Cuu Dulli (Genèse) 1

Cuu dul'n sɛbɛw

Cuu nǝ̃ǝ̃m'n tammã

Dĩɛ̃lãmmã nã, Dũnnũẁ nǝ̃́ǝ̃lã́ drɔkuɔli nǝ̃ ɲũũrũũgu.

2 Hlɔ̃mmã̀ sáá mã̀ã tɩgɩnǝ̃ǝ̃, mããkwam yáá. Dudũũmã̀ yáá mã̀ã suu hũnnumdamã nã, nǝ̃ Dũnnũ yurummã́ ba mã̀ waaraa hũm'n yuugɩ nã.

3 Dũnnũẃ fǝ̃ǝ̃ ǹ-waa wà: «Gbɩgbaamã́ hlǝ!» Gbɩgbaamã́ fǝ̃ǝ̃ ǹ-hlǝ.

4 Wú da wà gbɩgbaamã sáalá, wú buruɔ dudũũmã gbɩgbaamã nã.

5 Dũnnũẃ suu gbɩgbaam'n yiiri «bǝ̃ǝ̃nã», nã̀ã suu dudũũm'n yiirii «yisuɔ». Bǝ̃ǝ̃gɩ́ tã, taagá kaal, gùú cíé yudĩɛ̃lããgu.

6 Dũnnũẃ waa wà: «Sɔhlaagɩ́ jãn ǹ-buruɔ hũmmã nã tiɛmã hǝ̃ǝ̃lmã.»

7 Wú ce gɩ̀ sɔhlaagu, ǹ-buruɔ drɔhũmmã taara hũmmã nã. Dɩ́ ce nĩĩgu.

8 Wú suu sɔhlaa'n yiiri wà «drɔkuɔl». Bǝ̃ǝ̃gɩ́ tã, taagá kaal, gùú cíé bãnɲã hǝ̃ǝ̃lnãw.

9 Dũnnũẃ waa hlo wà: «Hũmmãã mãã drɔkuɔl'n taaragu, mã́ tɩgii sùɔ́gɩ dɩngu, nǝ̃ ɲũũrũũkuɔlɩ́ hillaa.» Dɩ́ ce nĩĩgu.

10 Wú suu ɲũũrũũkuɔl'n yiiri wà «hlɔ̃m», nã̀ã suu hũmpir'n yiiri wà «lwaakɩnkan». Wú da wà gɩ sáalá.

11 Wú fǝ̃ǝ̃ ǹ-waa wà: «Hĩɛ̃gu nǝ̃ dũmmãã mãã mã̀ ŋmǝ̃ǝ̃ dudusǝ'n biiga, nǝ̃ tubiɲinɲãã mãã ɲã̀ ŋmǝ̃ǝ̃ kuɔya'n biiga, ɲã̀ min nǝ̃ ɲã̀ plaaga, ɲã́ pa ɲũũrũũgu.» Dɩ́ ce nĩĩgu.

12 Gùú hĩɛ̃gu, nǝ̃ gùú dũmmãã mãã mã̀ pla ɲũũrũũgu, ɲã́ ŋmǝ̃ǝ̃ ɲã̀ dudusǝri, ɲã̀ min nǝ̃ ɲã̀ plaaga. Tubiɲin yo, ɲã́ ŋmǝ̃ǝ̃ biigaa mãã nǝ̃ kuɔyaga, ɲã̀ min nǝ̃ ɲã̀ plaaga. Dũnnũẃ da wà gɩ̀ sáalá.

13 Bǝ̃ǝ̃gɩ́ tã, taagá kaal, gùú cíé bãnɲã siɛlnãw.

14 Dũnnũẃ waa hlo wà: «Gbɩgbaam'n ɲinɲã́ pa drɔkuɔlɩ nã, ǹ-buruɔ bǝ̃ǝ̃nãgu yisuɔgɩ nã. Ɲã́ ba ɲã̀ pɩgaa bãnɲã, yunɲã nǝ̃ biiga.

15 Ɲã́ ba drɔkuɔlɩ nã, nã̀ã ba ɲã̀ hiil gbɩgbaamã ɲũũrũũgɩ min nã.» Dɩ́ fǝ̃ǝ̃ ǹ-ce nĩĩgu.

16 Dũnnũẃ ce gɩ̀ gbɩgbaam'n ɲinɲã hǝ̃ǝ̃lɲã, guugǝ̃ngããgɩ́ ba bǝ̃ǝ̃nã yuugɩ nã, guusaalaagɩ́ ba yisuɔ'n yuugɩ nã, nã̀ã fǝ̃ǝ̃ ǹ-ce ŋmĩɛ̃ yo.

