Cuu Dulli (Genèse) 2

Drɔkuɔli nǝ̃ ɲũũrũũgu, nǝ̃ ɲã̀ kusunãɲinɲã min ɲã̀ nǝ̃́ǝ̃lã́ ǹ-tã gùú tuugɩ-i.

2 Bãn nɩrhǝ̃ǝ̃lnã yuugu, Dũnnũẁ yáá wùu nǝ̃ǝ̃ ɲinɲã min ɲã́ tã ǹ-tã. Wù mããcemmã̀ mãã mã̀ yáá mã̀ã tã, wú fiisa gɩ̀-lǝ gɩ̀ yuugu.

3 Wù mãã wù yáá wùu nǝ̃ǝ̃ ɲinɲã min ɲã́ tã ǹ-tã bãn nɩrhǝ̃ǝ̃lnã yuugu, wú piɛ wù nãkrɔfɩnfaagu gɩ̀-lǝ gɩ̀ drɔ, nã̀ã hiil-gǝ gɩ̀ dǝ, gɩ́ ba wùú yuugu.

Edɛ̃n nãnkuɔtuuri

4 Drɔkuɔli nǝ̃ ɲũũrũũgɩ̀ nǝ̃́ǝ̃lã́ gùú tuugu, gɩ̀-i nnĩĩ: Fɩraa-Dũnnũẁ yáá wùu nǝ̃ǝ̃ ɲũũrũũgu nǝ̃ drɔkuɔli gùú yuuguu mãã,

5 tubikuu'n sáá dìɛ. Wù mãã wù sáá wùu ce duɔgɩ nɔ̃ sǝ ɲũũrũũgu, hĩɛ̃gu nǝ̃ tubikuu'n sáa gùu hlǝ sùɔ́ nã. Curo yo, wù sáá dìɛ wù ji kɔ̃ hlɔ̃mmã.

6 Hũmdaamã̀ yáá mã̀ hlǝ ɲũũrũũgu mã̀ sĩĩ hlɔ̃mmã.

7 Fɩraa-Dũnnũẃ tuu hlɔ̃mmã ɲũũrũũgu, ǹ-mã curow. Nã̀ã fǝ̃ǝ̃ ǹ-hulii wù nũmǝ̃nãsǝ'n saluugu ǹ-dii wù mĩɛ̃ga nã, curoẃ fǝ̃ǝ̃ ǹ-ba nũmǝ̃nãkuugu.

8 Gùú nã-i, Fɩraa-Dũnnũẃ so nãnkuɔturdarǝ Edɛ̃n bǝ̃ǝ̃'n pal'n yiɛgu. Nǝ̃ wù mãã wù mlã gùú curow mãã, wú kãã dii-yǝ gùú sùɔ́gu.

9 Fɩraa-Dũnnũẃ ce tubiɲinɲã hlǝ nãnkuɔtur díɛ́ nã, ɲã̀ã́ mãã ɲã̀ fa, nǝ̃ ɲã̀ bii yo, gá ba gà dwal wuumã nã. Nã̀ã fǝ̃ǝ̃ ǹ-so nũmǝ̃nãsǝ'n tubikuugu nãnkuɔtur'n sǝ̃ǝ̃gɩ nã, nǝ̃ tubikuuguu mãã gɩ̀ ce curow fǝ̃ǝ̃ diifɩnfaari ǹ-pyariɛ diibɩblaarɩ nã.

10 Lwaadaagɩ̀ yáá gɩ̀ hlǝ Edɛ̃ngɩ nã gɩ̀ ta nãnkuɔtur'n sǝ̃ǝ̃gɩ nã, ǹ-ba gɩ-ń ce gɩ́ ba gɩ̀ sĩĩ-dǝ. Gɩ̀ lwaagɩ̀ hlǝ́rá gɩ̀-lǝ gɩ̀ sùɔ́gɩ nã, gɩ́ kãã buruɔ tiɛmã nnǝ̃ǝ̃.

11-12 Bà yáá bà be lwaa'n nãkrɔdĩɛ̃lããgu wà Pisɔ̃. Gùú lwaaguu tíɛ́ ǹ-caliɛ Havilã yiɛgɩ nã. Sãnãfɩnfayǝw, nǝ̃ latɩkolow mãã bà be-yǝ bɩdǝlum, nǝ̃ bà mãã bà ce kɩɲǝ̃mbiiga nǝ̃ gùú tɩntãndii mãã, ɲã́ nǝ̃ gùú sùɔ́gɩ-i.

