پولسینگ نامه‌سی رومیلارا
سالاملار
۱
عیسی مسیحینگ خیدماتکَری و رِسولّیغا چاغیریلیپ، خودایینگ خوش خابارینی واغیظ اِتمَگه سایلانان مِن پولسدِن دُغایی سالام!
۲ خودای مُقادِّس یازغیلاردا اُز پیغامبارلارینینگ اوستو بیلِن بو خوش خاباری واعدا بِردی.
۳ بو خوش خابار خودایینگ اُغلی عیسی مسیح بارادادیر. اُل اینسان طِبیغاتینا گُرَه داوودینگ نِسلیندِندی.
۴ خودای تانگریمیز عیسی مسیحی اُلومدِن دیرِلدیپ، اُنی مُقادِّس روحدان دُلدوردی و شِیدیپ، اُنونگ خودایینگ قودراتلی اُغلودیغی تاصدیقلاندی.
۵ خودای بیزه عیسی مسیحینگ اوستو بیلِن مِرحِمِت اِدیپ، رِسولّیغا سایلادی. اُل مونی هِمّه میلِّتلِرینگ خودایا ایمان گِتیریپ، اُنگا موطیع بُلماغی، عیسی مسیحینگ آدینینگ بِییکلِنمِگی اوچین اِتدی.
۶ سیز هِم عیسی مسیحه باغلی بُلماغا چاغیریلان شُل میلِّتلِرینگ آراسینداسینگیز.
۷ مِن شو نامه‌می سیزه رومداقی ایماندارلارا یازیارین. خودای سیزینگ هِمَّه‌نگیزی سُیوپ، سیزی اُزونینگ خالقی بُلماغا چاغیردی. قُی، آتامیز خودایینگ و تانگریمیز عیسی مسیحینگ مِرحِمِتی و پاراحاتلیغی سیزه بُلسون!
پولس رومداقی ایماندارلاری گُرمِگی کویسِیَر
۸ اَوَّل، عیسی مسیحینگ اوستو بیلِن هِمَّه‌نگیز اوچین خوداییما شوکور اِدیَرین، سِبَبی ایمانینگیز باراداقی خابار تامام دونیَه یایرادی.
۹ مِن خودایینگ اُغلی باراداقی خوش خاباری یایرادیپ، خودایا جان-تِندِن خیدمات اِدیَرین، سیزینگ اوچین گیجه-گوندیز دُغا اِدیَرین. مونگا خودایینگ اِدیل اُزی شاهاتدیر.
۱۰ خودایینگ ایسلِگینه گُرَه سیزینگ یانینگیزا باسیم باریپ بیلِر یالی، اُندان بیر یُل آچماغینی دُغالاریمدا هِمیشه سُرایارین.
۱۱ سیزی خاص گُرِسیم گِلیَر، ایمانینگیزی قاییملاجاق روحانی ناغماتلاری سیزینگ بیلِن پایلاشاسیم گِلیَر.
۱۲ مِن ایمانیمیزینگ اوستو بیلِن بیری-بیریمیزدِن تِسِلّی آلماغمیزی ایسلِیَرین.
۱۳ اِی عزیزلِر، شونی بیلمِگینگیزی ایسلِیَرین: مِن بِیلِکی میلِّتلِرینگ آراسیندا بُلشی یالی، سیزینگ هِم آرانگیزداقی خیدماتیمینگ حاصیلینی گُرِسیم گِلدی. شُنگا گُرَه-ده، یانینگیزا بارجاق بُلوپ، بیرنَچه گِزِک نییِتلِشدیم، اِمّا هِر گِزِک بیر پَسگِلچیلیک بُلدی.
۱۴ مِن مِدِنییِتلی یا-دا مِدِنییِتسیز، سُوادلی یا-دا سُوادسیز آداملارا قاراز، هِمّه‌لِره خوش خاباری واغیظ اِتمَگه بِرگیلیدیرین.
۱۵ شُنونگ اوچین-ده، سیزه، رومداقیلارا هِم خوش خاباری واغیظ اِتمِگی کویسِیَرین.
۱۶ مِن خوش خاباردان اوتانمایارین، سِبَبی اُل خودایینگ گویجودیر. خودای بو خوش خابارینگ اوستو بیلِن هِر بیر ایمان گِتیرِنی: اَوَّل یَهودیلِری، سُنگرا یَهودی دَل‍لِری نِجات بِریَر.
۱۷ خوش خابار خودایینگ آداملاری نَدیپ تاقوالی حاساپلایاندیغینی آیان اِدیَر. اُل ایمان گِتیریَنلِری، هاووا، دینگه ایمان گِتیریَنلِری آقلایار. چونکی مُقادِّس یازغیلاردا: «تاقوالی آدام ایمان بیلِن یاشار» دییّپ یازیلاندیر.*
خودایینگ قاهار-غاضابی
۱۸ یامانلیقلاری بیلِن حاقیقاتی پَسگِل بِریَن آداملارینگ خودایسیزلیغینا و یامانلیغینا قارشی خودای اُز قاهار-غاضابینی آسماندان آیان اِدیَر.