17 Wú kra-ɲã drɔkuɔlɩ nã, ɲã́ ba ɲã̀ hiil gbɩgbaamã ɲũũrũũgu,

18 ɲã́ ba bǝ̃ǝ̃nãgu nǝ̃ yisuɔ'n yuugɩ nã, nã̀ã buruɔ gbɩgbaamã dudũũmã nã. Wú da wà gɩ sáalá.

19 Bǝ̃ǝ̃gɩ́ tã, taagá kaal, gùú cíé bãnɲã nnǝ̃ǝ̃nãw.

20 Dũnnũẃ fǝ̃ǝ̃ ǹ-waa wà: «Nũmǝ̃nãɲincin ɲã́ ba hũmmã nã, nǝ̃ diɛrnɲinɲã́ ba ɲã̀ yuu drɔgu.»

21 Wú nǝ̃ǝ̃ hũm'n kusunã ɲããgǝ̃ngãnɲã nǝ̃ nũmǝ̃nãɲinɲã piyɛ̃ nǝ̃ ɲã̀ plaaga, ɲã́ ba ɲã̀ sɔ ɲã̀ waaraa hũmmã kusunã. Nã̀ã nǝ̃ǝ̃ diɛrnɲin'n plaaga min. Wú da wà gɩ sáalá.

22 Wú piɛ wù nãkrɔfɩnfaagu ɲã̀ drɔ, nã̀ã waa nǝ̃-ɲã wà: «Húulà biiba ɲí ɲũrũɔ̃ ɲí yu hũmmã, diɛrnɲin yo, ɲã́ ɲũrũɔ̃ cuu nã.»

23 Bǝ̃ǝ̃gɩ́ tã, taagá kaal, gùú cíé bãnɲã ndiinãw.

24 Dũnnũẃ waa hlo wà: «Hlɔ̃mmã́ hiil nũmǝ̃nãɲinɲã nǝ̃ ɲã̀ plaaga: suɔnbɩganããba, baafuulǝbaba nǝ̃ jerbɩganããba, bà min nǝ̃ bà plaaga.» Dɩ́ fǝ̃ǝ̃ ǹ-ce nĩĩgu.

25 Wú ce jerbɩganããba nǝ̃ bà plaaga, suɔnbɩganããba nǝ̃ bà plaaga, baafuulǝbaba nǝ̃ bà plaaga. Wú da wà gɩ sáalá.

Curo'n blɩ'n nǝ̃ǝ̃mã

26 Wú fǝ̃ǝ̃ ǹ-waa wà: «Yáà yí nǝ̃ǝ̃ curow nǝ̃ yì yurummã, wú ba hãmĩĩ tammã, wú ba hũm'n tɩtraa'n yuugɩ nã, drɔdiɛrnɲin'n yuugɩ nã, suɔnbɩganãã'n yuugɩ nã, hlɔ̃mmã min yuugɩ nã, nã̀ã ba ɲũũrũũbaafuulǝbaba min yuugɩ nã.»

27 Dũnnũẃ nǝ̃ǝ̃ curow nǝ̃ wù hla'n yurummã, ǹ-ce-yǝ wà wú ba wùú tammã, nã̀ã ce-ba bibiɛ nǝ̃ cijal.

28 Wú piɛ wù nãkrɔfɩnfaagu bà drɔ, nã̀ã waa nǝ̃-ba wà: «Húulà tãnkuuraaba piyɛ̃ ɲí yu cuuw, ɲí ba wù yuuntiiw, ɲí ba hũm'n tɩtraaba, drɔdiɛrnɲinɲã, nǝ̃ ɲũũrũũnũmǝ̃nãɲinɲã min yuugɩ nã.»

29 Nã̀ã waa nǝ̃-ba wà: «Ɲi díɛ́, mǝ̃̀ hlã-ɲã́ã̀ nǝ̃ dũmmã nǝ̃ tubiɲinɲãã mãã ɲã̀ ŋmǝ̃ǝ̃ biiga, ɲã̀ã́ ji ba ɲã̀ wuuri.

30 Nǝ̃ ɲũũrũũkwasǝnɲin-lǝ, nǝ̃ drɔdiɛrnɲinɲã, nǝ̃ ɲũũrũũbaafuulǝbaba, nǝ̃ nũmǝ̃nãɲinɲã min mǝ̃̀ ji hã-ɲã nǝ̃ hĩɛ̃birĩɛ̃gu, gɩ́ ba ɲã̀ wuuri.» Dɩ́ ce nĩĩgu.

31 Dũnnũẃ ne wù nǝ̃́ǝ̃lã́ gùú ɲinɲã, wú waa wà ɲã̀ min ɲã sáalá ǹ-car. Bǝ̃ǝ̃gɩ́ tã, taagá kaal, gùú cíé bãn nãndiennãw.