13 Bà yáá bà be lwaa'n nãkrɔnɲã hǝ̃ǝ̃lnãw wà Gihɔ̃, gɩ̀-lǝ gùú yáá gɩ̀ ta gɩ̀ caliɛ Kuusǝgɩ nã.

14 Lwaa'n nãkrɔnɲã siɛlnãw, bà yáá bà be gɩ̀-lǝ wà Tiigrɩ. Gùú yáá gɩ̀ ta Asirii yiɛ'n bǝ̃ǝ̃'n pal'n yiɛgu. Lwaa'n nãkrɔnɲã nnǝ̃ǝ̃nã wɩ̀-i Efratɩw.

15 Fɩraa-Dũnnũẃ tuu curow, ǹ-kãã kra-yǝ Edɛ̃n'n nãnkuɔtuurɩ nã, wú ba wù mǝ̃gaa-dǝ, nã̀ã ba wù cii dɩ̀ nã.

16 Nã̀ã fǝ̃ǝ̃ ǹ-waa nǝ̃ curow wà: «Ǹ ji gbǝ̃ǝ̃ ǹ-ba nǝ̃ wuu nãnkuɔtubiɲinɲã min biiga,

17 fuwɔ gùú tubikuuguu mãã nǝ̃-ń wuu-gǝ, ń ba ǹ fǝ̃ǝ̃ ǹ pyariɛ diifɩnfaari diibɩblaarɩ nã. Nǝ̃-ń wuu gɩ̀ blɩri gùú yuuguu mãã, dɩ̀ káaláa n ji ku.»

18 Fɩraa-Dũnnũẃ waa wà: «Gɩ̀ sáa saa bibiɛẃ ba nǝ̃ wù dɩn. Mǝ̃̀ ji ce pyannãtiiw mãã wùú tammã yà saa nǝ̃-yǝ, ǹ-hã-yǝ.»

19 Fɩraa-Dũnnũẁ yáá wùu tuu hlɔ̃mmã ǹ-mǝ̃gaa kwasǝnɲinɲã nǝ̃ drɔdiɛrnɲinɲã min. Gùú nã-i, wú jo nǝ̃-ɲã bibiɛw nãã, wu ji suu-ɲã nǝ̃ yiriɛgaa mãã bà ji ba bà be-ɲã nǝ̃-ga.

20 Bibiɛẃ suu suɔnbɩganããba min, drɔdiɛrnɲinɲã nǝ̃ jerbɩganããba min nǝ̃ yiriɛga. Nǝ̃ bà-lǝ bà sǝ̃ǝ̃nã, wù sáa da wù tuuntiiw mãã wù ji gbǝ̃ǝ̃ ǹ-pɛ wù-lǝ wù nã.

21 Gùú nã-i, Fɩraa-Dũnnũẃ dii duɔsǝgǝ̃ngãmdamã bibiɛw nã, nã̀ã fǝ̃ǝ̃ ǹ-hiil wù gbɩgamblɩri, nã̀ã suu gɩ̀ sùɔ́gu gɩ̀ tammã nã.

22 Fɩraa-Dũnnũẃ mǝ̃gaa cijalw nǝ̃ gbɩgamblɩ díɛ̀, ǹ-jo nǝ̃-yǝ bibiɛw nãã.

23 Bibiɛẁ jáa da-yǝ, wú waa wà: «Kuɔkuɔ-lǝ, mã́ã nãyo wɩ̀-i nnĩĩ! Wù hlǝ́rá mã́ã cãnkũɔ̃m nã-i, wù cãndɩ min, dɩ̀ hlǝ mã́ã-i. Wù mãã wù hlǝ́rá bibiɛw nã, mǝ̃̀ ji suu wù yiiri “cijal”.»

24 Gùú cíé, bibiɛẁ ji ba wu-ń ce wú pyar wù tǝw bá nǝ̃ wù ɲũw nã, ǹ-ga ɲǝ̃gãr wù ciɛw nã, bá ba sùɔ́gɩ dɩngu.

25 Bibiɛw, bá nǝ̃ wù ciɛw, bà yáá nǝ̃ turkwɛga, bà sáá bà fǝ̃ǝ̃ cir.