̃ ǹ-hiil-yǝ, wú kra mɛlɛgɛbaa mãã bà be-ba serɩbɛ̃, Edɛ̃n nãnkuɔtur'n bǝ̃ǝ̃'n pal'n yiɛgu, nǝ̃ dǝ̃ǝ̃m'n dãngunãw, wú ba wù yiilǝǝ wù cii nũmǝ̃nãsǝ'n tuu'n hlũũgɩ nã.