۱۹ بو آداملارا خودای بارادا بیلیپ بُلیان زاتلار معلیمدیر، سِبَبی خودایینگ اُزی بولاری اُلارا مِسه-معلیم اِتدی.
۲۰ خودایینگ گُزه گُرونمِیَن صیفاتلاری، یَعنی اِبِدی قودراتی و حاق خودایدیغی دونیَه بِجِرلِندِن بَری اُنونگ یارادان زاتلاریندان مِسه-معلیم گُرونیَندیر. شُنگا گُرَه-ده، آداملارینگ: «خودای بارادا بیلمِیَریس» دییمَگه هیچ باهاناسی یُقدور.
۲۱ اُلار خودای بارادا بیلسِلِر-ده، اُنی خودای حُکمونده بِییکلِندیرمِدیلِر، اُنگا شوکور اِتمِدیلِر. تِرسینه، بُش فیکرلِره قُشولیپ یورِکلِرینی قارانگقیلیق دُلدوردی.
۲۲ اُلار اُزلِرینی عاقیلّی حاساپلاپ، آحماق بُلدولار،
۲۳ باقی خودایا عیبادات اِتمَن، فانی آداملارینگ، قوشلارینگ، حایوانلارینگ و خازاندالارینگ صوراتینداقی بُتلارا عیبادات اِتدیلِر.
۲۴ شُنونگ اوچین خودای اُلاری یورِکلِرینینگ گونَه‌لی هُوِسلِرینینگ اِدِن-اِتمیشلِرینه تابشیردی. شو سِبَپدِن اُلار بیری-بیرینینگ بِدِنلِرینی آبرایسیز ایشلِری بیلِن بیحُرمات اِتدیلِر.
۲۵ اُلار خودای باراداقی حاقیقاتی یالان زاتلار بیلِن چالیشدیلار. یارادانا دَل-ده، یارادیلان زاتلارا عیبادات و خیدمات اِتدیلِر. اِمّا اِبِدی بِییکلیک دینگه یارادانا میناسیپدیر. اَمین!
۲۶ هاووا، اُلار حاقیقاتی رِد اِدِنسُنگلار، خودای اُلاری اُزلِرینینگ اوتانچلی هُوِسلِرینه تابشیردی. حتّیٰ آیال‍لاری هِم طِبیغی قاتناشیغینی رِد اِتدیلِر. اُلار طِبیغی بُلمادیق قاتناشیقلارا یوز اوروپ، بیری-بیرلِری بیلِن یاتیپ توردیلار.
۲۷ شُنونگ یالی، اِرکِکلِر هِم آیال بیلِن طِبیغی قاتناشیغینی تِرک اِدیپ، بیری-بیرینه بُلان هُوِس اُدینا یاندیلار. اِرکِکلِر اِرکِکلِر بیلِن رُسوالیق ایشلِری اِدیپ، اُز تاقصیرلارینا لاییق جِزا آلدیلار.
۲۸ بو آداملار خودایی تانیمالیدیر دییّپ اَهمییِت بِرمِدیلِر. شُنگا گُرَه-ده، خودای اُلاری آخلاقسیز فیکرلِرینه تابشیریپ، اِدیلمِسیز زاتلاری اِتمِکلِرینه یُل بِردی.
۲۹ اُلارینگ قالبی هِر هیلی یامانلیقدان، تِلِکه‌لیکدِن، آچگُزلیکدِن و آخلاقسیزلیقدان دُلیدیر. اُلار باخیل، قاتل، داعواچی، آلدییانچی و بِدنییِتدیر. اُلار کِپچی،
۳۰ تُهمِتچی، خودایی ییگرِنیَرلِر، مَغرور، قابارجانگ بُلوپ و اُزونی اُویَنلِر، یامانلیق اِتمِگینگ هِر هیلی یُل‍لارینی تاپیارلار، اِنه-آتالارینا قولاق آسمایارلار.
۳۱ اُلار دوشومسیز، بیوِفا، شِپاقاتسیز و رِحمسیزدیر.
۳۲ اُلار خودایینگ عادالاتلی حُکمونه گُرَه شِیله ایشلِری اِدیَنلِرینگ اُلومه سِزاواردیغینی بیلسِلِر-ده، اُز اِدیَن ایشلِرینده اُوه گیدیَرلِر. مونونگ بیلِن قاناغات اِتمَن، باشغالارینگ هِم شِیله اِتمِگینی دُغری بیلیَرلِر.